2 ກະສັດ 14 - ພຣະຄຳພີສັກສິກະສັດອາມາຊີຢາແຫ່ງອານາຈັກຢູດາຍ ( 2 ຂຄ 25:1-24 ) 1 ໃນຣາຊການປີທີສອງຂອງເຈົ້າເຢໂຮອາດລູກຊາຍຂອງກະສັດເຢໂຮອາຮາດແຫ່ງອິດສະຣາເອນ; ເຈົ້າອາມາຊີຢາລູກຊາຍຂອງເຈົ້າໂຢອາດໄດ້ຂຶ້ນເປັນກະສັດແຫ່ງຢູດາຍ 2 ເມື່ອເພິ່ນອາຍຸໄດ້ຊາວຫ້າປີ ແລະປົກຄອງຢູ່ທີ່ນະຄອນເຢຣູຊາເລັມ ເປັນເວລາຊາວເກົ້າປີ. ແມ່ຂອງເພິ່ນເປັນຊາວເຢຣູຊາເລັມຊື່ວ່າ ເຢໂຮອັດດິນ. 3 ກະສັດອາມາຊີຢາໄດ້ເຮັດໃນສິ່ງທີ່ພຣະເຈົ້າຢາເວພໍໃຈ ແຕ່ບໍ່ເປັນດັ່ງກະສັດດາວິດບັນພະບຸລຸດຂອງເພິ່ນ; ເພິ່ນເຮັດຕາມທີ່ກະສັດໂຢອາດພໍ່ຂອງເພິ່ນໄດ້ເຮັດມາ. 4 ເພິ່ນບໍ່ໄດ້ມ້າງສະຖານທີ່ຂາບໄຫວ້ພະຂອງຄົນຕ່າງຊາດຖິ້ມ ແລະປະຊາຊົນຍັງສືບຕໍ່ຖວາຍເຄື່ອງບູຊາ ແລະເຜົາເຄື່ອງຫອມຢູ່ທີ່ນັ້ນ. 5 ພໍກະສັດອາມາຊີຢາໄດ້ມີອຳນາດໝັ້ນຄົງແລ້ວ ເພິ່ນກໍປະຫານພວກຂ້າຣາຊການຜູ້ທີ່ໄດ້ຂ້າພໍ່ຂອງເພິ່ນ. 6 ເຖິງຢ່າງໃດກໍຕາມ ເພິ່ນບໍ່ໄດ້ຂ້າລູກໆຂອງພວກເຂົາ ແຕ່ເຮັດຕາມທີ່ພຣະເຈົ້າຢາເວໄດ້ສັ່ງໄວ້ໃນກົດບັນຍັດຂອງໂມເຊວ່າ: “ພໍ່ແມ່ບໍ່ຄວນຖືກຂ້າຍ້ອນລູກເຮັດຜິດ ແລະລູກກໍບໍ່ຄວນຖືກຂ້າຍ້ອນພໍ່ແມ່ເຮັດຜິດ; ແລະຜູ້ໃດເຮັດຜິດກໍໃຫ້ຜູ້ນັ້ນຖືກຂ້າ.” 7 ກະສັດອາມາຊີຢາຂ້າທະຫານຊາວເອໂດມສິບພັນຄົນ ໃນຮ່ອມພູເກືອ; ເພິ່ນຢຶດເອົາເມືອງເສລາໄດ້ ແລະເອີ້ນຊື່ເມືອງນີ້ວ່າໂຢກເທເອນ ຊຶ່ງຊື່ນີ້ຍັງມີຢູ່ເທົ່າທຸກວັນນີ້. 8 ຕໍ່ມາ ກະສັດອາມາຊີຢາໄດ້ສົ່ງຄະນະທູດໄປຫາເຈົ້າເຢໂຮອາດ ກະສັດແຫ່ງອິດສະຣາເອນເພື່ອທ້າທາຍເພິ່ນໃຫ້ຕໍ່ສູ້. 9 ແຕ່ກະສັດເຢໂຮອາດໄດ້ສົ່ງຂໍ້ຄວາມຕອບກະສັດອາມາຊີຢາແຫ່ງຢູດາຍວ່າ, “ຍັງມີຄັ້ງໜຶ່ງ ພຸ່ມໜາມຢູ່ເທິງພູເຂົາເລບານອນໄດ້ສົ່ງຂໍ້ຄວາມໄປຫາຕົ້ນແປກວ່າ, ‘ຂໍໃຫ້ລູກສາວເຈົ້າແຕ່ງງານກັບລູກຊາຍຂ້ອຍ.’ ພໍສັດປ່າຜ່ານມາມັນກໍໄດ້ຢຽບພຸ່ມໜາມນັ້ນຖິ້ມ. 10 ອາມາຊີຢາເອີຍ ດຽວນີ້ເຈົ້າໄດ້ຊະນະຊາວເອໂດມ ແລະເຈົ້າກໍເຕັມໄປດ້ວຍຄວາມອວດຕົວ. ສະນັ້ນ ຈົ່ງພໍໃຈໃນຊື່ສຽງຂອງເຈົ້າເອງ ແລະຢູ່ໃນເຮືອນນັ້ນແຫຼະ. ເປັນຫຍັງຈຶ່ງສ້າງຄວາມເດືອດຮ້ອນ ທີ່ຈະນຳເອົາຄວາມຈິບຫາຍມາສູ່ເຈົ້າ ແລະປະຊາຊົນຂອງເຈົ້າເອງ?” 11 ແຕ່ກະສັດອາມາຊີຢາບໍ່ຍອມຟັງ. ດັ່ງນັ້ນ ກະສັດເຢໂຮອາດພ້ອມທັງທະຫານຂອງຕົນ ຈຶ່ງໄດ້ຍົກທັບອອກໄປຕໍ່ສູ້ກະສັດອາມາຊີຢາທີ່ເບັດເຊເມດໃນຢູດາຍ. 12 ກອງທັບຂອງກະສັດອາມາຊີຢາໄດ້ພ່າຍແພ້ ແລະທະຫານຂອງເພິ່ນກໍປົບໜີກັບເມືອບ້ານເຮືອນໃຜລາວ. 13 ກະສັດເຢໂຮອາດແຫ່ງອິດສະຣາເອນໄດ້ຈັບກະສັດອາມາຊີຢາແຫ່ງຢູດາຍລູກຊາຍຂອງໂຢອາດຫຼານຊາຍຂອງອາຮາຊີຢາທີ່ເບັດເຊເມດໄປເປັນຊະເລີຍ; ແລ້ວກໍບຸກໜ້າເຂົ້າໄປຈົນເຖິງນະຄອນເຢຣູຊາເລັມ ແລະທຳລາຍກຳແພງເມືອງ ຕັ້ງແຕ່ປະຕູເອຟຣາອິມຈົນເຖິງປະຕູແຈຂອງກຳແພງ ເປັນໄລຍະຍາວເກືອບສອງຮ້ອຍແມັດ. 14 ເພິ່ນໄດ້ຢຶດເອົາເງິນແລະຄຳທັງໝົດທີ່ເພິ່ນພົບເຫັນ ເຄື່ອງໃຊ້ໃນວິຫານຂອງພຣະເຈົ້າຢາເວແລະຊັບສົມບັດທັງໝົດໃນຣາຊວັງ ແລະຂົນເຄື່ອງເຫຼົ່ານີ້ເມືອນະຄອນຊາມາເຣຍ. ເພິ່ນຍັງໄດ້ຈັບເອົາຄົນໄປເປັນຕົວປະກັນດ້ວຍ. 15 ສິ່ງອື່ນທີ່ກະສັດເຢໂຮອາດໄດ້ກະທຳ ຕະຫລອດທັງວິລະກຳໃນການເຮັດເສິກກັບເຈົ້າອາມາຊີຢາກະສັດແຫ່ງຢູດາຍ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ. 16 ກະສັດເຢໂຮອາດໄດ້ຕາຍໄປ ແລະຖືກຝັງໄວ້ໃນອຸບມຸງຂອງກະສັດທີ່ນະຄອນຊາມາເຣຍ. ແລ້ວເຈົ້າເຢໂຣໂບອາມທີສອງ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ. ກະສັດອາມາຊີຢາ ແຫ່ງຢູດາຍຕາຍ ( 2 ຂຄ 25:25-28 ) 17 ຫລັງຈາກທີ່ເຈົ້າເຢໂຮອາດລູກຊາຍຂອງເຢໂຮອາຮາດ ກະສັດແຫ່ງອິດສະຣາເອນໄດ້ຕາຍໄປແລ້ວ; ເຈົ້າອາມາຊີຢາລູກຊາຍຂອງໂຢອາດ ກະສັດແຫ່ງຢູດາຍກໍມີຊີວິດຢູ່ຕໍ່ໄປອີກສິບຫ້າປີ. 18 ສິ່ງອື່ນທີ່ເຈົ້າອາມາຊີຢາໄດ້ກະທຳ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ. 19 ແລ້ວກໍມີການປອງຮ້າຍຂຶ້ນຢູ່ໃນນະຄອນເຢຣູຊາເລັມ ເພື່ອລອບສັງຫານເຈົ້າອາມາຊີຢາ. ເພິ່ນໄດ້ປົບໜີໄປທີ່ເມືອງລາກິດ ແຕ່ພວກສັດຕູໄດ້ໄລ່ຕາມໄປທັນຈຶ່ງຂ້າເພິ່ນເສຍໃນທີ່ນັ້ນ. 20 ພວກເຂົາເອົາຊາກສົບຂອງເພິ່ນໃສ່ຫລັງມ້າກັບຄືນມາສູ່ນະຄອນເຢຣູຊາເລັມ ແລະຝັງໄວ້ໃນອຸບມຸງແຫ່ງກະສັດທີ່ເມືອງຂອງດາວິດ. 