1 ຂ່າວຄາວ 24 - ພຣະຄຳພີສັກສິວຽກງານທີ່ຖືກມອບໝາຍໃຫ້ພວກປະໂຣຫິດ 1 ຄົນເຫຼົ່ານີ້ໄດ້ສືບເຊື້ອສາຍມາຈາກອາໂຣນ. ອາໂຣນມີລູກຊາຍສີ່ຄົນດັ່ງນີ້: ນາດາບ, ອາບີຮູ, ເອເລອາຊາ ແລະອີທາມາ. 2 ນາດາບແລະອາບີຮູຕາຍໄປກ່ອນພໍ່ ແລະບໍ່ໄດ້ສືບເຊື້ອສາຍໃຫ້ຜູ້ໃດເລີຍ; ດັ່ງນັ້ນ ເອເລອາຊາແລະອີທາມາ ນ້ອງຂອງພວກເຂົາຈຶ່ງຂຶ້ນເປັນປະໂຣຫິດ. 3 ກະສັດດາວິດຈັດເຊື້ອສາຍຂອງອາໂຣນເປັນສອງໝວດ ຕາມໜ້າທີ່ການຂອງພວກເຂົາ. ຊາດົກຜູ້ສືບເຊື້ອສາຍມາຈາກເອເລອາຊາ ແລະອາຮີເມເຫຼັກຜູ້ສືບເຊື້ອສາຍມາຈາກອີທາມາ ເປັນຜູ້ຊ່ວຍເພິ່ນໃນວຽກງານນີ້. 4 ເຊື້ອສາຍຂອງເອເລອາຊາໄດ້ຖືກແບ່ງອອກເປັນສິບຫົກໝວດ ສ່ວນເຊື້ອສາຍຂອງອີທາມາໄດ້ຖືກແບ່ງອອກເປັນແປດໝວດ; ການເຮັດເຊັ່ນນີ້ເພາະເຊື້ອສາຍຂອງເອເລອາຊາມີເພດຊາຍ ເປັນຫົວໜ້າຄອບຄົວຫລາຍກວ່າ. 5 ໃນເມື່ອທັງເຊື້ອສາຍຂອງເອເລອາຊາ ແລະອີທາມາ ມີເຈົ້າໜ້າທີ່ໃນພຣະວິຫານ ແລະຜູ້ນຳທາງດ້ານຈິດວິນຍານໃນທ່າມກາງພວກເຂົາ. ດັ່ງນັ້ນ ການມອບໝາຍໜ້າທີ່ຈຶ່ງໃຊ້ສະຫລາກ. 6 ເຊື້ອສາຍຂອງເອເລອາຊາ ແລະຂອງອີທາມາໄດ້ປ່ຽນຜຽນກັນໃຊ້ສະຫລາກ. ແລ້ວພວກເຂົາກໍໄປຈົດຊື່ນຳເຊມາອີຢາລູກຊາຍຂອງເນທາເນນຜູ້ເປັນເລຂາທິການຂອງຊາວເລວີ. ກະສັດ, ບັນດາຂ້າຣາຊການ, ປະໂຣຫິດຊາດົກ, ອາຮີເມເຫຼັກຜູ້ເປັນລູກຊາຍຂອງອາບີອາທາ ແລະບັນດາຫົວໜ້າຄອບຄົວຂອງປະໂຣຫິດ ແລະຂອງຊາວເລວີ ທັງໝົດຕ່າງກໍຮູ້ເຫັນເປັນພະຍານນຳ. 7-18 ຕໍ່ໄປ ແມ່ນຊາວສີ່ຄອບຄົວທີ່ໄດ້ຖືກມອບໝາຍໜ້າທີ່ໃຫ້ຮັບຜິດຊອບເປັນລຳດັບ ດັ່ງນີ້: ທີໜຶ່ງເຢໂຮຍອາຣິບ; ທີສອງເຢດາອີຢາ; ທີສາມຮາຣິມ; ທີສີ່ເສໂອຣິມ; ທີຫ້າມັນກີຢາ; ທີຫົກມີຢາມິນ; ທີເຈັດຮັກກົດ; ທີແປດອາບີຢາ; ທີເກົ້າເຢຊູອາ; ທີສິບເຊການີຢາ; ທີສິບເອັດເອລີອາຊິບ; ທີສິບສອງຢາກິມ; ທີສິບສາມຮຸບປາ; ທີສິບສີ່ເຢເຊເບອັບ; ທີສິບຫ້າບີນກາ; ທີສິບຫົກອີມເມ; ທີສິບເຈັດເຮຊີຣະ; ທີສິບແປດຮັບປີເຊດ; ທີສິບເກົ້າເປທາຮີຢາ; ທີຊາວເຢເຮຊະເກນ; ທີຊາວເອັດຢາກິນ; ທີຊາວສອງກາມູນ; ທີຊາວສາມເດລາອີຢາ; ທີຊາວສີ່ມາອາຊີຢາ. 