1 ຊາມູເອນ 25 - ພຣະຄຳພີສັກສິຊາມູເອນຕາຍ 1 ເມື່ອຊາມູເອນຕາຍໄປນັ້ນ ຊາວອິດສະຣາເອນທັງໝົດໄດ້ໄວ້ທຸກໃຫ້ເພິ່ນ. ພວກເຂົາໄດ້ຝັງສົບຂອງເພິ່ນໄວ້ທີ່ຣາມາ ບ້ານເມືອງຂອງເພິ່ນເອງ. ຫລັງຈາກນັ້ນ ດາວິດໄດ້ໄປທີ່ຖິ່ນແຫ້ງແລ້ງກັນດານປາຣານ. ດາວິດແລະນາງອາບີກາຍ 2-3 ມີຊາຍຄົນໜຶ່ງຢູ່ໃນຕະກຸນກາເລັບຊື່ວ່າ ນາບານ ລາວເປັນຊາວເມືອງມາໂອນແລະມີທີ່ດິນຢູ່ໃກ້ກັບເມືອງກາເມນ. ຊາຍຜູ້ນີ້ເປັນຄົນຮັ່ງມີ ແລະເປັນເຈົ້າຂອງແກະສາມພັນໂຕ ແລະແບ້ໜຶ່ງພັນໂຕ. ນາງອາບີກາຍເມຍຂອງລາວເປັນຄົນງາມ ແລະສະຫລຽວສະຫລາດ ສ່ວນນາບານນັ້ນເປັນຄົນໃຈແຂງແລະໂຫດຮ້າຍ. ນາບານກຳລັງຕັດຂົນແກະຂອງຕົນຢູ່ໃນເມືອງກາເມນ 4 ແລະດາວິດຜູ້ທີ່ອາໄສຢູ່ໃນຖິ່ນແຫ້ງແລ້ງກັນດານກໍໄດ້ຍິນວ່າ ນາບານກຳລັງຕັດຂົນແກະຂອງຕົນຢູ່. 5 ສະນັ້ນ ເພິ່ນຈຶ່ງສົ່ງຊາຍໜຸ່ມສິບຄົນນຳເອົາຄວາມຢື້ຢາມຖາມຂ່າວ ໄປຫານາບານທີ່ເມືອງກາເມນ. 6 ດາວິດໄດ້ແນະນຳພວກເຂົາໃຫ້ບອກນາບານດັ່ງນີ້: “ເພື່ອນເອີຍ ດາວິດຂໍຝາກຄວາມຢື້ຢາມຖາມຂ່າວມາເຖິງທ່ານພ້ອມກັບຄວາມປາຖະໜາດີ ມາເຖິງທ່ານກັບຄອບຄົວຂອງທ່ານ ແລະທຸກສິ່ງທີ່ເປັນຂອງທ່ານດ້ວຍ. 7 ຂ້າພະເຈົ້າຮູ້ວ່າທ່ານພວມຕັດຂົນແກະຢູ່ ແລະຂ້າພະເຈົ້າຢາກໃຫ້ທ່ານຮູ້ວ່າ ເມື່ອພວກລ້ຽງແກະຂອງທ່ານຢູ່ກັບພວກເຮົານັ້ນ ພວກເຮົາບໍ່ໄດ້ທຳຮ້າຍພວກເຂົາແຕ່ຢ່າງໃດເລີຍ. ຕະຫລອດເວລາທີ່ພວກເຂົາຢູ່ໃນເມືອງກາເມນນີ້ ພວກເຂົາບໍ່ໄດ້ສູນເສຍຫຍັງໝົດ. 8 ຂໍທ່ານຖາມພວກຊາຍໜຸ່ມຂອງທ່ານເບິ່ງກໍໄດ້ ແລະພວກເຂົາກໍຈະບອກໃຫ້ທ່ານຮູ້. ພວກເຮົາມາໃນມື້ງານກິນລ້ຽງ ແລະດາວິດກໍຂໍຮ້ອງກັບທ່ານ ໄດ້ໃຫ້ການຕ້ອນຮັບພວກເຮົາຢ່າງກັນເອງ. ຂໍທ່ານຈົ່ງເອົາສິ່ງຂອງໃຫ້ພວກເຮົາກັບດາວິດເພື່ອນທີ່ຮັກຂອງທ່ານ ຕາມທີ່ທ່ານສາມາດໃຫ້ໄດ້ດ້ວຍເທີ້ນ.” 9 ຄົນຂອງດາວິດໄດ້ກ່າວຖ້ອຍຄຳເຫຼົ່ານີ້ຕໍ່ນາບານໃນນາມຂອງດາວິດ. ແລ້ວພວກເຂົາກໍລໍຖ້າຢູ່ໃນທີ່ນັ້ນ 10 ແຕ່ນາບານກໍຕອບຄົນຮັບໃຊ້ຂອງດາວິດວ່າ, “ດາວິດແມ່ນຜູ້ໃດ? ລູກຊາຍຂອງເຢຊີແມ່ນຜູ້ໃດ? ມີທາດຮັບໃຊ້ເປັນຈຳນວນຫຼວງຫຼາຍທີ່ປົບໜີຈາກນາຍຂອງຕົນ. 11 ຂ້ອຍຈະບໍ່ເອົາເຂົ້າຈີ່, ນໍ້າ ແລະສັດທີ່ຂ້ອຍໄດ້ຂ້າສຳລັບຄົນຕັດຂົນແກະຂອງຂ້ອຍ ໃຫ້ຄົນທີ່ຂ້ອຍບໍ່ຮູ້ຈັກວ່າເຂົາມາແຕ່ໃສໄດ້ດອກ.” 12 ດັ່ງນັ້ນ ຄົນຂອງດາວິດຈຶ່ງກັບຄືນເມືອ ແລະບອກຖ້ອຍຄຳທີ່ນາບານໄດ້ເວົ້ານັ້ນສູ່ເພິ່ນຟັງ. 13 ດາວິດສັ່ງວ່າ, “ຕຽມເອົາດາບຂອງພວກເຈົ້າ.” ແລະພວກເຂົາກໍໄດ້ປະຕິບັດຕາມ. ສ່ວນດາວິດນັ້ນກໍຖືເອົາດາບຂອງຕົນຄືກັນໂດຍມີຄົນປະມານສີ່ຮ້ອຍຄົນ ອອກເດີນທາງໄປກັບເພິ່ນ ແລະສ່ວນອີກສອງຮ້ອຍຄົນນັ້ນ ໄດ້ປະໄວ້ໃຫ້ຢູ່ເຝົ້າເຄື່ອງຂອງ. 14 ຕໍ່ມາ ຄົນຮັບໃຊ້ນາບານຜູ້ໜຶ່ງໄດ້ມາບອກອາບີກາຍເມຍຂອງນາບານວ່າ, “ຍານາງໄດ້ຍິນບໍວ່າ ດາວິດໄດ້ສົ່ງຄົນຂອງເພິ່ນມາແຕ່ຖິ່ນແຫ້ງແລ້ງກັນດານ ເພື່ອນຳເອົາຄວາມຢື້ຢາມຖາມຂ່າວມາເຖິງນາຍຂອງພວກເຮົາ, ແຕ່ເພິ່ນຊໍ້າພັດໝິ່ນປະໝາດພວກເຂົາ. 15 ຄາວທີ່ພວກເຮົາຢູ່ໃນທົ່ງນາກັບພວກເຂົານັ້ນ ພວກເຂົາດີຕໍ່ພວກເຮົາຫລາຍ. ພວກເຂົາບໍ່ເຄີຍລົບກວນພວກເຮົາເລີຍ ແລະພວກເຮົາກໍບໍ່ໄດ້ສູນເສຍສິ່ງຂອງໃດໆທັງສິ້ນ. 16 ຕອນທີ່ພວກເຮົາເຝົ້າຝູງສັດຢູ່ກັບພວກເຂົານັ້ນ ພວກເຂົາໄດ້ປົກປັກຮັກສາພວກເຮົາຕະຫລອດວັນຕະຫລອດຄືນ. 17 ສະນັ້ນ ຈົ່ງພິຈາລະນາໃຫ້ດີເບິ່ງດູ ແລະຕັດສິນໃຈວ່າຍານາງຄວນຈະເຮັດຢ່າງໃດ ເລື່ອງນີ້ອາດນຳເອົາຄວາມຫຼົ້ມຈົມມາສູ່ນາຍຂອງພວກເຮົາ ຕະຫລອດທັງທຸກຄົນທີ່ຢູ່ໃນຄອບຄົວຂອງເພິ່ນກໍໄດ້. ເພິ່ນເປັນຄົນດື້ດ້ານທີ່ສຸດຈຶ່ງບໍ່ຍອມຟັງຜູ້ໃດໝົດ.” 