2 ກະສັດ 6 - ພຣະຄຳພີສັກສິເອລີຊາເຮັດໃຫ້ຂວານຕົກນໍ້າຟູ 1 ມີມື້ໜຶ່ງ ພວກຜູ້ທຳນວາຍທີ່ຢູ່ພາຍໃຕ້ການດູແລຂອງເອລີຊາ ໄດ້ຈົ່ມຕໍ່ເພິ່ນວ່າ, “ບ່ອນທີ່ພວກເຮົາຢູ່ນີ້ນ້ອຍໂພດ 2 ຈົ່ງອະນຸຍາດໃຫ້ພວກເຮົາໄປຕັດໄມ້ທີ່ແຄມຝັ່ງແມ່ນໍ້າຈໍແດນ ເພື່ອວ່າພວກເຮົາຈະໄດ້ສ້າງບ່ອນຢູ່ອາໄສໃໝ່.” ເພິ່ນຕອບວ່າ, “ຈົ່ງໄປສາ.” 3 ຜູ້ໜຶ່ງໃນພວກເຂົາຂໍຮ້ອງໃຫ້ເພິ່ນໄປນຳ; ເພິ່ນກໍຕົກລົງ. 4 ດັ່ງນັ້ນ ເພິ່ນຈຶ່ງໄປກັບພວກເຂົາ. ເມື່ອມາຮອດແຄມຝັ່ງແມ່ນໍ້າຈໍແດນແລ້ວ ພວກເຂົາຕ່າງກໍລົງມືເຮັດວຽກ. 5 ຂະນະທີ່ຄົນໜຶ່ງໃນພວກເຂົາກຳລັງຕັດໄມ້ຢູ່ນັ້ນ ຫົວຂວານເຫຼັກຂອງລາວກໍຫລ່ອນຕົກລົງໄປໃນນໍ້າ. ລາວຈຶ່ງຂື້ນວ່າ, “ນາຍເອີຍ ຂ້ານ້ອຍຈະເຮັດຢ່າງໃດ ມັນເປັນຂວານທີ່ຢືມມາຊໍ້າ.” 6 ຄົນຂອງພຣະເຈົ້າຖາມວ່າ, “ມັນຕົກຢູ່ບ່ອນໃດ?” ຊາຍຄົນນັ້ນໄດ້ຊີ້ໃຫ້ເພິ່ນເບິ່ງບ່ອນຫົວຂວານຕົກ, ແລ້ວເພິ່ນກໍຕັດເອົາໄມ້ທ່ອນໜຶ່ງຖິ້ມລົງໄປໃນນໍ້າ ແລະເຮັດໃຫ້ຫົວຂວານນັ້ນຟູຂຶ້ນມາ. 7 ເພິ່ນສັ່ງວ່າ, “ຈັບເອົາຂຶ້ນມາ.” ແລະຊາຍຄົນນັ້ນກໍຢື້ມືລົງໄປ ແລະຈັບເອົາຫົວຂວານຂຶ້ນມາ. ກອງທັບຊີເຣຍພ່າຍແພ້ 8 ຕໍ່ມາ ກະສັດແຫ່ງຊີເຣຍໄດ້ເຮັດເສິກຕໍ່ສູ້ອານາຈັກອິດສະຣາເອນ. ເພິ່ນໄດ້ປະຊຸມກັບພວກຂ້າຣາຊການຂອງເພິ່ນ ແລະເລືອກເອົາບ່ອນໜຶ່ງເປັນບ່ອນຕັ້ງຄ້າຍ. 9 ແຕ່ຄົນຂອງພຣະເຈົ້າໄດ້ສົ່ງຖ້ອຍຄຳໄປບອກກະສັດແຫ່ງອິດສະຣາເອນ ເພື່ອເຕືອນເພິ່ນບໍ່ໃຫ້ໄປໃກ້ບ່ອນນັ້ນ ເພາະພວກຊີເຣຍໄດ້ຄອຍຖ້າດັກໂຈມຕີຢູ່ທີ່ນັ້ນ. 10 ດັ່ງນັ້ນ ກະສັດແຫ່ງອິດສະຣາເອນຈຶ່ງໄດ້ສົ່ງຖ້ອຍຄຳທີ່ຄົນຂອງພຣະເຈົ້າບອກໄປຫາທະຫານ ທີ່ຢູ່ໃນບ່ອນນັ້ນໃຫ້ລະມັດລະວັງຕົວ. ເຫດການຢ່າງນີ້ໄດ້ເກີດຂຶ້ນຫລາຍຄັ້ງຫລາຍຄາວ. 