1 ຕີໂມທຽວ 4 - ພຣະຄຳພີສັກສິຄູສອນປອມ 1 ພຣະວິນຍານກ່າວໄວ້ຢ່າງຈະແຈ້ງວ່າ ໃນຍຸກສຸດທ້າຍຈະມີບາງຄົນປະຖິ້ມຄວາມເຊື່ອ ພວກເຂົາຈະເຊື່ອຟັງບັນດາດວງວິນຍານຜີຊົ່ວຮ້າຍທີ່ຫລອກລວງມະນຸດ ແລະຄຳສັ່ງສອນຂອງພວກຜີມານຮ້າຍ. 2 ຄຳສັ່ງສອນເຫຼົ່ານັ້ນ ມາຈາກການໜ້າຊື່ໃຈຄົດຂອງຄົນຂີ້ຕົວະ ຄືຄົນທີ່ໃຈສຳນຶກຜິດແລະຊອບຂອງພວກເຂົາຖືກໝາຍໄວ້ດ້ວຍເຫຼັກແດງເຜົາໄໝ້ຢູ່. 3 ພວກເຂົາຫ້າມບໍ່ໃຫ້ເອົາກັນເປັນຜົວເມຍ ຫ້າມກິນອາຫານບາງຊະນິດ ຊຶ່ງພຣະເຈົ້າໄດ້ສ້າງໄວ້ ແຕ່ພຣະເຈົ້າໄດ້ສ້າງອາຫານເຫຼົ່ານີ້ ເພື່ອໃຫ້ບັນດາຄົນທີ່ເຊື່ອ ແລະຮູ້ຈັກຄວາມຈິງນັ້ນ ກິນດ້ວຍການໂມທະນາຂອບພຣະຄຸນ. 4 ສິ່ງສາລະພັດທີ່ພຣະເຈົ້າສ້າງໄວ້ນັ້ນ ເປັນຂອງດີທັງໝົດ ບໍ່ຄວນປະຖິ້ມສິ່ງໃດເລີຍ ແຕ່ຈົ່ງຮັບເອົາທຸກສິ່ງດ້ວຍການໂມທະນາຂອບພຣະຄຸນ, 5 ເພາະວ່າສິ່ງເຫຼົ່ານັ້ນ ກໍຖືກຊຳລະໄວ້ແລ້ວ ໂດຍພຣະທຳຂອງພຣະເຈົ້າ ແລະດ້ວຍຄຳພາວັນນາອະທິຖານ. ຜູ້ຮັບໃຊ້ທີ່ດີຂອງພຣະເຢຊູເຈົ້າ 6 ຖ້າເຈົ້າໃຫ້ຄຳແນະນຳເຫຼົ່ານີ້ແກ່ບັນດາພີ່ນ້ອງ, ເຈົ້າກໍຈະເປັນຜູ້ຮັບໃຊ້ທີ່ດີຂອງພຣະເຢຊູຄຣິດເຈົ້າ ສົມກັບທີ່ເຈົ້າໄດ້ບຳລຸງຕົນດ້ວຍຖ້ອຍຄຳເລື່ອງຄວາມເຊື່ອ ແລະດ້ວຍຄຳສັ່ງສອນອັນແທ້ຈິງທີ່ເຈົ້າໄດ້ປະຕິບັດຕາມນັ້ນ. 7 ແຕ່ຈົ່ງຫລີກເວັ້ນຈາກນິຍາຍອັນໂງ່ງ່າວຕ່າງໆ ຊຶ່ງຂັດກັບຄວາມເຊື່ອ ຈົ່ງຝຶກຝົນຕົນເອງໃຫ້ດຳເນີນຊີວິດໃນຄວາມຢຳເກງພຣະເຈົ້າ. 8 ການຝຶກຝົນທາງກາຍນັ້ນ ມີປະໂຫຍດບາງຢ່າງ ແຕ່ການນັບຖືພຣະເຈົ້າຢ່າງຖືກຕ້ອງນັ້ນ ມີປະໂຫຍດທຸກຢ່າງ ເພາະໄດ້ຮັບພຣະສັນຍາອັນປະເສີດສຳລັບຊີວິດໃນປະຈຸບັນ ແລະໃນອະນາຄົດອີກດ້ວຍ. 9 ຂໍ້ຄວາມນີ້ກໍສັດຈິງ ສົມຄວນທີ່ທຸກຄົນຈະຮັບເອົາໄວ້ ແລະເຊື່ອຢ່າງຄົບຖ້ວນ. 10 ເຫດທີ່ພວກເຮົາເຮັດວຽກຢ່າງໜັກໜ່ວງແລະອົດສາສູ້ ເພາະວ່າພວກເຮົາໄດ້ໄວ້ວາງໃຈໃນພຣະເຈົ້າ ຜູ້ຊົງພຣະຊົນຢູ່, ຜູ້ຊົງໂຜດໃຫ້ພົ້ນຂອງທຸກຄົນ ແລະໂດຍສະເພາະແລ້ວຂອງພວກຄົນທີ່ເຊື່ອໃນພຣະອົງ. 11 ຈົ່ງແນະນຳແລະສັ່ງສອນຂໍ້ຄວາມເຫຼົ່ານີ້. 12 ຢ່າໃຫ້ຜູ້ໃດໝິ່ນປະໝາດຄວາມໜຸ່ມຂອງເຈົ້າ, ແຕ່ຈົ່ງເປັນແບບຢ່າງໃຫ້ຄົນທີ່ເຊື່ອທັງຫລາຍ ໃນທາງກິຣິຍາແລະວາຈາ ໃນຄວາມຮັກ ໃນຄວາມເຊື່ອ ແລະໃນຄວາມບໍຣິສຸດຂອງເຈົ້າ. 13 ຈົ່ງຕັ້ງໃຈດ້ວຍຄວາມພຽນພະຍາຍາມຂອງເຈົ້າ ໃນການອ່ານພຣະຄຳຂອງພຣະເຈົ້າໃນທີ່ນະມັດສະການ ແລະການເທດສະໜາກັບການສັ່ງສອນ ຈົນກວ່າເຮົາຈະມາ. 14 ຢ່າເມີນເສີຍຕໍ່ຂອງປະທານ ຝ່າຍຈິດວິນຍານທີ່ມີໃນເຈົ້າ ຊຶ່ງຖືກມອບໝາຍໃຫ້ເຈົ້າ ເມື່ອພວກຜູ້ທຳນວາຍແລະພວກເຖົ້າແກ່ວາງມືໃສ່ເຈົ້າ. 15 ຈົ່ງຝຶກຝົນສິ່ງເຫຼົ່ານັ້ນ ແລະອຸທິດເຈົ້າເອງຢ່າງໝົດສິ້ນໃສ່ການນີ້ ເພື່ອວ່າທຸກຄົນຈະໄດ້ເຫັນເຈົ້າຈະເລີນຂຶ້ນ. 16 ຈົ່ງລະວັງຕົວຂອງເຈົ້າ ແລະຄຳສັ່ງສອນຂອງເຈົ້າດ້ວຍ. ຈົ່ງສືບຕໍ່ດຳເນີນການເຫຼົ່ານີ້ ເພາະຖ້າເຈົ້າປະຕິບັດຢ່າງນີ້ ເຈົ້າກໍຈະຊ່ວຍເຈົ້າເອງແລະທຸກຄົນ ຜູ້ທີ່ຟັງເຈົ້າໃຫ້ພົ້ນ. |
@ 2012 United Bible Societies. All Rights Reserved.