1 ຊາມູເອນ 20 - ພຣະຄຳພີສັກສິໂຢນາທານຊ່ວຍເຫລືອດາວິດ 1 ຕໍ່ມາ ດາວິດໄດ້ໜີໄປຈາກບ້ານນາໂຢດໃນເມືອງຣາມາ ໄປຫາໂຢນາທານແລະຖາມລາວວ່າ, “ຂ້ອຍໄດ້ເຮັດຜິດຫຍັງ ຂ້ອຍມີຄວາມຜິດຫຍັງ ຂ້ອຍໄດ້ເຮັດຊົ່ວອັນໃດແດ່ຕໍ່ພໍ່ຂອງເຈົ້າ ເພິ່ນຈຶ່ງຢາກຂ້າຂ້ອຍ?” 2 ໂຢນາທານຕອບວ່າ, “ເຈົ້າຈະບໍ່ຕາຍດອກ ພໍ່ຂອງຂ້ອຍໄດ້ບອກໃຫ້ຂ້ອຍຮູ້ທຸກສິ່ງທີ່ເພິ່ນຈະເຮັດ ບໍ່ວ່າຈະເປັນສິ່ງສຳຄັນຫລືບໍ່ກໍຕາມ ເປັນຫຍັງເພິ່ນຈຶ່ງຈະປິດບັງເລື່ອງນີ້ຕໍ່ຂ້ອຍ ຄົງບໍ່ເປັນຢ່າງນັ້ນດອກ.” 3 ແຕ່ດາວິດຕອບວ່າ, “ພໍ່ຂອງເຈົ້າຮູ້ດີວ່າເຈົ້ານິຍົມຊົມຊອບຂ້ອຍຫລາຍເທົ່າໃດ ເພິ່ນຄົງບໍ່ກ້າບອກແຜນການທີ່ເພິ່ນຈະເຮັດໃຫ້ເຈົ້າຮູ້ນຳດອກ ເພາະເຈົ້າອາດໂສກເສົ້າເສຍໃຈ. ຂ້ອຍຂໍສາບານໂດຍພຣະເຈົ້າຢາເວອົງຊົງຊີວິດຢູ່ແລະຕໍ່ເຈົ້າວ່າ ຂ້ອຍເອງຢູ່ຫ່າງຈາກຄວາມຕາຍແຕ່ພຽງກ້າວດຽວເທົ່ານັ້ນ.” 4 ໂຢນາທານເວົ້າວ່າ, “ຂ້ອຍຈະເຮັດທຸກສິ່ງທີ່ເຈົ້າຕ້ອງການ.” 5 ດາວິດບອກລາວວ່າ, “ມື້ອື່ນນີ້ເປັນວັນສະຫລອງເດືອນຂຶ້ນໃໝ່ ຂ້ອຍຕ້ອງຮັບປະທານອາຫານຮ່ວມໂຕະກັບກະສັດ, ແຕ່ຖ້າເຈົ້າເຫັນດີ ຂ້ອຍຈະໄປລີ້ຢູ່ໃນທົ່ງນາຈົນເຖິງຕອນຄໍ່າມື້ຮື. 6 ເມື່ອພໍ່ຂອງເຈົ້າສັງເກດເຫັນວ່າ ຂ້ອຍບໍ່ມີໜ້າຢູ່ໃນທີ່ນັ້ນ ໃຫ້ເຈົ້າບອກເພິ່ນວ່າ ຂ້ອຍຂໍອະນຸຍາດນຳເຈົ້າຟ້າວເມືອເຮືອນທີ່ເບັດເລເຮັມ ເພາະເປັນປີທີ່ບັນດາຄອບຄົວທັງໝົດຖວາຍເຄື່ອງບູຊາປະຈຳປີ. 7 ຖ້າເພິ່ນເວົ້າວ່າ, ‘ບໍ່ເປັນຫຍັງ’ ຂ້ອຍກໍຈະປອດໄພ, ແຕ່ຖ້າເພິ່ນຮ້າຍຂຶ້ນ ເຈົ້າກໍຈະຮູ້ວ່າເພິ່ນຍັງຕັ້ງໃຈທີ່ຈະທຳລາຍຂ້ອຍຢູ່. 8 ຂໍໃຫ້ເຈົ້າຈົ່ງເຮັດຕາມຄຳຂໍຮ້ອງຂອງຂ້ອຍດ້ວຍເທີ້ນ ແລະຈົ່ງຮັກສາຄຳສັນຍາອັນສັກສິດທີ່ເຈົ້າໄດ້ມີຕໍ່ຂ້ອຍ, ແຕ່ຖ້າຂ້ອຍເປັນຄົນຜິດ ກໍຂໍໃຫ້ເຈົ້າເປັນຜູ້ຂ້າຂ້ອຍເອງ ແລະບໍ່ຕ້ອງໃຫ້ພໍ່ຂອງເຈົ້າລົງມືຂ້າຂ້ອຍດອກ.” 9 ໂຢນາທານຕອບວ່າ, “ຢ່າຄິດຢ່າງນັ້ນເລີຍ ຖ້າຂ້ອຍຮູ້ແນ່ວ່າພໍ່ຂອງຂ້ອຍຕັ້ງໃຈທີ່ຈະທຳຮ້າຍເຈົ້າ ຂ້ອຍຈະບໍ່ບອກເຈົ້າຊັ້ນບໍ?” 10 ແລ້ວດາວິດກໍຖາມວ່າ, “ຖ້າພໍ່ຂອງເຈົ້າຕອບຢ່າງໃຈຮ້າຍ ຜູ້ໃດຈະບອກໃຫ້ຂ້ອຍຮູ້?” 11 ໂຢນາທານຕອບວ່າ, “ໃຫ້ພວກເຮົາອອກໄປທີ່ທົ່ງນາ.” ດັ່ງນັ້ນ ທັງສອງຈຶ່ງອອກໄປທີ່ທົ່ງນາ 12 ແລະໂຢນາທານເວົ້າກັບດາວິດວ່າ, “ຂໍໃຫ້ພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ເປັນພະຍານໃຫ້ແກ່ພວກເຮົາ. ມື້ອື່ນກັບມື້ຮືໃນເວລາດຽວກັນນີ້ ຂ້ອຍຈະຖາມພໍ່ຂ້ອຍ. ຖ້າເພິ່ນສະແດງທ່າທາງດີຕໍ່ເຈົ້າ ຂ້ອຍຈະສົ່ງຂ່າວມາບອກເຈົ້າ. 13 ຖ້າເພິ່ນຍັງມີເຈດຕະນາທຳຮ້າຍເຈົ້າ ແລະຖ້າຂ້ອຍບໍ່ສົ່ງຂ່າວມາບອກໃຫ້ເຈົ້າໜີໄປຢ່າງປອດໄພ ກໍຂໍໃຫ້ພຣະເຈົ້າຢາເວລົງໂທດຂ້ອຍເຖິງຕາຍ. ຂໍໃຫ້ພຣະເຈົ້າຢາເວສະຖິດຢູ່ກັບເຈົ້າ ດັ່ງທີ່ພຣະອົງເຄີຍສະຖິດຢູ່ນຳພໍ່ຂອງຂ້ອຍເຖີດ. 14 ຖ້າຂ້ອຍຍັງມີຊີວິດຢູ່ ກໍຂໍໃຫ້ເຈົ້າຮັກສາຄຳສັນຍາອັນສັກສິດນີ້ໄວ້ ແລະສັດຊື່ຕໍ່ຂ້ອຍ, ແຕ່ຖ້າຂ້ອຍຕາຍໄປ 15 ຈົ່ງສະແດງຄວາມສັດຊື່ຢ່າງດຽວກັນນີ້ຕໍ່ຄອບຄົວຂອງຂ້ອຍຕະຫລອດໄປດ້ວຍ. ເມື່ອໃດພຣະເຈົ້າຢາເວໄດ້ທຳລາຍເຫຼົ່າສັດຕູທັງໝົດຂອງເຈົ້າຈາກແຜ່ນດິນໂລກແລ້ວ 16 ກໍຂໍໃຫ້ຄຳສັນຍາທີ່ພວກເຮົາມີຕໍ່ກັນນີ້ຍັງຄົງຢູ່. ຖ້າເຈົ້າເຮັດຜິດຕໍ່ຄຳສັນຍານີ້ ພຣະເຈົ້າຢາເວຈະລົງໂທດເຈົ້າເອງ.” 17 ອີກເທື່ອໜຶ່ງ ໂຢນາທານໄດ້ຂໍຮ້ອງດາວິດໃຫ້ສັນຍາວ່າຈະຮັກຕົນ ເພາະໂຢນາທານຮັກດາວິດຫລາຍເທົ່າກັບຮັກຕົນເອງ. 18 ແລ້ວໂຢນາທານກໍເວົ້າກັບດາວິດວ່າ, “ມື້ອື່ນເປັນວັນສະຫລອງເດືອນຂຶ້ນໃໝ່ ຖ້າເຈົ້າບໍ່ຢູ່ໃນທີ່ນັ້ນ ມັນກໍຈະເປັນການຜິດສັງເກດ. 19 ໃນມື້ຕໍ່ໄປ ການທີ່ເຈົ້າບໍ່ມີໜ້າໃນທີ່ນັ້ນອີກ ກໍຍິ່ງຈະເປັນການຜິດສັງເກດຕື່ມ. ສະນັ້ນ ເຈົ້າຈົ່ງໄປລີ້ຢູ່ບ່ອນທີ່ເຈົ້າໄດ້ໄປລີ້ຢູ່ແຕ່ກ່ອນ ແລະໃຫ້ລີ້ຢູ່ທາງຫລັງຂອງໂງ່ນຫີນໃນທີ່ນັ້ນ. 20 ແລ້ວຂ້ອຍຈະຍິງທະນູສາມລູກໄປທີ່ໂງ່ນຫີນ ບ່ອນທີ່ເປັນເປົ້າໝາຍ. 21 ຫຼັງຈາກນັ້ນ ຂ້ອຍຈະບອກຄົນຮັບໃຊ້ຂອງຂ້ອຍໃຫ້ໄປຊອກຫາລູກທະນູນັ້ນ ແລະຖ້າຂ້ອຍບອກລາວວ່າ, ‘ເບິ່ງດຸ໋ ລູກທະນູຢູ່ທາງດ້ານນີ້ ຈົ່ງໄປເກັບເອົາແມ.’ ໝາຍຄວາມວ່າເຈົ້າປອດໄພແລະໃຫ້ອອກມາໄດ້. ຂ້ອຍຂໍສາບານໂດຍພຣະເຈົ້າຢາເວອົງຊົງຊີວິດຢູ່ວ່າ ເຈົ້າຈະບໍ່ເປັນອັນຕະລາຍແຕ່ຢ່າງໃດ. 22 ແຕ່ຖ້າຂ້ອຍບອກລາວວ່າ, ‘ເບິ່ງດຸ໋ ລູກທະນູຢູ່ທາງດ້ານພຸ້ນ.’ ເຈົ້າຈົ່ງໜີໄປ; ເພາະພຣະເຈົ້າຢາເວກຳລັງສົ່ງເຈົ້າໜີໄປ. 23 ສ່ວນຄຳສັນຍາທີ່ພວກເຮົາມີຕໍ່ກັນນັ້ນ ພຣະເຈົ້າຢາເວຈະໂຜດໃຫ້ພວກເຮົາຮັກສາຕໍ່ກັນໄວ້ໄດ້ສືບໄປຢ່າງແນ່ນອນ.” 24 ສະນັ້ນ ດາວິດຈຶ່ງໄປລີ້ຢູ່ທີ່ທົ່ງນາ. ໃນວັນສະຫລອງເດືອນອອກໃໝ່ ກະສັດໂຊນກໍມາເພື່ອຈະກິນອາຫານ 25 ແລະນັ່ງຢູ່ບ່ອນທີ່ເພິ່ນເຄີຍນັ່ງແປະຝາ. ອັບເນກໍນັ່ງຢູ່ທີ່ນັ້ນຖັດເພິ່ນໄປ ສ່ວນໂຢນາທານນັ່ງກົງກັນຂ້າມກັບເພິ່ນ. ແຕ່ບ່ອນນັ່ງຂອງດາວິດເປົ່າວາງ 26 ເຖິງຢ່າງໃດກໍຕາມ ໃນມື້ນັ້ນກະສັດໂຊນບໍ່ໄດ້ເວົ້າຫຍັງເລີຍ ເພາະເພິ່ນຄິດວ່າ ອາດມີບາງສິ່ງບາງຢ່າງເກີດຂຶ້ນກັບລາວ ແລະລາວອາດຍັງມີມົນທິນຢູ່ກໍໄດ້. 