तीतुस 2 - Walangi

होरे होरे मेह्‍णु जे शिक्षा

¹ पर बे कोईया! तु तेन्हि जीणे ईं शिक्षा देन्ते रेह जे सही असी।

² मतलब कि स्याणे मड़दी जे बोल कि से अपु चेता अन्तर, इज्जत जुए, समोझि कइ बिशे। होर अपु विश्वास, परेम त दुख सेहणे अन्तर होरी जे नमूना बणे।

³ तीं स्याणी जिल्हाणु जे बोल कि तेन्के जीण त चाल चलण शुचे मेह्‍णु केईं लौतु; से दोष लाणे बाड़ी त प्याकड़ ना लौती, पर से अब्बल बोक शिचालणे बाड़ी लौती।

⁴ ताकि से जवान जिल्हाणु जे जोर दी कइ बोल बटियेल कि अपु धाणि त गभुर जुए परेम करे,

⁵ त समोझि कइ गीहे कम-काज करे त शुचा बिशे, दाह करे त अपु धाणि वश अन्तर बिशे, जेसे बेलि परमेश्वरे वचने कोई बुराई ना कइ बटियाल।

⁶ तिहांणि, जवान मड़दी बि समझाण दिए कि से बि समोझि कइ बिशे।

⁷ तु अपफ बि सोबी चीज अन्तर खरे कम कर कइ तेन्के नमूना बण। तें शिक्षा अन्तर इमानदारी, इज्जत

⁸ त ईं अब्बल बोक मेओ लौती कि कोई तसे चाथि ना कइ बटियेल; तोउं जे हें खिलाफ असे से लजिन्ते, किस कि तेन्हि हें बारे बुरु बोलुण जे कुछ ना मेतु।

⁹ गुलाम बि समझाण दे कि से अपु अपु मालिके बोक मान कइ बिशे त हर बोक पुठ तस खुश करे, त बवेला ना करे।

¹⁰ चोरुण नउ; पर अपफ जे पूरा यकीन लेएक त खरा हराले ताकि असी बचाणे बाड़ा परमेश्वरे वचने शिक्षाई इज्जत बधियेल।

¹¹ किस कि परमेश्वरे कृपादृष्टि भुओ असी, जेसे बेलि सोब मेह्‍णु बच घियेल।

¹² त से असी खबरदार कती कि अभक्ति त मतोके इच्छा छड़ दी कइ अपु मन बदलाए। त इस कलि जुग अन्तर पूरे भक्ति त इमानदारी जुए त समोझि कइ अपु अपु उमर कटे,

¹³ त अपु से बोडे उम्मीद, मतलब हें बोडा परमेश्वर त बचाणे बाड़ा यीशु मसीह दुबारी एणे भाड़ बिशे।

¹⁴ तेन अपु जिन्‍दगी हें लिए भकत दिती, ताकि अस सम्हाई पाप केआं छुड़कियेल त शुचे भोई कइ तसे यक टज बणियेल जे खरे खरे कम करण जे तेयार असे।

¹⁵ ए तीतुसा, ई सोब बोके सम्हाई जेईं पूरे हक जुए शिचाल, त खबरदार कर। कोई बि तोउ कमजोर ना समझे।