1 ກະສັດ 13 - ພຣະຄຳພີສັກສິ1 ຍັງມີຄົນຂອງພຣະເຈົ້າຄົນໜຶ່ງຈາກຢູດາຍ ທີ່ໄດ້ຮັບຖ້ອຍຄຳຈາກພຣະເຈົ້າຢາເວໃຫ້ໄປທີ່ເມືອງເບັດເອນ. ເພິ່ນໄດ້ມາຮອດບ່ອນນັ້ນໃນຂະນະທີ່ກະສັດເຢໂຣໂບອາມ ກຳລັງຢືນຖວາຍເຄື່ອງບູຊາທີ່ແທ່ນ. 2 ຜູ້ນັ້ນໄດ້ຮ້ອງຕໍ່ສູ້ແທ່ນບູຊາດ້ວຍຖ້ອຍຄຳຂອງພຣະເຈົ້າຢາເວ ແລະກ່າວວ່າ, “ໂອ ແທ່ນບູຊາ ແທ່ນບູຊາເອີຍ! ພຣະເຈົ້າຢາເວກ່າວດັ່ງນີ້: ‘ມີເດັກນ້ອຍຄົນໜຶ່ງຈະເກີດມາໃນຄອບຄົວຂອງດາວິດ ທີ່ຈະຊື່ວ່າ ໂຢສີຢາ. ລາວຈະປະຫານບັນດາປະໂຣຫິດທີ່ຮັບໃຊ້ພະຂອງຄົນຕ່າງຊາດເທິງແທ່ນບູຊານີ້ ແລະຜູ້ທີ່ຖວາຍເຄື່ອງບູຊາເທິງແທ່ນບູຊານີ້ ແລະລາວກໍຈະເຜົາກະດູກຄົນໃສ່ເທິງເຈົ້າ.”’ 3 ແລ້ວລາວໄດ້ໃຫ້ມີໝາຍສຳຄັນໃນວັນດຽວກັນວ່າ, “ນີ້ເປັນໝາຍສຳຄັນວ່າ ພຣະເຈົ້າຢາເວໄດ້ກ່າວວ່າ, ‘ແທ່ນບູຊານີ້ຈະແຕກພັງທະລາຍລົງ ແລະຂີ້ເຖົ່າປົນໄຂມັນທີ່ເທິງແທ່ນນີ້ກໍຈະກະຈັດກະຈາຍໄປ.”’ 4 ເມື່ອກະສັດເຢໂຣໂບອາມໄດ້ຍິນຖ້ອຍຄຳທີ່ຄົນຂອງພຣະເຈົ້າໄດ້ຮ້ອງຕໍ່ສູ້ແທ່ນບູຊາທີ່ເບັດເອນ. ເພິ່ນກໍຊີ້ໜ້າຊາຍຜູ້ນັ້ນ ແລະສັ່ງວ່າ, “ຈັບຊາຍຄົນນີ້ໄວ້.” ໃນທັນໃດນັ້ນ ແຂນຂອງກະສັດກໍລ່ອຍຈົນພັບຄືນບໍ່ໄດ້. 5 ແທ່ນບູຊາກໍແຕກພັງທະລາຍລົງຢ່າງກະທັນຫັນ ແລະຂີ້ເຖົ່າປົນໄຂມັນກໍຕົກລົງດິນ ຊຶ່ງເປັນໄປຕາມໝາຍສຳຄັນທີ່ຄົນຂອງພຣະເຈົ້າໄດ້ກ່າວຖ້ອຍຄຳຂອງພຣະເຈົ້າຢາເວໄວ້ກ່ອນນັ້ນ. 6 ກະສັດເຢໂຣໂບອາມໄດ້ກ່າວແກ່ຜູ້ທຳນວາຍວ່າ, “ກະລຸນາພາວັນນາອະທິຖານຂໍພຣະເຈົ້າຢາເວ ພຣະເຈົ້າຂອງທ່ານ ໃຫ້ຮັກສາແຂນຂອງເຮົາໃຫ້ດີແດ່ທ້ອນ.” ຄົນຂອງພຣະເຈົ້າໄດ້ພາວັນນາອະທິຖານຕໍ່ພຣະເຈົ້າຢາເວ ແລະແຂນຂອງກະສັດກໍດີເປັນປົກກະຕິເໝືອນເດີມ. 7 ແລ້ວກະສັດກໍກ່າວແກ່ຄົນຂອງພຣະເຈົ້າວ່າ, “ເຊີນເມືອຮັບປະທານອາຫານໃນວັງນຳເຮົາເທີ້ນ ແລະເຮົາຈະໃຫ້ບຳເໜັດແກ່ທ່ານໃນສິ່ງທີ່ທ່ານໄດ້ກະທຳ.” 8 ຄົນຂອງພຣະເຈົ້າຕອບວ່າ, “ເຖິງແມ່ນວ່າທ່ານຈະເອົາຊັບສິນຂອງທ່ານເຄິ່ງໜຶ່ງໃຫ້ຂ້າພະເຈົ້າ ຂ້າພະເຈົ້າກໍຈະບໍ່ຍອມໄປກັບທ່ານ ຫລືກິນແລະດື່ມຫຍັງກັບທ່ານ. 9 ເພາະພຣະເຈົ້າຢາເວໄດ້ສັ່ງຂ້າພະເຈົ້າບໍ່ໃຫ້ກິນແລະດື່ມສິ່ງໃດໝົດ ແລະທັງບໍ່ໃຫ້ກັບເມືອທາງເສັ້ນເກົ່າອີກ.” 10 ດັ່ງນັ້ນ ລາວຈຶ່ງບໍ່ໄດ້ກັບຄືນເມືອຕາມທາງເສັ້ນເກົ່າ, ແຕ່ກັບໄປທາງເສັ້ນອື່ນ. ຜູ້ທຳນວາຍຜູ້ເຖົ້າແຫ່ງເບັດເອນ 11 ໃນເວລານັ້ນ ຍັງມີຜູ້ທຳນວາຍຜູ້ເຖົ້າຄົນໜຶ່ງຢູ່ໃນເມືອງເບັດເອນ. ພວກລູກຊາຍ ຂອງເພິ່ນໄດ້ມາບອກເຖິງເລື່ອງທັງໝົດທີ່ຄົນຂອງພຣະເຈົ້າໄດ້ກະທຳທີ່ເມືອງເບັດເອນໃນມື້ນັ້ນ ຕະຫລອດທັງຖ້ອຍຄຳທີ່ເພິ່ນໄດ້ກ່າວແກ່ກະສັດເຢໂຣໂບອາມ. 12 ຜູ້ເປັນພໍ່ຖາມວ່າ, “ເມື່ອເພິ່ນໜີໄປນັ້ນ ເພິ່ນໄປທາງໃດ?” ພວກລູກບອກພໍ່ວ່າ, “ທາງນັ້ນ.” 13 ແລ້ວເພິ່ນກໍສັ່ງພວກລູກວ່າ, “ໃຫ້ຕຽມອານໃສ່ຫລັງລໍໃຫ້ພໍ່.” ພວກເຂົາໄດ້ເຮັດຕາມທີ່ເພິ່ນໄດ້ສັ່ງ ແລະເພິ່ນກໍຂີ່ລໍອອກໄປ. 14 ເພິ່ນໄດ້ໄປຕາມທາງທີ່ຄົນຂອງພຣະເຈົ້າໄປນັ້ນ ແລະພົບເພິ່ນພວມນັ່ງຢູ່ກ້ອງຕົ້ນໂອກຕົ້ນໜຶ່ງ. ເພິ່ນຖາມວ່າ, “ທ່ານນີ້ບໍເປັນຄົນຂອງພຣະເຈົ້າຈາກຢູດາຍ?” ຊາຍຄົນນັ້ນຕອບວ່າ, “ແມ່ນແລ້ວ.” 15 ເພິ່ນກ່າວເຊີນວ່າ, “ເຊີນໄປທີ່ເຮືອນຮັບປະທານອາຫານກັບຂ້າພະເຈົ້າເທີ້ນ.” 16 ແຕ່ລາວຕອບວ່າ, “ຂ້າພະເຈົ້າເມືອກັບທ່ານ ແລະຮັບເອົາການຕ້ອນຮັບຈາກທ່ານບໍ່ໄດ້ດອກ. ຂ້າພະເຈົ້າບໍ່ຕ້ອງການກິນຫລືດື່ມຫຍັງກັບທ່ານຢູ່ບ່ອນນີ້ 17 ເພາະພຣະເຈົ້າຢາເວໄດ້ສັ່ງຂ້າພະເຈົ້າວ່າ ບໍ່ໃຫ້ກິນແລະດື່ມຫຍັງ ແລະທັງບໍ່ໃຫ້ກັບຄືນເມືອຕາມທາງເສັ້ນເກົ່າ.” 18 ແລ້ວຜູ້ທຳນວາຍຜູ້ເຖົ້າຈາກເບັດເອນກໍກ່າວແກ່ລາວວ່າ, “ຂ້າພະເຈົ້າເອງກໍເປັນຜູ້ທຳນວາຍເໝືອນກັບທ່ານ ພຣະເຈົ້າຢາເວສັ່ງໃຫ້ເທວະດາຕົນໜຶ່ງມາບອກຂ້າພະເຈົ້າໃຫ້ພາທ່ານເມືອເຮືອນ ເພື່ອໃຫ້ທ່ານໄດ້ກິນແລະດື່ມ,” ແຕ່ຜູ້ທຳນວາຍຜູ້ເຖົ້າຄົນນີ້ເວົ້າຕົວະ. 19 ດັ່ງນັ້ນ ຄົນຂອງພຣະເຈົ້າຈຶ່ງກັບເມືອເຮືອນຂອງຜູ້ທຳນວາຍຜູ້ເຖົ້າຄົນນີ້ ຮ່ວມຮັບປະທານອາຫານນຳເພິ່ນ. 20 ໃນຂະນະທີ່ທັງສອງພວມນັ່ງຮັບປະທານອາຫານຮ່ວມກັນຢູ່ນັ້ນ ພຣະເຈົ້າຢາເວໄດ້ບອກຖ້ອຍຄຳ ແກ່ຜູ້ທຳນວາຍຜູ້ເຖົ້າ 21 ແລະເພິ່ນກໍຮ້ອງໃສ່ຄົນຂອງພຣະເຈົ້າຈາກຢູດາຍວ່າ, “ພຣະເຈົ້າຢາເວກ່າວວ່າ ຍ້ອນທ່ານບໍ່ໄດ້ເຊື່ອຟັງຖ້ອຍຄຳຂອງພຣະເຈົ້າຢາເວ ແລະບໍ່ໄດ້ປະຕິບັດຕາມສິ່ງທີ່ພຣະເຈົ້າຢາເວ ພຣະເຈົ້າຂອງທ່ານໄດ້ສັ່ງທ່ານ. 22 ແຕ່ທ່ານໄດ້ກັບຄືນໄປ ແລະຮັບປະທານອາຫານໃນບ່ອນທີ່ພຣະອົງສັ່ງຫ້າມບໍ່ໃຫ້ກິນ. ຍ້ອນເລື່ອງນີ້ທ່ານຈະຖືກຂ້າ ແລະສົບຂອງທ່ານຈະບໍ່ໄດ້ຖືກຝັງໄວ້ ໃນຂຸມຝັງສົບປະຈຳຄອບຄົວຂອງທ່ານ.” 23 ຫລັງຈາກທັງສອງກິນອີ່ມແລ້ວ ຜູ້ທຳນວາຍຜູ້ເຖົ້າກໍຕຽມອານໃສ່ຫລັງລໍ ໃຫ້ຄົນຂອງພຣະເຈົ້າຂີ່ໄປ. 24 ເມື່ອໄປຕາມທາງ ໄດ້ມີສິງໂຕໜຶ່ງອອກມາກັດເພິ່ນຕາຍ. ຊາກສົບຂອງເພິ່ນນອນຢຽດຢູ່ກາງຖະໜົນ ສ່ວນລໍກັບສິງກໍໄດ້ຢືນຢູ່ໃກ້ຂ້າງເພິ່ນໃນທີ່ນັ້ນ. 25 ມີຜູ້ຄົນໄດ້ຜ່ານໄປ ແລະເຫັນຊາກສົບຂອງເພິ່ນໃນຫົນທາງ ທັງໂຕສິງກໍຢືນຢູ່ຂ້າງສົບນັ້ນ ພວກເຂົາຈຶ່ງໄປທີ່ເມືອງເບັດເອນບ່ອນທີ່ຜູ້ທຳນວາຍຜູ້ເຖົ້າຢູ່ ແລະໄດ້ລາຍງານຕາມທີ່ພວກຕົນໄດ້ເຫັນ. 26 ເມື່ອຜູ້ທຳນວາຍຜູ້ເຖົ້າໄດ້ຍິນກ່ຽວກັບເຫດການນີ້ ເພິ່ນຈຶ່ງເວົ້າວ່າ, “ນັ້ນຄືຄົນຂອງພຣະເຈົ້າທີ່ບໍ່ຟັງຖ້ອຍຄຳຂອງພຣະເຈົ້າຢາເວ. ດ້ວຍເຫດນີ້ ພຣະເຈົ້າຢາເວຈຶ່ງສົ່ງສິງມາຄຸບ ແລະກັດເພິ່ນຕາຍຕາມທີ່ພຣະເຈົ້າຢາເວໄດ້ກ່າວໄວ້.” 