27 ມື້ຕໍ່ມາ ເປັນມື້ຫລັງຈາກເດືອນອອກໃໝ່ ບ່ອນນັ່ງຂອງດາວິດກໍຍັງວ່າງເປົ່າຢູ່ຄືເກົ່າ. ດັ່ງນັ້ນ ກະສັດໂຊນຈຶ່ງຖາມໂຢນາທານວ່າ, “ເປັນຫຍັງທັງມື້ວານນີ້ແລະມື້ນີ້ ດາວິດຈຶ່ງບໍ່ມາຮ່ວມກິນອາຫານນຳ?” 28 ໂຢນາທານຕອບວ່າ, “ລາວຂໍອະນຸຍາດນຳລູກເມືອເມືອງເບັດເລເຮັມ. 29 ລາວເວົ້າວ່າ, ‘ອະນຸຍາດໃຫ້ຂ້ອຍໄປເທາະ ເພາະຄອບຄົວຂອງພວກເຮົາສະຫລອງງານຖວາຍບູຊາຢູ່ໃນເມືອງ ແລະອ້າຍຂອງຂ້ອຍກໍສັ່ງໃຫ້ຂ້ອຍໄປທີ່ນັ້ນ. ຖ້າເຈົ້າເປັນເພື່ອນຂ້ອຍ ຈົ່ງອະນຸຍາດໃຫ້ຂ້ອຍໄປຫາພີ່ນ້ອງຂອງຂ້ອຍສາ.’ ດ້ວຍເຫດນີ້ ດາວິດຈຶ່ງບໍ່ໄດ້ມາຮ່ວມໂຕະນຳພໍ່.” 30 ກະສັດໂຊນໂກດຮ້າຍໃຫຍ່ໃຫ້ໂຢນາທານ ແລະເວົ້າໃຫ້ລາວວ່າ, “ລູກໜ້າຊົ່ວ ບັດນີ້ຂ້ອຍຮູ້ແລ້ວວ່າເຈົ້າເວົ້າເຂົ້າຂ້າງດາວິດ ແລະເຈົ້າກຳລັງເຮັດໃຫ້ເຈົ້າເອງກັບແມ່ເຈົ້າເສື່ອມເສຍກຽດ. 31 ເຈົ້າຮູ້ຫຼືບໍ່ວ່າຕາບໃດທີ່ດາວິດຍັງມີຊີວິດຢູ່ ເຈົ້າຈະບໍ່ໄດ້ເປັນກະສັດຂອງອານາຈັກນີ້ຈັກເທື່ອ. ຈົ່ງໄປນຳຕົວມັນມາດຽວນີ້ ມັນສົມຄວນຈະຕາຍ.” 32 ໂຢນາທານເວົ້າຂຶ້ນວ່າ, “ເປັນຫຍັງລາວຈຶ່ງຄວນຈະຕາຍ ລາວໄດ້ເຮັດຜິດຫຍັງ?” 33 ໃນທັນທີນັ້ນ ກະສັດໂຊນເງືອດຫອກຂອງຕົນອອກໝາຍຈະຂ້າໂຢນາທານ ແລະໂຢນາທານກໍເຂົ້າໃຈຄັກແນ່ວ່າ ພໍ່ຂອງຕົນຕັ້ງໃຈຈະຂ້າດາວິດແທ້. 