प्र. बोके 16 - Walangi

परमेश्वरे कोपे सत कटोरे ( 16:1-21 )

¹ तोउं मेईं देहेर अन्तर केसेरी अवाज जोरी जोई तेन्हि सतो स्वर्गेदूती जे ईं बोते शुणी, “घिए, परमेश्वरे कोपे सतो कटोरे धरती पुठ डोल छड़े!”

² तोउं पेहले स्वर्गेदूते घेई कइ अपु कटोरा धरती पुठ डोल छड़ा। तोउं जेन्हि मेह्‍णु पुठ तेस जानवरे छाप थिआ त जे तसे मुर्ति पूजा कतेथ, तेन्हि पुठ यक सुआ चिड़ंग देणे बाड़े त खतरनाक खेड़े भुए।

³ दोके स्वर्गेदूते अपु कटोरा समन्दर अन्तर डोल छड़ा। त से मरो मेह्‍णु के लहुए ईं बण गा, त समन्दर अन्तर हर यक जीव मर गे।

⁴ टेके स्वर्गेदूते अपु कटोरा दरेउ त पुओणि सुजल अन्तर डोल छड़ा, त से लहु बण गे।

⁵ तोउं मेईं पुओणि पुठ हक रखणे बाड़े स्वर्गेदूत ईं बोता शुणा: “ए परमेश्वरा, तु जे शुचा असा, होर जे थिआ त जे असा, ई सोब कर कइ तेईं न्याय किओ असा;

⁶ किस कि तेन्हि तुं शुचे मेह्‍णु त तुं भविष्य वक्ती के लहु बोहाओ थिउ, त तेईं तेन्हि लहु पिआउ। जेसे जीं करणी, तेसे तीं भरणी भुन्ति।”

⁷ फि मेईं कुण्ड केआं ईं अवाज शुणी: “आं, ए सर्व शक्तिमान प्रभु परमेश्वरा, तें फैंसले सही त सच्चे असे।”

⁸ चौंथु स्वर्गेदूते अपु कटोरा दिस पुठ डोल छड़ा, त दिस मेह्‍णु आगी बइ टड़ण लगा।

⁹ मेह्‍णु सुआ गरमी बइ भुरड़ी गे, त तेन्हि तेस परमेश्वरे नओएं बुराई की, जेस अन्हि बुखताई पुठ हक थिआ। तेन्हि पछताण ना आउ, होर परमेश्वरे गुणगान करुण ना चहा।

¹⁰ पन्जु स्वर्गेदूते अपु कटोरा तेस जानवरे सिंहासन पुठ डोल छड़ा, त तसे राज्य अन्हारा भोई गा। मेह्‍णु दुख तकलीफे बझई जोई दन्‍त कुरुड़ खाण लगे।

¹¹ अपु दुख तकलीफ त खेड़ी के बझई जोई मेह्‍णु स्वर्गे परमेश्वरे बुराई की, पर अपु अपु बुरे कमी के लिए पछताण ना चहु।

¹² छटूं स्वर्गेदूते अपु कटोरा यूफ्रातेस नओएं बोडा दरेउ पुठ डोल छड़ा, त तसे पुओणि शुख गोउ, ताकि पूरबे कनारी राजी के सेना जे बथ बण घियेल।

¹³ फि मेईं तेस राकसे मुंहे बइ, त तेस जानवरे मुंहे बइ, होर तेस झूठे भविष्य वक्ते मुंहे बइ टाई जुठी आत्मा मेंढकी के रूप अन्तर निस्ती काई।

¹⁴ ए निशाण हरालणे बाड़ी दुष्ट आत्मा भो, जे पूरे मतोके राजी केईं तोउं घेन्ति कि तेन्हि सर्व शक्तिमान परमेश्वरे खिलाफ तेस बोडे दने युद्धे लिए किठेरुं। प्रभु यीशु बोता,

¹⁵ “हेरे, अउं चोरे ईं अजगता एन्ता; धन्य से असा जे खड़ खड़ बिश्ता, त अपु झिणि के निगरानी कता कि नगे न हंटे, त मेह्‍णु तेस नगे न हेरियेल।”

¹⁶ होर तेन्हि दुष्ट आत्माई मतोके राजे युद्ध करणे जे तेस जगाई किठेरे, जेस जे इब्रानी भाषा अन्तर हरमगिदोन बोते।

¹⁷ तोउं सतूं स्वर्गेदूते अपु कटोरा ब्यार पुठ डोल छड़ा, त देहरे सिंहासन केआं ईं बोडी अवाज आई, “भोई गोउ!”

¹⁸ तोउं बिजली चमकी, त मेघ गड़कुणे अवाज आई, त यक ईं भुंजल गा कि धरती पुठ मेह्‍णु बसण केआं पता, अपल तकर कदी अत बोडा भुंजल नेओथ गो।

¹⁹ एसे बेलिए तेस बोडे बेबीलोन शेहरे टाई टुकुड़ भोई गे, त जाति जाति के शेहर ढेई गे। ई कर कइ परमेश्वर तेस बोडे शेहरे बुराई लिए अपु लेहरी कटोरे केईआं पिआउ।

²⁰ त हर यक टापु डूब गे, त फाटी के पता ई न चला।

²¹ अम्बर केआं मेह्‍णु पुठ जे मणे मणे शरवाठे झड़े। ए बुखता सुआ बोडी भारी थी। मेह्‍णु शरवाठी के बुखताई के बझई जोई परमेश्वरे बुराई की।