27 ແລ້ວເພິ່ນກໍເວົ້າແກ່ພວກລູກຊາຍຂອງຕົນວ່າ, “ຕຽມອານໃສ່ຫລັງລໍໃຫ້ພໍ່ແດ່.” ພວກເຂົາກໍປະຕິບັດຕາມ 28 ແລະເພິ່ນກໍຂີ່ລໍອອກໄປ ແລະພົບຊາກສົບຂອງຜູ້ທຳນວາຍນອນຢຽດໃນຫົນທາງ ຊຶ່ງມີລໍແລະສິງຢືນຢູ່ທີ່ນັ້ນ. ສິງບໍ່ໄດ້ກັດກິນຊາກສົບ ຫລືຕໍ່ສູ້ລໍແຕ່ຢ່າງໃດ. 29 ຜູ້ທຳນວາຍຜູ້ເຖົ້າຍົກເອົາສົບຂຶ້ນໃສ່ຫລັງລໍ ແລະນຳກັບເມືອເມືອງເບັດເອນ ເພື່ອເຮັດພິທີໄວ້ທຸກແລະຝັງສົບຜູ້ທຳນວາຍຄົນນັ້ນ. 30 ເພິ່ນຝັງໃສ່ຂຸມຝັງສົບປະຈຳຄອບຄົວຂອງເພິ່ນເອງ. ແລ້ວເພິ່ນກັບພວກລູກຊາຍກໍໄວ້ທຸກໃຫ້ ແລະກ່າວລຳພັນວ່າ, “ນ້ອງຊາຍຂອງຂ້ອຍເອີຍ ນ້ອງຊາຍຂອງຂ້ອຍເອີຍ!” 31 ຫລັງຈາກການຝັງສົບແລ້ວໆ ຜູ້ທຳນວາຍຜູ້ເຖົ້າກໍເວົ້າຕໍ່ພວກລູກຊາຍຂອງຕົນວ່າ, “ເມື່ອພໍ່ຕາຍໄປ ໃຫ້ຝັງສົບພໍ່ໃສ່ຂຸມນີ້ ແລະເອົາຊາກສົບຂອງພໍ່ນອນໃກ້ກັບເພິ່ນນີ້ເດີ.” 32 ຄຳເວົ້າທີ່ລາວໄດ້ກ່າວໄວ້ຕາມຖ້ອຍຄຳຂອງພຣະເຈົ້າຢາເວ ເພື່ອຕໍ່ສູ້ແທ່ນບູຊາໃນເມືອງເບັດເອນ ແລະຕໍ່ສູ້ບ່ອນຂາບໄຫວ້ຕ່າງໆ ຢູ່ໃນເມືອງຊາມາເຣຍນີ້ຈະເກີດເປັນຈິງແທ້. ເຢໂຣໂບອາມເຮັດບາບອັນຮ້າຍແຮງ 33 ເຈົ້າເຢໂຣໂບອາມກະສັດແຫ່ງອິດສະຣາເອນຍັງບໍ່ເລີກການກະທຳຊົ່ວຂອງຕົນ, ເພິ່ນຍັງສືບຕໍ່ເລືອກເອົາພວກປະໂຣຫິດຈາກຄອບຄົວຂອງຄົນທຳມະດາ ໃຫ້ຮັບໃຊ້ທີ່ແທ່ນບູຊາ ຊຶ່ງເພິ່ນໄດ້ສ້າງຂຶ້ນນັ້ນ. 34 ບາບທີ່ເພິ່ນໄດ້ກະທຳນັ້ນ ໄດ້ນຳເອົາການທຳລາຍແລະຄວາມຈິບຫາຍ ມາສູ່ຍາດວົງຂອງເພິ່ນເອງຈາກຜືນແຜ່ນດິນໂລກ. |
@ 2012 United Bible Societies. All Rights Reserved.