1 ກະສັດ 20 - ພຣະຄຳພີສັກສິເສິກກັບຊີເຣຍ 1 ເຈົ້າເບັນຮາດາດ ກະສັດແຫ່ງຊີເຣຍໄດ້ຮວບຮວມເອົາທະຫານທັງໝົດຂອງເພິ່ນ ແລະມີພວກກະສັດສາມສິບສອງຄົນ ມີຄົນອື່ນອີກສະໜັບສະໜູນໂດຍໃຫ້ຝູງມ້າແລະລົດຮົບ ໄດ້ຍົກທັບຂຶ້ນໄປອ້ອມນະຄອນຊາມາເຣຍໄວ້ແລະໄດ້ເຂົ້າໂຈມຕີເອົາເມືອງ. 2 ເພິ່ນໄດ້ໃຊ້ພວກຜູ້ນຳຂ່າວເຂົ້າໄປໃນເມືອງເພື່ອພົບກະສັດອາຮາບ ກະສັດແຫ່ງອິດສະຣາເອນ ແລະບອກວ່າ, “ກະສັດເບັນຮາດາດຮຽກຮ້ອງໃຫ້ທ່ານຍອມຈຳນົນ 3 ແລະມອບເງິນ, ຄຳ, ພວກເມຍ ແລະພວກລູກຜູ້ແຂງແຮງທີ່ສຸດຂອງທ່ານໃຫ້ເພິ່ນ.” 4 ກະສັດອາຮາບຕອບວ່າ, “ຈົ່ງໄປບອກກະສັດເບັນຮາດາດເຈົ້ານາຍຂອງເຮົາວ່າ ເຮົາຕົກລົງ; ໃຫ້ເພິ່ນເອົາຕົວເຮົາແລະທຸກສິ່ງທີ່ເຮົາມີໄປສາ.” 5 ຕໍ່ມາ ພວກຜູ້ນຳຂ່າວກໍກັບຄືນມາຫາກະສັດອາຮາບອີກ ພ້ອມດ້ວຍຄຳຮຽກຮ້ອງຢ່າງອື່ນຈາກກະສັດເບັນຮາດາດວ່າ, “ເຮົາໄດ້ໃຊ້ຄົນມາບອກທ່ານໃຫ້ມອບເງິນ, ຄຳ, ພວກເມຍ ແລະພວກລູກຂອງທ່ານໃຫ້ເຮົາ 6 ເຖິງຢ່າງນັ້ນກໍຕາມ ບັດນີ້ ເຮົາຈະສົ່ງພວກທະຫານຂອງເຮົາເຂົ້າໄປຄົ້ນໃນຣາຊວັງ ແລະໃນເຮືອນນາຍທະຫານຂອງທ່ານ ເພື່ອຢຶດເອົາສິ່ງຂອງທຸກໆຢ່າງທີ່ພວກເຂົາ ເຫັນວ່າມີຄ່າ. ມື້ອື່ນໃນເວລາດຽວກັນນີ້ ພວກນາຍທະຫານຈະມາໃນຣາຊວັງຂອງທ່ານ.” 7 ແລ້ວກະສັດອາຮາບກໍໄດ້ເອີ້ນພວກຜູ້ນຳຂອງປະເທດມາ ແລະບອກວ່າ, “ພວກທ່ານເຫັນແລ້ວວ່າຊາຍຄົນນີ້ຢາກທຳລາຍເຮົາ. ລາວໄດ້ສົ່ງຜູ້ນຳຂ່າວມາຂໍເອົາບັນດາເມຍ ແລະລູກໆຂອງເຮົາ, ເງິນແລະຄຳຂອງເຮົາ ແລະເຮົາເອງກໍຍອມໃຫ້ແລ້ວ.” 8 ພວກຜູ້ນຳກັບປະຊາຊົນຕອບວ່າ, “ຢ່າຟັງຄວາມລາວ ແລະຢ່າຍອມແພ້ລາວ.” 9 ດັ່ງນັ້ນ ກະສັດອາຮາບຈຶ່ງຕອບພວກຜູ້ນຳຂ່າວຂອງກະສັດເບັນຮາດາດວ່າ, “ຈົ່ງໄປບອກກະສັດຜູ້ເປັນເຈົ້ານາຍຂອງເຮົາວ່າ ເຮົາເອງຍິນຍອມເຮັດຕາມຄຳຮຽກຮ້ອງຄັ້ງທີໜຶ່ງ, ແຕ່ເຮົາເຮັດຕາມຄຳຮຽກຮ້ອງຄັ້ງນີ້ບໍ່ໄດ້.” ພວກຜູ້ນຳຂ່າວໄດ້ກັບໄປລາຍງານກະສັດເບັນຮາດາດ ແລ້ວກໍກັບຄືນມາໃໝ່ 10 ຈາກນັ້ນ ກະສັດເບັນຮາດາດຈຶ່ງໄດ້ສົ່ງຂ່າວມາເຖິງກະສັດອາຮາບວ່າ, “ເຮົາຈະນຳທະຫານມາໃຫ້ຫລາຍພໍ ເພື່ອຈັບເອົາກ້ອນຫີນຄົນລະກ້ອນ ແລະທຳລາຍເມືອງຂອງທ່ານ. ຖ້າເຮົາບໍ່ເຮັດຕາມທີ່ໄດ້ເວົ້ານັ້ນ ກໍຂໍພະທັງຫລາຍລົງໂທດເຮົາໃຫ້ເຖິງຕາຍ.” 11 ກະສັດອາຮາບຕອບວ່າ, “ຈົ່ງໄປບອກກະສັດເບັນຮາດາດວ່າ, ທະຫານທີ່ເກັ່ງກ້າແທ້ນັ້ນອວດອ້າງຫລັງຈາກແລ້ວເສິກ ບໍ່ແມ່ນອວດອ້າງກ່ອນເຮັດເສິກ.” 12 ກະສັດເບັນຮາດາດໄດ້ຮັບຄຳຕອບຈາກກະສັດອາຮາບ ໃນຕອນທີ່ເພິ່ນກັບໝູ່ເພື່ອນຂອງເພິ່ນພ້ອມທັງພວກກະສັດຄົນອື່ນໆ ກຳລັງນັ່ງດື່ມເຫຼົ້າໃນຜ້າເຕັນ. ເພິ່ນຈຶ່ງສັ່ງພວກທະຫານໃຫ້ຕຽມຕົວໂຈມຕີເມືອງ ແລະພວກເຂົາກໍເຂົ້າປະຈຳໜ້າທີ່ຢ່າງພຽບພ້ອມ. 13 ໃນຂະນະດຽວກັນນັ້ນ ກໍມີຜູ້ທຳນວາຍຄົນໜຶ່ງມາຫາກະສັດອາຮາບ ແລະບອກເພິ່ນວ່າ, “ພຣະເຈົ້າຢາເວບອກວ່າ ຢ່າຢ້ານກອງທັບໃຫຍ່ນັ້ນເລີຍ ວັນນີ້ ເຮົາຈະໃຫ້ເຈົ້າມີໄຊຊະນະເໜືອພວກເຂົາ ແລະເຈົ້າຈະຮູ້ວ່າເຮົາແມ່ນພຣະເຈົ້າຢາເວ.” 14 ກະສັດອາຮາບຖາມວ່າ, “ຜູ້ໃດຈະເປັນຜູ້ເຮັດໃນການໂຈມຕີຄັ້ງນີ້?” ຜູ້ທຳນວາຍຕອບວ່າ, “ພຣະເຈົ້າຢາເວບອກວ່າ ແມ່ນພວກທະຫານໜຸ່ມທີ່ຢູ່ໃຕ້ການບັງຄັບບັນຊາຂອງຜູ້ປົກຄອງທ້ອງຖິ່ນຈະເປັນຜູ້ເຮັດ.” ກະສັດຖາມວ່າ, “ຜູ້ໃດຈະເປັນຜູ້ບັນຊາການກອງທັບໃຫຍ່?” ຜູ້ທຳນວາຍຕອບວ່າ, “ທ່ານເອງ.” 