2 ກະສັດ 3 - ພຣະຄຳພີສັກສິເສິກລະຫວ່າງອິດສະຣາເອນແລະໂມອາບ 1 ໃນຣາຊການປີທີສິບແປດ ຂອງເຈົ້າເຢໂຮຊາຟັດກະສັດແຫ່ງຢູດາຍ ໂຢຣາມລູກຊາຍອາຮາບໄດ້ຂຶ້ນເປັນກະສັດແຫ່ງອິດສະຣາເອນ ເພິ່ນໄດ້ປົກຄອງຢູ່ທີ່ນະຄອນຊາມາເຣຍເປັນເວລາສິບສອງປີ. 2 ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ແຕ່ຍັງບໍ່ຮ້າຍແຮງເທົ່າກັບພໍ່ຂອງເພິ່ນ ຫລືນາງເຢເຊເບນແມ່ຂອງເພິ່ນ; ເພິ່ນໄດ້ຮື້ຖອນຮູບພະບາອານທີ່ພໍ່ຂອງເພິ່ນໄດ້ສ້າງສຳລັບຂາບໄຫວ້. 3 ແຕ່ໂຢຣາມໄດ້ພາຊາວອິດສະຣາເອນເຮັດບາບຢ່າງບໍ່ຢຸດຢັ້ງ ຢ່າງດຽວກັບກະສັດເຢໂຣໂບອາມລູກຊາຍຂອງເນບັດ ກະສັດທີ່ປົກຄອງກ່ອນເພິ່ນ. 4 ກະສັດເມຊາແຫ່ງໂມອາບໄດ້ລ້ຽງແກະໄວ້ຢ່າງຫລວງຫລາຍ; ແລະທຸກປີໃດ ເພິ່ນໄດ້ເສຍສ່ວຍໃຫ້ກະສັດແຫ່ງອິດສະຣາເອນ ລູກແກະໜຶ່ງແສນໂຕ ແລະຂົນແກະຈາກແກະໜຶ່ງແສນໂຕ. 5 ແຕ່ເມື່ອເຈົ້າອາຮາບກະສັດແຫ່ງອິດສະຣາເອນໄດ້ຕາຍໄປແລ້ວ ໂມອາບກໍໄດ້ກະບົດຕໍ່ອານາຈັກອິດສະຣາເອນ. 6 ກະສັດໂຢຣາມຈຶ່ງອອກຈາກນະຄອນຊາມາເຣຍໄປທັນທີ ເພື່ອທ້ອນໂຮມເອົາທະຫານທັງໝົດຂອງເພິ່ນ. 7 ເພິ່ນໄດ້ສົ່ງຄວາມໄປບອກກະສັດເຢໂຮຊາຟັດແຫ່ງຢູດາຍວ່າ, “ກະສັດແຫ່ງໂມອາບໄດ້ກະບົດຕໍ່ຂ້າພະເຈົ້າ ທ່ານຈະຮ່ວມກັບຂ້າພະເຈົ້າເຮັດເສິກຕໍ່ສູ້ລາວໄດ້ບໍ່?” ກະສັດເຢໂຮຊາຟັດຕອບວ່າ, “ເຫັນດີ ຂ້າພະເຈົ້າເອງພ້ອມທີ່ຈະໄປກັບທ່ານ ລວມທັງທະຫານຂອງຂ້າພະເຈົ້າແລະຝູງມ້າຂອງຂ້າພະເຈົ້າດ້ວຍ. 8 ພວກເຮົາຈະເຂົ້າໂຈມຕີທາງຖະໜົນເສັ້ນໃດ?” ກະສັດໂຢຣາມຕອບວ່າ, “ພວກເຮົາຈະຜ່ານໄປທາງຖິ່ນແຫ້ງແລ້ງກັນດານເອໂດມໄປ.” 9 ແລ້ວກະສັດໂຢຣາມ, ກະສັດແຫ່ງຢູດາຍ ແລະກະສັດແຫ່ງເອໂດມກໍຍົກທັບອອກໄປ. ຫລັງຈາກຍົກທັບໄປໄດ້ເຈັດມື້ແລ້ວ ພວກເຂົາກໍໝົດນໍ້າດື່ມ ແລະບໍ່ມີນໍ້າເຫຼືອໃຫ້ພວກທະຫານຫລືສັດກິນ. 10 ກະສັດໂຢຣາມຮ້ອງຂຶ້ນວ່າ, “ພວກເຮົາຈະໄປທາງໃດດີ ພຣະເຈົ້າຢາເວມອບພວກເຮົາສາມຄົນໄວ້ໃນກຳມືຂອງກະສັດແຫ່ງໂມອາບແລ້ວ.” 