प्र. बोके 21 - Walangi

नोई सृष्टि त नउआं यरुशलेम शेहर ( 21:1—22:5 ) परमेश्वर नोउआं अम्बर त नोउईं धरती बणाण

¹ फि मेईं यक नोउआं अम्बर त नोउईं धरती काई, किस कि पेहलकण अम्बर त धरती खतम भोई गो थिए, त समन्दर बि ना थिए रिहो।

² तोउं मेईं शुचा शेहर मतलब नोउआं यरुशलेम स्वर्ग केआं परमेश्वरे भेएड़ा उन्नि एन्ता काआ। से अपु धाणि जे खरी ठाटि-ठुटि कइ तेयार बिशो दुल्हने ईं थी।

³ तोउं मेईं सिंहासन पुठा यक अवाज जोरी जोई ईं बोती शुणी, “हेरे, मेह्‍णु के बुछ परमेश्वरे डेरा! अब से तेन्हि जुओई साते बिश्ता, त से तेसे टज भुन्ते। परमेश्वर अपफ तेन्के परमेश्वर बण कइ तेन्हि जुओई साते बिश्ता।

⁴ से तेन्के टीरी के सोब आंखु धूश छता। अब मेह्‍णु हउ ना मरते। अब न शोक, न रोलुण शींकुण, न दुख दर्द, किछ न रेहन्तु, किस कि पेहलकण बोके सोब घेई गो असी।”

⁵ जे सिंहासन पुठ बिशो थिआ, तेन बोलु, “हेर! अब अउं सोब किछ नोउ करण लगो असा”। फि तेन मोउं जे बोलु, “लिख छड़, किस कि ए जे बि बोली गो असु, से यकीन लेएक त सच्ची असी।”

⁶ होर तेन मोउं जे बोलु, “सोब बोके पूरी भोई गो असी! अउंए ‘अ’ त अउंए ‘ज्ञ’ भो। अउंए शुरुवात त अउंए अन्त भो। अउं टिशो तेन्हि जीवन देणे बाड़ी पोणि सुजल अन्तरा मुफत अन्तर पीण देन्ता।

⁷ जे जीतता सेईंए एन्हि चीजी के हकदार भुन्ता: होर अउं तेसे परमेश्वर भुन्ता त से में गभुर भुन्तु।

⁸ पर डरपोकी, अविश्वासी, बुराई करणे बाड़े, मेह्‍णुमार, गलत तरीके जुए जिसमे संमंध रखणे बाड़े, जादू टौणा करणे बाड़े, मुर्तिपुजा करणे बाड़े त सोब झूठे तेस टह्‌नु अन्तर घेन्ते, जे हमेशा आग त गन्धके बेलि जाओरा रेहन्ता। एईएं दोकु मरुण भो।”

नोउआं यरुशलेम

⁹ तोउं जेन्हि सत स्वर्गेदूती केईं अखिर बुखता बाड़े सत कटोरे थिए, तेन्हि बुचा यक मोउं केईं आ, त बोलु, “इएर आई, अउं तोउ दुल्हन, मतलब किएऊ जुएली हरालता”।

¹⁰ तोउं से मोउं आत्मा अन्तर यक मोटे फाटे चोटि पुठ घिन गा, होर से शुचा शेहर यरुशलेम परमेश्वरे भेएड़ा, स्वर्ग केआं उन्निया जे एन्ता हराला।

¹¹ से परमेश्वरे महिमा बेलि सजाओ थी त तसे लौई जीं शिशे ईं साफ सुआ कीमति घोड़ यशब ईं थी।

¹² तेस शेहरे चोहरो कनारी भिथ सुआ उची त बीलि थी। तेसे बाराह बोडे बोडे दुआर थिए त हर यक दुआरी पुठ यक यक स्वर्गेदूत पेहरा देन्तेथ; तेन्हि दुआरी पुठ इस्राएले बाराह ऊड़ी के नओं लिखो थिए।

¹³ पूरब दिशाई जे टाई दुआर, उत्तर दिशाई जे टाई दुआर, दखण दिशाई जे टाई दुआर, त पश्चिम दिशाई जे टाई दुआर थिए।

¹⁴ शेहरे भिथि बाराह खाई थी त तेन्हि पुठ किएऊ बाराह प्रतिनिधि के नओं लिखो थिए।

¹⁵ जे स्वर्गेदूत मोउं जोई बोक करण लगो थिआ तेस केईं शेहर त तेसे दुआर त तेसे भिथ नापुण जे सुन्ने गज थिआ।

¹⁶ से शेहर वर्ग अन्तर बसो थिआ, त तेसे लम्माई त चौड़ाई बराबर थी; त तेन गजे बइ शेहर नापा, त 2,220 किलोमिटर निसा : तेसे लम्माई, चौड़ाई त उचाई सोब बराबर थी।

¹⁷ तोउं तेन तेस भिथि चौड़ाई मेह्‍णु के हेसाब जोई नापी, त से 65 मिटर बीलि निसि।

¹⁸ तेसे भिथ यशब मणि त शेहर पूरा साफ सुन्ने थिआ, जे साफ शिशे ईं चिलकताथ।

¹⁹ तेस भिथि खाई बाराह कीमति मणि बइ सजाओ थी। पेहली खाई यशब नओएं मणि बइ सजाओ थी। दोकी खाई नीलमे बइ, टेकी खाई सुलेमानी नओएं मणि बइ, त चौथी खाई मरकत नओएं मणि बइ सजाओ थी।

²⁰ पंजमी खाई गौमेदक नओएं मणि बइ, छटी खाई मणिक्य मणि बइ, सतमी खाई पीरमणि बइ त अठमी खाई पेरोज नओएं मणि बइ सजाओ थी। नौमी खाई पुखराज नओएं मणि बइ, त दसमी खाई लेहसनिआ नओएं मणि बइ, ग्यारहमी खाई धुम्रकान्त नओएं मणि बइ, त बाराहमी खाई याकुत नओएं मणि बइ सजाओ थी।

²¹ शेहरे बारोह दुआर बाराह मोती के बणो थिए; यक यक दुआर यक यक मोती बणो थिआ। शेहरे बथ साफ सुन्ने थी, जे साफ शिशे ईं चिलकतीथ।

²² मेईं तेस शेहर अन्तर कोई देहेर न काआ, किस कि सर्व शक्तिमान प्रभु परमेश्वर त किएऊ तेसे देहेर भो।

²³ तेस शेहर अन्तर दिसे त जोसणी टगड़ियारी जरूरत नेईं, किस कि परमेश्वरे टगड़ियारी बेलि तठि टगड़ियार भुन्ति, त किएऊ तेसे दीया भो।

²⁴ जाति जाति मेह्‍णु तेसे टगड़ियार अन्तर हंटते, त धरती राजे अपु अपु धन दौलत तठि आणते।

²⁵ तेसे दुआर झवादी टेम बन्न न भुन्ते, किस कि तठि कदी रात न भुन्ति।

²⁶ हर यक जाति मेह्‍णु अपु अपु धन दौलत त शान तेस अन्तर आणते।

²⁷ पर तेस अन्तर कोई बि जुठी चीज घेई ना सकती। होर ना तेस अन्तर कोई नलाज्जे कम करणे बाड़ा, या झूठ बोलुणे बाड़ा घेई सकता। पर तेस अन्तर सद से मेह्‍णु घेई सकते, जेन्के नओं किएऊ जीवने कताब अन्तर लिखो असु।