18 ແລ້ວອາບີກາຍກໍຟ້າວຕຽມເອົາເຂົ້າຈີ່ສອງຮ້ອຍກ້ອນ, ເຫຼົ້າອະງຸ່ນສອງຖົງໜັງ, ແກະເຜົາຫ້າໂຕ, ເຂົ້າຂົ້ວຫ້າກະຖັງ, ໝາກອະງຸ່ນແຫ້ງຮ້ອຍມັດ ແລະເຂົ້າໜົມໝາກເດື່ອສອງຮ້ອຍກ້ອນບັນທຸກໃສ່ຫລັງລໍໄປ. 19 ແລ້ວນາງກໍເວົ້າກັບພວກຄົນຮັບໃຊ້ວ່າ, “ໃຫ້ພວກເຈົ້າອອກໄປກ່ອນ ແລະຂ້ອຍຈະຕາມໄປນຳຫລັງ.” ແຕ່ນາງບໍ່ໄດ້ບອກໃຫ້ຜົວຂອງຕົນຮູ້ນຳແຕ່ຢ່າງໃດໝົດ. 20 ໃນຂະນະທີ່ນາງກຳລັງຂີ່ລໍໄປຕາມເນີນພູນັ້ນ ໃນທັນໃດ ນາງໄດ້ພົບດາວິດແລະຄົນທັງຫລາຍຂອງເພິ່ນທີ່ກຳລັງມຸ່ງໜ້າມາຫານາງ. 21 ດາວິດຄິດໃນໃຈວ່າ, “ເຫດໃດຂ້ອຍຈຶ່ງຮັກສາຊັບສິນຂອງຊາຍຄົນນີ້ ຢູ່ໃນຖິ່ນແຫ້ງແລ້ງກັນດານ? ທຸກສິ່ງທີ່ເປັນຂອງລາວບໍ່ໄດ້ສູນເສຍແຕ່ຢ່າງໃດໝົດ. ອັນນີ້ບໍ ຄືການຕອບແທນໃນສິ່ງທີ່ຂ້ອຍໃຫ້ການຊ່ວຍເຫລືອແກ່ລາວ? 22 ຂໍໃຫ້ພຣະເຈົ້າລົງໂທດຂ້ອຍ ເຖິງຕາຍ ຖ້າຂ້ອຍບໍ່ໄດ້ຂ້າຜູ້ຊາຍທຸກຄົນໃນຄອບຄົວຂອງນາບານ ກ່ອນມື້ອື່ນເຊົ້າ.” 23 ພໍອາບີກາຍຫລຽວເຫັນດາວິດ ນາງກໍຟ້າວລົງຈາກຫລັງລໍ ແລະກົ້ມຂາບລົງດິນ 24 ນາງຂາບລົງທີ່ຕີນຂອງດາວິດ ແລະເວົ້າວ່າ, “ທ່ານເອີຍ ກະລຸນາຟັງຂ້ານ້ອຍກ່ອນທ້ອນ ໃຫ້ຂ້ານ້ອຍຮັບເອົາຄວາມຜິດທັງໝົດນັ້ນສາ. 25 ຂໍຢ່າໄດ້ຖືຊານຳນາບານຄົນທີ່ບໍ່ມີຫຍັງດີຜູ້ນີ້ເລີຍ ລາວສົມຊື່ລາວນັ້ນແຫຼະ ຄືຄົນໂງ່ຈ້າ ທ່ານເອີຍ ຕອນທີ່ທ່ານໃຊ້ຄົນໄປນັ້ນຂ້ານ້ອຍບໍ່ຢູ່. 26 ທ່ານເອີຍ ພຣະເຈົ້າຢາເວຊົງພຣະຊົນຢູ່ ແລະທ່ານມີຊີວິດຢູ່, ດ້ວຍວ່າພຣະເຈົ້າຢາເວໄດ້ຫ້າມທ່ານບໍ່ໃຫ້ແກ້ແຄ້ນ ແລະຂ້າສັດຕູຂອງທ່ານ. ບັດນີ້ ຂໍໃຫ້ສັດຕູທຸກຄົນທີ່ຢາກທຳຮ້າຍທ່ານຖືກລົງໂທດຢ່າງດຽວກັນກັບນາບານ. 