रोमी 1 - Walangi

नमस्कार त शुरुवाती बोके ( 1:1-17 ) नमस्कार

¹ में ट्यारे रोम शेहरे विश्वासी भाई त भेणिओं! अउं पौलुस, यीशु मसीहे सेवक तुसी जे नमस्कार कता। परमेश्वरे अउं मसीहे प्रतिनिधि बणण जे भिहो असा, त तसे खुश खबरी प्रचार करण जे बखरे किओ असा।

² एस खुश खबरी बारे ईं तेन सुआ सौ साल पेहले जुबान दुतो थी कि से अपु भविष्य वक्ती के बेलि लिखो बोकी अन्तरा एस हरालता, जीं धरमे कताब अन्तर असु।

³ ए खुश खबरी अपु कुआ, हें प्रभु यीशु मसीहे बारे असी। से जिसमे हेसाब जुए त राजा दाऊदे ऊड़ी अन्तर जमो थिआ।

⁴ पर परमेश्वरे गुणे हेसाब जुए शुची आत्माई ताकते बेलि मरो तेन्हि अन्तरा दुबारी जी कइ तेन हरालु कि सच्चे बि से परमेश्वरे कुआ भो।

⁵ तसे बेलिए असी पुठ कृपा भुई त तेन अस अपु प्रतिनिधि बणाए, ताकि तसे नओएं प्रचार करणे बेलि सोब जाति मेह्‍णु विश्वास कर कइ तस मानेल।

⁶ तेन्हि अन्तर तुस बि असे जे परमेश्वरे यीशु मसीहे अपु भुण जे भिओ असे।

⁷ ए चिट्ठि रोम शेहरे तुसी सोबी जे असी, जे परमेश्वरे ट्यारे असे त शुचे भुण जे भिहो असे। हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे, होर तुसी शान्ति मेती रिहे। आमीन।

धन्यवाद देणे प्रार्थना

⁸ सोबी केआं पेहले त अउं तुं सोबी के लिए यीशु मसीहे बेलिए अपु परमेश्वरे धन्यवाद कता, किस कि मसीह पुठ तुं विश्वासे बारे पूरे धरती पुठ बोके भुण लगो असी।

⁹ जेस परमेश्वरे सेवा अउं पूरे मन जोई तसे कोईया खुश खबरी प्रचार करणे बेलि कता, सेईंए में उगाह असा कि अउं दन रात अपु प्रार्थना अन्तर तुसी याद कता रेहन्ता।

¹⁰ त रोज खास कर कइ प्रार्थना कता कि तुसी केईं एणे में इच्छा अखिर अन्तर परमेश्वर खुश कराल त से तुसी केईं एणे लिए मोउं जे बत बणाल।

¹¹ तुसी जोई मीणे में तीं इच्छा असी, ताकि परमेश्वरे आत्माई दुतो वरदान तुसी जुए बांट सकुं, जेसे बेलि विश्वास अन्तर तुस ताकतवर बण घेन्ते।

¹² मतलब ई असा कि जपल अस मीते त में विश्वासे बेलि तुसी, होर तुं विश्वासे बेलि मोउं ती हिम्मत मेईंयेल।

¹³ ए ट्यारेओ, अउं ना चहन्ता कि तुस एस बोक केआं अणजाण रिहे। मेईं बार बार तुसी केईं एण चहु, ताकि जीं गैर यहूदी मेह्‍णु बुच मेईं मसीहे चेले बणाए, तीं तुसी बुच बि बणान्ता। तोउं बि अउं अपल तकर केहि बोकी रोक रखो असा।

¹⁴ में जिम्मेबारी असी कि अउं बुद्धि बाड़े त नालायकी के बुछ, होर पढ़ो लिखो त अनपढ़ मेह्‍णु होर सोबी मेह्‍णु के बुछ खुश खबरी प्रचार करुं।

¹⁵ तोउं त, अउं रोम शेहर अन्तर बिशो तुसी बुछ बि खुश खबरी शुणाण जे हथि खुरी प्युली लाई बिशो असा।

खुश खबरी ताकत

¹⁶ खुश खबरी केआं अउं केसे बझई जुए बि ना लजिन्ता, किस कि से हर यक विश्वास करणे बाड़ी के बचणे लिए परमेश्वरे ताकत असी, पेहले त यहूदी मेह्‍णु लिए, फि गैर यहूदी लिए।

