रोमी 15 - Walangi

अपफ ना, होरे खुश करण।

¹ त ए ट्यारेओ! अस जे विश्वास अन्तर पक्के असे, असी लौतु कि जे विश्वास अन्तर कमजोर असे, तेन्के कमजोरी सेहण करीण, न कि अपु अपफ खुश करण।

² असी बुचा हर यक जेईं से सोब करण चहिए, जेसे बेलि हें होरे विश्वासी भाई भेणि के मदत भोई बटियेल त मसीह पुठ विश्वास अन्तर से पक्के भोई घियेल।

³ किस कि मसीह सद अपु अपफ खुश न भुआ, पर धरमे कताब अन्तर लिखो बोके हेसाब जुए किउ। लिखो असु कि “ए परमेश्वरा, जे बुराई मेह्‍णु तें कते, से मोउं पुठ एई गो असी।”

⁴ किस कि धरमे कताब अन्तर जे बि बोक पेहलाई लिखि गो असी, से हें शिक्षाई लिए लिखिए असी, ताकि तेसे बेलि अस लाह जोई दुख सीढ़ बटते, त तसे हिम्मते बेलिए असी उम्मीद मेई सकती।

⁵ अउं प्रार्थना कता कि लाह त हिम्मत देणे बाड़ा परमेश्वर तुसी यीशु मसीहे ईं अपफ बुच यक मन भोई कइ बिशणे वरदान दियेल,

⁶ ताकि तुस यक मन भोई कइ त उई मी कइ हें प्रभु यीशु मसीहे बोउ परमेश्वरे गुणगान करियेल।

सोबी जे खुश खबरी

⁷ तोउं त, जीं मसीहे तुस अपणाओ असे, तिहांणि तुस बि यकी होरी जोई उई मी कइ बिशे, ताकि परमेश्वरे महिमा भोल।

⁸ अउं त बोता कि जे जुबान परमेश्वरे यहूदी मेह्‍णु के पुरखी कें धे दुतो थी, तेन्हि पूरा करण जे त परमेश्वरे सच्चाई सबूत देणे लिए, मसीह यहूदी मेह्‍णु के सेवक बणा।

⁹ होर से गैर यहूदी मेह्‍णु पुठ परमेश्वरे दाहे बझई जोई बि आ, ताकि से बि परमेश्वरे महिमा करियेल, जीं धरमे कताब अन्तर राजा दाऊदे लिखो असु, “ए प्रभु, तोउं त अउं हर यक जाति मेह्‍णु के बुछ तें धन्यवाद कता, त तें नओएं भजन लान्ता।”

¹⁰ फि ई बि बोलो असु, “ए हर यक जाति मेह्‍णुओ! परमेश्वरे टज जोई मी कइ खुशी मनाए।”

¹¹ होर ई बि कि “ए गैर यहूदी मेह्‍णुओ, प्रभु पूजा अराधना करे, होर ए हर यक जाति मेह्‍णुओ! तसे गुणगान करे।”

¹² होर फि यशायाह भविष्य वक्ता ई बोता, “जिशे कुआ, दाऊद राजे टब्बर अन्तर यक ईं मेह्‍णु खड़िन्ता, जे गैर यहूदी मेह्‍णु पुठ राज कता, होर तेस पुठ गैर यहूदी मेह्‍णु उम्मीद रखते।”

¹³ त अउं प्रार्थना कता कि जे परमेश्वर हें जीवन उम्मीद जुए भरता, विश्वास करण अन्तर तुसी सोब किस्मी खुशी त शान्ति जोई भरे, ताकि शुची आत्माई ताकती बेलिए तुस अपु उम्मीद अन्तर पक्के भोई घियेल। आमीन

पौलुसे योजना त अखिरि बोक ( 15:14—16:27 ) गैर यहूदी मेह्‍णु बुछ पौलुसे प्रचारे कम

¹⁴ त ए में ट्यारेओ! तुं बारे मोउं पूरा यकीन असा कि तुस भलाई करण अन्तर माहिर असे, होर परमेश्वरे ज्ञान जोईए बि भरिए असे, त यकी होरी शिचाल बटते।

^15-16 तोउं बि इस चिट्ठि अन्तर तुसी चेता दिआण जे कोठि कोठि मेईं धिक सक्ति कइ लिखो असु। ई करणे हिम्मत मोउं परमेश्वरे कृपाई बेलि मेओ असी। तेन अउं गैर यहूदी मेह्‍णु बुछ मसीह यीशु खुश खबरी प्रचार करण जे यक खास दूत त पुजारे ईं सेवा करण जे नियुक्त किओ असा। एसे बेलि शुची आत्मा गैर यहूदी मेह्‍णु परमेश्वर खुश करणे लेएक भकते ईं बणान्ती।

