तीतुस 3 - Walangi

विश्वासी मेह्‍णु सुसुर जीण

¹ मेह्‍णु चेता देन्ता रेह कि से सोब अफसरे त अधिकारी बोक मान कइ रेह त सम्हाई खरे कम करण जे हमेशा तेयार बिशे।

² केसे जे बदनाम ना करे, होर ना झगड़ा करे। पर सोबी अब्बल गुण जुए सम्हाई मेह्‍णु जुए बिशे।

³ किस कि अस बि पेहले वेबखुफ, बोक ना मानणे बाड़े, होरे होरे बेहकाव अन्तर फसो त होरे होरे इच्छाई त मौजमस्ति गुलामी अन्तर थिए त दुश्माणी त रोभ किढ़ कइ जीन्तेथ। अस बि रशुणे त यक होरी के खिलाफ थिए।

⁴ पर जपल हें बचाणे बाड़ा परमेश्वर अपु दाह त परेम हराला,

⁵ त अस बचाई छड़े। तेन अस हें किओ खरे कमी के बेलि नेईं बचाओ, पर अपु दाह जुए दुबारी जमणे सन्हुण त शुची आत्मा नोई बणाणे बेलि बचाए।

⁶ से आत्मा तेन असी बचाणे बाड़ा यीशु मसीहे बेलि असी पुठ रज्जि दुतो असी।

⁷ तसे दाहे बझई जुए, तेन अस धर्मी बणाए त हेन्धे अमर जीवने हकदार भुणे पक्का उम्मीद दुतो असी।

⁸ ए त सोबी मानणे बाड़ी बोक असी त अउं बि चहन्ता कि तु ई सोब बोके बारे पूरे जोर जुए बोले। इसे बेलि जेन्हि परमेश्वर पुठ विश्वास किओ असा, से खरे खरे कम करणे मन रखते। ए सोब बोके खरी असी त मेह्‍णु फायदे लिए असी।

⁹ पर बेमतलब बेहेस केआं, त ऊड़ी बही खाता, मडीण झगड़ीण त नियमे बारे झगड़े केआं दूर बिश, किस कि से सोब खाली त बेकार असु।

¹⁰ अगर कोई मेह्‍णु बुच झगड़ा आणते, त तेन्हि यक दुई लिंग खबरदार कर; तढ़ेया पता तेन्हि जुए कुछ लेण देण ना कर।

¹¹ किस कि से सच्चाई केआं मुकीर गो असे त तेन्के पाप तेन्हि अपफ दोषी ठहरेरते।

अखिर शिक्षा

¹² बे कोईया! जपल अउं अर्टिमास भाई या तुखिकुस भाई तोउ केईं लंघान्ता, त मोउं केईं नीकुपुलिस शेहर एणे भरपूर कोशिश कर, किस कि मेईं हियुंत ता घेणे ठीक किओ असा।

¹³ वकील जेनास त अपोलुस भाई झट अगर लंघाण दिए त ध्यान रख कि तेन्के सोब जरूरते पूरे भोई गो असी।

¹⁴ हें विश्वासी मेह्‍णु बि होरी के जरूरते टेम मदत करणे खरा कम शिचो लौता। तोउं से बेकार ना भुन्ते।

¹⁵ जे मोउं जोई असे तेन्हि सोबी के तोउ जे नमस्कार। जे विश्वासे लिए असी जुए परेम कते, तेन्हि सोबी जे में नमस्कार बोले। परमेश्वरे कृपादृष्टि तुसी पुठ भुन्ति रिहे। आमीन