27 ຂໍທ່ານກະລຸນາຮັບເອົາຂອງຂວັນທີ່ຂ້ານ້ອຍນຳມາໃຫ້ທ່ານ ແລະແຈກຢາຍໃຫ້ຄົນຂອງທ່ານກິນເຖີດ. 28 ຂໍໂຜດກະລຸນາຍົກໂທດໃນສິ່ງໃດໆທີ່ຂ້ານ້ອຍໄດ້ເຮັດຜິດໄປນັ້ນສາ. ພຣະເຈົ້າຢາເວຈະໃຫ້ທ່ານເປັນກະສັດຕະຫລອດທັງເຊື້ອສາຍຂອງທ່ານດ້ວຍ ເພາະທ່ານກຳລັງສູ້ຮົບເພື່ອພຣະເຈົ້າຢາເວ. ທ່ານຄົງບໍ່ເຮັດການຊົ່ວ ຢ່າງໃດເລີຍ ຕາບໃດທີ່ທ່ານຍັງມີຊີວິດຢູ່. 29 ຖ້າມີຜູ້ໃດຜູ້ໜຶ່ງຈະໂຈມຕີທ່ານ ແລະພະຍາຍາມຈະຂ້າທ່ານ ພຣະເຈົ້າຢາເວ ພຣະເຈົ້າຂອງທ່ານກໍຈະຮັກສາທ່ານໃຫ້ພົ້ນ ເໝືອນດັ່ງຜູ້ໜຶ່ງທີ່ເຝົ້າຮັກສາສົມບັດອັນປະເສີດຂອງພຣະອົງ. ສຳລັບເຫຼົ່າສັດຕູຂອງທ່ານນັ້ນ ພຣະອົງຈະໂຍນພວກເຂົາຖິ້ມ ດັ່ງກ້ອນຫີນທີ່ຖືກຍິງອອກໄປຈາກກະຖຸນ. 30 ໃນເມື່ອພຣະເຈົ້າຢາເວຈະກະທຳສິ່ງທີ່ດີທຸກຢ່າງແກ່ທ່ານ ຕາມທີ່ພຣະອົງໄດ້ສັນຍາໄວ້ ແລະທັງຕັ້ງທ່ານໃຫ້ເປັນກະສັດຂອງຊາດອິດສະຣາເອນ 31 ທ່ານກໍຈະບໍ່ເສຍໃຈ ຫລືກິນແໜງທີ່ທ່ານຕ້ອງໄດ້ຂ້າຄົນໂດຍບໍ່ມີເຫດຜົນ ຫລືທີ່ທ່ານຕ້ອງໄດ້ແກ້ແຄ້ນດ້ວຍຕົນເອງ. ທ່ານເອີຍ ເມື່ອໃດພຣະເຈົ້າຢາເວອວຍພອນທ່ານແລ້ວ ກະລຸນາຢ່າລືມຂ້ານ້ອຍເດີ.” 32 ດາວິດເວົ້າກັບນາງວ່າ, “ສັນລະເສີນພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ທີ່ໄດ້ສົ່ງເຈົ້າມາພົບຂ້ອຍໃນວັນນີ້. 33 ຂອບຄຸນພຣະເຈົ້າໃນຄວາມສະຫລາດຂອງເຈົ້າ ແລະຕໍ່ສິ່ງທີ່ເຈົ້າເຮັດໃນວັນນີ້ ຄືປ້ອງກັນຂ້ອຍຈາກໂທດຂ້າຄົນ ແລະຈາກໂທດທີ່ລົງມືແກ້ແຄ້ນໂດຍຕົນເອງ. 34 ພຣະເຈົ້າຢາເວ ພຣະເຈົ້າແຫ່ງຊາດອິດສະຣາເອນໄດ້ລະງັບຂ້ອຍໄວ້ ບໍ່ໃຫ້ທຳຮ້າຍເຈົ້າ, ແລະຖ້າເຈົ້າບໍ່ຟ້າວມາພົບຂ້ອຍ ຜູ້ຊາຍຂອງນາບານທຸກຄົນຈະຕ້ອງຕາຍໝົດກ່ອນມື້ອື່ນເຊົ້າ.” 35 ແລ້ວດາວິດກໍຮັບເອົາເຄື່ອງຂອງທີ່ນາງນຳມານັ້ນ ແລະກ່າວແກ່ນາງວ່າ, “ໃຫ້ເຈົ້າກັບເມືອສາ ຢ່າໄດ້ກັງວົນເລີຍ ຂ້ອຍຈະເຮັດຕາມທີ່ເຈົ້າຕ້ອງການ.” 