प्र. बोके 20 - Walangi

यक हजार साले लिए शैतान कैद करण

¹ तढ़िया पता, मेईं यक स्वर्गेदूत स्वर्ग केआं उन्नि एन्ता काआ, जेसे हथ अन्तर काल खपरे कुंजुड़ त यक बोडी शंकीड़ी थी।

² तेन तेस राकस मतलब पुराणे कीड़े जे, जे दोष लाणे बाड़ा शैतान बोलिन्ता, टाइ कइ यक हजार साले लिए बन्ह छड़ा।

³ तोउं से काल खपर अन्तर छइ कइ ढप छड़ा त तेस पुठ मुहर लाई छड़ी, ताकि से हजार साल पूरा भुण तकर कोई बि जाति मेह्‍णु दुबारी फि भरमाल नउ। ई सोब भुण केआं पता जरूरी थिउ कि किछ टेमी लिए से फि खोल छाण।

⁴ तोउं मेईं सिंहासन हेरा, त तेन्हि पुठ से मेह्‍णु बिश गे जेन्हि न्याय करणे हक मेओ थिआ। त मेईं तेन्के आत्मा बि काई, जेन्के मगिर यीशु मसीहे बारे उगाही देणे त परमेश्वरे वचने प्रचार करणे बझई जोई कटोओ थिए। तेन्हि न तेस जानवरे, होर न तसे मुर्तिपुजा किओ थी। तेन्के हथ त मगिरि पुठ तेस जानवरे छाप नेओथ लगो। से जीन्ते भोई कइ मसीह जोई हजार साल तकर राज कते रिहे।

⁵ एईएं से पेहले मेह्‍णु भो, जेन्हि परमेश्वर पेहली बार मरो तेन्हि अन्तरा दुबारी जीआन्ता। बाकी मरो मेह्‍णु तपल तकर जीन्ता ना भुए, जपल तकर कि ए हजार साल पूरे न भुओ।

⁶ धन्य त शुचे से असे, जे इस दुबारी जीण अन्तर हेस्सेदार भुन्ते। अन्हि पुठ दोके लिंगि मरणे कोई हक न भुन्ता। बल्कि ए त परमेश्वरे त मसीहे पुजारे भुन्ते त तेस जोई साते हजार साल तकर राज कते।

अखिरि न्याय भुण ( 20:11—22:5 ) शैतान सज्जा मेण

⁷ जपल यक हजार साल पूरा भुन्ता त शैतान कैद अन्तरा छड़ दी घेन्ता।

⁸ तोउं से धरती हर कना बसो तेन्हि जाति मतलब गोग त मागोग भरमाई कइ युद्ध करणे लिए कठेरण जे घेन्ता, जे समन्दरे रेते ईं अणगिणत असे।

⁹ तेन्हि पूरे धरती पुठ भरी कइ शुचे मेह्‍णु के डेरा त ट्यारे शेहर बटेर छते। पर तपल स्वर्ग केआं परमेश्वर आग लंघाई कइ तेन्हि भसम कइ छता।

¹⁰ तोउं तेन्हि भरमाणे बाड़ा शैतान आगी त गन्धकी तेस टह्‌नु अन्तर, जेस अन्तर से खतरनाक जानवर त झूठा भविष्य वक्ता बि भुन्ता, फटाई छड़े। तठि दन रात जुग जुग तकर से आग अन्तर टड़ते रेहन्ते त अविष्य भोई बिश्तु।

सोबी के अखिरि न्याय भुण

¹¹ फि मेईं यक हच्छा रंगे बोडा सिंहासन काआ त से काआ, जे तेस पुठ बिशो असा। तसे समाणि केआं धरती त अम्बर नश गे, त तेन्हि नियोकण जे कोठि जगाह ना मेई।

¹² तोउं मेईं मठुड़ बोडे सोब मरो से सिंहासन समाणि खड़ खड़ काए। तोउं कताब खोली त फि यक होरी कताब बि खोली मतलब “जीवने कताब” बि। तेन्हि कताबी अन्तर लिखो तेन्के कमी के हेसाब जोई मरो तेन्के न्याय भुआ।

¹³ से समन्दर अन्तरा, काल खपर अन्तरा त दरघाई केईआं अओ थिए। होर तेन्हि अन्तरा हर यक जेईं के न्याय तेन्के कमे हेसाब जोई भुआ।

¹⁴ दरघाई त काल खपरे आगी टह्‌नु अन्तर फटाई छड़े। एईएं आगी टह्‌नु दोकु मरुण भो।

¹⁵ होर जेसे केसेरी नओं जीवने कताब अन्तर लिखो न मेउ, से आगी टह्‌नु अन्तर फटाई छड़े।