प्र. बोके 15 - Walangi

अखिरि सत बुखता जोई सत स्वर्गेदूत

¹ फि मेईं स्वर्ग अन्तर यक बोडा त अनोखा निशाण काआ, मतलब सत स्वर्गेदूत जेन्हि केईं सत अखिरि बुखता थी। किस कि तेन्के भुण केआं पता परमेश्वरे कोप शान्त भोई घेन्ता।

² तोउं मेईं यक शिशे समन्दर ईं काआ जेस जोई आग मिआओ असी। तसे औत पुठ से मेह्‍णु खड़ खड़ काए जे तेस खतरनाक जानवर पुठ, तसे मुर्ति पुठ त तसे नओएं अंक पुठ जीत गो थिए। तेन्हि केईं परमेश्वरे दुतो दुन्तारे थिए।

³ से परमेश्वरे सेवक मूसे त किएऊ घीत लाण लगो थिए, “ए सर्व शक्तिमान प्रभु परमेश्वरा! तें कम महान त अनोखे असे; ए सोबी जाति के राजीया, तें चाल खरी त सच्ची असी।

⁴ ए प्रभु, कोउं तोउ हेर न डरता त तें नओएं महिमा न कता? किस कि सद तुईएं शुचा असा। सोब जाति तें समाणि एई कइ तें गुणगान कते, किस कि तें न्याये कम प्रगट भोई गो असे।”

⁵ तढ़िया पता मेईं हेरु कि स्वर्ग अन्तर उगाही डेरा मतलब देहेर उघाड़ो असा।

⁶ त सत स्वर्गेदूत जेन्हि केईं सत बुखता थी, तेस देहेर अन्तरा निसे। तेन्हि मलमले साफ त चमकदार झिणे, होर छती पुठ सुन्ने पट्टि बन्हो थी।

⁷ तोउं तेन्हि चोहरोई जीवी अन्तरा यक जेईं तेन्हि सतो स्वर्गेदूती कें धे सुन्ने सत कटोरे दिते। तेस कटोरे अन्तर तेस परमेश्वरे कोप भरो थिआ, जे जुग जुग जीन्ता असा।

⁸ त परमेश्वरे महिमा त तसे ताकती बझई जोई देहेर तुउए बइ भरी गा। त जपल तकर तेन्हि सतो स्वर्गेदूती के सत बुखता खतम न भुई, तपल तकर कोई देहरे अन्तर घेई न बटा।