प्र. बोके 22 - Walangi

जीवन देणे बाड़ा दरेउ

¹ तोउं तेन स्वर्गेदूते मोउं जीवन देणे बाड़ा पाणि दरेउ हराला, जे साफ शिशे ईं चिलकताथ। ए दरेउ परमेश्वरे त किएऊ सिंहासने केआं निस्ता।

² ए दरेउ तेस शेहरे खास बते बइ बहिन्ता। दरेउए औत-कोत जीवन देणे बाड़े बुटे बसो असे। ए बुटे हर मेहन फल देन्ते त यक साल अन्तर बाराह लिंगि फल फलते। एस बुटे पन्नी अन्तर जाति जाति मेह्‍णु ठीक करणे ताकत असी।

³ अभेईं केआं खड़ तठि शराप लगो किछ ना रेहन्तु। परमेश्वरे त किएऊ सिंहासन तेस शेहर अन्तर भुन्ता त तेन्के सेवक तेन्के पूजा अराधना कते।

⁴ तेन्हि से अमाणि-समाणि हेरते त तसे नओं तेन्के मगिरि पुठ लिखो भुन्तु।

⁵ तठि अब रात भुन्ति ए नउ, होर ना तठि दीये त दिसे टगड़ियारी जरूरत भुन्ति, किस कि प्रभु परमेश्वर तेन्हि टगड़ियार देन्ता, त से जुग जुग तकर तठि राज कते।

अखिरि बोके ( 22:6-21 ) यीशु दुबारी एण

⁶ तोउं तेन स्वर्गेदूते मोउं जे बोलु, “ए जे बोके तोउ जे बोली गो असी, ए सोब सच्ची त यकीन लेएक असी। भविष्य वक्ती के आत्माई के जे परमेश्वर भिन्थ, से प्रभु जे बोक झठ भुणे बाड़ी असी, तेन्हि अपु सेवकी हरालण जे अपु स्वर्गेदूत लंघाओ असा।”

⁷ प्रभु यीशु बोता “हेर, अउं झठ एणे बाड़ा असा। धन्य असा से मेह्‍णु, जे इस कताबी भविष्य वाणि बोके मान कइ जीन्ता।”

⁸ अउं सेईंए यूहन्ना भो, जेन ए सोब बोके शुणी त हेरी। ई सोब बोक शुण कइ त हेर कइ अउं तेस स्वर्गेदूते पूजा अराधना करण जे तेसे खुरी पुठ झड़ गा, जेन ए सोब बोके मोउं हराली।

⁹ पर तेनि मोउं जे बोलु, “हेर! ईं न कर; किस कि अउं त सद परमेश्वरे यक सेवक भो, जीं तु अपफ, भविष्य वक्ते, त इस कताबी के भविष्य वाणि मानणे बाड़े हर यक जेईं असे। पूजा अराधना करीण असी त परमेश्वरे कर।”

¹⁰ तोउं तेन मोउं जे बोलु, “इस कताबी अन्तर लिखो भविष्य वाणि बोके नियोकइ कइ न रख, किस कि एन्के पूरा भुणे टेम नीड़ा असा।

¹¹ तोउं त इस बुछ, जे बुराई कता से बुराई कते रिहे; होर जे पापी असा, से पाप कता रिहे; होर जे धर्मी असा, से धर्मी बण बिशे, होर जे शुचा असा से शुचा बिशे।”

¹² प्रभु यीशु बोता “हेरे! अउं झठ एणे बाड़ा असा; होर हर यक कमे हिसाब जोई बदला देण जे फल अउं अपफ जोई साते आणता।

¹³ अउंए ‘अ’ त अउंए ‘ज्ञ’ भो। अउंए पेहला त अउंए अखिर, होर अउंए शुरुवात त अउंए अन्त भो।”

¹⁴ “धन्य असे से, जेन्हि अपु झिणे धुई छो असे, ताकि दुआरे बइ तेस शुचे शेहर अन्तर घेई सकते त जीवने बुटे फल खाई सकते।

¹⁵ पर जुठे मेह्‍णु जीं कि जादू टौणा करणे बाड़े, गलत तरीके जुए जिसमे संमंध रखणे बाड़े, मेह्‍णुमार त मुर्तिपुजा करणे बाड़े त झूठ बणाणे बाड़ा त झूठे साथ देणे बाड़े शेहरे बाहरे ईं रेहन्ते।”

¹⁶ “मेईं यीशु अपु स्वर्गेदूत तोउं लंघो असा ताकि से तुसी सोबी जे सतसंग बारे ए समाचार दिआल। अउंए दाऊद राजे जड़ त वंश भो, त पथवारी तारा ब्यानु भो”।

¹⁷ आत्मा त दुल्हन दुहिए बोती, “आई”। त शुणणे बाड़ा बि बोले, “आई”। जे टिशो असा आईए; त जे बि चहन्ता, से जीवने पुओणि मुफत अन्तर पिए।

अखिरि बोक

¹⁸ अउं तेन्हि सोबी जे सावधान कता, जे इस कताबी भविष्य वाणि शुणता: अगर कोउं बि एन्हि बोकी अन्तर किछ बि जोड़ाल त परमेश्वर तेन्हि बुखताई तेस पुठ बधान्ता, जेसे बारे इस कताबी अन्तर लिखो असु।

¹⁹ अगर कोउं एस भविष्य वाणि कताबी अन्तरा किछ बोके किढ़ छड़ियेल त परमेश्वर तेस जीवने बुटे त शुचे शेहर अन्तरा तेसे बांट टोड़ छता, जेसे बारे इस कताबी अन्तर लिखो असु।

²⁰ प्रभु यीशु इन्हि बोकी के उगाही देन्ता। से ईं बोता कि “आं, अउं झठ एणे बाड़ा असा।” आमीन, ए प्रभु यीशु, आई!

²¹ प्रभु यीशु कृपादृष्टि सोबी पुठ भुन्ति रिहे। आमीन।