तीतुस 1 - Walangi

नमस्कार

¹ में ट्यारे तीतुस, परमेश्वरे गुलाम त यीशु मसीहे प्रतिनिधि अउं पौलुस तोउ जे नमस्कार कता। परमेश्वरे अउं लंघो असा ताकि तसे चुणो मेह्‍णु बुच विश्वासे बारे प्रचार करुं त तेन्हि सच्चाई शिचालुण, जेसे बेलि तेन्हि पता लगियाल कि परमेश्वर मनी कइ कीं जीण।

² ए सच्चाई तेन्हि यकीन दिआन्ती कि तेन्हि केईं अमर जीवन असा। जे परमेश्वर कदी झूठ ना बोता, तेन से तेन्हि देण जे सुआ टेम पेहलाई अपु जुबान दुतो थी।

³ अब ठीक टेम पुठ तेन अपु बोक मेह्‍णु के सामणि अण्हती, जेसे सम्हाई के अगर प्रचार करण जे परमेश्वरे मोउं जिम्मा दुतो असा।

⁴ त ए तीतुसा! विश्वास अन्तर में सच्चा कुआ, तोउ जे ई लिखुण लगो असा। परमपिता परमेश्वरे त असी बचाणे बाड़ा यीशु मसीहे कृपादृष्टि त शान्ति तोउ पुठ भुन्ति रिहे। आमीन

सतसंगे मुखिये गुण

⁵ बे कोईया! तु मेईं तोउं क्रेते टापु अन्तर बिशिण दिता ताकि हें जे कम बाकी असु तस पूरा कइ बटियेल त जीं मेईं निआंग दुतो थी, तीं जगाई जगाई मुखिया नियुक्त कइ बटियेल।

⁶ मुखिया दोषी ना लौता, यक जुएली धाणि लौता, जेसे गभुर बि विश्वासी भो लौते त लूचे होर फुर्तुआटा ना लौते।

⁷ किस कि जे सतसंगे मुखिया भुन्ते, से परमेश्वरे भण्डारी बणते। इस बझई जुए से दोषी ना लौते; ना हठि, ना उश्कोटे, ना प्याकड़, ना कुटीण बाड़े, होर ना अपु फायदे लालची लौते।

⁸ पर से सेवा पाणि करणे बाड़े, भलाई करणे बाड़े, खरे, न्यायी, समोझि कइ बिशणे बाड़े त शुचा लौते।

⁹ होर से जे यकीन लेएक वचने शिक्षा असी केआं शिचो असी, से तेन्हि सुसुर मानते ताकि से खरे प्रवचन दी बटियेल त जे खिलाफ असे तेन्हि चुप कराई बटियेल।

¹⁰ किस कि सुआ वेकाबु, बजरीणे बाड़े त धोखा देण बाड़े मेह्‍णु असे, खास कर कइ यहूदी विश्वासी मेह्‍णु केईं।

¹¹ तेन्हि चुप कराण जरूरी असु, किस कि ए अपु फायदा लिए जे शिक्षा गलत असी, तस शिचाल कइ सम्हाई के घर उजाड़ुण लगो असे।

¹² तेन्हि बुचा कोई यक जेईं तेन्के भविष्य वक्ता असा, बोलो असु कि “क्रेते मेह्‍णु हमेशा झूठे, दुष्ट जानवर त आलसी पेटियाले भो।”

¹³ ए बोक सच्ची असी। तोउं त तेन्हि खरे समझाण दिए ताकि तेन्के विश्वास सुसुर रिहे।

¹⁴ होर यहूदी के से बेह्‌लि कथाई जे त सच्चाई छड़ देण बाड़े तेन्हि मेह्‍णु के निआंग जे कोई ध्यान ना दे।

¹⁵ जेन्के मन साफ असा, तेन्हि जे सम्हाई शुचु असु। पर जेन्के मन जुठे असे, त जे विश्वास कते नोउ, तेन्हि जे कुछ बि शुचु नेईं। तेन्के मन त अन्तरात्मा दुहिए जुठी असे।

¹⁶ से त बोते कि परमेश्वर पिछाणते, पर तेन्के कम ई हरालता कि से तस न पिछाणते। किस कि से रशुणे असे त निआंग ना मानणे बाड़े असे। होर तेन्के बेलि कोई बि खरु कम भुन्ते ई नउ।