प्र. बोके 6 - Walangi

किएऊ सत मुहरी खोलीण

¹ फि मेईं हेरु कि किएऊ तेन्हि सत मुहरी अन्तरा यक मुहरी खोली; त तेन्हि चोहरोई जीवी अन्तरा यक जेईं कड़कड़ांती अवाज बइ बोलु, “आई!”

² मेईं नजर घुमाई त हेरु, यक हच्छा घोड़ा असा, त जे तेस पुठ सवार असा तेन धनुष टातो असा। तसे धे यक मुकुट दी गा, त से जीतो वीर के ईं घेई गा कि से हउ बि जीताल।

³ जपल तेन दोकी मुहर खोली, त मेईं दोके जीव ईं बोता शुणा, “आई!”

⁴ फि यक होरा घोड़ा निथा जे आगे ईं लाल रंगी थिआ। तसे सवारे धे यक बोडी तलवार दिती त ईं हक दिता कि धरती पुठि भाईचारा खतम करियेल, ताकि मेह्‍णु यक होरी मारेल।

⁵ जपल तेन टेकी मुहर खोली, त मेईं टेका जीव ईं बोता शुणा, “आई!” मेईं नजर घुमाई त हेरु, यक टुठा घोड़ा असा, त तसे सवारे हथ यक टकड़ी असी।

⁶ तोउं मेईं तेन्हि चोहरोई जीवी के बुचा यक अवाज ईं बोती शुणी, “यक भयंकर ईं अकाल लंघाण दिए, कि सेर भइ गिहुंए आटे कीमत यक रोजे धिहाड़ी भुओ लौती, त तिहांणि टाई सेर जोउवे आटा मेओ लौता। पर जैतुने त दछि बगी के कोई नुकसान ना करण।”

⁷ जपल तेन चौंथु मुहर खोली, त मेईं चौंथु जीवे अवाज ईं बोती शुणी, “आई!”

⁸ मेईं नजर घुमाई त हेरु यक पीया घोड़ा असा। तसे सवारे नउ थिउ “मरुण”, त पाताल तसे पता पता असा। तेन्के धे धरती चोउर हेस्सा बुठा यक हेस्से हक दी गा कि तलवार, अकाल, महामारी त धरती पुठि जंगली जानवरी के बेलिए मेह्‍णु मार छड़े।

⁹ जपल तेन पन्जु मुहर खोली, त मेईं कुण्ड पड्डे तेन्हि मेह्‍णु के प्राण काए, जे परमेश्वरे वचने बझई जोई त तेन्के दुतो उगाही बझई जोई मरि गो थिए।

¹⁰ तेन्हि जोरी जोई छनेअरे कर कइ बोलु, “ए महान प्रभु, शुचा त सच्चा! तु न्याय करण जे हउ कतु चेरे लान्ता? धरती पुठ बिशणे बाड़ी केआं हें लहुए बदला कपल नेन्ता?”

¹¹ तोउं परमेश्वर तेन्हि अन्तरा हर यक जेईं कें धे हच्छे झिणे दिते, त बोलु “जपल तकर तुं साथी सेवक त भाई, जे तुं ईं मरणे बाड़े असे, तेन्के गिणती पूरी ना भोल, तपल तकर तुस हउ कुछ टेमे लिए लाह रखे।”

¹² जपल तेन छटूं मुहर खोली त मेईं नजर घुमाई त हेरु कि यक बोडा भुंजल गा, त दिस तुओई ईं टुठु त पूरी जोसुण लहुए ईं भोई गई।

¹³ अम्बरे तारे धरती पुठ ईं झड़े कि जीं सुआ ब्यारी बेलिए हिल कइ बुटे पुठा कच्चे फल झड़ते।

¹⁴ अम्बर भुजोठे ईं बेहढ़ी गा। होर हर यक फाट त टापु अपु अपु जगाई केआं डूल गे।

¹⁵ तोउं धरती पुठि राजा, बोडे बोडे मेह्‍णु, सेनापति, अमीर त ताकतवर मेह्‍णु, त हर यक जेईं नौखर त अजाद मेह्‍णु कुड त पलणी पड्डे नियोक गे।

¹⁶ होर फाटी त पलणी जे बोलुण लगे, “असी पुठ झड़े त असी तेस केआं जे सिंहासन पुठ बिशो असा, होर किएऊ लेहेर केआं नियोकाण दिए;

¹⁷ किस कि तेन्के लेहरी खतरनाक दन एई गो असे। एसे समाणि कोउं टिग बटता?”