34 ດັ່ງນັ້ນ ໂຢນາທານຈຶ່ງລຸກຂຶ້ນແລະອອກຈາກໂຕະໄປ ໂດຍບໍ່ກິນຫຍັງໃນມື້ນັ້ນ ຊຶ່ງເປັນມື້ທີສອງຂອງການສະຫລອງເດືອນຂຶ້ນໃໝ່. ລາວໂສກເສົ້າເສຍໃຈຢ່າງໜັກເຖິງເລື່ອງຂອງດາວິດ ຍ້ອນວ່າກະສັດໂຊນໄດ້ດູຖູກດາວິດຢ່າງຮຸນແຮງ. 35 ເຊົ້າມື້ໃໝ່ມາ ໂຢນາທານໄດ້ອອກໄປພົບດາວິດຢູ່ທີ່ທົ່ງນາ ຕາມທີ່ໄດ້ຕົກລົງກັນໄວ້. ລາວເອົາເດັກນ້ອຍຜູ້ໜຶ່ງໄປນຳ 36 ແລະບອກລາວວ່າ, “ຈົ່ງແລ່ນໄປເກັບເອົາລູກທະນູທີ່ຂ້ອຍຈະຍິງໄປເດີ.” ເດັກນ້ອຍຜູ້ນັ້ນກໍແລ່ນໄປ, ໂຢນາທານຈຶ່ງຍິງລູກທະນູຂ້າມຫົວລາວໄປ. 37 ເມື່ອເດັກນ້ອຍໄປຮອດບ່ອນທີ່ລູກທະນູຕົກ ໂຢນາທານຈຶ່ງຮ້ອງໃສ່ລາວວ່າ, “ລູກທະນູຢູ່ທາງດ້ານພຸ້ນ, 38 ຢ່າຢືນຢູ່ຫັ້ນ ຮີບຟ້າວໄປ.” ເດັກນ້ອຍຜູ້ນັ້ນກໍໄປເກັບເອົາລູກທະນູ ແລ້ວກັບມາຫານາຍຂອງຕົນ 39 ໂດຍບໍ່ຮູ້ຄວາມໝາຍຫຍັງໝົດ ມີແຕ່ໂຢນາທານກັບດາວິດເທົ່ານັ້ນທີ່ຮູ້ຈັກ. 40 ໂຢນາທານເອົາອາວຸດຂອງຕົນໃຫ້ເດັກນັ້ນຖື ແລະໃຫ້ເອົາກັບຄືນເມືອໄວ້ໃນເມືອງ. 41 ຫລັງຈາກເດັກນ້ອຍກັບເມືອແລ້ວ ດາວິດໄດ້ອອກມາຈາກດ້ານຫລັງຂອງໂງ່ນຫີນ ກົ້ມຂາບລົງຕໍ່ໜ້າໂຢນາທານສາມເທື່ອ. ດາວິດກັບໂຢນາທານກອດກັນຮ້ອງໄຫ້. ດາວິດໂສກເສົ້າເສຍໃຈຫລາຍກວ່າໂຢນາທານ. 42 ໂຢນາທານເວົ້າກັບດາວິດວ່າ, “ຈົ່ງໄປດ້ວຍຄວາມສະຫງົບສຸກ ຕາມທີ່ເຮົາທັງສອງໄດ້ສາບານໃນນາມຂອງພຣະເຈົ້າຢາເວວ່າ, ພຣະເຈົ້າຢາເວຈະໂຜດໃຫ້ເຈົ້າກັບຂ້ອຍ ແລະເຊື້ອສາຍຂອງເຈົ້າກັບເຊື້ອສາຍຂອງຂ້ອຍເປັນມິດຕໍ່ກັນຕະຫລອດໄປຢ່າງແນ່ນອນ.” ແລ້ວດາວິດກໍຈາກໄປ ແລະໂຢນາທານໄດ້ກັບເມືອໃນເມືອງ. |
@ 2012 United Bible Societies. All Rights Reserved.