1 ຊາມູເອນ 10 - ພຣະຄຳພີສັກສິ1 ແລ້ວຊາມູເອນກໍເອົາເຕົ້ານໍ້າມັນໝາກກອກເທດຖອກໃສ່ຫົວໂຊນ ແລະຈູບລາວ ແລະກ່າວວ່າ, “ພຣະເຈົ້າຢາເວໄດ້ຫົດສົງເຈົ້າໃຫ້ເປັນຜູ້ປົກຄອງຊາວອິດສະຣາເອນປະຊາຊົນຂອງພຣະອົງ. ເຈົ້າຈະປົກຄອງປະຊາຊົນຂອງພຣະເຈົ້າຢາເວ ແລະຊ່ວຍພວກເຂົາໃຫ້ພົ້ນຈາກສັດຕູທັງປວງຂອງພວກເຂົາ. ຂໍ້ພິສູດທີ່ພຣະເຈົ້າຢາເວໄດ້ເລືອກເອົາເຈົ້າ ໃຫ້ຂຶ້ນເປັນຜູ້ປົກຄອງປະຊາຊົນຂອງພຣະອົງ ແມ່ນດັ່ງນີ້: 2 ມື້ນີ້ ເມື່ອເຈົ້າຈາກຂ້ອຍໄປແລ້ວ ເຈົ້າຈະພົບຊາຍສອງຄົນໃກ້ກັບຂຸມຝັງສົບຂອງນາງຣາເຊັນ ທີ່ເຊັນຊາໃນເຂດແດນເບັນຢາມິນ. ພວກເຂົາຈະບອກເຈົ້າວ່າລໍທີ່ເຈົ້າກຳລັງຊອກຫານັ້ນພົບແລ້ວ ເພື່ອວ່າພໍ່ຂອງເຈົ້າຈະບໍ່ເປັນຫ່ວງນຳມັນອີກຕໍ່ໄປ ແຕ່ຄິດເປັນຫ່ວງນຳເຈົ້າຫລາຍກວ່າ ຈົນຖາມຢູ່ສະເໝີວ່າ, ‘ລູກຊາຍຂ້ອຍເປັນຢ່າງໃດເດນໍ?’ 3 ຈາກບ່ອນນີ້ ເຈົ້າຈະໄປຮອດຕົ້ນໄມ້ສັກສິດທີ່ຕາໂບ; ໃນທີ່ນັ້ນ ເຈົ້າຈະພົບຊາຍສາມຄົນ; ພວກເຂົາກຳລັງເດີນທາງໄປຖວາຍເຄື່ອງບູຊາແກ່ພຣະເຈົ້າທີ່ເມືອງເບັດເອນ. ຄົນໜຶ່ງໃນພວກເຂົານັ້ນຈູງແບ້ນ້ອຍສາມໂຕ; ຄົນໜຶ່ງອີກມີເຂົ້າຈີ່ສາມກ້ອນແລະຜູ້ທີສາມມີຖົງເຫຼົ້າອະງຸ່ນ. 4 ພວກເຂົາຈະຄຳນັບເຈົ້າແລະເອົາເຂົ້າຈີ່ສອງກ້ອນໃຫ້ເຈົ້າ ເຈົ້າຈະຮັບເອົາເຂົ້າຈີ່ນັ້ນ. 5 ຕໍ່ຈາກນັ້ນ ເຈົ້າຈະໄປເຖິງເນີນພູຂອງພຣະເຈົ້າທີ່ເມືອງກີເບອາ ບ່ອນທີ່ພວກຟີລິດສະຕິນຕັ້ງຄ້າຍຢູ່. ທີ່ທາງເຂົ້າປະຕູເມືອງ ເຈົ້າຈະພົບຜູ້ທຳນວາຍກຸ່ມໜຶ່ງທີ່ກຳລັງດີດພິນ, ຕີກອງ ແລະເປົ່າຂຸ່ຍ ພວມລົງມາແຕ່ເນີນພູບ່ອນມີແທ່ນບູຊາ. ພວກເຂົາຈະຟ້ອນແລະຮ້ອງໂຮດ້ວຍສຽງດັງ. 6 ໃນທັນໃດນັ້ນ ພຣະວິນຍານຂອງພຣະເຈົ້າຢາເວຈະເຂົ້າຄວບຄຸມເຈົ້າ ແລະເຈົ້າຈະເຂົ້າຮ່ວມກັບພວກເຂົາທຳນວາຍ ແລະເຈົ້າຈະປ່ຽນເປັນຄົນໃໝ່. 7 ເມື່ອເຫດການຢ່າງນີ້ເກີດຂຶ້ນ ຈົ່ງກະທຳຕາມທີ່ພຣະເຈົ້ານຳພາເຈົ້າກະທຳ. 