36 ນາງອາບີກາຍກັບຄືນເມືອຫານາບານທີ່ກຳລັງກິນລ້ຽງຢ່າງໃຫຍ່ໂຕ ດັ່ງກະສັດຢູ່ໃນເຮືອນຂອງຕົນ. ລາວກຳລັງມືນເມົາແລະມ່ວນຊື່ນຢູ່. ສະນັ້ນ ນາງອາບີກາຍຈຶ່ງບໍ່ໄດ້ເວົ້າຫຍັງສູ່ລາວຟັງຈົນເຖິງມື້ອື່ນເຊົ້າ. 37 ເມື່ອລາວເຊົາເມົາແລ້ວ ນາງຈຶ່ງບອກທຸກສິ່ງໃຫ້ລາວຮູ້. ພໍໄດ້ຍິນດັ່ງນັ້ນ ນາບານກໍລົ້ມລົງ ແລະເປັນອຳມະພາດໄປທັງຕົວ. 38 ປະມານສິບວັນຕໍ່ມາ ພຣະເຈົ້າຢາເວກໍລົງໂທດນາບານ, ແລະລາວຕາຍໄປ. 39 ເມື່ອດາວິດຮັບຂ່າວວ່ານາບານໄດ້ຕາຍໄປແລ້ວ ເພິ່ນຈຶ່ງກ່າວວ່າ, “ສັນລະເສີນພຣະເຈົ້າຢາເວ ພຣະອົງໄດ້ແກ້ແຄ້ນນາບານເພາະລາວໝິ່ນປະໝາດຂ້ານ້ອຍ ແລະພຣະອົງຮັກສາຂ້ານ້ອຍຜູ້ທີ່ເປັນຄົນຮັບໃຊ້ຂອງພຣະອົງບໍ່ໃຫ້ເຮັດຜິດ. ພຣະເຈົ້າຢາເວໄດ້ລົງໂທດນາບານຍ້ອນຄວາມຊົ່ວຊ້າທີ່ລາວໄດ້ເຮັດ.” ແລ້ວດາວິດກໍສົ່ງຄົນໄປສູ່ຂໍເອົານາງອາບີກາຍມາເປັນເມຍຂອງຕົນ. 40 ຄົນຮັບໃຊ້ຂອງດາວິດໄດ້ມາຫາອາບີກາຍທີ່ກາເມນ ແລະເວົ້າກັບນາງວ່າ, “ດາວິດໄດ້ສົ່ງພວກເຮົາມາຂໍເອົາຍານາງໄປເປັນເມຍຂອງເພິ່ນ.” 41 ນາງອາບີກາຍກົ້ມຂາບລົງ ແລະຕອບວ່າ, “ຂ້ອຍເອງເປັນຜູ້ຮັບໃຊ້ຂອງເພິ່ນ ແລະພ້ອມແລ້ວທີ່ຈະລ້າງຕີນໃຫ້ພວກຜູ້ຮັບໃຊ້ຂອງເພິ່ນ.” 42 ແລ້ວນາງກໍຟ້າວລຸກຂຶ້ນ ແລະຂີ່ລໍໄປພ້ອມດ້ວຍສາວໃຊ້ຫ້າຄົນ. ນາງໄປກັບພວກຄົນຮັບໃຊ້ຂອງດາວິດ ແລະກາຍເປັນເມຍຂອງເພິ່ນ. 43 ດາວິດຍັງໄດ້ແຕ່ງງານກັບນາງອາຮີໂນອາມຊາວຢິດຊະເຣນ ແລະບັດນີ້ເພິ່ນຍັງເອົານາງອາບີກາຍມາເປັນເມຍຂອງເພິ່ນອີກ. 44 ໃນລະຫວ່າງນັ້ນ ກະສັດໂຊນກໍໄດ້ມອບນາງມີການລູກສາວຂອງຕົນ ທີ່ເປັນເມຍຂອງດາວິດໃຫ້ປານຕີ ລູກຊາຍຂອງລາອິດ ຊາວການລິມ. |
@ 2012 United Bible Societies. All Rights Reserved.