15 ດັ່ງນັ້ນ ກະສັດຈຶ່ງໄດ້ສັ່ງໃຫ້ບັນດາທະຫານໜຸ່ມທຸກຄົນ ທີ່ຢູ່ພາຍໃຕ້ການບັງຄັບບັນຊາຂອງຜູ້ປົກຄອງທ້ອງຖິ່ນມາ ທັງໝົດມີສອງຮ້ອຍສາມສິບສອງຄົນ. ແລ້ວເພິ່ນກໍເອີ້ນເອົາພວກທະຫານອິດສະຣາເອນມາຄືກັນຮວມທັງໝົດມີເຈັດພັນຄົນ. 16 ການໂຈມຕີໄດ້ເລີ່ມຂຶ້ນໃນຕອນທ່ຽງ ໃນຂະນະທີ່ກະສັດເບັນຮາດາດກັບພັນທະມິດຂອງເພິ່ນສາມສິບສອງຄົນກຳລັງດື່ມເຫຼົ້າເມົາຢູ່ໃນຜ້າເຕັນ. 17 ພວກທະຫານໜຸ່ມໄດ້ມຸ່ງໜ້າເຂົ້າໄປກ່ອນ. ພວກສອດແນມທີ່ກະສັດເບັນຮາດາດສົ່ງອອກໄປໄດ້ກັບຄືນມາລາຍງານເພິ່ນວ່າ, “ໄດ້ມີທະຫານໝວດໜຶ່ງກຳລັງມາແຕ່ເມືອງຊາມາເຣຍ.” 18 ເພິ່ນສັ່ງວ່າ, “ໃຫ້ພວກເຈົ້າຈັບພວກເຂົາທັງເປັນ ບໍ່ວ່າພວກເຂົາມາສູ້ຮົບ ຫລືມາເຈລະຈາສັນຕິພາບກໍຕາມ.” 19 ພວກທະຫານໜຸ່ມໄດ້ນຳພາການບຸກໂຈມຕີ ໂດຍມີກອງທັບອິດສະຣາເອນຕິດຕາມໄປດ້ວຍ. 20 ແຕ່ລະຄົນຕ່າງກໍໄດ້ຂ້າຄູ່ຕໍ່ສູ້ຂອງຕົນ. ຝ່າຍພວກຊີເຣຍນັ້ນໄດ້ປົບໜີໄປ ແລະພວກອິດສະຣາເອນກໍໄລ່ຕິດຕາມພວກເຂົາໄປຢ່າງບໍ່ລົດລະ ແຕ່ກະສັດເບັນຮາດາດໄດ້ຂີ່ມ້າປົບໜີໄປ ໂດຍມີທະຫານມ້າບາງຄົນຕິດຕາມໄປນຳ. 21 ກະສັດອາຮາບໄດ້ຍົກທັບອອກໄປ, ຢຶດເອົາ ມ້າແລະລົດຮົບ ແລະຕີຊາວຊີເຣຍໃຫ້ພ່າຍແພ້ຢ່າງໜັກ. 22 ຫຼັງຈາກນັ້ນ ມີຜູ້ທຳນວາຍຄົນໜຶ່ງໄດ້ໄປຫາກະສັດອາຮາບ ແລະບອກວ່າ, “ໃຫ້ທ່ານກັບຄືນເມືອຮວບຮວມເອົາກຳລັງຂອງທ່ານ ແລະວາງແຜນຢ່າງລະມັດລະວັງ ເພາະກະສັດຊີເຣຍຈະກັບຄືນມາໂຈມຕີອີກໃນລະດູໃບໄມ້ປົ່ງໃນປີຕໍ່ໄປ.” ພວກຊີເຣຍມາໂຈມຕີຄັ້ງທີສອງ 23 ບັນດາຂ້າຣາຊການຂອງກະສັດເບັນຮາດາດໄດ້ເວົ້າກັບເພິ່ນວ່າ, “ບັນດາພະຂອງຊາວອິດສະຣາເອນເປັນພຣະເຈົ້າແຫ່ງພູຜາ. ດັ່ງນັ້ນ ຊາວອິດສະຣາເອນຈຶ່ງເອົາຊະນະພວກເຮົາ, ແຕ່ຖ້າພວກເຮົາຕໍ່ສູ້ພວກເຂົາໃນທີ່ຮາບພຽງ ພວກເຮົາຈະເອົາຊະນະພວກເຂົາໄດ້ຢ່າງແນ່ນອນ. 