1 ກະສັດ 11 - ພຣະຄຳພີສັກສິໂຊໂລໂມນຫັນໜີຈາກພຣະເຈົ້າ 1 ກະສັດໂຊໂລໂມນໄດ້ເກີດມີຄວາມຮັກກັບຍິງສາວຊາວຕ່າງຊາດຫລາຍຄົນ. ນອກຈາກລູກສາວຂອງກະສັດເອຢິບແລ້ວເພິ່ນຍັງມີເມຍຄົນຮິດຕີ, ຄົນໂມອາບ, ຄົນອຳໂມນ, ຄົນເອໂດມ ແລະຄົນຊີໂດນ. 2 ເພິ່ນເອົາຍິງເຫຼົ່ານີ້ມາເປັນເມຍ ແມ່ນວ່າພຣະເຈົ້າຢາເວໄດ້ສັ່ງຊາວອິດສະຣາເອນບໍ່ໃຫ້ແຕ່ງງານກັບຍິງເຫຼົ່ານີ້ ເພາະພວກເຂົາຈະເຮັດໃຫ້ຊາວອິດສະຣາເອນສັດຊື່ຕໍ່ບັນດາພະອື່ນ. 3 ກະສັດໂຊໂລໂມນມີເມຍທີ່ເປັນເຈົ້າຍິງເຈັດຮ້ອຍຄົນ ແລະຍັງມີເມຍນ້ອຍສາມຮ້ອຍຄົນ. ພວກຍິງເຫຼົ່ານີ້ໄດ້ເຮັດໃຫ້ເພິ່ນຫັນໜີຈາກພຣະເຈົ້າ 4 ແລະເມື່ອເຖິງເວລາເພິ່ນເຖົ້າແກ່ແລ້ວ ພວກນາງກໍໄດ້ນຳພາເພິ່ນໄປຂາບໄຫວ້ບັນດາພະຕ່າງຊາດ. ເພິ່ນບໍ່ໄດ້ສັດຊື່ຕໍ່ພຣະເຈົ້າຢາເວ ພຣະເຈົ້າຂອງເພິ່ນ ດັ່ງກະສັດດາວິດພໍ່ຂອງເພິ່ນ. 5 ເພິ່ນໄດ້ຂາບໄຫວ້ເຈົ້າແມ່ອັດສະຕາກຂອງຊາວຊີໂດນ ແລະພະມິນກົມທີ່ໜ້າລັງກຽດຂອງຊາວອຳໂມນ. 6 ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ແລະບໍ່ໄດ້ຕິດຕາມພຣະເຈົ້າຢາເວ ດັ່ງກະສັດດາວິດພໍ່ຂອງເພິ່ນ. 7 ຢູ່ເທິງພູເຂົາທາງທິດຕາເວັນອອກຂອງນະຄອນເຢຣູຊາເລັມ ກະສັດໂຊໂລໂມນໄດ້ສ້າງບ່ອນຂາບໄຫວ້ພະເຄໂມດ ພະທີ່ໜ້າລັງກຽດຂອງຊາວໂມອາບ ແລະສ້າງບ່ອນຂາບໄຫວ້ພະໂມເລັກ ພະທີ່ໜ້າລັງກຽດຂອງຊາວອຳໂມນ. 8 ເພິ່ນຍັງໄດ້ສ້າງບ່ອນຂາບໄຫວ້ໃຫ້ບັນດາເມຍຕ່າງຊາດຂອງເພິ່ນທຸກຄົນ ເພື່ອໃຫ້ພວກເຂົາເຜົາເຄື່ອງຫອມ ແລະຖວາຍບູຊາແກ່ບັນດາພະຂອງພວກເຂົາ. 9-10 ແມ່ນວ່າພຣະເຈົ້າຢາເວ ພຣະເຈົ້າຂອງຊາດອິດສະຣາເອນໄດ້ປາກົດຕໍ່ໂຊໂລໂມນເຖິງສອງຄັ້ງ ແລະສັ່ງເພິ່ນບໍ່ໃຫ້ຂາບໄຫວ້ບັນດາພະຕ່າງຊາດກໍຕາມ; ໂຊໂລໂມນກໍບໍ່ໄດ້ເຊື່ອຟັງພຣະເຈົ້າຢາເວພຣະເຈົ້າຂອງເພິ່ນ ເພິ່ນໄດ້ຫັນໜີຈາກພຣະອົງ. ດັ່ງນັ້ນ ພຣະເຈົ້າຢາເວຈຶ່ງຄຽດຮ້າຍກະສັດໂຊໂລໂມນ 11 ເຫດສະນັ້ນ ພຣະເຈົ້າຢາເວຈຶ່ງກ່າວຕໍ່ໂຊໂລໂມນວ່າ, “ຍ້ອນເຈົ້າຝ່າຝືນພັນທະສັນຍາ ທີ່ມີໄວ້ກັບເຮົາຢ່າງເຈດຕະນາ ແລະບໍ່ເຊື່ອຟັງຂໍ້ຄຳສັ່ງຂອງເຮົາ ເຮົາສັນຍາວ່າເຮົາຈະເອົາອານາຈັກຂອງເຈົ້າໄປຈາກເຈົ້າ ແລະຈະຍົກໃຫ້ຄົນໜຶ່ງໃນບັນດາຂ້າຣາຊການຂອງເຈົ້າ. 12 ແຕ່ເຖິງຢ່າງໃດກໍຕາມ ເພື່ອເຫັນແກ່ດາວິດພໍ່ຂອງເຈົ້າ ເຮົາຈະບໍ່ເຮັດຕາມສິ່ງທີ່ກ່າວມານີ້ໃນຊົ່ວຊີວິດຂອງເຈົ້າ ແຕ່ມັນຈະເກີດຂຶ້ນໃນຣາຊການຂອງລູກຊາຍຂອງເຈົ້າ. 13 ເຮົາຈະບໍ່ເອົາອານາຈັກທັງໝົດໄປຈາກລາວ; ແຕ່ເຮົາຈະຈົ່ງເຜົ່າໜຶ່ງໄວ້ໃຫ້ລາວເພື່ອເຫັນແກ່ດາວິດຜູ້ຮັບໃຊ້ຂອງເຮົາ ແລະເພື່ອເຫັນແກ່ນະຄອນເຢຣູຊາເລັມ ເມືອງທີ່ເຮົາໄດ້ເລືອກໄວ້ເປັນຂອງເຮົາ.” ເຫຼົ່າສັດຕູຂອງໂຊໂລໂມນ 14 ດັ່ງນັ້ນ ພຣະເຈົ້າຢາເວຈຶ່ງໄດ້ເຮັດໃຫ້ຮາດາດ ຄົນໜຶ່ງໃນຄອບຄົວຂອງກະສັດແຫ່ງເອໂດມ ເປັນສັດຕູຕໍ່ກະສັດໂຊໂລໂມນ. 15-16 ດົນນານມາແລ້ວກ່ອນເຫດການນີ້ ເມື່ອກະສັດດາວິດໄດ້ເອົາຊະນະເອໂດມ ໂຢອາບຜູ້ບັນຊາການຂອງເພິ່ນໄດ້ໄປທີ່ເມືອງນັ້ນເພື່ອຝັງສົບຄົນຕາຍ. ລາວກັບພວກທະຫານຂອງລາວໄດ້ຄ້າງຢູ່ໃນເອໂດມເປັນເວລາຫົກເດືອນ ໃນຂະນະທີ່ພວກເຂົາຢູ່ໃນທີ່ນັ້ນ ພວກເຂົາໄດ້ຂ້າຜູ້ຊາຍທຸກຄົນໃນເມືອງເອໂດມ 17 ເວັ້ນໄວ້ແຕ່ຮາດາດກັບຄົນຮັບໃຊ້ຊາວເອໂດມບາງຄົນຂອງພໍ່ຕົນ ທີ່ປົບໜີໄປປະເທດເອຢິບ. (ໃນຄາວນັ້ນຮາດາດຍັງເປັນເດັກນ້ອຍຢູ່.) 18 ພວກເຂົາໄດ້ອອກຈາກເມືອງມີດີອານໄປທີ່ເມືອງປາຣານ ຊຶ່ງມີຊາວປາຣານບາງຄົນໄດ້ຮ່ວມໄປນຳດ້ວຍ. ແລ້ວພວກເຂົາກໍໄດ້ເດີນທາງໄປປະເທດເອຢິບ ແລະໄປເຝົ້າກະສັດຟາໂຣ; ກະສັດຜູ້ນີ້ໄດ້ເອົາດິນແດນບາງຕອນ ແລະເຮືອນຫລັງໜຶ່ງໃຫ້ຮາດາດ ແລະຈັດຫາສະບຽງອາຫານໃຫ້ລາວ. 19 ຮາດາດເປັນທີ່ພໍໃຈຂອງກະສັດຟາໂຣ; ສະນັ້ນ ກະສັດຈຶ່ງຍົກນ້ອງເມຍຂອງຕົນ ຄືນ້ອງສາວຂອງຣາຊີນີຕາເປເນັດ ໃຫ້ເປັນເມຍຂອງລາວ. 20 ນາງມີລູກຊາຍຜູ້ໜຶ່ງກັບຮາດາດຊື່ວ່າ ເກນູບັດ; ຣາຊີນີຕາເປເນັດໄດ້ລ້ຽງດູເດັກນີ້ໄວ້ໃນຣາຊວັງ ບ່ອນດຽວກັນກັບບັນດາລູກຊາຍຂອງກະສັດ. 21 ຕໍ່ມາ ເມື່ອຮາດາດໄດ້ຍິນຂ່າວວ່າກະສັດດາວິດໄດ້ຕາຍໄປແລ້ວ ແລະໂຢອາບຜູ້ບັນຊາການກອງທັບຂອງເພິ່ນກໍຕາຍໄປດ້ວຍ; ສະນັ້ນ ລາວຈຶ່ງເວົ້າກັບກະສັດວ່າ, “ກະລຸນາໃຫ້ຂ້ານ້ອຍກັບເມືອປະເທດຂອງຂ້ານ້ອຍສາ.” 22 ກະສັດຖາມວ່າ, “ເຮົາເຮັດໃຫ້ເຈົ້າຂາດເຂີນສິ່ງໜຶ່ງສິ່ງໃດຊັ້ນບໍ? ດ້ວຍເຫດໃດເຈົ້າຈຶ່ງຢາກກັບຄືນເມືອປະເທດຂອງເຈົ້າ?” ຮາດາດຕອບກະສັດວ່າ, “ຂໍໃຫ້ຂ້ານ້ອຍໄດ້ກັບຄືນເມືອກ່ອນ.” ແລ້ວລາວກໍໄດ້ກັບເມືອປະເທດຂອງຕົນ. ພໍຮາດາດໄດ້ຂຶ້ນເປັນກະສັດແຫ່ງເອໂດມແລ້ວ ລາວໄດ້ກາຍເປັນຄົນຊົ່ວຮ້າຍ ແລະທັງເປັນສັດຕູຜູ້ຮ້າຍກາດຂອງຊາດອິດສະຣາເອນ. 23 ພຣະເຈົ້າຍັງໄດ້ເຮັດໃຫ້ເຣຊົນ ລູກຊາຍຂອງເອລີອາດາເປັນສັດຕູຕໍ່ກະສັດໂຊໂລໂມນ. ເຣຊົນໄດ້ປົບໜີຈາກເຈົ້າຮາດາເດເຊ ນາຍຂອງຕົນຜູ້ທີ່ເປັນກະສັດແຫ່ງໂຊບາ 24 ແລະໄດ້ກາຍເປັນຫົວໜ້າຂອງພວກກອງໂຈນ. (ເຫດການນີ້ໄດ້ເກີດຂຶ້ນ ຫລັງຈາກກະສັດດາວິດໄດ້ເອົາຊະນະຮາດາເດເຊ ແລະຂ້າຊາວຊີເຣຍຜູ້ເປັນພັນທະມິດຂອງລາວ.) ເຣຊົນ ແລະພັກພວກຂອງລາວໄດ້ໄປຢູ່ໃນເມືອງດາມັສກັດ ແລ້ວພັກພວກຂອງລາວກໍໄດ້ແຕ່ງຕັ້ງລາວໃຫ້ເປັນກະສັດແຫ່ງຊີເຣຍ. 25 ລາວເປັນສັດຕູຄົນໜຶ່ງຂອງຊາດອິດສະຣາເອນ ຕະຫລອດເວລາທີ່ກະສັດໂຊໂລໂມນຍັງມີຊີວິດຢູ່. ລາວໄດ້ສ້າງຄວາມວຸ້ນວາຍເໝືອນດັ່ງຮາດາດໄດ້ເຮັດ; ລາວໄດ້ກຽດຊັງຊາດອິດສະຣາເອນ ແລະປົກຄອງເໜືອຊີເຣຍ. ພຣະເຈົ້າສັນຍາຕໍ່ເຢໂຣໂບອາມ 26 ເຢໂຣໂບອາມ ຄົນໃນຣາຊການຂອງກະສັດໂຊໂລໂມນ ເປັນສັດຕູຜູ້ໜຶ່ງຂອງເພິ່ນເຊັ່ນກັນ. ລາວເປັນລູກຊາຍຂອງເນບັດ ຊາວເມືອງເຊເຣດາໃນເຜົ່າເອຟຣາອິມ. ແມ່ຂອງລາວເປັນໝ້າຍຊື່ວ່າ ເຊຣູຢາ. 27 ຕໍ່ໄປນີ້ແມ່ນເລື່ອງລາວການກະບົດຂອງເຢໂຣໂບອາມ: ກະສັດໂຊໂລໂມນໄດ້ຖົມດິນແດນທາງທິດຕາເວັນອອກຂອງນະຄອນເຢຣູຊາເລັມ ແລະໄດ້ສ້ອມແປງກຳແພງເມືອງ. 28 ເຢໂຣໂບອາມເປັນຊາຍໜຸ່ມທີ່ເກັ່ງກ້າ ເມື່ອກະສັດໂຊໂລໂມນໄດ້ສັງເກດເຫັນວ່າ ລາວເປັນຊາຍໜຸ່ມທີ່ເອົາໃຈໃສ່ຕໍ່ວຽກງານ ເພິ່ນຈຶ່ງແຕ່ງຕັ້ງລາວໃຫ້ເປັນຜູ້ກຳກັບແຮງງານທັງໝົດ ຂອງເຜົ່າມານາເຊ ແລະເຜົ່າເອຟຣາອິມ. 29 ມື້ໜຶ່ງ ໃນຂະນະທີ່ເຢໂຣໂບອາມເດີນທາງໄປຈາກນະຄອນເຢຣູຊາເລັມ ຜູ້ທຳນວາຍອາຮີຢາແຫ່ງເມືອງຊີໂລກໍໄດ້ໄປພົບລາວຕາມລຳພັງ ທີ່ຖະໜົນນອກເມືອງ. 30 ອາຮີຢາໄດ້ແກ້ເສື້ອຄຸມໃໝ່ທີ່ຕົນນຸ່ງນັ້ນອອກ ແລ້ວຈີກເປັນສິບສອງຕ່ອນ 31 ແລະກ່າວແກ່ເຢໂຣໂບອາມວ່າ, “ໃຫ້ເຈົ້າເອົາໄປສິບຕ່ອນ ເພາະພຣະເຈົ້າຢາເວ ພຣະເຈົ້າຂອງຊາດອິດສະຣາເອນກ່າວແກ່ເຈົ້າວ່າ, ‘ເບິ່ງແມ ເຮົາຈະເອົາອານາຈັກໄປຈາກໂຊໂລໂມນ ແລະຍົກໃຫ້ເຈົ້າສິບເຜົ່າ. 32 ເຮົາຈະຈົ່ງເຜົ່າໜຶ່ງໄວ້ໃຫ້ລາວ ເພື່ອເຫັນແກ່ດາວິດຜູ້ຮັບໃຊ້ຂອງເຮົາ ແລະເພື່ອເຫັນແກ່ນະຄອນເຢຣູຊາເລັມ ນະຄອນທີ່ເຮົາໄດ້ເລືອກໄວ້ເປັນຂອງເຮົາ ຈາກດິນແດນທັງໝົດຂອງຊາດອິດສະຣາເອນ. 33 ຍ້ອນໂຊໂລໂມນໄດ້ປະຖິ້ມເຮົາແລະໄດ້ ຂາບໄຫວ້ບັນດາພະຂອງຊາວຕ່າງຊາດ ເຊັ່ນເຈົ້າແມ່ອັດສະຕາກ ພະຂອງຊາວຊີໂດນ; ເຄໂມດ ພະຂອງຊາວໂມອາບ; ມິນກົມ ພະຂອງຊາວອຳໂມນ. ໂຊໂລໂມນໄດ້ ຂາດຄວາມເຊື່ອຟັງທີ່ມີຕໍ່ເຮົາ; ລາວເຮັດຜິດແລະບໍ່ໄດ້ຖືຮັກສາບັນດາກົດບັນຍັດແລະຂໍ້ຄຳສັ່ງຂອງເຮົາ, ດັ່ງດາວິດພໍ່ຂອງລາວໄດ້ປະຕິບັດມາ. 34 ແຕ່ເຮົາຈະບໍ່ເອົາອານາຈັກໄປໝົດຈາກລາວ ເພາະເຮົາຍັງຈະໃຫ້ລາວມີອຳນາດໄປຕະຫລອດຊົ່ວຊີວິດຂອງລາວ. ເຮົາຈະເຮັດເຊັ່ນນີ້ ເພາະເຫັນແກ່ດາວິດຜູ້ຮັບໃຊ້ຂອງເຮົາທີ່ເຮົາໄດ້ເລືອກເອົາ ແລະເປັນຜູ້ທີ່ໄດ້ຖືຮັກສາບັນດາຂໍ້ຄຳສັ່ງຂອງເຮົາ. 35 ເຮົາຈະເອົາອານາຈັກໄປຈາກລູກຊາຍຂອງໂຊໂລໂມນ ແລະໃຫ້ເຈົ້າປົກຄອງສິບເຜົ່າ; 36 ເຮົາຍັງຈະໃຫ້ເຜົ່າໜຶ່ງແກ່ລູກຊາຍຂອງລາວ ເພື່ອດາວິດຜູ້ຮັບໃຊ້ຂອງເຮົາຈະມີໂຄມໄຟດວງໜຶ່ງ ຕັ້ງຢູ່ຕໍ່ໜ້າເຮົາຢູ່ໃນນະຄອນເຢຣູຊາເລັມສະເໝີ ຊຶ່ງເປັນນະຄອນທີ່ເຮົາໄດ້ເລືອກໃຫ້ນາມຊື່ຂອງເຮົາຕັ້ງຢູ່ທີ່ນັ້ນ. 37 ເຢໂຣໂບອາມເອີຍ ເຮົາຈະໃຫ້ເຈົ້າເປັນກະສັດຂອງອິດສະຣາເອນ ແລະເຈົ້າຈະປົກຄອງທົ່ວທັງເຂດແດນຕາມທີ່ເຈົ້າຕ້ອງການ. 38 ຖ້າເຈົ້າເຊື່ອຟັງເຮົາທຸກຢ່າງ, ປະຕິບັດຕາມບັນດາກົດບັນຍັດຂອງເຮົາ ແລະເຮັດໃຫ້ເຮົາພໍໃຈໂດຍປະຕິບັດຕາມຂໍ້ຄຳສັ່ງຂອງເຮົາ ດັ່ງດາວິດຜູ້ຮັບໃຊ້ຂອງເຮົາໄດ້ປະຕິບັດນັ້ນ ເຮົາກໍຈະຢູ່ກັບເຈົ້າເລື້ອຍໄປ. ເຮົາຈະໃຫ້ເຈົ້າເປັນກະສັດຂອງອິດສະຣາເອນ ແລະຈະໃຫ້ມີເຊື້ອສາຍປົກຄອງສືບແທນເຈົ້າ ດັ່ງທີ່ເຮົາໄດ້ປະຕິບັດຕໍ່ດາວິດນັ້ນ. 39 ຍ້ອນໂຊໂລໂມນເຮັດບາບ ເຮົາຈະລົງໂທດເຊື້ອສາຍຂອງດາວິດ, ແຕ່ບໍ່ແມ່ນຕະຫລອດໄປ.”’ 40 ດັ່ງນັ້ນ ກະສັດໂຊໂລໂມນຈຶ່ງຫາວິທີຂ້າເຢໂຣໂບອາມ; ແຕ່ເຢໂຣໂບອາມໄດ້ປົບໜີໄປຫາເຈົ້າຊີຊາກກະສັດແຫ່ງເອຢິບ ແລະຢູ່ໃນປະເທດນີ້ຈົນກະສັດໂຊໂລໂມນຕາຍ. ໂຊໂລໂມນຕາຍ ( 2 ຂຄ 9:29-31 ) 41 ສິ່ງອື່ນໆທີ່ກະສັດໂຊໂລໂມນໄດ້ເຮັດ, ບໍ່ວ່າວຽກການ ແລະສະຕິປັນຍາຂອງເພິ່ນ ແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງກະສັດໂຊໂລໂມນ. 42 ກະສັດໂຊໂລໂມນປົກຄອງຢູ່ທີ່ນະຄອນເຢຣູຊາເລັມ ເໜືອປະເທດອິດສະຣາເອນເປັນເວລາສີ່ສິບປີ. 43 ເພິ່ນໄດ້ຕາຍໄປ ແລະຖືກຝັງໄວ້ທີ່ເມືອງຂອງດາວິດ. ເຣໂຫໂບອາມ ລູກຊາຍຂອງເພິ່ນໄດ້ຂຶ້ນເປັນກະສັດແທນ. |
@ 2012 United Bible Societies. All Rights Reserved.