रोमी 6 - Walangi

पापे वश केआं छुड़कुण, त मसीह लिए जीण

¹ में बोलो बोकी पुठ मोखयाल कोउं जेईं ई बोलियाल कि “चले, अस पाप त गलती कते रेहन्ते, ताकि परमेश्वरे कृपा असी पुठ हउ बि भोल।”

² पर अउं बोता कि ना, कदी ना! किस कि अस पापे वश केआं छुड़की गो असे, होर गलती त पाप कर कइ हउ ना जीन्ते।

³ तुस त जाणते ना कि अस सोब, जे यीशु मसीहे नओएं बइ पुओणि अन्तर चुसिए असे, तसे जुओई साते मर बि गो असे।

⁴ तोउं त, तसे नओएं बइ पुओणि अन्तर चुस कइ मरणे बेलि जीं अस तेस जोई साते पथि बि गो असे, ताकि जीं बोउए अपु महिमाईं बेलिए मसीह मरो तेन्हि अन्तरा दुबारी जीआ, तिहांणि अस बि नोई जमणे जिन्‍दगी जीएल।

⁵ त किस कि अस मसीहे मरण अन्तर तेस जोई मी गो असे, त जरूर तसे जीण अन्तर बि तेस जोई मीते।

⁶ अस जाणते कि तेस जोई साते हें पुराणे सभाव बि क्रूस पुठ मर गे, ताकि गलती त पाप करणे हें सभाव मुक घियेल, त तढ़िया पता अस पापे गुलाम ना रिहेल।

⁷ किस कि जे मर गा, से पापे वश केआं छुड़क कइ अजाद भोई गे।

⁸ तोउं त, किस कि अस मसीह जोई साते मर गो असे, त हें विश्वास ईं असा कि अस तेस जोई साते जीन्ते बि।

⁹ किस कि अस जाणते कि परमेश्वरे मसीह मरो तेन्हि अन्तरा दुबारी जीआ, त से फि कदी ना मरता; तेस पुठ फि मौत कदी जीत ना बटती।

¹⁰ मसीह जपल मरा, से हें गलती त पापे लिए यके लिंगि मरा। पर से अभेईं परमेश्वर जुए सात बिशुण जे जीन्ता भोई गो असा।

¹¹ तोउं त, तुस बि अपु अपफ गलती त पाप करण जे मरोरे समझे, पर परमेश्वरे लिए मसीह यीशु अन्तर जीन्ते समझे।

¹² तोउं त, तुस अपु खतम भुणे बाड़े जिसम पुठ पापे इच्छाई हेसाब जुए जीण ना दिए कि पाप तुसी पुठ राज करेल।

¹³ होर ना अपु जिसमे अंग अधर्मे हथियार बणुण जे पापे हवाले करे। पर अपु अपफ मरो तेन्हि अन्तरा जीन्ता भुओ समझ कइ परमेश्वरे हवाले करे त अपु अंग धरमे हथियार बणुण जे परमेश्वरे धे दिए।

¹⁴ तुस कदी पापे वश अन्तर ना रिहे, किस कि तुं जीण नियमे वश अन्तर ना, पर परमेश्वरे कृपाई वश अन्तर असु।

पापे गुलामी केआं छुड़की कइ धरमे गुलाम बणुण

¹⁵ मोखयाल कोउं जेईं ई बोलियेल कि “चले, अस गलती त पाप कते रेहन्ते, किस कि अस नियमे वश अन्तर नेईं, बल्कि परमेश्वरे कृपाई वश अन्तर असे।” अउं बोता, कदी ना।

¹⁶ कि तुस ना जाणते ना कि जेसे निआंग मानणे लिए तुस अपफ जे तेयारेरते, तसेरी गुलाम बणते। चहे तुस पाप करण लिए अपफ जे तेयारेरते, जेसे अखिर फल मौत असी, त तुस पापे गुलाम बण गो असे। होर चहे तुस परमेश्वरे निआंग मानणे लिए अपफ जे तेयारेरते, जेसे बेलिए तुस धर्मी कम कते, त तुस तसेरी गुलाम असे।

¹⁷ पर परमेश्वरे धन्यवाद लौता भो कि तुस जे पेहले पापे गुलाम थिए, अब पूरे मन जुए तेस शिच मानणे बाड़े बण गे, जे तुसी मेओ थी।

¹⁸ होर पापे वश केआं छुड़क कइ तुस धर्मी परमेश्वरे गुलाम बण गे।

¹⁹ ई सोब बोक समझाणे लिए तुस कमजोर असे। तोउं त मेईं गुलामी के मशाल दी कइ बोलो असु। त जीं तुसी अपु अंग अधर्मे कमे लिए त पापे गुलाम बणाई छो थिए, तिहांणि अब अपु सम्हाई अंग शुचा भुणे लिए धर्मी परमेश्वरे गुलाम बणाई छड़े।

²⁰ जपल तुस पापे गुलाम थिए, त धर्मी परमेश्वरे निआंग मनण केआं अजाद थिए।

²¹ पर तेस अजादी बेलि तुं की फायदा भुआ? तुसी त अब तेन्हि कमी हेर शरम एन्ती, किस कि तेन्हि कमी के अखिरि फल मौत असी।

²² पर अब पाप केआं अजाद भोई कइ त परमेश्वरे गुलाम बण कइ तुसी जे फायदा भो असा, तसे बेलिए तुस शुचे भुन्ते, त अखिर अन्तर अमर जीवन मेता।

²³ किस कि पाप करणे मजूरी मौत असी, पर परमेश्वरे वरदान हें प्रभु मसीह यीशु अन्तर अमर जीवन असा।