प्र. बोके 1 - Walangi

शुरुवाती बोके ( 1:1-8 )

¹ यीशु मसीहे प्रकट किओ बोक, जे परमेश्वरे तसे धे तोउं दिती, ताकि जेन्के झठ भुण ठीक कइ छो असु, से अपु सेवक हरालाल। त तेन अपु स्वर्गेदूत लंघा त तसे बेलिए अपु सेवक यूहन्ने जे बोलु।

² होर यूहन्ना ईं उगाही देन्ता कि जे कुछ बि तेन हेरो थिउ, से सोब परमेश्वरे वचन त यीशु मसीहे उगाही भो।

³ परमेश्वर तेन्हि सोबी जे अशुश देन्ता, जे भविष्य वाणि इन्हि बोके पढ़ते, होर शुणते त इस अन्तर लिखो बोकी मानते, किस कि अन्हि बोकी के पूरा भुणे टेम नीड़ा ओ असा।

एशिया इलाके सत सतसंग जे खबर

^4-5 एशिया इलाके सतहोई सतसंगे में ट्यारे विश्वासी भाई त भेणिओं! अउं यूहन्ना ई चिट्ठि लिखुण लगो असा त अउं चहन्ता कि परमेश्वरे कृपादृष्टि तुसी पुठ भुन्ति रिहे त तुसी शान्ति मेती रिहे। से परमेश्वर जीन्ता असा। से पेहलाई केआं जीन्ता थिआ, त अगर जे बि जीन्ता रेहन्ता। तिहांणि तेन्हि सत आत्माई, जे तसे सिंहासने समाणि भुन्ति, त यीशु मसीहे बि कृपादृष्टि तुसी पुठ भुन्ति रिहे, होर तुसी शान्ति मेती रिहे। से यीशु मसीह परमेश्वरे यकीन लेएक उगाह असा, जे मरो तेन्हि अन्तरा सोबी केआं पेहले दुबारी जीआ त धरती सोब राजी के अधिकारी असा। तेन असी जोई परेम किआ त अपु लहु बहाई कइ हें पाप धुई छड़े।

⁶ होर तेन अस अपु बोउए परमेश्वरे टज त तसे समाणि सेवा करणे बाड़े पुजारे बणो असे। जुग जुग तकर सम्हाई ताकत तसेरी भो त तसेरी गुणगान भुन्ता रिहे। आमीन।

⁷ हेरे! से बदेई पुठ सवार भोई कइ एणे बाड़ा असा। होर जेन्हि से कोरो थिआ, से बि तेस हेरते, त तसे बझई जोई धरती पुठि सोब जाति मेह्‍णु अपु अपु डडोर बजान्ते। आं, आं सच्चे बि। आमीन।

⁸ सर्व शक्तिमान प्रभु परमेश्वर ईं बोता कि “अउंए ‘अ’ त अउंए ‘ज्ञ’ भो। अउं जीन्ता असा, अउं पेहलाई केआं जीन्ता थिआ, त अगर जे बि जीन्ता रेहन्ता।”

सत सतसंगी जे चिट्ठि ( 1:9—3:22 ) यूहन्ने मसीहे दर्शण भुण

⁹ अउं यूहन्ना, विश्वास अन्तर तुं भाई त मसीह यीशु लिए दुख सीढ़ण अन्तर तुं ईं हेस्सेदार असा। होर तुं ईं परमेश्वरे राज्ये वारिस भुणे उम्मीद रखो असी। अउं परमेश्वरे वचन त यीशु मसीहे बारे उगाही देणे बझई जोई पतमस नओएं यक टापु अन्तर कैद थिआ।

¹⁰ प्रभु रोज अउं शुची आत्माई जुए भरी गा, त अपु पतूं, जीं रेशमि लम्मी अवाजे ईं ई बोती शुणी,

¹¹ “जे किछ तु हेरता, तेस यक कताब अन्तर लिख कइ तेन्हि सतहोई सतसंगी जे लंघाण दिए, जे इफिसुस, स्मुरना, पिरगमुन, थुआतीरा, सरदीस, फिलदिफिया त लौदीकिया शेहर अन्तर असे।”

¹² तोउं अउं पतूं खरका कि तेस हेरुं, जे मोउं जोई बोक करण लगो असा, त हेरु कि तठि सत दीये बाड़ी सुन्ने अगाशदीआ असा।

¹³ तेन्हि दीयी के बुच मनखे कोईये ईं यक मेह्‍णु काआ, जेन खुरी तकर झिणे लओ त छाति पुठ सुन्ने कवच बन्हो थिआ।

¹⁴ तसे मगरी छते हच्छी ऊनि के ईं त डंगे ईं हच्छी थी, होर तसे टीर आगी लौई ईं थिए।

¹⁵ तसे खुर पित्तले ईं चिलको थिए, जे ईं लगतेथ जीं आग अन्तर तचाणो असे। होर तसे अवाज सुआ पाणि शणशणाते ईं थी।

¹⁶ तेन अपु सुमले हथे बइ सत तारे टाइ रखो थिए। होर तसे आसी बइ तेज दुई धारी तलवार निसतीथ। तसे मुंह अतु टगड़ु थिउ, जीं भर दिसाई दिस चिलकतु।

¹⁷ जपल मेईं से काआ त अउं यक मुड़दे ईं तसे खुरी पुठ डूल गा। तेन मोउं पुठ अपु देहणा हथ रख कइ बोलु, “डर नउ; अउंए शुरुवात त अउंए अन्त भो।

¹⁸ अउंए जीन्ता असा। अउं मर गो थिआ, त अब हेर, अउं जुग जुग जीन्ता असा। होर मरण त पाताले कुंजुड़ मोउं केईं असे।

¹⁹ तोउं त, जे बोके तेईं भुन्ति काई, त जे बोके भुण लगो असी, होर जे बोके इढ़िया पता भुणे बाड़ी असी, तेन्हि सोबी लिख छड़।

²⁰ होर से सत तारे, जे तेईं में सुमले हथ टातो हेरे, त तेस सत दीये बाड़े सुन्ने अगाशदीए राज ईं असा: से सत तारे सतहोई सतसंगी के दूत भो, त से सत दीये, सत सतसंग भो।”