प्र. बोके 11 - Walangi

दुई उगाह

¹ फि मेन्धे नापण जे यक गज दिता, त बोलु, “खड़ भो, त परमेश्वरे देहेर त कुण्ड नापीण दे त तेस अन्तर पुजापाठ करणे बाड़ी गिणिण दे।

² पर देहरे बाहर दुआर अगर ना नाप। तेस छड़ दे, किस कि से गैर यहूदी कें धे दी गो असु। त से शुचा शेहर बताड़ी मेहन तकर ढचते-मिनते रेहन्ते त जुठा कते।

³ पर ततरे मेहने तकर अउं अपु दुई उगाही कें धे ईं हक देन्ता कि से ब्युर लपेट कइ भविष्य वाणि करे।”

⁴ ई सेईंए दुई जैतुने बुटे त दुई दीये भो, जे धरती प्रभु समाणि खड़ खड़ असे।

⁵ अगर कोउं तेन्हि नुकसान करण चहन्ता, त तेन्के आसी केआं आग निस कइ तेन्के दुश्माणी भसम कइ छती। अगर कोउं तेन्हि नुकसान कराल, त जरूरी असु कि से एसे रीति जोई मारी घेण असा।

⁶ तेन्हि अम्बर बन्न करणे हक असा कि तेन्के भविष्य वाणि करणे दिनि अन्तर कदी बि मेघे ना लौती लगो। होर तेन्हि सोब पुओणि पुठ बि हक असा कि तेस लहु बणाल। होर जपल जपल से चहेल तपल तपल धरती पुठ बुखता लंघाई बटते।

⁷ तोउं बताड़ी मेहने पूरे भुणे केआं पता जपल से अपु उगाही दी बटियेल, त से खतरनाक जानवर, जे काल खपर अन्तरा निस्ता, तेन्हि जोई लड़ाई कर कइ तेन्हि केआं जीत घेन्ता त तेन्हि मार छता।

⁸ होर तेन्के लाश तेस यरुशलेम शेहरे चौबाटे पुठ लिगड़ेरी रेहन्ती। ए से शेहर भो जेठि तेन्के प्रभु बि क्रूस पुठ ढनाई कइ मरो थिआ। ए शेहर अपु लूचे कम करणे त परमेश्वरे टज भुंजाणे बझई जोई सदोम शेहर त मिस्र देश बि बोलिन्ता।

⁹ सोबी ऊड़ी, जाति, भाषा त देशे मेह्‍णु तेन्के लाश सढ़े टाई रोज तकर हेरते रेहन्ते, त तेन्के लाशी पथण ना देन्ते।

¹⁰ होर धरती पुठ बिशणे बाड़े तेन्के मरणे बेलिए खुश त मस्त भुन्ते। से यकी होरी कें धे मिठेई देन्ते, किस कि इन्हि दुहि भविष्य वक्ती धरती पुठ बिशणे बाड़ी पुठ सुआ अशी अण्हो थी।

¹¹ पर सढ़े टाई रोजे बाद, परमेश्वरे कनारा जिन्‍दगी सांस तेन्हि अन्तर पैठ गा त से अपु खुर के बल खड़ी गे। तेन्हि हेरणे बाड़े सोब डर कइ भय भंकार घेई गई।

¹² तोउं तेन्हि दुई उगाही स्वर्ग केआं यक बोडी हुशेरि शुणी, “इठि, बेहीं एईए!” ईं शुण कइ से बदेए पुठ सवार भोई कइ अपु दुश्माणी के समाणि स्वर्ग जे घेई गे।

¹³ फि तेस घड़ी यक बोडा भुंजल गा, त तेस शेहरे दसमा हेस्सा ढेई गा। तेस भुंजले बेलिए सत हजार मेह्‍णु मर गे, त होरे डर गे त स्वर्गे परमेश्वरे गुणगान करण लगे।

¹⁴ दोकी बुखता मुक गई। हेरे! टेकी बुखता झठ एणे बाड़ी असी।

सतूं रेशमि फुक देण

¹⁵ जपल सतूं स्वर्गेदूते रेशमि फुक दिती, त स्वर्ग अन्तर ईं बोडी बोडी अवाज भुण लगी, “मतोके राज्य हें प्रभु त तसे मसीहे भोई गा, त से जुग जुग तकर राज कता।”

¹⁶ तोउं चोबिहो स्याणी, जे परमेश्वरे समाणि अपु अपु सिंहासन पुठ बिशो थिए, उटेऊ बिश कइ परमेश्वरे खुर बिने।

¹⁷ त ईं बोलुण लगे, “ए सर्व शक्तिमान प्रभु परमेश्वरा! तुस जे असा त जे थिए, अस तुं धन्यवाद कते कि तेईं अपु बोडी ताकती बेलि राज करण शुरु किओ असा।

¹⁸ सोब जाति लेहरी, पर तें कोप एई गा, से टेम एई गा कि मरो तेन्के न्याय भोल। होर तें सेवक भविष्य वक्ती त शुचे मेह्‍णु त तेन्हि मठुड़ बोडी जे, जे तुं इज्जत कते, तेन्के धे फल देन्ते। होर धरती बिगाड़णे बाड़े सम्हाई खतम करी घेण असे।”

¹⁹ तोउं मेईं हेरु कि परमेश्वरे से देहेर जे स्वर्ग अन्तर असा, खुली गा। त तसे देहेर अन्तर तसेरी जुबाने सन्नूक काआ। होर तठि बिजली चमकुण, मेघ गड़कुणे, होरे होरे डरौणी अवाज एणे लगे त भुंजल गा, होर बोडे बोडे शरवाठे शीण लगे।