रोमी 13 - Walangi

प्रशासने अधिकारी के वश अन्तर बिशुण

¹ हर यक मेह्‍णु अपु प्रशासने अधिकारी के वश अन्तर बिशुण, किस कि परमेश्वर ईं असा जे तेन्हि अधिकार देन्ता। होर जे अधिकारी असे, से परमेश्वरे नियुक्त किओ असे।

² तोउं त, जे कोउं अधिकारी के खिलाफ भुन्ता, से परमेश्वरे इच्छाई खिलाफ भुन्ता। होर अधिकारी के खिलाफ भुणे बझई जोई तेन्हि सज्जा मेती।

³ अउं ए तोउं बोता किस कि अधिकारी खरे कम करणे बाड़ी डराण जे नेईं, पर बुरे कम करणे बाड़ी डराण जे असे। तोउं त अगर तुस अधिकारी हेर नडर रेहण चहन्ते, त खरे कम करे। तोउं से तुं तारीफ कते।

⁴ किस कि से तुं भलाई लिए परमेश्वरे सेवक भिन्थ। पर अगर तुस बुराई करियेल, त डरे, किस कि परमेश्वर ए बुरे कम करणे बाड़ी सज्जा देण जे नियुक्त किओ असे। ई कर कइ से तसे सेवा कते।

⁵ तोउं त, अधिकारी के वश अन्तर बिशुण जरूरी असु, ना कि सद तेन्के सज्जा देणे डरे बझई जुए, पर अन्तरात्माई उगाही बझई जुए बि कि से परमेश्वरे सेवक भिन्थ।

⁶ इस बझई जुए मामला बि देण दिए, किस कि अधिकारी जपल अपु कम सुसुर कते रेहन्ते, से परमेश्वरे सेवा कते।

⁷ तोउं त, हर यक जेईं के हक चुकान्‍ते रिहे, जेस मामला लौता, तसे धे मामला दिए, जेस हरा-करा लौता, तसे धे हरा-करा दिए। जेस हेर डरुण चहिए, तस हेर डरीण दिए, जेसे इज्जत करीण चहिए, तसे इज्जत करे।

यक होरी जोई परेम करण

⁸ तुस अपफ बुछ परेम जोई बिशणे ऋण छड़ दी कइ, होर केसेरी ऋणि न बणे। किस कि जे होरी जोई परेम कते, तेन्हि नियम मनो असे।

⁹ किस कि “नाजायज रिश्ता न रखुंण, मेह्‍णु मारण नउ, चोरुण नउ, लालच न करीण” त इन्हि छड़ कइ होरी बि केहि निआंग असी, जेन्के सीरे इस बोक अन्तर असी कि, “तु अपु भेयाड़ी जोई अपु बराबर परेम कर।”

¹⁰ अगर तुस अपु भेयाड़ी जोई सच्चे परेम कते त तुस तेन्हि जोई कोई गलत न कते। तोउं त परेम करण, नियम मनण असे।

मसीहे एणे रोज

¹¹ अभेईंकण टेम पिछाण कइ जे मेईं बोलो असु तस करीण दिए। खड़ भो त समोझि बिशे, किस कि अब हें बचणे टेम नीड़ा एई गो असा। हें बचणे टेम पेहले केईआं अब सुआ नीड़ा एई गो असा।

¹² धरती पुठ हें जीण पूरु भुणे बाड़ु असु, जीं यक रात खतम भुणे बाड़ी असी, त भ्याग भुणे बाड़ी असी। तोउं त, असी अन्हारे कम छड़ दी कइ टगड़ियारी हथियार टाइ रखण।

¹³ असी तीं जीण, जीं अस दिसाई हंटते। ना कि मौजमस्ति कर कइ, न प्याकड़ बण कइ, न नाजायज रिश्ता बणाई कइ त बेशर्मी कम कर कइ, होर न कुटीण मडीण त जड़ कइ।

¹⁴ बल्कि असी यीशु मसीहे ईं जीण असु। त असी अपु जिसमे बुरी इच्छा पूरी करणे कोशिश न करीण।