11 ກະສັດແຫ່ງຊີເຣຍເສຍໃຈຫຼາຍໃນເລື່ອງນີ້; ເພິ່ນຈຶ່ງໄດ້ເອີ້ນພວກນາຍທະຫານຂອງເພິ່ນມາຖາມວ່າ, “ມີໃຜແດ່ໃນພວກເຈົ້າ ທີ່ເຂົ້າຂ້າງກະສັດແຫ່ງອິດສະຣາເອນ?” 12 ນາຍທະຫານຄົນໜຶ່ງຕອບຂຶ້ນວ່າ, “ຂ້າແດ່ພະຣາຊາ ບໍ່ມີໃຜດອກ. ແມ່ນຜູ້ທຳນວາຍເອລີຊາແຫ່ງອິດສະຣາເອນ ຜູ້ໄດ້ບອກກະສັດແຫ່ງອິດສະຣາເອນ ເຖິງຄຳເວົ້າທີ່ທ່ານໄດ້ເວົ້າເປັນທາງສ່ວນຕົວ ແມ່ນແຕ່ໃນຫ້ອງນອນຂອງທ່ານ.” 13 ກະສັດສັ່ງວ່າ, “ຈົ່ງຊອກຫາວ່າລາວຢູ່ໃສ? ແລະເຮົາຈະໃຊ້ຄົນໄປຈັບລາວ.” ເມື່ອມີຄົນມາບອກເພິ່ນວ່າ ເພິ່ນຢູ່ທີ່ເມືອງໂດທານ 14 ດັ່ງນັ້ນ ເພິ່ນຈຶ່ງສົ່ງກອງທັບໃຫຍ່ໄປທີ່ນັ້ນພ້ອມທັງຝູງມ້າ ແລະລົດຮົບ. ພວກເຂົາໄປຮອດຕົວເມືອງໃນເວລາກາງຄືນ ແລະອ້ອມເມືອງໄວ້. 15 ມື້ຕໍ່ມາ ຄົນຮັບໃຊ້ຄົນຂອງພຣະເຈົ້າໄດ້ລຸກຂຶ້ນແຕ່ເຊົ້າໆ ແລະອອກໄປທາງນອກເຮືອນ ລາວຈຶ່ງເຫັນກຳລັງທະຫານຂອງຊີເຣຍ ພ້ອມດ້ວຍຝູງມ້າ ແລະລົດຮົບອ້ອມເມືອງຢູ່. ລາວຟ້າວກັບຄືນໄປຫາເອລີຊາ ແລະຮ້ອງຂຶ້ນວ່າ, “ນາຍເອີຍ ຕາຍແລ້ວບັດນີ້ ພວກເຮົາຈະເຮັດຢ່າງໃດ?” 16 ເພິ່ນຕອບວ່າ, “ບໍ່ຕ້ອງຢ້ານ ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ.” 17 ແລ້ວເອລີຊາກໍພາວັນນາອະທິຖານວ່າ, “ຂ້າແດ່ພຣະເຈົ້າຢາເວ ຂໍພຣະອົງເປີດຕາຄົນຮັບໃຊ້ຂອງຂ້ານ້ອຍຄົນນີ້ ໃຫ້ເຫັນກຳລັງຝ່າຍເຮົາແດ່ທ້ອນ.” ພຣະເຈົ້າຢາເວຕອບຄຳພາວັນນາອະທິຖານຂອງເອລີຊາ. ເມື່ອຄົນຮັບໃຊ້ຂອງເພິ່ນຫລຽວຂຶ້ນໄປທີ່ເທິງພູ ລາວກໍເຫັນຝູງມ້າ ແລະລົດຮົບເປັນໄຟຢູ່ອ້ອມລ້ອມເອລີຊາ. 18 ເມື່ອພວກຊີເຣຍເຂົ້າໂຈມຕີ ເອລີຊາກໍພາວັນນາອະທິຖານຕໍ່ພຣະເຈົ້າຢາເວວ່າ, “ຂໍພຣະອົງເຮັດໃຫ້ພວກທະຫານເຫຼົ່ານີ້ຕາບອດສາ.” ພຣະອົງຕອບຄຳພາວັນນາອະທິຖານຂອງເພິ່ນ ແລະເຮັດໃຫ້ພວກເຂົາຕາບອດ. 