¹⁷ किस कि ए खुश खबरी हरालती कि जे परमेश्वर पुठ विश्वास कते, तेन्हि से कीं कइ धर्मी बणान्ता, जीं धरमे कताब अन्तर लिखो असु, “विश्वासे बेलिए ईं धर्मी मेह्‍णु जीन्ते रेहन्ते।”

यहूदी त गैर यहूदी मेह्‍णु, सोब पापे वश अन्तर ( 1:18—3:20 ) मनखे दोष

¹⁸ परमेश्वरे लेहेर स्वर्ग केआं तेन्हि सोबी अधर्मी त पापी मेह्‍णु पुठ एन्ती, जे अधर्मे कमे बेलिए परमेश्वरे सच्चाई चिख रखते।

¹⁹ परमेश्वरे बारे ज्ञान सोबी के मन अन्तर असा, किस कि परमेश्वरे अपफ तेन्के मन अन्तर ज्ञान छओ असा।

²⁰ सृष्टि शुरुवात केआं परमेश्वरे ना केणे बाड़े गुण, मतलब तसे कदी ना मुकणे बाड़ी ताकत त सभाव, तसे कमी के बेलिए केण लगो असे। तोउं त, केसे केईं बि कोई बहाना नेईं।

²¹ से बेशक परमेश्वर जाणते, बुझते। तोउं बि तेन्हि परमेश्वरे महिमा न की, होर ना तसे धन्यवाद किआ। तसे बदले तेन्के बुद्धि भ्रष्ट भोई गई, त तेन्के मन अन्हार भोई गा।

²² से अपु अपफ जे त बोडे बुद्धिमान बोतेथ, पर मुर्ख बण गे।

²³ होर कदी ना मुकणे बाड़ा परमेश्वरे महिमा करण छड़ दी कइ मुकणे बाड़े मेह्‍णु, चड़ी चखुरु, जानवर त कीड़े काकली के मुर्ति बणाई।

²⁴ एस बझई जोई परमेश्वरे से छड़ दुतो असे, ताकि से तेन्के मने इच्छाई हेसाब जुए गलत कम करियेल त अपफ बुच छना परदा न करियेल।

²⁵ किस कि तेन्हि परमेश्वरे सच्चाई बदल कइ झुठी बड़ाई छड़ी, त बणाणे बाड़ा परमेश्वरे छड़ दी कइ बणो चीजी के पूजा अराधना त सेवा की। तेन्हि तेस परमेश्वरे पूजा अराधना न की, जेस हमेशा हमेशा लिए महिमा मेओ लौती। आमीन।

²⁶ तोउं त, परमेश्वरे से कुस्तुरी लालचे वश अन्तर छड़ दिते। तेन्के जिल्हाणु अपु अपु सभावे हेसाब जुए रिश्ता रखुंण छड़ दी कइ गलत रिश्ता रखण लगी।

²⁷ तिहांणि मड़द बि अपु अपु सभावे हेसाब जुए जिल्हाणु जोईया रिश्ता रखुंण छड़ दी कइ अपफ बुच जड़ण लगे। होर से मड़द जुओई ईं बेशर्मे कम करण लगे त अपु गलती के तेन्हि सही फल मेई गा।

²⁸ होर किस कि तेन्हि परमेश्वर मनण बेकार लगा, त परमेश्वरे बि से तेन्के नकम्मे मने वश अन्तर कइ छड़े, ताकि से हउ बि खरे-खोटे कम करियेल।

²⁹ तोउं त से सोब किस्मे अधर्मी, त दुष्ट कम कते। तेन्के जीण लालच त बैरभाव जुए भरी गो असु। से होरी हेर जड़ते, मेह्‍णु मारते, झगड़ीन्‍ते, त छल कपट कते त हर बोकी बुराई कते। से चाथि कते।

³⁰ से बदनाम कते, परमेश्वर हेर नफरत कते, होरी के बेइज्जत कते। से सुआ बुड़ुक लान्ते, बोडी बोडी बोके कते, बुराई करणे नोउआं नोउआं तरीके तोपते, त ईये बोउए केहणा ना मानते।

³¹ से बेअक्ले कम कते, अपु जुबान केआं मुकीर घेन्ते। से ना परेम कते, होर ना केसेरी दाह कते।

³² से परमेश्वरे नियम जाणते कि ईं ईं बुरे कम करणे बाड़े मरणे सज्जाई लेएक असे। तोउं बि ना सद से अपफ ईं कम कते, बल्कि ईं कम करणे बाड़ी हिम्मत देन्ते।