1 ຂ່າວຄາວ 27 - ພຣະຄຳພີສັກສິການຈັດຕັ້ງທາງທະຫານ ແລະພົນລະເຮືອນ 1 ຕໍ່ໄປນີ້ແມ່ນລາຍຊື່ຂອງບັນດາຫົວໜ້າຄອບຄົວ ແລະບັນດາຫົວໜ້າຕະກຸນ ພ້ອມທັງບັນດາເຈົ້າໜ້າທີ່ອິດສະຣາເອນ ທີ່ໄດ້ບໍລິຫານວຽກງານຂອງຣາຊອານາຈັກ. ທຸກໆເດືອນໃນແຕ່ລະປີໃດ ໄດ້ມີໝວດຕ່າງໆຊາວສີ່ພັນຄົນ ປະຕິບັດໜ້າທີ່ພາຍໃຕ້ຜູ້ບັນຊາການປະຈຳເດືອນນັ້ນໆ. 2-15 ລາຍຊື່ດັ່ງຕໍ່ລົງໄປນີ້ແມ່ນບັນດາຜູ້ບັນຊາການຂອງແຕ່ລະເດືອນ ມີດັ່ງນີ້: ເດືອນທີໜຶ່ງ: ຢາໂຊເບອາມ ລູກຊາຍຂອງຊັບດີເອນ (ລາວເປັນສະມາຊິກຂອງຕະກຸນເປເຣັດ ຊຶ່ງເປັນສ່ວນໜຶ່ງຂອງເຜົ່າຢູດາ) ເດືອນທີສອງ: ໂດດາຍ ເຊື້ອສາຍຄົນໜຶ່ງຂອງອາໂຮ (ມິກໂລດເປັນຜູ້ຮອງ) ເດືອນທີສາມ: ເບນາອີຢາ ລູກຊາຍຂອງປະໂຣຫິດເຢໂຮຍອາດາ; ລາວໄດ້ເປັນຫົວໜ້າຂອງ “ທະຫານເອກສາມສິບຄົນ” (ອຳມີຊາບັດ ຜູ້ເປັນລູກຊາຍຂອງເບນາອີຢາ ໄດ້ຂຶ້ນເປັນຜູ້ບັນຊາການຂອງໝວດນີ້ແທນພໍ່ຂອງຕົນ) ເດືອນທີສີ່: ອາສາເຮນ ນ້ອງຊາຍຂອງໂຢອາບ (ເຊບາດີຢາຜູ້ເປັນລູກຊາຍໄດ້ຂຶ້ນແທນລາວ) ເດືອນທີຫ້າ: ຊາມຮູດ ເຊື້ອສາຍຜູ້ໜຶ່ງຂອງອີຊະຣາ ເດືອນທີຫົກ: ອີຣາ ລູກຊາຍຂອງອິກເກັດ ຊາວເມືອງເຕກົວ ເດືອນທີເຈັດ: ເຮເລດ ຊາວເອຟຣາອິມ ຈາກເມືອງເປໂລນ ເດືອນທີແປດ: ສິບເບກາຍ ຊາວຮູຊາ (ລາວເປັນສະມາຊິກຄົນໜຶ່ງໃນຕະກຸນເຊຣາ ຊຶ່ງເປັນສ່ວນໜຶ່ງຂອງເຜົ່າຢູດາ) ເດືອນທີເກົ້າ: ອາບີເອເຊ ຊາວເມືອງອານາທົດໃນເຂດແດນຂອງເຜົ່າເບັນຢາມິນ ເດືອນທີສິບ: ມະຫາໄຣ ຊາວເມືອງເນໂຕຟາ ລາວເປັນສະມາຊິກຄົນໜຶ່ງຂອງຕະກຸນເຊຣາ ເດືອນທີສິບເອັດ: ເບນາອີຢາ ຊາວເມືອງປີຣາໂທນໃນເຂດແດນຂອງເຜົ່າເອຟຣາອິມ ເດືອນທີສິບສອງ: ເຮນດາອີ ຊາວເມືອງເນໂຕຟາ (ລາວເປັນເຊື້ອສາຍຜູ້ໜຶ່ງຂອງໂອດນີເອນ) ການບໍລິຫານງານຂອງບັນດາເຜົ່າອິດສະຣາເອນ 16-22 ຕໍ່ໄປນີ້ແມ່ນລາຍຊື່ຂອງຜູ້ບໍລິຫານງານຂອງບັນດາເຜົ່າອິດສະຣາເອນມີດັ່ງນີ້: ເຜົ່າ ຜູ້ບໍລິຫານ ຣູເບັນ ເອລີເອເຊລູກຊາຍຂອງຊີກະຣີ ຊີເມໂອນ ເຊຟາຕີຢາລູກຊາຍຂອງມາອາກາ ເລວີ ຮາຊາບີຢາລູກຊາຍຂອງເກມູເອນ ອາໂຣນ ຊາດົກ ຢູດາ ເອລີຮູອ້າຍຂອງກະສັດດາວິດ ອິດຊາຄາ ອົມຣີລູກຊາຍຂອງມີກາເອນ ເຊບູໂລນ ອີຊະມາອີຢາລູກຊາຍຂອງໂອບາດີຢາ ເນັບທາລີ ເຢຣີໂມດລູກຊາຍຂອງອາຊະຣີເອນ ເອຟຣາອິມ ໂຮເຊອາລູກຊາຍຂອງອາຊາຊີຢາ ມານາເຊເຄິ່ງເຜົ່າຕາເວັນຕົກ ໂຢເອນລູກຊາຍຂອງເປດາອີຢາ ມານາເຊເຄິ່ງເຜົ່າຕາເວັນອອກ ອິດໂດລູກຊາຍຂອງເຊກາຣີຢາ ເບັນຢາມິນ ຢາອາສີເອນລູກຊາຍຂອງອັບເນ ດານ ອາຊາເຣນລູກຊາຍຂອງເຢໂຣຮາມ ເຜົ່າ ຜູ້ບໍລິຫານ 23 ກະສັດບໍ່ໄດ້ຈົດຊື່ປະຊາຊົນຜູ້ມີອາຍຸຕໍ່າກວ່າຊາວປີລົງໄປ ເພາະພຣະເຈົ້າຢາເວໄດ້ສັນຍາວ່າຈະໃຫ້ປະຊາຊົນອິດສະຣາເອນ ມີຈຳນວນຫລວງຫລາຍດັ່ງດວງດາວໃນຟ້າສະຫວັນ. 24 ໂຢອາບ ລູກຊາຍຂອງນາງເຊຣູອີຢາໄດ້ລົງມືຈົດຊື່ປະຊາຊົນ ແຕ່ເພິ່ນເຮັດບໍ່ສຳເລັດ. ພຣະເຈົ້າໄດ້ລົງໂທດຊາດອິດສະຣາເອນ ຍ້ອນການຈົດຊື່ຈຳນວນປະຊາຊົນນີ້; ດັ່ງນັ້ນ ຕົວເລກອັນແທ້ຈິງຈຶ່ງບໍ່ໄດ້ຖືກບັນທຶກໄວ້ໃນເອກະສານທາງການຂອງກະສັດດາວິດ. ຜູ້ບໍລິຫານຊັບສົມບັດຂອງກະສັດ 25-31 ຕໍ່ໄປນີ້ແມ່ນລາຍຊື່ຂອງຜູ້ບໍລິຫານຊັບສົມບັດຂອງກະສັດມີດັ່ງນີ້: ຫ້ອງເກັບເຄື່ອງຂອງກະສັດ: ອາຊະມາເວດລູກຊາຍຂອງອາດີເອນ ຫ້ອງເກັບເຄື່ອງທ້ອງຖິ່ນ: ໂຢນາທານລູກຊາຍຂອງອຸດຊີຢາ ຜູ້ດູແລຄົນເຮັດນາ: ເອຊະຣີລູກຊາຍຂອງເກລຸບ ຜູ້ດູແລຄົນເຮັດສວນອະງຸ່ນ: ຊີເມອີຊາວເມືອງຣາມາ ຜູ້ດູແລຫ້ອງໄວ້ເຫຼົ້າອະງຸ່ນ: ຊັບດີຊາວເມືອງເຊຟາມ ຜູ້ດູແລຄົນເຮັດສວນໝາກກອກເທດ ແລະໝາກເດື່ອ (ທີ່ຕີນພູດ້ານທິດຕາເວັນຕົກ): ບາອານຮານານຊາວເມືອງເກເດ ຜູ້ດູແລຫ້ອງໄວ້ນໍ້າມັນໝາກກອກເທດ: ໂຢອາດ ຜູ້ດູແລຄົນລ້ຽງສັດໃນທົ່ງຫຍ້າຊາໂຣນ: ຊິດໄຣຊາວເມືອງຊາໂຣນ ຜູ້ດູແລຝູງສັດຢູ່ໃນຮ່ອມພູ: ຊາຟັດລູກຊາຍຂອງອັດໄລ ຜູ້ດູແລຝູງອູດ: ໂອບິນຊາວອິດຊະມາເອນ ຜູ້ດູແລຝູງລໍ: ເຢເດອີຢາຊາວເມືອງເມໂຣໂນດ ຜູ້ດູແລຝູງແກະແລະຝູງແບ້: ຢາຊິດຊາວເມືອງຮັກຣິດ. ທີ່ປຶກສາສ່ວນຕົວຂອງກະສັດດາວິດ 32 ໂຢນາທານລູງຂອງກະສັດດາວິດເປັນທີ່ປຶກສາທີ່ສະຫລຽວສະຫລາດ ແລະທັງເປັນນັກຮຽນຮູ້ຜູ້ໜຶ່ງ. ເພິ່ນເອງ ແລະເຢຮີເອນລູກຊາຍຂອງຮັກໂມນີ ເປັນຜູ້ກຳກັບການສຶກສາຂອງພວກລູກຂອງກະສັດ. 33 ອາຮີໂຕເຟນເປັນທີ່ປຶກສາຂອງກະສັດ ແລະຮູຊາຍຊາວເມືອງອາກກິດ ເປັນເພື່ອນ ແລະທັງເປັນທີ່ປຶກສາຂອງກະສັດດາວິດ. 34 ຫລັງຈາກອາຮີໂຕເຟນໄດ້ຕາຍໄປແລ້ວ ເຢໂຮຍອາດາລູກຊາຍຂອງເບນາອີຢາ ແລະອາບີອາທາກໍໄດ້ຂຶ້ນເປັນທີ່ປຶກສາແທນ. ສ່ວນໂຢອາບນັ້ນໄດ້ເປັນຜູ້ບັນຊາການທະຫານສູງສຸດ. |
@ 2012 United Bible Societies. All Rights Reserved.