19 ແລ້ວເອລີຊາກໍໄປຫາພວກເຂົາ ແລະເວົ້າວ່າ, “ພວກເຈົ້າມາຜິດທາງ; ນີ້ບໍ່ແມ່ນເມືອງທີ່ພວກເຈົ້າກຳລັງຊອກຫາ. ຈົ່ງຕາມຂ້ອຍມາ ຂ້ອຍຈະນຳພວກເຈົ້າໄປຫາຊາຍທີ່ພວກເຈົ້າກຳລັງຊອກຫານັ້ນ.” ແລ້ວເພິ່ນກໍນຳພວກເຂົາໄປທີ່ນະຄອນຊາມາເຣຍ. 20 ພໍພວກເຂົາເຂົ້າໄປໃນນະຄອນຊາມາເຣຍ ເອລີຊາຈຶ່ງພາວັນນາອະທິຖານວ່າ, “ຂ້າແດ່ພຣະເຈົ້າຢາເວ ຂໍພຣະອົງເປີດຕາພວກເຂົາໃຫ້ເຫັນເທີ້ນ.” ພຣະເຈົ້າຢາເວໄດ້ຕອບຄຳພາວັນນາອະທິຖານຂອງເພິ່ນ; ພຣະອົງໃຫ້ພວກເຂົາເຫັນຮຸ່ງ ແລະພວກເຂົາຈຶ່ງເຫັນວ່າພວກຕົນພວມຢູ່ໃນນະຄອນຊາມາເຣຍ. 21 ເມື່ອກະສັດແຫ່ງອິດສະຣາເອນເຫັນພວກຊີເຣຍ ເພິ່ນຈຶ່ງຖາມເອລີຊາວ່າ, “ພໍ່ເອີຍ ໃຫ້ເຮົາຂ້າພວກເຂົາບໍ? ໃຫ້ເຮົາຂ້າພວກເຂົາບໍ?” 22 ເພິ່ນຕອບວ່າ, “ບໍ່ ແມ່ນແຕ່ທະຫານທີ່ທ່ານຈັບໄດ້ໃນສະໜາມຮົບກໍຢ່າຂ້າພວກເຂົາ. ຈົ່ງຫາອາຫານແລະນໍ້າ ໃຫ້ພວກເຂົາກິນແລະດື່ມ ແລະປ່ອຍໃຫ້ພວກເຂົາກັບຄືນເມືອຫາກະສັດຂອງພວກເຂົາ.” 23 ດັ່ງນັ້ນ ກະສັດອິດສະຣາເອນຈຶ່ງໄດ້ຈັດຫາອາຫານລ້ຽງພວກເຂົາຢ່າງໃຫຍ່ໂຕ; ຫລັງຈາກພວກເຂົາກິນແລະດື່ມແລ້ວ, ກະສັດກໍສົ່ງພວກເຂົາກັບຄືນເມືອຫາກະສັດແຫ່ງຊີເຣຍ. ນັບຕັ້ງແຕ່ນັ້ນມາ ຊາວຊີເຣຍກໍຢຸດໂຈມຕີດິນແດນອິດສະຣາເອນ. ການປິດລ້ອມນະຄອນຊາມາເຣຍ 24 ຕໍ່ມາ ກະສັດເບັນຮາດາດແຫ່ງຊີເຣຍໄດ້ນຳເອົາກອງທັບທັງໝົດຂອງເພິ່ນ ໄປຕໍ່ສູ້ອານາຈັກອິດສະຣາເອນແລະອ້ອມນະຄອນຊາມາເຣຍໄວ້. 25 ການປິດລ້ອມເມືອງໃນຄັ້ງນີ້ເປັນເຫດໃຫ້ຕົວເມືອງ ເກີດການຂາດແຄນອາຫານເປັນຢ່າງໜັກ ຈົນວ່າຫົວລໍໂຕໜຶ່ງມີລາຄາແປດສິບຫລຽນເງິນ ແລະຂີ້ນົກກາງແກ ສອງຮ້ອຍກຼາມ ມີລາຄາຫ້າຫລຽນເງິນ. 26 ມື້ໜຶ່ງ ກະສັດແຫ່ງອິດສະຣາເອນກຳລັງຍ່າງລຽບຕາມກຳແພງເມືອງ. ແລ້ວກໍມີຍິງຄົນໜຶ່ງຮ້ອງໃສ່ເພິ່ນວ່າ, “ຂ້າແດ່ພະຣາຊາ ກະລຸນາຊ່ວຍຂ້ານ້ອຍແດ່ທ້ອນ.” 27 ກະສັດຕອບວ່າ, “ຖ້າພຣະເຈົ້າຢາເວບໍ່ຊ່ວຍເຈົ້າແລ້ວ ເຮົາຈະຊ່ວຍເຈົ້າໄດ້ຢ່າງໃດ? ເຮົາມີເຂົ້າ ຫລືເຫຼົ້າອະງຸ່ນຊັ້ນບໍ? 