प्र. बोके 10 - Walangi

स्वर्गेदूते मठड़ी कताब

¹ फि मेईं यक होरा ताकतवर स्वर्गेदूत बदेए बइ घटिए स्वर्ग केआं उन्नि एन्ता काआ। तसे मगरी पुठ मेघे धनुष थिआ। तसे मुंह दिसे ईं त तसे खुर आगे खम्मे ईं थिए।

² तसे हथ अन्तर यक मठड़ी ईं खोलो कताब थी। तेन अपु देहणा खुर समन्दर पुठ त बउंआ खुर धरती पुठ रखा।

³ तोउं तेन ईं जोरी जोई हुशेरि दिती कि जीं शेर गरजता। होर जपल तेन हुशेरि दिती त गड़कुणे सत अवाज भुई।

⁴ जपल गड़कुणे सतो अवाज भुई, त अउं लिखण पुठ थिआ दे, मेईं स्वर्ग केआं ईं अवाज शुणी, “जे बोके गड़कुणे तेन्हि सत अवाजी केआं शुणो असी, तेन्हि नियोकइ कइ रख, तेन्हि ना लिख।”

⁵ जे स्वर्गेदूत मेईं समन्दर त धरती पुठ खड़ खड़ काओ थिआ, तेन अपु देहणा हथ स्वर्ग जे खड़ेरा।

⁶ होर जे परमेश्वर जुग जुग जीन्ता असा, त जेन स्वर्ग त जे किछ तेस अन्तर असु, होर धरती त जे किछ तेस पुठ असु, होर समन्दर त जे किछ तेस अन्तर असु बड़ाओ असु, तसे सोहो कर कइ बोलु, “अब हउ चेरे ना लगतु।

⁷ पर जपल सतूं स्वर्गेदूते बेलि सतूं रेशमि फुक दीइन्ती, तेन्हि दिनि परमेश्वरे से नियोको बोक पूरी भुन्ति। ए से खुश खबरी मुताविक भुन्ति, जे तेन अपु सेवकी, भविष्य वक्ती जे बोलो थी।”

⁸ तोउं, जे अवाज मेईं स्वर्ग केआं बोती शुणो थी, से फि मोउं जोई बोक करण लगा, “गा, जे स्वर्गेदूत समन्दर त धरती पुठ खड़ खड़ असा, तसे हथा खोलो कताब घिन गा।”

⁹ मेईं स्वर्गेदूते भेएड़ घेई कइ बोलु, “एस मठड़ी कताब मेन्धे दे!” तेन मोउं जे बोलु, “ने, एस खाण दे। ए तें आसी अन्तर मखीरे ईं मुठु लगती, पर तें पेट कौड़ु कती।”

¹⁰ तोउं मेईं से मठड़ी कताब तेस स्वर्गेदूते हथा नी त खाई छड़ी। से में आसी अन्तर मखीरे ईं मीठी त लगी, पर जपल अउं तेस खाई बिठा, त में पेट कौड़ु भोई गोउ।

¹¹ तोउं मोउं जे ईं बोली गोउ, “तोउ हउ बि सुआ मेह्‍णु, जाति, भाषा त राजी के बारे भविष्य वाणि करीण असी।”