21 ປະຊາຊົນຊາວຢູດາຍທັງໝົດຈຶ່ງສວມມົງກຸດໃຫ້ອາຊາຣີຢາລູກຊາຍຂອງເພິ່ນຜູ້ທີ່ມີອາຍຸສິບຫົກປີຂຶ້ນເປັນກະສັດ. 22 ກະສັດອາຊາຣີຢາໄດ້ຕີເອົາເມືອງເອລາດຄືນມາໄດ້ ແລະສ້າງເມືອງນີ້ຂຶ້ນໃໝ່ ຫລັງຈາກທີ່ພໍ່ຂອງເພິ່ນຕາຍໄປແລ້ວ. ກະສັດເຢໂຣໂບອາມທີສອງແຫ່ງອິດສະຣາເອນ 23 ໃນຣາຊການປີທີສິບຫ້າຂອງເຈົ້າອາມາຊີຢາລູກຊາຍຂອງເຈົ້າໂຢອາດກະສັດແຫ່ງຢູດາຍ; ເຈົ້າເຢໂຣໂບອາມລູກຊາຍຂອງເຈົ້າເຢໂຮອາດໄດ້ຂຶ້ນເປັນກະສັດແຫ່ງອິດສະຣາເອນ ແລະປົກຄອງຢູ່ທີ່ນະຄອນຊາມາເຣຍເປັນເວລາສີ່ສິບເອັດປີ. 24 ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ໂດຍນຳຕາມແບບຢ່າງອັນຊົ່ວຮ້າຍຂອງເຈົ້າເຢໂຣໂບອາມລູກຊາຍຂອງເນບັດກະສັດຄົນກ່ອນ ທີ່ເປັນຜູ້ນຳອານາຈັກອິດສະຣາເອນເຮັດບາບ. 25 ກະສັດເຢໂຣໂບອາມທີສອງໄດ້ຢຶດເອົາເຂດແດນທັງໝົດ ທີ່ເປັນຂອງຊາວອິດສະຣາເອນຄືນ ຕັ້ງແຕ່ທາງຜ່ານຊ່ອງແຄບຮາມັດຢູ່ທາງເໜືອ ຈົນເຖິງທະເລໃນອາຣາບາ. ເຫດການນີ້ເປັນໄປຕາມຖ້ອຍຄຳທີ່ອົງພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນໄດ້ກ່າວໄວ້ ຜ່ານທາງຜູ້ຮັບໃຊ້ຂອງພຣະອົງ ຄືຜູ້ທຳນວາຍໂຢນາ ລູກຊາຍຂອງອາມິດໄຕ ຊາວເມືອງກາດເຮເຟ. 26 ພຣະເຈົ້າຢາເວໄດ້ເຫັນຊາວອິດສະຣາເອນເດືອດຮ້ອນ ຢ່າງທົນທຸກໜັກ ແລະບໍ່ມີໃຜຊ່ວຍເຫລືອພວກເຂົາ. 27 ແຕ່ພຣະເຈົ້າຢາເວບໍ່ປະສົງຈະທຳລາຍອານາຈັກອິດສະຣາເອນ ໃຫ້ສູນສິ້ນຕະຫລອດໄປ. ດັ່ງນັ້ນ ພຣະອົງຈຶ່ງຊ່ວຍກູ້ເອົາພວກເຂົາໄວ້ ຜ່ານທາງກະສັດເຢໂຣໂບອາມທີສອງນີ້. 28 ສິ່ງອື່ນທີ່ກະສັດເຢໂຣໂບອາມທີສອງໄດ້ກະທຳ ພ້ອມທັງວິລະກຳໃນສະໜາມຮົບ ແລະການຕີເອົາເມືອງດາມັສກັດແລະເມືອງຮາມັດ ຄືນມາເປັນຂອງອານາຈັກອິດສະຣາເອນ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ. 29 ກະສັດເຢໂຣໂບອາມໄດ້ຕາຍໄປ ແລະຊາກສົບຂອງເພິ່ນໄດ້ຖືກຝັງໄວ້ໃນອຸບມຸງຂອງກະສັດ. ແລ້ວເຈົ້າເຊກາຣີຢາ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ. |
@ 2012 United Bible Societies. All Rights Reserved.