प्र. बोके 3 - Walangiसरदीस शेहरे सतसंग जे ब्योरा देण 1 “सरदीस शेहरे सतसंगे दूत जे ईं लिख: यीशु मसीह, जेस केईं परमेश्वरे सत आत्मा त सत तारे असे, से ईं बोता कि तुं सोबी कमी अउं जाणता: मेह्णु तुसी जे जीन्ते त बोते, पर असे मरो। 2 अपु विश्वासे उंघुण केईआं खड़ भो, त तुं जे विश्वास मुकते मुकते बचो असा, तस पक्कारिण दिए, किस कि जेस परमेश्वरे अउं सेवा कता, तसे समाणि मोउं तुं कम अधूरु मेतु। 3 तोउं त, याद कर कि तुसी की शिक्षा मेओ थी त की शुणो थिउ। तसे अन्तर बणि बिशे त मन बदलीण दिए। अगर तुस चौकाने ना बिशाल त अउं चोरे ईं एई घेन्ता, त तुसी कदी पता न लगाल कि अउं केस घड़ी तुसी सज्जा देण जे एन्ता। 4 पर आं, तुं अठि सतसंग अन्तर केहि ईं मेह्णु असे, जेन्हि अपु अपु झिणे बुराई जोई जुठे नेईं किओ। से हच्छे झिणे लाई कइ मोउं जोई हंटते, किस कि से इस जोग असे। 5 जे जीतते, तेन्हि इहांणि हच्छे झिणे डबेईन्ते, होर अउं तेन्के नओं जीवने कताब अन्तरा केसे बि रीति जोई न कटता। होर तेन्के नओं अपु बोउए त तसे स्वर्गेदूती केईं मान छता। 6 कन खोल कइ शुणीण दिए कि शुची आत्मा सतसंगी जे की बोती।” फिलदिफिया शेहरे सतसंग जे ब्योरा देण 7 “फिलदिफिया शेहरे सतसंगे दूत जे ईं लिख: यीशु मसीह जे शुचा त सच्चा असा, होर जे दाऊद राजे परमेश्वरे राज्य घेणे कुंजुड़ साह्मता, जेसे खोलो कोई बन्न ना कइ बटता, त ना तसे बन्हो कोई खोल बटता, से ईं बोता कि 8 अउं तुं हर कम जाणता। हेर, मेईं तुं समाणि यक दुआर खोल रखो असु, जेस कोई बन्न ना कइ बटता। तुं ताकत बेशक धिखुभई असी, तोउं बि तुसी में शिच मनो असी त में नओं नेण केआं कदी ना नेईं किओ। 9 हेर! अउं तेन्हि शैताने दले मेह्णु तुं वश अन्तर कइ छता, जे यहूदी बण बिशो असे, पर भिन्थ नओं। से झूठ बोते। हेर, अउं ईं कता कि से एई कइ तुं खुरी पुठ बिश्ते, त ईं बि जाण घेन्ते कि अउं तुसी जोई परेम कता। 10 त जपल सोब धरती बाड़ी परखणे लिए भुमण पुठ मुश्किल घड़ी एन्ती त अउं तुसी तेस घड़ी केआं बचाई रखता, किस कि तुसी में वचने हेसाब जोई लाह रख कइ कष्ट सीढ़ो असे। 11 हेर! अउं झठ एणे बाड़ा असा; त जे किछ तुसी केईं असु, तेस सुसुर टाइ रखे, ताकि कोउं जेईं तुं मुकुट नी ना छड़ियेल। 12 जे जीतते, तेन्हि अउं परमेश्वरे देहेर अन्तर थमे ईं बड़ान्ता, त तेन्हि कोई जेईं बि कदी बाहर ना किढ़ बटते। होर अउं अपु परमेश्वरे नओं त अपु परमेश्वरे तेस शेहरे नओं मतलब नोउए यरुशलेमे नओं तेस पुठ लिखता, जे में परमेश्वरे स्वर्ग केआं एन्ता। तेस पुठ अउं अपु नोउ नओं बि लिखता। 13 कन खोल कइ शुणीण दिए कि शुची आत्मा सतसंगी जे की बोती।” लौदीकिया शेहरे सतसंग जे ब्योरा देण 14 “लौदीकिया शेहरे सतसंगे दूत जे ईं लिख: यीशु मसीह, जे आमीन असा, जे विश्वास करणे लेएक त सच्चा उगाह असा, होर जेसे बेलि परमेश्वरे पूरी सृष्टि बणाई, से ईं बोता कि 15 अउं तुं कमी जाणता कि ना त तुस ठन्ने असे, होर ना ताते: खरु भुन्तुथ कि तुस ठन्ने या ताते भुन्तेथ। 16 त किस कि तुस घुरम ईं असे, ना ठन्ने होर ना ताते, तोउं त अउं तुसी अपु आसी केआं थूकणे बाड़ा असा। 17 तुस बोते कि ‘अस अमीर बण गो असे। हें हर किछ सुहलियत भोई गो असी, त असी केसे चीजी घटी नेईं।’ पर तुस ईं ना जाणते कि तुस कत नभागे, बिचारे, नगे-ढुके, अन्हे त कंगाल असे। 18 तोउं त, में बोक माने! मोउं केआं आग अन्तर परखो सुन्ना मुले नीए, ताकि तुस अमीर बण घियेल। होर हच्छे झिणे नीए, ताकि डब कइ तुसी नगे भुणे लज ना लगियेल त अपु टीरी जोई लाण जे टड नीए, ताकि तुं टीर सारी घियेल। 19 जेन्हि जेन्हि जोई अउं परेम कता, तेन्हि सोबी जेईं जड़कान्ता त समझान्ता। तोउं त सोचीण दिए त अपु मन बदलीण दिए। 20 हेर, अउं तुं मने दुआर पुठ खड़ी कइ घमकान्ता; अगर कोउं में अवाज शुण कइ मोउं अन्तर नीएल, त अउं तसे अन्तर एई घेन्ता, होर अस दुहे जेईं मी कइ साते खांजे खांते।” 21 “जे जीतते, तेन्हि अउं अपफ जोई साते अपु सिंहासन पुठ तिहांणि बिशणे हक देन्ता, जीं अउं बि जीत कइ अपु बोउ जोई साते, तसे सिंहासन पुठ बिश गो असा। 22 कन खोल कइ शुणीण दिए कि शुची आत्मा सतसंगी जे की बोती।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.