¹⁷ त किस कि अउं मसीह यीशु जुए जुड़ो असा, त परमेश्वरे खुश खबरी जे, जे सेवा अउं कता, तस बारे रोभ किढ़ता।

^18-19 मसीहे दुतो ताकती बेलि गैर यहूदी मेह्‍णु केईआं परमेश्वर मनाण जे, मेईं जे जे किओ असु, तेन्हि छड़ दी कइ केसे होर बोकी पुठ रोभ लाणे हिम्मत मोउं केईं नेईं। ई सोब मेईं अपु बोके त कमे बेलि किउ, जे शुची आत्माई ताकती बेलिए होरे होरे निशाण त चमत्कारी कमी जुए भो थिउ। त मेईं ना सद यरुशलेम शेहरे चोहरो कना, बल्कि इल्लुरिकुम इलाके तकर जेठि बि अउं गा, मसीहे खुश खबरी प्रचार किआ।

²⁰ त हमेशा में इच्छा त कोशिश ईं असी कि जेठि जेठि बि मसीहे बारे प्रचार नेईं भुओ, तठि खुश खबरी शुणाउं, ताकि होरी मेह्‍णु खाई पुठ अपु घर ना बणाउं।

²¹ पर जीं धरमे कताब अन्तर लिखो असु, तिहांणि लौतु भो कि, “जेन्हि बुछ तसे बारे प्रचार नेईं भो सेईंए हेरते, त जेन्हि तसे खुश खबरी कदी नेईं शुणो सेईंए समझते।”

रोम शेहर घेणे पौलुसे योजना

²² इस कमे बझई जोई अउं तुसी केईं एण केआं घड़ी घड़ी रुक बिशा।

²³ पर अभेईं, इन्हि इलाके अन्तर में कम पूरु भोई गो असु, होर सुआ साल केईआं खड़ि में तुसी केईं एणे इच्छा बि असी,

²⁴ त जपल अउं स्पेन राज्य जे घिउं त तुं एन बइ एई कइ घेन्ता। किस कि मोउं उम्मीद असी कि तेस सफर अन्तर तुसी जोई मुलाकत भुन्ति, होर जपल तुं परेम त भाईचारे जोई में मन धिक खुश भोई घियाल त तुस मोउं अगर घेण जे मदत करियेल।

²⁵ पर अभेईं अउं मसीहे विश्वासी मेह्‍णु के सेवा करण जे यरुशलेम शेहर जे घेण लगो असा,

²⁶ किस कि मकिदुनिया त अखया राज्ये विश्वासी मेह्‍णु ईं खरु लगु कि यरुशलेम शेहरे यहूदी विश्वासी मेह्‍णु अन्तर जे गरीब असे, तेन्हि जे कुछ चन्ना कठेरुं।

²⁷ तेन्हि ईं करुण ठीक किउ, होर सच्चे बि से तेन्के ऋणि असे। त किस कि यहूदी के बेलि गैर यहूदी मेह्‍णु के आत्माई फायदा भो असा, त ई ठीक असु कि गैर यहूदी के बेलि यहूदी मेह्‍णु मदत भोल।

²⁸ तोउं त, जपल अउं इस कम पूरा करुं, होर चन्ना तेन्हि केईं पुजाई छउं, तोउं स्पेन राज्य जे घेन्त पेंत अउं तुं एन बइ एई कइ तुसी जुए मीता।

²⁹ होर अउं जाणता कि जपल अउं तुसी केईं एऊं, त मसीहे सम्हाई अशुश अपफ जुए साते घिन एन्ता।

³⁰ ए ट्यारेओ! हें प्रभु यीशु मसीहे त शुची आत्माई दुतो परेम याद दिआई कइ अउं तुं छने कता कि जीं अउं पूरे ताकत जुए परमेश्वर जे प्रार्थना कता, तीं तुस बि में लिए, मोउं जोई साते मी कइ लगातार प्रार्थना कते रिहे,

³¹ ताकि परमेश्वर मोउं अविश्वासी यहूदी मेह्‍णु केईआं बचाल, होर चन्ना अण्हणे में सेवा यरुशलेम शेहरे शुचे मेह्‍णु जे खरी लगेल।

³² तोउं अउं परमेश्वरे इच्छाई हेसाब जुए खुशी खुशी तुसी केईं एऊं, होर तुसी जोई मीणे बेलि मोउं अराम मेईंयाल।

³³ जे परमेश्वर असी शान्ति देन्ता, तुसी सोबी जोई साते साते रिहे। आमीन।