1 ກະສັດ 19 - ພຣະຄຳພີສັກສິເອລີຢາເທິງພູເຂົາຊີນາຍ 1 ກະສັດອາຮາບເລົ່າເລື່ອງທັງໝົດທີ່ເອລີຢາໄດ້ເຮັດນັ້ນສູ່ນາງເຢເຊເບນເມຍຂອງຕົນຟັງ ແລະບອກເຖິງເລື່ອງທີ່ເອລີຢາໄດ້ຂ້າພວກຜູ້ທຳນວາຍທັງໝົດພະບາອານຢ່າງໃດ. 2 ດັ່ງນັ້ນ ນາງເຢເຊເບນຈຶ່ງໃຊ້ຄົນອອກໄປບອກເອລີຢາວ່າ, “ມື້ອື່ນເວລາດຽວກັນນີ້ ຖ້າຂ້ອຍບໍ່ໄດ້ຂ້າເຈົ້າ ດັ່ງທີ່ເຈົ້າໄດ້ຂ້າບັນດາຜູ້ທຳນວາຍພະບາອານນັ້ນ ກໍຂໍພະທັງຫລາຍເຮັດໃຫ້ຂ້ອຍຕາຍສາເຖີດ.” 3 ເອລີຢາເກີດຢ້ານກົວຫລາຍ ຈຶ່ງໜີເອົາຊີວິດລອດ ເພິ່ນໄດ້ເອົາຄົນຮັບໃຊ້ຂອງເພິ່ນໄປທີ່ເມືອງເບເອນເຊບາໃນອານາຈັກຢູດາຍ. ແລ້ວເອລີຢາກໍໄດ້ປະຄົນຮັບໃຊ້ຂອງຕົນໄວ້ຢູ່ໃນເມືອງນີ້ 4 ສ່ວນເພິ່ນເອງນັ້ນຍ່າງໄປຕາມຖິ່ນແຫ້ງແລ້ງກັນດານໝົດມື້. ເພິ່ນຢຸດນັ່ງພັກຢູ່ໃຕ້ຮົ່ມໄມ້ຕົ້ນໜຶ່ງ ແລະຄິດຢາກຈະຕາຍ. ເພິ່ນພາວັນນາອະທິຖານວ່າ, “ຂ້າແດ່ພຣະເຈົ້າຢາເວ ຂໍໂຜດເອົາຊີວິດຂອງຂ້ານ້ອຍໄປເທີ້ນ ເພາະຂ້ານ້ອຍບໍ່ດີໄປກວ່າປູ່ຍ່າຕາຍາຍຂອງຂ້ານ້ອຍ.” 5 ເພິ່ນເອນຕົວລົງຢູ່ໃຕ້ຕົ້ນໄມ້ນັ້ນ ແລະນອນຫລັບໄປ. ໃນທັນໃດ ມີເທວະດາຕົນໜຶ່ງມາຊຸກເພິ່ນ ແລະກ່າວວ່າ, “ຈົ່ງລຸກຂຶ້ນ ແລະກິນອາຫານສາແມ.” 6 ເມື່ອເພິ່ນຫລຽວໄປຮອບໆກໍເຫັນເຂົ້າຈີ່ກ້ອນໜຶ່ງ ແລະໄຫນໍ້າຢູ່ໃກ້ກັບຫົວຂອງຕົນ. ເພິ່ນຈຶ່ງກິນແລະດື່ມແລ້ວນອນລົງອີກ. 7 ແຕ່ເທວະດາຂອງພຣະເຈົ້າຢາເວໄດ້ກັບຄືນມາປຸກເພິ່ນອີກເປັນຄັ້ງທີສອງ ແລະບອກວ່າ, “ຈົ່ງລຸກຂຶ້ນ ແລະກິນອາຫານສາ ເພາະການເດີນທາງຄັ້ງນີ້ໜັກໜ່ວງໂພດສຳລັບເຈົ້າ.” 8 ເອລີຢາກໍລຸກຂຶ້ນກິນແລະດື່ມ; ດ້ວຍອາຫານນັ້ນໄດ້ເຮັດໃຫ້ເພິ່ນມີເຫື່ອແຮງຍ່າງໄດ້ສີ່ສິບວັນ ໄປສູ່ພູເຂົາຊີນາຍ ພູຂອງພຣະເຈົ້າ. 9 ແລ້ວເພິ່ນກໍເຂົ້າໄປນອນຄ້າງຄືນຢູ່ໃນຖໍ້າ. ໃນທັນໃດ ຖ້ອຍຄຳຂອງພຣະເຈົ້າຢາເວໄດ້ມາເຖິງເພິ່ນວ່າ, “ເອລີຢາ ເຈົ້າເຮັດຫຍັງຢູ່ທີ່ນີ້?” ອົງພຣະຜູ້ເປັນເຈົ້າປາກົດແກ່ເອລີຢາ 10 ເພິ່ນຕອບວ່າ, “ຂ້າແດ່ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ ຂ້ານ້ອຍຮັບໃຊ້ພຽງແຕ່ພຣະອົງມາຕະຫລອດ, ແຕ່ປະຊາຊົນອິດສະຣາເອນໄດ້ລະເມີດພັນທະສັນຍາຂອງພຣະອົງ, ໄດ້ທຳລາຍແທ່ນບູຊາຂອງພຣະອົງ ແລະໄດ້ຂ້າພວກຜູ້ທຳນວາຍຂອງພຣະອົງ. ມີແຕ່ຂ້ານ້ອຍຄົນດຽວເຫລືອຢູ່ ແລະພວກເຂົາກໍພະຍາຍາມຈະຂ້າຂ້ານ້ອຍເສຍ.” 11 ພຣະອົງກ່າວຕໍ່ເພິ່ນວ່າ, “ຈົ່ງອອກໄປຢືນຢູ່ຕໍ່ໜ້າພຣະເຈົ້າຢາເວເທິງຈອມພູນີ້ ແລ້ວພຣະເຈົ້າຢາເວຈະກາຍໄປ.” ກ່ອນໜ້າພຣະເຈົ້າຢາເວສະເດັດໄປກໍເກີດມີລົມພະຍຸຮ້າຍຈົນເຮັດໃຫ້ພູເຂົາຍະອອກ ແລະເຮັດໃຫ້ກ້ອນຫີນແຕກເປັນກ້ອນໆ, ແຕ່ພຣະເຈົ້າຢາເວບໍ່ໄດ້ຢູ່ໃນລົມນັ້ນ. ຫລັງຈາກນັ້ນກໍເກີດແຜ່ນດິນໄຫວ, ແຕ່ພຣະເຈົ້າຢາເວບໍ່ໄດ້ຢູ່ໃນແຜ່ນດິນໄຫວນີ້. 12 ຫລັງຈາກແຜ່ນດິນໄຫວກໍມີໄຟ, ແຕ່ພຣະເຈົ້າຢາເວບໍ່ໄດ້ຢູ່ໃນໄຟນີ້. ແລະຫລັງຈາກໄຟກໍມີສຽງກະຊິບເບົາໆດັງແວ່ວມາ. 13 ເມື່ອເອລີຢາໄດ້ຍິນສຽງນີ້ ເພິ່ນກໍເອົາເສື້ອຄຸມຂອງເພິ່ນປົກໜ້າໄວ້ ແລະອອກໄປຢືນຢູ່ປາກຖໍ້າ. ສຽງນັ້ນກ່າວຕໍ່ເພິ່ນວ່າ, “ເອລີຢາ ເຈົ້າເຮັດຫຍັງຢູ່ທີ່ນີ້?” 14 ເພິ່ນຕອບວ່າ, “ຂ້າແດ່ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ ຂ້ານ້ອຍຮັບໃຊ້ພຽງແຕ່ພຣະອົງມາໂດຍຕະຫລອດ, ແຕ່ປະຊາຊົນອິດສະຣາເອນໄດ້ລະເມີດພັນທະສັນຍາຂອງພຣະອົງ, ໄດ້ທຳລາຍແທ່ນບູຊາຂອງພຣະອົງ ແລະໄດ້ຂ້າພວກຜູ້ທຳນວາຍຂອງພຣະອົງ. ມີແຕ່ຂ້ານ້ອຍຄົນດຽວເຫລືອຢູ່ ແລະພວກເຂົາກໍພະຍາຍາມຈະຂ້າຂ້ານ້ອຍເສຍ.” 15 ແລ້ວພຣະເຈົ້າຢາເວກໍກ່າວຕໍ່ເພິ່ນວ່າ, “ຈົ່ງກັບຄືນໄປຖິ່ນແຫ້ງແລ້ງກັນດານໃກ້ກັບເມືອງດາມັສກັດ ແລ້ວເຂົ້າໄປໃນເມືອງ ແລະເອົານໍ້າມັນເຈີມຫົດສົງຮາຊາເອນ ໃຫ້ເປັນກະສັດແຫ່ງຊີເຣຍ; 16 ເອົານໍ້າມັນເຈີມຫົດສົງເຢຮູລູກຊາຍຂອງນິມຊີ ໃຫ້ເປັນກະສັດແຫ່ງອິດສະຣາເອນ ແລະເອົານໍ້າມັນເຈີມຫົດສົງເອລີຊາລູກຊາຍຂອງຊາຟັດຊາວອາເບັນເມໂຮລາ ໃຫ້ເປັນຜູ້ທຳນວາຍສືບແທນເຈົ້າ. 17 ຜູ້ໃດຜູ້ໜຶ່ງທີ່ໜີພົ້ນຈາກຖືກຮາຊາເອນຂ້າ ຈະຖືກເຢຮູຂ້າ ຜູ້ໃດຜູ້ໜຶ່ງທີ່ໜີພົ້ນຈາກຖືກເຢຮູຂ້າ ຈະຖືກເອລີຊາຂ້າ. 18 ແຕ່ຢ່າງໃດກໍຕາມ ເຮົາຈະໃຫ້ມີເຈັດພັນຄົນ ມີຊີວິດຢູ່ໃນອິດສະຣາເອນ ຄືພວກທີ່ສັດຊື່ຕໍ່ເຮົາ ແລະບໍ່ໄດ້ຂາບໄຫວ້ພະບາອານ ຫລືຈູບຮູບເຄົາຣົບຂອງມັນ.” ອົງພຣະຜູ້ເປັນເຈົ້າເອີ້ນເອົາເອລີຊາ 19 ເອລີຢາໄດ້ຈາກໄປ ແລະພົບເອລີຊາລູກຂອງຊາຟັດກຳລັງໄຖນາ; ໄດ້ມີງົວສິບເອັດຄູ່ຍ່າງອອກກ່ອນລາວ, ແຕ່ລາວເອງໄດ້ໃຊ້ງົວຄູ່ທີສິບສອງໄຖໄປຕາມຫລັງ. ເອລີຢາແກ້ເສື້ອຄຸມຂອງຕົນອອກ ແລະຫົ່ມໃຫ້ເອລີຊາ. 20 ແລ້ວເອລີຊາກໍໄດ້ປະງົວຂອງຕົນ ແລະແລ່ນຕາມຫລັງເອລີຢາໄປ ທັງເວົ້າວ່າ, “ຂໍໃຫ້ຂ້ານ້ອຍໄປຈູບສັ່ງລາພໍ່ແມ່ຂອງຂ້ານ້ອຍສາກ່ອນ ແລ້ວຂ້ານ້ອຍກໍຈະໄປກັບທ່ານ.” ເອລີຢາຕອບວ່າ, “ບໍ່ເປັນຫຍັງດອກ ຄືນໄປສາ ຂ້ອຍຈະບໍ່ຫ້າມເຈົ້າ.” 21 ແລ້ວເອລີຊາກໍໄດ້ໄປຂ້າງົວຄູ່ນັ້ນຂອງຕົນ ແລະເອົາຊີ້ນເຮັດອາຫານ ໂດຍໃຊ້ໄຖເປັນຟືນດັງໄຟ. ລາວແບ່ງຊີ້ນໃຫ້ຄົນທັງຫລາຍ ແລະພວກເຂົາກໍກິນ. ແລ້ວລາວກໍຈາກໄປ ແລະຕິດຕາມເອລີຢາ ໂດຍເປັນຜູ້ຮັບໃຊ້ຂອງເພິ່ນ. |
@ 2012 United Bible Societies. All Rights Reserved.