प्र. बोके 12 - Walangi

राकस त दुई जानवर ( 12:1—13:18 ) जिल्हाणु त राकस

¹ तोउं स्वर्ग अन्तर यक बोडा निशाण काआ, मतलब यक जिल्हाणु जेन दिस डबो थिउ त जोसुण तसे खुर पड्डे थी। होर तसे मगरी पुठ बाराह तारी के मुकुट थिआ।

² से गभुरवाल थी, त अशी बेलिए हुशेरि देन्तीथ, किस कि तेस शुले लगो थी।

³ तपले यक होरा निशाण बि स्वर्ग अन्तर काआ। यक बोडा लाल राकस थिआ, जेसे सत मगरी त दस शंग थिए। होर तसे मगरी पुठ सत मठ मठ मुकुट थिए।

⁴ तेन अपु पुंछड़ी बइ अम्बरे तारी केआं टाई हेस्से तारे थुस कइ धरती पुठ फटाई छड़े। से राकस तेस जिल्हाणु समाणि खड़ खड़ बिश गा, जे गभुरवाल थी कि से गभुरु जमाणियेल त तेस निलग छता।

⁵ तेन कुआ जमाणा, जेस बोडा भोई कइ लोहिए लेउडी बइ सोब जाति पुठ राज करण असा। पर तेस राकस केआं पेहलाई, अजगता से कुआ टाइ कइ परमेश्वरे त तसे सिंहासने भेएड़ पुजेई गा।

⁶ होर से जिल्हाणु तेस अरुणि धार जे नश गई, जेठि परमेश्वरे कनारा तेस जे यक जगाह तेयार किओ थी, कि तठि तसे बताड़ी मेहन तकर ख्याल रखियेल।

⁷ फि स्वर्ग अन्तर युद्ध भुआ। मीकाईल त तसे साथ स्वर्गेदूत राकस जोई युद्ध करण लगे त राकस होर तसे साथी तेन्के खिलाफ युद्ध किआ।

⁸ पर से राकस हारी गा, त स्वर्ग अन्तर तेस जे कोई जगाह ना रेही।

⁹ तोउं से बोडा राकस धरती पुठ फटाई छड़ा। ए सेईंए पुराणा कीड़ा भो, जे बुराई करणे बाड़ा त शैतान बोलिन्ता, जे पूरा मतोक भरमान्ता। तेस जोई तसे दूत बि साते फटाई छड़े।

¹⁰ तोउं मेईं स्वर्ग केआं ईं बोडी अवाज शुणी, “अभेईं हें परमेश्वर मेह्‍णु बचान्ता, त अपु ताकते बेलि राज कता। त अब तसे मसीह धरती पुठ अपु पूरा हक प्रगट कता, किस कि हें साथी सेवकी पुठ शैतान, जे दन रात हें परमेश्वरे समाणि तेन्हि पुठ दोष लान्ता रेहन्ताथ, से उन्निया फटाई छड़ा।

¹¹ हें साथी सेवक किएऊ लहुए बझई जोई त अपु उगाही वचने बझई जोई तेस पुठ जीत गे, किस कि तेन्हि अपु प्राण ट्यारे ना किए, बल्कि मर बि गे।

¹² इस बझई जोई ए पूरा स्वर्ग त तठि बिशणे बाड़िओ, खुशी मनाए। पर ए धरती त समन्दर! तुं खेया खाट भोई घेन्ता, किस कि शैतान सुआ लेहरी कइ तुसी केईं जे उन्निया एई गो असा, से जाणता कि तसे थोड़ा ईं टेम हउ रिहो असा।”

¹³ जपल राकसे हेरु कि अउं धरती पुठ फटाई छओ असा, तेन तेस जिल्हाणु पता पता दौड़ दिती, जेस कुआ जमो थिआ, ताकि तस मुकाई बटियेल।

¹⁴ पर तेस जिल्हाणु धे बोडी पैठु दुई पंखोड़ दिते कि राकसे समाणि केआं उडीर कइ अरुणि धारे तेस जगाई पूज घियेल, जेठि सढ़े टाई साल तकर तसे धरण-पाड़ण करियेल।

¹⁵ त तेन राकसे तेस जिल्हाणु पता अपु आसी बइ दरेउए ईं पुओणि बहाउ कि से हाड़ अन्तर बहोई घियेल।

¹⁶ पर धरती तेस जिल्हाणु मदत की त तेन बकी कइ से हाड़, जे राकसे अपु आसी बइ बोहाओ थिउ, से अपु अन्तर कइ छउ।

¹⁷ त राकस जिल्हाणु हेर सुआ लेहेर एई गई, त तसे होरी गभुरु खिलाफ, जे परमेश्वरे निआंग मानते त यीशु उगाही देणे पक्के थिए, युद्ध करण जे गा।

¹⁸ तोउं से राकस समन्दरे औत पुठ घेई कइ खड़ी गा।