24 ບັດນີ້ຂໍທ່ານຈົ່ງປົດພວກກະສັດສາມສິບສອງຄົນນີ້ອອກຈາກຕຳແໜ່ງຜູ້ບັນຊາການ ແລະແຕ່ງຕັ້ງພວກຜູ້ບັນຊາການສະໜາມຮົບແທນ. 25 ຈົ່ງລະດົມເອົາທະຫານໃຫ້ຫລາຍເທົ່າກັບຈຳນວນທີ່ໄດ້ໜີໄປຈາກທ່ານ ສ່ວນມ້າແລະລົດຮົບກໍໃຫ້ມີຈຳນວນເທົ່າເກົ່າ. ແລ້ວພວກເຮົາກໍຈະສູ້ຮົບພວກອິດສະຣາເອນໃນບ່ອນຮາບພຽງ ແລະໃນຄັ້ງນີ້ ພວກເຮົາຈະເອົາຊະນະພວກເຂົາໃຫ້ໄດ້.” ກະສັດເບັນຮາດາດໄດ້ຕົກລົງເຮັດຕາມຄຳແນະນຳຂອງພວກເຂົາ. 26 ພໍເຖິງລະດູໃບໄມ້ປົ່ງ ເພິ່ນກໍລະດົມເອົາທະຫານຂອງເພິ່ນ ແລະຍົກທັບໄປເມືອງອາເຟັກເພື່ອໂຈມຕີຊາວອິດສະຣາເອນ. 27 ຝ່າຍຊາວອິດສະຣາເອນກໍເກນເອົາທະຫານປະກອບອາວຸດໃຫ້ ແລະຕຽມເອົາສະບຽງອາຫານ ແລ້ວຍົກທັບອອກໄປຕັ້ງຄ້າຍເປັນສອງໝວດປິ່ນໜ້າໃສ່ພວກຊີເຣຍ. ເມື່ອປຽບທຽບພວກອິດສະຣາເອນໃສ່ກັບພວກຊີເຣຍທີ່ກະຈັດກະຈາຍໄປທົ່ວທົ່ງນາແລ້ວ ພວກອິດສະຣາເອນກໍເບິ່ງຄືຝູງແບ້ນ້ອຍໆສອງຝູງ. 28 ມີຜູ້ທຳນວາຍຄົນໜຶ່ງໄດ້ໄປຫາກະສັດອາຮາບ ແລະບອກວ່າ, “ພຣະເຈົ້າຢາເວບອກໄວ້ດັ່ງນີ້: ‘ເນື່ອງຈາກຊາວຊີເຣຍເວົ້າວ່າ ເຮົາເປັນພຣະເຈົ້າຢາເວແຫ່ງພູຜາ ແລະບໍ່ແມ່ນພຣະເຈົ້າແຫ່ງບ່ອນຮາບພຽງ’ ເຮົາຈະໃຫ້ເຈົ້າມີໄຊຊະນະເໜືອກອງທັບໃຫຍ່ຂອງພວກເຂົາ ແລ້ວເຈົ້າແລະປະຊາຊົນຂອງເຈົ້າກໍຈະໄດ້ຮູ້ວ່າ ເຮົາແມ່ນພຣະເຈົ້າຢາເວ.” 29 ພວກຊີເຣຍແລະພວກອິດສະຣາເອນຢູ່ໃນຄ້າຍ ປິ່ນໜ້າໃສ່ກັນເປັນເວລາເຈັດມື້. ໃນມື້ທີເຈັດທັງສອງຝ່າຍໄດ້ເລີ່ມຕໍ່ສູ້ກັນ ຊາວອິດສະຣາເອນໄດ້ຂ້າທະຫານລາບຊີເຣຍເປັນຈຳນວນໜຶ່ງຮ້ອຍພັນຄົນ. 30 ສ່ວນພວກທີ່ລອດຕາຍນັ້ນໄດ້ປົບໜີໄປເມືອງອາເຟັກ, ແຕ່ພວກນີ້ໄດ້ຖືກກຳແພງເຈື່ອນທັບຕາຍຊາວເຈັດພັນຄົນ. ກະສັດເບັນຮາດາດໄດ້ປົບໜີໄປໃນເມືອງນັ້ນເຊັ່ນດຽວກັນ ແລະເຂົ້າໄປລີ້ຢູ່ທາງຫລັງຫ້ອງຂອງເຮືອນຫລັງໜຶ່ງ. 31 ພວກຂ້າຣາຊການຂອງເພິ່ນໄດ້ເຂົ້າມາບອກວ່າ, “ພວກຂ້ານ້ອຍໄດ້ຍິນວ່າກະສັດແຫ່ງອິດສະຣາເອນມີໃຈເມດຕາ. ດັ່ງນັ້ນ ຈົ່ງໃຫ້ພວກຂ້ານ້ອຍເອົາຜ້າກະສອບຮັດແອວ ແລະເອົາເຊືອກຄ້ອງຄໍໄປຫາເພິ່ນ ແລະບາງທີເພິ່ນຈະໄວ້ຊີວິດຂອງທ່ານກໍໄດ້.” 32 ດັ່ງນັ້ນ ພວກເຂົາຈຶ່ງເອົາຜ້າກະສອບເຂົ້າຮັດແອວ ແລະເອົາເຊືອກຄ້ອງຄໍໄປຫາກະສັດອາຮາບ ແລະກ່າວວ່າ, “ກະສັດເບັນຮາດາດຂໍຮ້ອງທ່ານໃຫ້ໄວ້ຊີວິດເພິ່ນ.” ກະສັດອາຮາບຕອບວ່າ, “ເພິ່ນຍັງມີຊີວິດຢູ່ບໍ? ດີແລ້ວ ເພິ່ນກໍເປັນດັ່ງນ້ອງຊາຍຄົນໜຶ່ງຂອງເຮົານັ້ນເອງ.” 33 ພວກຂ້າຣາຊການຂອງກະສັດເບັນຮາດາດຄອຍຖ້າຫາໂອກາດຢູ່. ເມື່ອກະສັດອາຮາບເວົ້າຂຶ້ນວ່າ, “ນ້ອງຊາຍ” ພວກເຂົາຈຶ່ງກ່າວທັນທີວ່າ, “ດັ່ງທີ່ທ່ານເວົ້ານັ້ນແລ້ວ ເບັນຮາດາດແມ່ນນ້ອງຊາຍຂອງທ່ານ.” ກະສັດອາຮາບສັ່ງວ່າ, “ຈົ່ງພາລາວມາຫາເຮົາ” ເມື່ອກະສັດເບັນຮາດາດມາຮອດແລ້ວ ກະສັດອາຮາບກໍເຊີນເພິ່ນຂຶ້ນຂີ່ລົດມ້າໄປນຳ. 34 ກະສັດເບັນຮາດາດກ່າວແກ່ເພິ່ນວ່າ, “ຂ້າພະເຈົ້າຈະເອົາເມືອງທີ່ພໍ່ຂອງຂ້າພະເຈົ້າ ຢຶດເອົາຈາກພໍ່ຂອງທ່ານນັ້ນຄືນໃຫ້ທ່ານ ເພື່ອທ່ານຈະໄດ້ສ້າງສູນການຄ້າຂອງທ່ານໄວ້ໃນເມືອງດາມັສກັດ ດັ່ງທີ່ພໍ່ຂອງຂ້າພະເຈົ້າໄດ້ສ້າງໄວ້ທີ່ເມືອງຊາມາເຣຍ.” ກະສັດອາຮາບຕອບວ່າ, “ເພາະເງື່ອນໄຂນີ້ ຂ້າພະເຈົ້າຈະປ່ອຍທ່ານໄປ.” ເພິ່ນເຮັດຂໍ້ຕົກລົງກັບກະສັດເບັນຮາດາດ ແລ້ວກໍປ່ອຍເພິ່ນໄປ. ຜູ້ທຳນວາຍກ່າວໂທດອາຮາບ 35 ຕໍ່ມາ ພຣະເຈົ້າຢາເວໄດ້ໃຊ້ລູກຜູ້ທຳນວາຍຄົນໜຶ່ງ ໄປບອກເພື່ອນຂອງຕົນທີ່ເປັນຜູ້ທຳນວາຍໃນກຸ່ມດຽວກັນວ່າ, “ເຈົ້າຈົ່ງຕົບໜ້າຂອງຂ້ອຍແມ,” ແຕ່ລາວບໍ່ຍອມເຮັດ. 36 ສະນັ້ນ ລາວຈຶ່ງບອກວ່າ, “ຍ້ອນເຈົ້າຂັດຂືນຄຳສັ່ງຂອງພຣະເຈົ້າຢາເວ ພໍເຈົ້າຈາກຂ້ອຍໄປ ສິງຈະກັດເຈົ້າຈົນຕາຍ.” ພໍລາວຈາກໄປ ສິງໂຕໜຶ່ງກໍມາກັດລາວຈົນຕາຍ. 37 ແລ້ວຜູ້ທຳນວາຍຄົນເກົ່ານີ້ກໍໄປຫາຊາຍຄົນໜຶ່ງອີກ ແລະສັ່ງວ່າ, “ຕົບໜ້າຂ້ອຍດູ.” ຊາຍຜູ້ນີ້ກໍປະຕິບັດຕາມ; ລາວຕົບໜ້າຜູ້ທຳນວາຍຄົນນີ້ບາດໜຶ່ງໝົດແຮງ ຈົນຜູ້ທຳນວາຍເຈັບປວດ. 38 ຜູ້ທຳນວາຍຈຶ່ງເອົາຜ້າພັນໜ້າໄວ້, ປອມຕົວໄປຢືນຢູ່ແຄມຖະໜົນ ແລະຄອຍຖ້າໃຫ້ກະສັດອິດສະຣາເອນຜ່ານມາ. 39 ພໍກະສັດອິດສະຣາເອນຜ່ານມາ ຜູ້ທຳນວາຍຄົນນີ້ກໍຮ້ອງໃສ່ເພິ່ນວ່າ, “ຂ້າແດ່ພະຣາຊາ ເມື່ອຂ້ານ້ອຍຕໍ່ສູ້ໃນສະໜາມຮົບ ມີທະຫານຄົນໜຶ່ງພາຊະເລີຍມາຫາຂ້ານ້ອຍ ແລະສັ່ງວ່າ, ‘ຈົ່ງເຝົ້າຮັກສາຊາຍຄົນນີ້; ຖ້າລາວໜີໄປ ເຈົ້າຈະຕ້ອງເອົາຊີວິດຂອງເຈົ້າເປັນຄ່າໃຊ້ທົດແທນ ຫລືເອົາເງິນສົດສາມພັນຫລຽນໃຊ້ແທນ.’ 40 ແຕ່ຂ້ານ້ອຍຫຍຸ້ງຢູ່ກັບວຽກອື່ນໆ ແລະຊະເລີຍກໍໜີໄປ.” ກະສັດຕອບວ່າ, “ເຈົ້າຈະຖືກລົງໂທດ ເພາະເຈົ້າກ່າວໂທດໃສ່ເຈົ້າເອງ.” 41 ແລ້ວຜູ້ທຳນວາຍກໍດືງຜ້າພັນໜ້າອອກ ທັນໃດນັ້ນ ກະສັດກໍຈື່ໄດ້ວ່າ ລາວເປັນຜູ້ທຳນວາຍຄົນໜຶ່ງ. 42 ຜູ້ທຳນວາຍຈຶ່ງກ່າວຕໍ່ກະສັດວ່າ, “ນີ້ຄືຖ້ອຍຄຳຂອງພຣະເຈົ້າຢາເວ: ‘ເພາະເຈົ້າປ່ອຍຄົນທີ່ເຮົາສັ່ງໃຫ້ຂ້າຖິ້ມໜີໄປ ເຈົ້າຈະຕ້ອງເອົາຊີວິດຂອງເຈົ້າເອງທົດແທນຄືນ ແລະກອງທັບຂອງເຈົ້າກໍຈະຖືກທຳລາຍ ທີ່ເຈົ້າໄດ້ປ່ອຍໃຫ້ກອງທັບຂອງລາວໜີໄປ.”’ 43 ສ່ວນກະສັດກໍໄດ້ກັບຄືນສູ່ນະຄອນຊາມາເຣຍ ດ້ວຍຄວາມກັງວົນແລະເປັນທຸກໃຈ. |
@ 2012 United Bible Societies. All Rights Reserved.