प्र. बोके 18 - Walangiबेबीलोन शेहर खतम भोई घेण 1 तढ़िया पता मेईं यक स्वर्गेदूत स्वर्ग केआं उन्निया एन्ता काआ, जेस सुआ हक थिआ, त धरती तसे लौई बेलिए चमक गई। 2 तेन जोरी जोई हक दी कइ बोलु, “हेरे, बरबाद भोई गा से बोडा शेहर! बेबीलोन शेहर खतम भोई गो असा! से दुष्ट आत्माई के घर बण गो असा, त हर यक जुठी आत्माई के अड्डा बणो असा, त हर यक जुठी त कुस्तुरे चड़ी चखुरु के बसेरा बणो असा। 3 किस कि तसे नाजायज रिश्ते रखणे लाग, तेज अराखे ईं सोबी देशी पुठ चढ़ गो असी। त मतोके राजी तेस जोई नाजायज रिश्ता बड़ाओ असा। होर मतोके व्यापारी तसे मौज मस्ती बाड़ी अमीरी बेलि अमीर बण गो असे।” परमेश्वर अपु टज बखरी करीण 4 तोउं फि मेईं स्वर्ग केआं यक होरी अवाज शुणी, “ए में मेह्णुओ! तेस शेहर अन्तरा बाहर नश घिए, ताकि तुस तसे पापी के हेस्सेदार न बणियेल। होर तसे बुखता अन्तरा कोई बि तुसी पुठ न एईयेल। 5 किस कि तसे पापी के ढेर स्वर्ग तकर पूज गो असा। त तसे बुराई परमेश्वर याद अओ असी। 6 जीं तेन किओ असु, तीं तुस बि तेस जोई करे। त तसे बुराई हेसाब जोई तेस केईआं दुगुणा बदला नीए। जेस कटोर अन्तर तेन तुसी जे पातर बणाओ थी, तेस कटोर अन्तर ईं तेस जे दुगुणी तेज बाड़ी पातर बणाण दिए। 7 जती तेन अपु तारीफ की त मौज मस्ती की, ततुरु तुस तेस दुख दर्द दिए, किस कि से अपु अपफ बोती, ‘अउं त राणी ईं बस गो असी, होर विधवा नेईं, त शोक अन्तर कदी न घेन्ति।’ 8 तोउं त यके रोज अन्तर ईं तेस पुठ बुखता एई घेन्ति। त महामारी, हिकि हिकि रोलुण, त अकाल घेन्ता त से आग अन्तर भसम भोई घेन्ति। किस कि ताकतवर, प्रभु परमेश्वर तसे न्याय कता।” 9 “तिखेईं मतोके राजा जेन्हि तेस जोई नाजायज रिश्ता त मौजमस्ति किओ थी, जपल तसे टाड़णे तुउ हेरते, त तेस जे रोलते त डडोर बजान्ते।” 10 “तसे अशी हेर से डरते त दुरारी खड़ी कइ ईं बोते: ‘ए बोडा शेहर बेबीलोन! ए ताकतवर शेहर, तें खेया खाट भोई गा! यके घड़ी अन्तर तें बरबादी भोई गई।’” 11 “मतोके व्यापारी तेस जे रोलुण शींकुण किढ़ते, किस कि अब कोई जेईं बि तेन्के माल न खरीदते। 12 पेहले से सुन्ना, चन्नी, कीमति रत्न, मोती, मखमल, चमकिली, रेशमी, लाल रंगे झिणे, हर यक किस्मी मुश्कदार कठोड़, हाथी दन्ते हर यक किस्मी चीज, सुआ कीमति कठोड़े चीज, पीतल, लोहिए त संगमरमरे सोब किस्मी चीज बेचतेथ। 13 होर से दालचीनी, मसाले, गुगुल, मुश्कदार तेल, खुशबुदार गुगुल, अराख, जैतुने तेल, मैदा, गिहुं, गुओरु, ढडुड़ बकरी, घोड़े, रथ त मेह्णु बि गुलाम बणाई कइ बेचतेथ।” 14 “जेस चीजी के बेलि तेईं अपु मन लचेरणे सोचो थी, से त अब बचे ईं नओं। त सुखमी त रोभ किढ़णे बाड़ी चीजे तोउ केआं दूर भोई गई। से फि तोउ कदी न मेती। 15 अन्हि चीजी के व्यापारी, जे एन्के बेलिए अमीर बण गो थिए, तसे दुख दर्दे बझई जोई दूर खड़ी कइ रोलते, अपु डडोर बजान्ते बोते: 16 ‘तें खेया खाट भोई गई, ए बोडा शेहर, जे मलमले, चिल-चिलान्ते त लाल रंगे झिणे डबताथ, त सुन्ने, कीमति रत्न त मोती बइ सजाओ थिआ, 17 यक घड़ी अन्तर ईं तें सोब शान खतम भोई गई।’” “हर यक जहाजे मालिक, मांझी, यात्री, होर जत बि समन्दर अन्तरा कमान्ते, सोब दूर खड़ खड़ बिशे। 18 होर तस फुकीणे तुउ हेर कइ हुशेरि दी कइ बोलुण लगे, ‘असा ना कोठि इस बोडा शेहरे ईं, होरा शेहर?’ 19 सोब अपु अपु मगिरि पुठ जन फटान्ते त रोलते डडोर बजान्ते, हुशेरि दी दी कइ बोलुण लगे: ‘तें खेया खाट भोई गा, ए बोडा शेहर! जेसे धन दौलते बेलिए सोब जहाजे मालिक अमीर भोई गे, अब तु यके घड़ी अन्तर उजीड़ गा।’” 20 “ए स्वर्ग, ए शुचे मेह्णुओ, होर ए प्रतिनिधि त भविष्य वक्तों! तेस शेहरे हाल पुठ तुस खुशी मनाए। किस कि परमेश्वरे न्याय कर कइ तेस केआं तुं बदला नीओ असा!” 21 फि यक ताकतवर स्वर्गेदूते बोडा घते पठ के ईं बोडा घोड़ टाता, त ईं बोल कइ ती जोरी जोई समन्दर अन्तर फटाई छड़ा, “बोडा शेहर बेबीलोन इहांणि जोरी जोई ढेईन्ता, त फि कदी तसे पता न लगता। 22 दुन्तारा बजाणे बाड़े, घीत लाणे बाड़े, बेईंछ बजाणे बाड़े त रेशमि फुकणे बाड़ी के अवाज फि कदी तोउ अन्तर न शुणती, त फि कोई कारगीरी त तेन्के कोई बि कम कदी तोउ अन्तर न मेते। होर घत पिह्णे गड़कुण फि तें अन्तरा कदी न निस्ती। 23 होर दीये टगड़ियार फि कदी तोउ अन्तर न चिलकती, त ब्याहे जानि रौनक तोउ अन्तर फि कदी न भुन्ति। ई सोब तोउं भुन्तु, किस कि तें व्यापारी जे मतोके बोडे बोडे मेह्णु थिए, तेन्हि तें जादू बेलिए सोब जाति भरमाई छो थी। 24 होर तेईं भविष्य वक्ते, शुचे मेह्णु, त मतोके सोब मेह्णु मार छड़े।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.