रोमी 4 - Walangi

अब्राहमे विश्वासे नमूना

¹ ईं नेईं त, असी हें यहूदी मेह्‍णु के पुरखा अब्राहमे विश्वासे बारे की बोलुण?

² किस कि अगर अब्राहम नियमे कमी के बेलिए धर्मी बणताथ, त तेस बि अक्कड़ लाण जे बझह मेतीथ। पर परमेश्वरे सामणि ना।

³ किस कि धरमे कताब अन्तर की लिखो असु? लिखो असु कि “अब्राहमे परमेश्वर पुठ विश्वास किआ, त एसे बेलि परमेश्वरे से धर्मी मना।”

⁴ अब कम करणे बाड़ी कें धे मजूरी देण, कोई दान ना भो, पर तेन्के हक भो।

⁵ पर कोई जेईं बि अपु किओ कमे बेलि परमेश्वरे समाणि धर्मी ना बोलिन्ता। पर जे अधर्मी मेह्‍णु धर्मी बणाणे बाड़े परमेश्वर पुठ विश्वास कता, सेईंए धर्मी बोलिन्ता।

⁶ जेस मेह्‍णु परमेश्वर बजन कमी के धर्मी बणान्ता, तेस जे राजा दाऊद बि धन्य बोता।

⁷ “धन्य असे से, जेन्के अधर्म माफ कइ छो असे, होर जेन्के पाप घटो असे।

⁸ धन्य असे से मेह्‍णु, जेन्हि प्रभु दोषी त पापी ना बोलाल।”

⁹ त ए अशुश कि सद खतना भुओ यहूदी मेह्‍णु जे असी ना, या फि बजन खतना किओ गैर यहूदी मेह्‍णु जे बि असी? अस ईं बोते कि “परमेश्वर पुठ विश्वासे ईं अब्राहम धर्मी बणा।”

¹⁰ त से कीं परमेश्वरे धर्मी बणा? कि तसे खतना भुण केआं पेहले ना, कि खतना भुण केआं पता बणा? से खतना कराण केआं पेहले बणा, ना कि खतना कराणे केआं पता।

¹¹ अब्राहमे परमेश्वर पुठ विश्वास करणे सुआ टेम बाद ईं ई हरालण जे अपु खतना किआ कि खतना ना कराई कइ बि परमेश्वर पुठ विश्वास करणे बेलि से धर्मी बणो असा। एस बझई जोई से तेन्हि सोबी के पुरखा बणा, जे बगैर खतने धर्मी बणण जे परमेश्वर पुठ विश्वास कते।

¹² होर एसे बेलि से तेन्हि खतना भुओ बाड़ी के बि पुरखा बणा, जेन्हि ना सद खतना कराओ असा, पर हें पुरखा अब्राहमे ईं बि विश्वास कते, जीं तेन बजन खतने किओ थिआ।

विश्वास करणे बाड़ी जे परमेश्वरे जुबाने फल मेण

¹³ परमेश्वर अब्राहम त तसे वंश जे जपल धरती हकदार बणणे जुबान दिती, त से अब्राहमे नियम मानणे बझई जोई न दिती, बल्कि तस पुठ अब्राहम विश्वास करणे बेलि धर्मी भुणे बझई जोई दिती।

¹⁴ किस कि अगर नियम मानणे बाड़े धरती हकदार भुए, त परमेश्वर पुठ विश्वास करण नकम्मा, होर तसे जुबान बेकार भुई।

¹⁵ किस कि नियम टोड़ुण परमेश्वर लेहरारती। पर नियम न भोल त नियम टोड़ुण बि ना भुन्ते।

¹⁶ एस बझई जोई परमेश्वर पुठ विश्वास करणे बेलि ईं जुबान मेती, ताकि से तसे कृपादृष्टि हेसाब जुए भोल। से अपु जुबान तेन्हि सोबी कें धे देन्ता, जे अब्राहमे ईं विश्वास करणे बाड़े असे - अस यहूदी जे, जेन्हि केईं परमेश्वरे नियम त विश्वास असा, होर तेन्हि गैर यहूदी जे बि, जेन्हि केईं नियम त नेईं, पर अब्राहमे ईं विश्वास असा। किस कि सेईंए त असी सोबी विश्वासी के पुरखा भो।

¹⁷ जीं कि धरमे कताब अन्तर परमेश्वरे तेस जे बोलो बोके लिखो असी कि “मेईं तु सुआ जाति के पुरखा बणाओ असा।” ए तोउं बोलु, किस कि अब्राहमे तेस परमेश्वर पुठ विश्वास किआ, जे मरो तेन्हि दुबारी जीआन्ता, होर जे असे ई नउ, तेन्हि भुण जे बोता।

¹⁸ अब्राहम उम्मीद रखणे कोई बझह नेओथ। तोउं बि तेन उम्मीद रख कइ विश्वास किआ त सुआ जाति के पुरखा बणा, जीं परमेश्वरे तस जे जुबान दुतो थी कि “तु सुआ जाति के पुरखा बणता।”

¹⁹ से तपल कोई यक सौ साले थिआ। तोउं बि अपु लगभग मरणे बाड़ी जिसम त अपु जुएली सारे गभुर ना भुणे हाल हेर कइ बि विश्वास अन्तर कमजोर ना भुआ।

²⁰ होर ना विश्वास छड़ दी कइ परमेश्वरे जुबान पुठ कोई शक किआ, पर विश्वास अन्तर पक्का भोई कइ परमेश्वरे गुणगान किआ।

²¹ तस पूरा यकीन थिआ कि परमेश्वर अपु दुतो जुबान पूरी करणे ताकत असी।

²² इस बझई जोई परमेश्वरे अब्राहम धर्मी मना।

²³ होर धरमे कताबे इन्हि बोकी, “विश्वासे बेलि ईं से धर्मी बणा” ना सद तसे लिए लिखो असु,

²⁴ बल्कि हें लिए बि लिखो असु, जेन्हि परमेश्वर विश्वास बेलि धर्मी बणान्ता, किस कि अस तेस पुठ विश्वास कते, जेन हें प्रभु यीशु मरो तेन्हि अन्तरा दुबारी जीआ।

²⁵ परमेश्वर से हें गलती त पापी के बझई जोई मरण दिता, त असी धर्मी बणाण जे दुबारी जीआई बि छड़ा।