8 ເຈົ້າຈະໄປທີ່ເນີນພູຂອງພຣະເຈົ້າທີ່ເມືອງກິນການກ່ອນຂ້ອຍ ແລະຂ້ອຍຈະໄປພົບເຈົ້າຢູ່ທີ່ນັ້ນ ເພື່ອຖວາຍເຄື່ອງບູຊາກັບຖວາຍບູຊາເພື່ອຄວາມສາມັກຄີທຳ. ຈົ່ງຄອຍຖ້າຢູ່ທີ່ນັ້ນເຈັດວັນ ຈົນກວ່າຂ້ອຍຈະມາ ແລະບອກເຈົ້າວ່າຄວນເຮັດຢ່າງໃດ.” 9 ເມື່ອໂຊນຈາກຊາມູເອນໄປແລ້ວ ພຣະເຈົ້າກໍປ່ຽນໂຊນເປັນຄົນໃໝ່. ທຸກໆສິ່ງທີ່ຊາມູເອນໄດ້ບອກໄວ້ກັບລາວກໍເກີດຂຶ້ນໃນມື້ນັ້ນ. 10 ເມື່ອໂຊນແລະຄົນຮັບໃຊ້ຂອງລາວມາຮອດເມືອງກີເບອາ ກໍມີຜູ້ທຳນວາຍກຸ່ມໜຶ່ງມາພົບລາວ. ໃນທັນໃດນັ້ນ ພຣະວິນຍານຂອງພຣະເຈົ້າກໍເຂົ້າຄວບຄຸມລາວ ແລະນຳລາວໄປພ້ອມທັງທຳນວາຍຮ່ວມກັບພວກເຂົາ. 11 ຜູ້ໃດທີ່ເຄີຍຮູ້ໂຊນມາກ່ອນ ເມື່ອເຫັນລາວກຳລັງເຮັດຢ່າງນັ້ນຕ່າງກໍຖາມກັນວ່າ, “ມີຫຍັງເດນໍ ທີ່ເກີດຂຶ້ນກັບລູກຊາຍຂອງກີເຊ? ໂຊນກາຍເປັນຜູ້ທຳນວາຍແລ້ວບໍ?” 12 ມີຊາຍຄົນໜຶ່ງທີ່ອາໄສຢູ່ໃນທີ່ນັ້ນຖາມວ່າ, “ຜູ້ທຳນວາຍຄົນອື່ນໆເດເປັນຈັ່ງໃດ? ພໍ່ຂອງພວກເຂົາເປັນຜູ້ໃດ?” ດັ່ງນັ້ນ ຈຶ່ງມີຄຳເວົ້າສືບຕໍ່ກັນມາວ່າ, “ໂຊນກາຍເປັນຜູ້ທຳນວາຍແລ້ວບໍ?” 13 ເມື່ອໂຊນເຊົາຟ້ອນແລະເຊົາຮ້ອງໂຮແລ້ວ ລາວກໍໄດ້ໄປທີ່ແທ່ນບູຊາຢູ່ເທິງເນີນພູ. 14 ຜູ້ເປັນລູງເຫັນໂຊນກັບຄົນຮັບໃຊ້ຂອງລາວ ຈຶ່ງຖາມວ່າ, “ພວກເຈົ້າພາກັນໄປໃສມາ?” ໂຊນຕອບວ່າ, “ໄປຊອກຫາລໍມາ ເມື່ອພວກຂ້ອຍບໍ່ພົບລໍຈຶ່ງໄປຫາຊາມູເອນ.” 15 ລູງຂອງໂຊນຖາມວ່າ, “ເພິ່ນບອກພວກເຈົ້າຫຍັງແດ່?” 16 ໂຊນຕອບວ່າ, “ເພິ່ນໄດ້ບອກພວກຂ້ອຍວ່າ ລໍນັ້ນໄດ້ພົບແລ້ວ.” ສ່ວນເລື່ອງທີ່ຊາມູເອນບອກວ່າ, ລາວຈະຂຶ້ນເປັນກະສັດນັ້ນ ລາວບໍ່ໄດ້ບອກໃຫ້ລູງຮູ້ຈັກນຳ. ໂຊນໄດ້ຮັບການສະໜັບສະໜູນໃຫ້ເປັນກະສັດ 17 ແລ້ວຊາມູເອນກໍໄດ້ເອີ້ນປະຊາຊົນມາເຕົ້າໂຮມກັນ ຊ້ອງໜ້າພຣະເຈົ້າຢາເວທີ່ເມືອງມີຊະປາ 18 ແລະກ່າວແກ່ພວກເຂົາວ່າ, “ພຣະເຈົ້າຢາເວ ພຣະເຈົ້າຂອງຊາດອິດສະຣາເອນກ່າວວ່າ, ‘ເຮົາໄດ້ພາພວກເຈົ້າອອກມາຈາກປະເທດເອຢິບ ແລະຊ່ວຍກູ້ເອົາພວກເຈົ້າໃຫ້ພົ້ນຈາກຊາວເອຢິບ ແລະຊົນຊາດອື່ນໆທີ່ຂົ່ມເຫັງພວກເຈົ້າ. 19 ແຕ່ໃນມື້ນີ້ ພວກເຈົ້າໄດ້ປະຖິ້ມພຣະເຈົ້າຂອງພວກເຈົ້າ ຜູ້ທີ່ຊ່ວຍເອົາພວກເຈົ້າໃຫ້ພົ້ນຈາກຄວາມລຳບາກ ຕະຫລອດທັງຄວາມຫຍຸ້ງຍາກທຸກຢ່າງ ແລະຂໍຮ້ອງເຮົາໃຫ້ແຕ່ງຕັ້ງກະສັດຄົນໜຶ່ງໃຫ້ພວກເຈົ້າ ດີແລ້ວ ຖ້າດັ່ງນັ້ນ ໃຫ້ພວກເຈົ້າເຕົ້າໂຮມກັນເປັນເຜົ່າແລະເປັນຕະກຸນຊ້ອງໜ້າພຣະເຈົ້າຢາເວ.”’ 20 ແລ້ວຊາມູເອນກໍເອົາແຕ່ລະເຜົ່າໄປຂ້າງໜ້າ ແລະເຜົ່າເບັນຢາມິນໄດ້ຖືກເລືອກ. 21 ຕໍ່ມາ ຊາມູເອນໄດ້ເອົາຄອບຄົວຕ່າງໆໃນເຜົ່າເບັນຢາມິນໄປຂ້າງໜ້າ ຄອບຄົວຂອງມາຕະຣີຈຶ່ງຖືກເລືອກ. ຕໍ່ມາອີກ ພວກຜູ້ຊາຍໃນຄອບຄົວມາຕະຣີໄດ້ຖືກນຳໄປຂ້າງໜ້າ ຈຶ່ງເລືອກຖືກໂຊນລູກຊາຍຂອງກີເຊ. ພວກເຂົາໄດ້ຊອກຫາລາວ, ແຕ່ເມື່ອຊອກບໍ່ພົບລາວ 22 ພວກເຂົາຈຶ່ງທູນຖາມພຣະເຈົ້າຢາເວວ່າ, “ຍັງມີຄົນອື່ນອີກບໍ?” ພຣະເຈົ້າຢາເວຈຶ່ງຕອບວ່າ, “ໂຊນຢູ່ຫັ້ນເດ ພວມລີ້ຢູ່ທາງຫລັງເຄື່ອງຂອງ.” 23 ດັ່ງນັ້ນ ພວກເຂົາຈຶ່ງຟ້າວໄປນຳເອົາໂຊນມາຫາປະຊາຊົນ ແລະພວກເຂົາກໍເຫັນວ່າຫົວລາວສູງກວ່າຄົນອື່ນໆ. 24 ຊາມູເອນກ່າວແກ່ປະຊາຊົນວ່າ, “ຜູ້ນີ້ແມ່ນຊາຍທີ່ພຣະເຈົ້າຢາເວໄດ້ເລືອກເອົາ ບໍ່ມີຜູ້ໃດໃນທ່າມກາງພວກເຈົ້າຄືກັບລາວ.” ປະຊາຊົນຈຶ່ງພາກັນຮ້ອງຂຶ້ນວ່າ, “ຂໍໃຫ້ກະສັດຈົ່ງໝັ້ນຍືນ!” 25 ຊາມູເອນໄດ້ອະທິບາຍເຖິງສິດ ແລະໜ້າທີ່ຂອງກະສັດໃຫ້ປະຊາຊົນຟັງ ແລະຂຽນຄຳອະທິບາຍເຫຼົ່ານັ້ນໄວ້ຢູ່ໃນປຶ້ມຊ້ອງໜ້າພຣະເຈົ້າຢາເວ ແລ້ວເພິ່ນກໍໃຫ້ທຸກຄົນກັບເມືອເຮືອນຂອງໃຜລາວ. 26 ສ່ວນໂຊນນັ້ນ ລາວໄດ້ກັບເມືອເຮືອນຂອງຕົນທີ່ເມືອງກີເບອາເຊັ່ນກັນ. ຊາຍບາງຄົນທີ່ມີອຳນາດ ຊຶ່ງໄດ້ຮັບການບັນດົນໃຈຈາກພຣະເຈົ້າກໍໄດ້ໄປນຳໂຊນ. 27 ແຕ່ນັກເລງບາງຄົນໄດ້ເວົ້າວ່າ, “ຄົນນີ້ຈະຊ່ວຍພວກເຮົາໄດ້ຢ່າງໃດ?” ພວກເຂົາໝິ່ນປະໝາດໂຊນ ແລະບໍ່ໄດ້ນຳເອົາຂອງຂວັນຫຍັງມາໃຫ້ລາວເລີຍ, ແຕ່ລາວກໍມິດເສີຍ. |
@ 2012 United Bible Societies. All Rights Reserved.