11 ກະສັດເຢໂຮຊາຟັດຈຶ່ງຖາມວ່າ, “ຢູ່ທີ່ນີ້ ມີຜູ້ທຳນວາຍຂອງພຣະເຈົ້າຢາເວພໍທີ່ພວກເຮົາຈະຖາມພຣະເຈົ້າຢາເວຜ່ານທາງເພິ່ນໄດ້ແດ່ບໍ່?” ນາຍທະຫານຄົນໜຶ່ງໃນກອງທັບຂອງກະສັດໂຢຣາມຕອບວ່າ, “ເອລີຊາ ລູກຊາຍຂອງຊາຟັດຢູ່ບ່ອນນີ້. ເພິ່ນເຄີຍເປັນຜູ້ຊ່ວຍຂອງເອລີຢາ.” 12 ກະສັດເຢໂຮຊາຟັດກ່າວວ່າ, “ຖ້ອຍຄຳຂອງພຣະເຈົ້າຢາເວຢູ່ກັບລາວ.” ດັ່ງນັ້ນ ກະສັດທັງສາມຈຶ່ງພາກັນໄປຫາເອລີຊາ. 13 ເອລີຊາກ່າວຕໍ່ກະສັດແຫ່ງອິດສະຣາເອນວ່າ, “ຂ້ານ້ອຍຈະຊ່ວຍທ່ານເຮັດຫຍັງ? ຈົ່ງໄປປຶກສາພວກຜູ້ທຳນວາຍເຫຼົ່ານັ້ນ ທີ່ພໍ່ແມ່ຂອງທ່ານເຄີຍໄດ້ປຶກສານັ້ນສາ.” ແຕ່ກະສັດໂຢຣາມຕອບວ່າ, “ບໍ່ໄດ້ດອກ ເພາະແມ່ນພຣະເຈົ້າຢາເວທີ່ມອບພວກເຮົາກະສັດສາມຄົນນີ້ ໄວ້ໃນກຳມືຂອງກະສັດແຫ່ງໂມອາບ.” 14 ເອລີຊາຕອບວ່າ, “ໂດຍພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ອົງຊົງພຣະຊົນຢູ່, ອົງທີ່ຂ້ານ້ອຍຮັບໃຊ້ຢູ່ນີ້ ຂ້ານ້ອຍຂໍສາບານວ່າ ຖ້າຂ້ານ້ອຍບໍ່ນັບຖືເຈົ້າເຢໂຮຊາຟັດກະສັດແຫ່ງຢູດາຍ ຜູ້ທີ່ເປັນພັນທະມິດຂອງທ່ານແລ້ວ ຂ້ານ້ອຍຈະບໍ່ຍອມກ່ຽວຂ້ອງກັບທ່ານແຕ່ຢ່າງໃດ. 15 ບັດນີ້ຈົ່ງນຳນັກດົນຕຼີຄົນໜຶ່ງມາໃຫ້ຂ້ານ້ອຍ.” ໃນຂະນະທີ່ນັກດົນຕຼີກຳລັງດີດພິນຢູ່ນັ້ນ ຣິດເດດຂອງພຣະເຈົ້າຢາເວກໍໄດ້ລົງມາຄວບຄຸມເອລີຊາ 16 ເພິ່ນຈຶ່ງກ່າວວ່າ, “ພຣະເຈົ້າຢາເວກ່າວວ່າ, ‘ໃຫ້ຂຸດຫລຸມຢູ່ຕາມຮ່ອງຫ້ວຍແລ້ງແຫ່ງນີ້.’ 17 ພຣະເຈົ້າຢາເວກ່າວວ່າ, ‘ເຖິງແມ່ນວ່າທ່ານຈະບໍ່ເຫັນຝົນຫລືລົມ ຮ່ອງຫ້ວຍນີ້ກໍຈະເຕັມດ້ວຍນໍ້າ. ທ່ານເອງ, ຝູງງົວ ແລະຝູງສັດຂອງທ່ານຈະມີນໍ້າດື່ມພຽງພໍ.”’ 18 ເອລີຊາກ່າວຕໍ່ໄປວ່າ, “ພຣະເຈົ້າຢາເວກະທຳການນີ້ໄດ້ຢ່າງງ່າຍດາຍ ແລະພຣະອົງຈະໃຫ້ພວກທ່ານຮົບຊະນະພວກໂມອາບ. 19 ທ່ານຈະໂຈມຕີເອົາເມືອງທັງໝົດອັນສວຍງາມທີ່ມີປ້ອມປ້ອງກັນໄດ້; ທ່ານຈະປໍ້າຕົ້ນໄມ້ທັງໝົດທີ່ມີໝາກລົງ, ຖົມບໍ່ນໍ້າທັງໝົດຂອງພວກເຂົາຖິ້ມ ແລະເອົາຫີນຖົມໄຮ່ນາທັງໝົດທີ່ອຸດົມສົມບູນຂອງພວກເຂົາ ເພື່ອເປັນການທຳລາຍ.” 