28 ເຈົ້າມີຄວາມເດືອດຮ້ອນຫຍັງ?” ນາງຕອບວ່າ, “ມື້ກ່ອນນັ້ນ ຍິງຄົນນີ້ສະເໜີວ່າໃຫ້ກິນລູກຂອງຂ້ານ້ອຍກ່ອນ ແລ້ວໃນມື້ຕໍ່ໄປຈຶ່ງກິນລູກຂອງນາງ. 29 ດັ່ງນັ້ນ ພວກເຮົາຈຶ່ງໄດ້ເອົາລູກຊາຍຂອງຂ້ານ້ອຍມາຈັດແຈ່ງເປັນອາຫານ. ໃນມື້ຕໍ່ມາ ຂ້ານ້ອຍບອກລາວວ່າ, ‘ພວກເຮົາຕ້ອງກິນລູກຊາຍຂອງເຈົ້າ’ ແຕ່ນາງໄດ້ເຊື່ອງລູກຊາຍນັ້ນໄວ້.” 30 ເມື່ອໄດ້ຍິນດັ່ງນັ້ນ ກະສັດຈຶ່ງຈີກເຄື່ອງນຸ່ງຂອງຕົນດ້ວຍຄວາມທຸກໃຈ ແລະປະຊາຊົນທີ່ຢູ່ຕາມກຳແພງກໍໄດ້ເຫັນເພິ່ນນຸ່ງເຄື່ອງທີ່ເຮັດດ້ວຍຜ້າກະສອບເຂົ້າ ຊ້ອນໄວ້ທາງໃນເຄື່ອງນຸ່ງຂອງເພິ່ນ. 31 ເພິ່ນຮ້ອງຂຶ້ນວ່າ, “ຖ້າເອລີຊາບໍ່ຖືກຕັດຫົວກ່ອນວັນນີ້ໝົດໄປ ກໍຂໍໃຫ້ພຣະເຈົ້າປະຫານຊີວິດຂອງຂ້ານ້ອຍເສຍເຖີດ.” 32 ແລ້ວເພິ່ນກໍໃຊ້ຄົນໄປນຳເອົາເອລີຊາ. ໃນຂະນະດຽວກັນນັ້ນ ເອລີຊາກຳລັງນັ່ງຢູ່ໃນເຮືອນກັບບັນດາເຖົ້າແກ່ບາງຄົນ ທີ່ໄດ້ມາຢ້ຽມຢາມເພິ່ນ. ກ່ອນທີ່ຄົນຂອງກະສັດມາຮອດ ເອລີຊາເວົ້າກັບບັນດາເຖົ້າແກ່ວ່າ, “ຄາດຕະກອນຄົນນັ້ນກຳລັງສົ່ງຄົນມາສັງຫານຂ້າພະເຈົ້າ ເມື່ອລາວມາຮອດທີ່ນີ້ແລ້ວໃຫ້ອັດປະຕູໄວ້ ຢ່າໃຫ້ລາວເຂົ້າມາ. ສ່ວນກະສັດເອງຈະຕາມຄົນນີ້ມານຳຫລັງ.” 33 ເອລີຊາເວົ້າຍັງບໍ່ທັນຈົບ, ກະສັດ ກໍມາຮອດ ແລະກ່າວວ່າ, “ແມ່ນພຣະເຈົ້າຢາເວທີ່ໄດ້ນຳເອົາຄວາມເດືອດຮ້ອນນີ້ມາສູ່ພວກເຮົາ. ເຫດໃດຂ້າພະເຈົ້າຈຶ່ງຈະລໍຖ້າພຣະເຈົ້າຢາເວໃຫ້ດຳເນີນການຢ່າງໃດຢ່າງໜຶ່ງ?” |
@ 2012 United Bible Societies. All Rights Reserved.