19 ຄົນເຫຼົ່ານີ້ໄດ້ຖືກຈົດຊື່ໄວ້ຕາມໜ້າທີ່ ຊຶ່ງໄດ້ຮັບມອບໝາຍໃຫ້ເຮັດໃນວິຫານຂອງພຣະເຈົ້າຢາເວ ແລະເຮັດໜ້າທີ່ຊຶ່ງອາໂຣນບັນພະບຸລຸດຂອງພວກເຂົາໄດ້ວາງໄວ້; ເພື່ອປະຕິບັດຕາມຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າແຫ່ງຊາດອິດສະຣາເອນ. ບັນຊີລາຍຊື່ຂອງຊາວເລວີ 20 ຄົນເຫຼົ່ານີ້ເປັນຫົວໜ້າຄອບຄົວທີ່ສືບເຊື້ອສາຍມາຈາກເລວີມີດັ່ງນີ້: ເຢເດອີຢາ ເຊື້ອສາຍຂອງອຳຣາມ ສືບມາທາງຊູບາເອນ; 21 ອີຊີຢາ ເຊື້ອສາຍຂອງເຣຮາບີຢາ; 22 ຢາຮາດ ເຊື້ອສາຍຂອງອີຊະຮາ ສືບມາທາງເຊໂລໂມດ; 23 ເຢຣິຢາ, ອາມາຣີຢາ, ເຢຮາຊີເອນ ແລະເຢກາມີອາມລູກຊາຍຂອງເຮັບໂຣນ ຕາມລຳດັບອາຍຸ; 24 ຊາເມຍ ເຊື້ອສາຍຂອງອຸດຊີເອນ ສືບມາທາງມີກາ; 25 ເຊກາຣີຢາ ສືບມາທາງອິດຊີຢາ. ລາວເປັນນ້ອງຊາຍຂອງມີກາ; 26 ມາຮະລີ, ມູຊີ ແລະຢາອາຊີຢາ, ເຊື້ອສາຍຂອງເມຣາຣີ. 27 ສ່ວນຢາອາຊີຢານັ້ນມີລູກຊາຍສາມຄົນ ດັ່ງນີ້: ໂຊຮາມ, ຊັກກູເຣ ແລະອິບຣີ. 28-29 ມາຮະລີມີລູກຊາຍສອງຄົນ: ເອເລອາຊາແລະກີເຊ. ເອເລອາຊາບໍ່ມີລູກຊາຍ ແຕ່ກີເຊນັ້ນມີລູກຊາຍຜູ້ໜຶ່ງຊື່ວ່າ ເຢຣາເມເອນ. 30 ສ່ວນມູຊີນັ້ນມີລູກຊາຍສາມຄົນ ດັ່ງນີ້: ມາຮະລີ, ເອເດ ແລະເຢຣີໂມດ. ຄົນເຫຼົ່ານີ້ແມ່ນຄອບຄົວຕ່າງໆຂອງຊາວເລວີ. 31 ຫົວໜ້າຂອງແຕ່ລະຄອບຄົວ ແລະນ້ອງຊາຍຂອງພວກເຂົາກໍເໝືອນກັນ ໄດ້ໃຊ້ສະຫລາກເລືອກເອົາໜ້າທີ່ ຊຶ່ງໄດ້ຖືກມອບໝາຍໃຫ້ ເໝືອນກັນກັບຍາດຕິພີ່ນ້ອງຂອງພວກເຂົາຄືບັນດາປະໂຣຫິດ ທີ່ສືບເຊື້ອສາຍມາຈາກອາໂຣນໄດ້ປະຕິບັດຕໍ່ໜ້າກະສັດດາວິດ, ຊາດົກ, ອາຮີເມເຫຼັກ ແລະບັນດາຫົວໜ້າຄອບຄົວຂອງປະໂຣຫິດແລະຂອງຊາວເລວີ ຕ່າງກໍໄດ້ຮູ້ເຫັນເປັນພະຍານນຳ. |
@ 2012 United Bible Societies. All Rights Reserved.