प्र. बोके 2 - Walangiइफिसुस शेहरे सतसंग जे ब्योरा देण 1 “इफिसुस शेहरे सतसंगे दूत जे ईं लिख: यीशु मसीह जेन सतहो तारे अपु सुमले हथ अन्तर रखो असे, त सत दीये बाड़े सुन्ने अगाशदीए के बुच हंटता, से ईं बोता कि 2 अउं तुं कम, तुं मेहनत, त तुं लाह रखुंण जाणता। होर ईं बि जाणता कि तुस कीं बुरे मेह्णु हेरी ना बटता। त तुसी से सोब परख कइ झूठे कइ छड़े, जे अपफ जे प्रतिनिधि त बोते, पर असे नउ। 3 तुस लाह रख कइ टिग बिशो असे त में नओएं लिए दुख सीढ़ कइ बि नेईं टूटो। 4 पर तुं खिलाफ मोउं ईं बोलुण असु कि तुसी अपु पेहलकण ईं परेम करण छड़ दुतो असा। 5 तोउं त, तुस याद करे कि कोठि रेही गा, होर अपु मन बदलीण दे त पेहलकण ईं जीं कतेथ, तिहांणि करे। ना त अउं तुसी केईं एई कइ तुं दीये तसे जगाई केईआं घराई छता। 6 पर आं, तुसी अन्तर यक बोक ई असी कि तुसी नीकुली नओएं मेह्णु शिक्षा मानणे बाड़ी के कमी रशुणे लगते, जे मोउं बि रशुणे लगते। 7 कन खोल कइ शुणीण दिए कि शुची आत्मा सतसंगी जे की बोती। जे बि जीतते, अउं तेन्के धे जीवने बुटे केआं फल खाण जे देन्ता, जे परमेश्वरे स्वर्गलोक अन्तर असा।” स्मुरना शेहरे सतसंग जे ब्योरा देण 8 “स्मुरना शेहरे सतसंगे दूत जे ईं लिख: यीशु मसीह जे पेहला त अखिरि भो, जे मर गो थिआ त अब जीन्ता भोई गो असा, से ईं बोता कि 9 अउं तुं दुख तकलीफ त गरीबी जाणता, पर आत्मा अन्तर तुस अमीर असे। होर जे मेह्णु अपफ जे यहूदी बोते, पर भिन्थ नउ, बल्कि से शैताने सतसंगे मेह्णु भो, तुं बारे तेन्के बुराई करण बि जाणता। 10 जे दुख तुसी सीढ़ण एन्ते, तेन्हि हेर डरे नउ। किस कि हेरे, शैतान तुसी बुचा केहि जेईं जेहेल अन्तर छाणे बाड़ा असा, ताकि तुस परखियेल। तुसी दस रोज तकर दुख तकलीफ सीढ़ण एन्ते। मरण तकर विश्वास कते रिहेल, त अउं तुन्धे जीवन देणे बाड़ा मुकुट देन्ता। 11 कन खोल कइ शुणीण दिए कि शुची आत्मा सतसंगी जे की बोती। जे बि जीतते, तेन्हि दोके मरण केआं कोई नुकसान ना भुन्ता।” पिरगमुन शेहरे सतसंग जे ब्योरा देण 12 “पिरगमुन शेहरे सतसंगे दूत जे ईं लिख: यीशु मसीह, जेस केईं तेज केआं बि तेज दुई धारी तलवार असी, से ईं बोता कि 13 अउं ई जाणता कि तुस तेस शेहर बिश्ते, जेठि शैताने सिंहासन असा। तोउं बि तुस में नओं हमेशा नेन्ते रेहन्ते। शैताने तेस जगाई अन्तर, तेन्हि दिनि बि तुस मोउं पुठ विश्वास करण केआं पतूं ना खिरके, जपल तठियाणि मेह्णु में यकीन लेएक उगाह अन्तिपास मार छड़ा। 