प्र. बोके 8 - Walangi

सत रेशमि फुक देण ( 8:1—11:19 ) सुन्ने गुगलोटु

¹ जपल तेन किएऊ सतूं मुहर खोली, त स्वर्ग अन्तर कोई आधे घंटे तकर शुनु भोई गोउ।

² तोउं मेईं सत स्वर्गेदूत काए, जे परमेश्वरे समाणि खड़ खड़ बिश्ते, त तेन्के धे सत रेशमि दिती।

³ फि यक होरा स्वर्गेदूत सुन्ने गुगलोटु घिन आ, त कुण्डे भेएड़ खड़ी गा। त तसे धे सुआ गुगुल दुतु कि सोब शुचे मेह्‍णु के प्रार्थनाई जोई साते सुन्ने तेस कुण्ड पुठ छड़ियेल, जे सिंहासन सम्हाणि असी।

⁴ तेस गुगुले तुउ शुचे मेह्‍णु के प्रार्थना जोई साते स्वर्गेदूते हथे बइ परमेश्वरे समाणि पूज गा।

⁵ तोउं स्वर्गेदूते गुगलोटु नी कइ तेस अन्तर कुण्डे आगी केआं म्युरी भरी त धरती पुठ फटाई; त बिजली चमकुण लगी, मेघ गड़कुणे त होरे होरे डरौणी अवाज, त भुंजल घेण लगे।

सत रेशमि

⁶ तोउं से सतो स्वर्गेदूत जेन्हि केईं सत रेशमि थी, तेन्हि अन्तर फुक देण जे तेयार भोई गे।

⁷ पेहले स्वर्गेदूते रेशमि फुक दिती, त लहु मिओ शरवाठे त आग निथि। से धरती पुठ फटाई छड़ी त धरती टाई हेस्सा टड़ गे, होर टाई हेस्सा बुटे बि टड़ गे, त सोब नीलु नीलु घास बि टड़ गोउ।

⁸ दोके स्वर्गेदूते रेशमि फुक दिती, त आगी बइ जाओ यक बोडा फाटे ईं कुछ समन्दर अन्तर फटाई छउ। त टाई हेस्सा समन्दर लहु बण गा।

⁹ त टाई हेस्सा समन्दरे जीव मर गे, त टाई हेस्सा जहाज टूट कइ खतम भोई गे।

¹⁰ टेके स्वर्गेदूते रेशमि फुक दिती, त यक बोडा तारा, मशाले ईं जाओ स्वर्ग केआं टुटा त टाई हेस्सा दरियोउ त पाणि सुजली पुठ झड़ गा।

¹¹ तेस तारे नओं “शेंगर” असु, त टाई हेस्से पाणि कौड़ु भोई गोउ, त सुआ मेह्‍णु तेस पाणि पी कइ मर गे।

¹² चौथे स्वर्गेदूते रेशमि फुक दिती, त दिसे टाई हेस्से, जोसुणे टाई हेस्से त तारे टाई हेस्से पुठ बुखता आई, त से टाई हेस्से अन्हारु भोई गे। होर दिसाई दिसे टाई हेस्सा टेम अन्तरा यक हेस्सा टेम टगड़ियार ना दिती, तिहांणि राति जोसुण त तारे बि टाई हेस्सा अन्तरा यक हेस्सा टगड़ियार ना दिती।

¹³ जपल मेईं फि दुबारी हेरु, त अम्बरे बुचो बुच यक पैठु उडरता काआ त जोरी जोई ईं बोते शुणा, “ए मेईंया! जेन्हि टाई स्वर्गेदूती होता रेशमि फुक देण बाकी असी, तेन्के अवाजे बेलि धरती पुठ बिशणे बाड़ी के खेया खाट भोई घेन्ता।”