प्र. बोके 13 - Walangi

दुई जानवर

¹ तोउं मेईं यक खतरनाक जानवर समन्दर अन्तरा निस्ता काआ, जेसे दस शंग त सत मगिर थी। तसे शंग पुठ दस मुकुट थिए, होर तसे सत मगरी पुठ परमेश्वरे बुराई करणे बाड़ु नओं लिखो थिउ।

² जे जानवर मेईं काआ, से लाघे ईं थिआ। होर तसे पन्जा ढबु ईं त मुंह शेरे ईं थिउ। तेन राकस अपु ताकत, सिंहासन त सुआ हक तसे धे दिता।

³ मेईं तसे मगरी बुचा यक मगिरि पुठ तेस मारणे लेएक यक बोडा घा काआ, पर तसे मारणे बाड़ा से घा ठीक भोई गा। त धरती पुठि सोब मेह्‍णु हैरान भोई कइ तसे पता पता घेई गे।

⁴ मेह्‍णु राकसे पूजा की, किस कि तेन जानवरे धे अपु हक दुतो थिआ। त ईं बोल कइ तेस जानवरे पूजा की, “इस जानवरे ईं कोउं असा? एस जोई कोउं युद्ध कइ बटता?”

⁵ अपु बारे बोडी बोडी बोके करण जे त परमेश्वरे बुराई करण जे तेस जानवरे धे ताकत दी गा। त तस बताहड़ी मेहन तकर अपु हक जताण जे इजाजत मेई गई।

⁶ तेन परमेश्वरे बुराई करण जे मुंह उघाड़ु कि तसे नउएं त तसे डेरा मतलब स्वर्ग अन्तर बिशणे बाड़ी के बुराई करे।

⁷ तस शुचे मेह्‍णु जोई युद्ध करण त तेन्हि हराण जे इजाजत बि मेओ थी। होर तेस हर यक जाति, मेह्‍णु, भाषा त ऊड़ी हक दिता।

⁸ धरती पुठि से सोब बिशणे बाड़े, जेन्के नओं जीवने कताब अन्तर ना लिखिए तेस जानवरे पूजा कते। पर जेन्के नओं तेस जीवने कताब अन्तर भुमणे शुरु केआं पेहलाई लिखो थिउ, से तेस जानवरे पूजा ना कते। से कताब यीशु भो, जे यक भकत चढ़ो किएऊ ईं असा।

⁹ अगर तुस में बोक ध्यान जोई शुणियेल त तुस समझ घेन्ते।

¹⁰ जेस कैद अन्तर घेण असु, से कैद अन्तर घेन्ता। जेस तलवारी बइ मरण असु, से तलवारी बइ जरूर मरता। एस बोक अन्तर शुचे मेह्‍णु के लाह रखण त विश्वास कते रेहण जरूरी असु।

¹¹ फि मेईं यक होरा जानवर धरती अन्तरा निस्ता काआ, तसे किएऊ ईं दुई शंग थिए। से राकसे ईं बोताथ।

¹² से पेहले तेस जानवरे हके बेलि अपु सम्हाई कम कता, होर धरती पुठ बिशणे बाड़ी केआं तेस पेहले जानवरे पूजा करान्‍ताथ, जेसे मारणे लेएक घा ठीक भोई गो थिआ।

¹³ से बोडे बोडे निशाण हरालता, अतु तकर कि मेह्‍णु के सम्हाणि अम्बरे केआं धरती पुठ आग फटान्‍ता।

¹⁴ तेन्हि निशाणी के बझई जोई, जेन्हि तेस जानवरे सम्हाणि हरालणे हक थिआ, से धरती पुठ बिशणे बाड़ी भरमान्ता। होर तेन्हि जे बोता कि तेस जानवरे मुर्ति बणाए, जे तलवारे खतरनाक चोट लगण केआं पता बि बच गा।

¹⁵ तस तेस जानवरे मुर्ति अन्तर प्राण छाणे हक बि मेईंया कि जानवरे मुर्ति बोलुण लगे, होर जत मेह्‍णु तेस जानवरे मुर्तिपुजा ना करेल, तेन्हि मरवाई छड़ियेल।

¹⁶ होर त होर, तेन मठुड़, बोडे, अमीर, गरीब, अजाद, गुलाम सोबी के देहणे हथ या तेन्के मगरी पुठ यक यक छापा लोवाई छड़ा,

¹⁷ ताकि बजन तेस छापे, कोई बि मेह्‍णु कोई लेण देण ना कइ सकियेल। तसे छाप मतलब तेस जानवरे नउ या तसे नओएं अंक भो।

¹⁸ एस समझुण जे अक्ले जरूरत असी। जेस अन्तर बुद्धि असी, से इस जानवरे अंक जोड़ीण दिए, किस कि से मेह्‍णु के अंक भो, त से अंक छेआ सौ छेआठ भो।