14 पर मोउं तुं खिलाफ कुछ बोलुण असु, किस कि तुं बुछ किछ मेह्णु ईं असे, जे बालाम भविष्य वक्ते केहणा मानते। तेस केईआं शिच कइ राजा बालाक इस्राएली मेह्णु मुर्ति केईआं भकत चढ़ो चीज खाणे त नाजायज रिश्ता रखणे पाप करवा। 15 तिहांणि तुं बुछ केहि ईं असे, जे नीकुली मेह्णु के गलत शिक्षा मान कइ जीन्ते। 16 तोउं त, मन बदलीण दिए! ना त अउं झठ तुसी केईं एई कइ तेस तलवारी बइ तेन्हि जोई लड़ता, जे में मुंह केआं निस्ती। 17 कन खोल कइ शुणीण दिए कि शुची आत्मा सतसंगी जे की बोती। जे जीतते, तेन्के धे अउं तेन्हि रौठि देन्ता जे अमर जीवन देन्ती। होर तेन्के धे यक हच्छा घोड़ बि देन्ता, जेस पुठ यक नोउ नओं लिखो भुन्तु। तेस नओएं बारे होर कोई ना जाणता, सद सेईंया जाणता, जेस से मेता।” थुआतीरा शेहरे सतसंग जे ब्योरा देण 18 “थुआतीरा शेहरे सतसंगे दूत जे ईं लिख: परमेश्वरे कुआ यीशु मसीह, जेसे टीर आगी लौई ईं असे, होर जेसे खुर आगी कुण्ड अन्तर तचाणो पीतले ईं असे, से ईं बोता कि 19 अउं तुं कम, परेम, विश्वास, सेवा त लाह रखण जाणता, होर ईं बि कि तुं आजकण कम पेहलकण केआं अब्बल असे। 20 तोउं बि, मोउं तुं खिलाफ ई बोलुण असु कि तुस तेस जिल्हाणु ईजेबेल, जे अपु अपफ जे भविष्य वक्तिणी बोती, अपफ जुए बिशुण दुतो असी। से में सेवक नाजायज रिश्ता रखण जे त मुर्ति पुठ भकत चढ़ो चीज खाण जे लुन्ज देन्ती। 21 मेईं तसे धे अपु मन बदलुण जे मौका दुतो थिआ। पर से अपु नाजायज रिश्ता रखण केआं मन बदलण ना चहन्ती। 22 हेर! अउं तेस बीमार कता त मन्जे पुठ छता। होर जे तेस जोई नाजायज रिश्ता बड़ान्ते, अगर से बि तसे ईं कमी केआं मन ना बदलीयेल त अउं तेन्हि सुआ कड़ा-क्लेश अन्तर छइ छता। 23 अउं तेस मानणे बाड़ी जे महामारी बेलि मार छता, तोउं सोबी सतसंगी पता लग घेन्ता कि दिल त मन परखणे बाड़ा अउंए भो। होर अउं तुसी सोबी बुचा हर यक जेईं तेन्के कमी के हेसाब जुए फल देन्ता। 24 पर थुआतीरा शेहरे कुछ मेह्णु ईं असे, जे ईजेबेले शिक्षा ना मानते त शैताने सिपरी सिपरी बोके अन्तर नेईं अओ। तेन्हि जे बि अउं ई बोता कि अउं तुसी पुठ होरा कोई भार ना छता। 25 पर आं, जे तुसी केईं असु तेस में एण तकर टाइ रखे। 26 जे जीतते, होर जे में कम अखिरि तकर कते रेहन्ते, अउं तेन्के धे हर जाति मेह्णु पुठ तेस हक देन्ता, 27 जे हक में बोउए मेन्धे दुतो असा। तोउं से लोहिए लेउडी बइ तेन्हि पुठ राज कते त तेन्हि शोउए घाड़ु के ईं टोड़ कइ धुस कइ छते। 28 होर अउं तसे धे पथवारी तारा ब्यानु देन्ता। 29 कन खोल कइ शुणीण दिए कि शुची आत्मा सतसंगी जे की बोती।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.