20 ເຊົ້າມື້ໃໝ່ມາ ຕາມເວລາທີ່ຖວາຍເຄື່ອງບູຊາໃນຕອນເຊົ້າ ໄດ້ມີນໍ້າໄຫລມາຈາກທາງເມືອງເອໂດມ ແລະມີນໍ້າເຕັມຢູ່ທົ່ວທຸກບ່ອນ. 21 ເມື່ອຊາວໂມອາບໄດ້ຍິນວ່າມີກະສັດສາມຄົນມາໂຈມຕີພວກຕົນ, ພວກເຂົາຈຶ່ງລະດົມເອົາຊາຍທຸກຄົນທີ່ສາມາດຖືອາວຸດໄດ້ ບໍ່ວ່າເຖົ້າແກ່ຫລືໜຸ່ມນ້ອຍ ແລະໃຫ້ທຸກຄົນໄປຕັ້ງທີ່ໝັ້ນປະຈຳການຢູ່ຊາຍແດນ. 22 ເມື່ອພວກເຂົາລຸກຂຶ້ນມາໃນຕອນເຊົ້າ ຕາເວັນໄດ້ສ່ອງແສງໃສ່ນໍ້າ ເຮັດໃຫ້ເບິ່ງນໍ້າເປັນສີແດງດັ່ງເລືອດ. 23 ພວກເຂົາຈຶ່ງຮ້ອງຂຶ້ນວ່າ, “ແມ່ນເລືອດ! ສັດຕູທັງສາມກອງທັບນັ້ນຄົງໄດ້ຕໍ່ສູ້ແລະຂ້າກັນເອງ ໃຫ້ພວກເຮົາໄປປຸ້ນຄ້າຍຂອງພວກເຂົາເທາະ.” 24 ແຕ່ພໍພວກເຂົາໄປເຖິງຄ້າຍຂອງພວກອິດສະຣາເອນ, ພວກອິດສະຣາເອນກໍອອກມາໂຈມຕີ ແລະໄລ່ພວກເຂົາກັບຄືນມາ. ພວກອິດສະຣາເອນສືບຕໍ່ໄລ່ຕາມ ຂ້າຊາວໂມອາບ 25 ແລະທຳລາຍເມືອງຕ່າງໆຂອງພວກເຂົາ. ເມື່ອຜ່ານໄຮ່ນາອັນອຸດົມສົມບູນຂອງຊາວໂມອາບໄປນັ້ນ ຊາວອິດສະຣາເອນແຕ່ລະຄົນກໍໄດ້ໂຍນກ້ອນຫີນໃສ່ ຈົນໄຮ່ນາທັງໝົດເຕັມໄປດ້ວຍກ້ອນຫີນ; ພວກເຂົາຖົມບໍ່ນໍ້າແລະປໍ້າຕົ້ນໄມ້ທີ່ມີໝາກທັງໝົດລົງ. ໃນທີ່ສຸດ ມີແຕ່ເມືອງກີຣະເຮເຣັດ ທີ່ຍັງເຫລືອຢູ່ ຊາວອິດສະຣາເອນຈຶ່ງເຂົ້າລ້ອມໄວ້ແລະໂຈມຕີເອົາ. 26 ເມື່ອກະສັດແຫ່ງໂມອາບຮູ້ວ່າຕົນເສຍໄຊໃຫ້ແກ່ສັດຕູແລ້ວ, ເພິ່ນກໍພາທະຫານດາບເຈັດຮ້ອຍຄົນ ຕີຜ່າວົງລ້ອມ ແລະປົບໜີໄປຫາກະສັດແຫ່ງຊີເຣຍ ແຕ່ກໍບໍ່ສຳເລັດ. 27 ສະນັ້ນ ເພິ່ນຈຶ່ງພາລູກຊາຍກົກຜູ້ທີ່ຈະຂຶ້ນເປັນກະສັດແທນຕົນນັ້ນ ໄປຖວາຍທີ່ເທິງກຳແພງເມືອງເປັນເຄື່ອງບູຊາແກ່ພະຂອງຊາວໂມອາບ. ຊາວອິດສະຣາເອນເກີດຢ້ານກົວຈົນຕົວສັ່ນເຊັນ ຈຶ່ງຖອນໜີຈາກເມືອງແລະກັບຄືນໄປສູ່ປະເທດຂອງຕົນ. |
@ 2012 United Bible Societies. All Rights Reserved.