मरकुस 7 - Walangi

शुचा त जुठा भुणे बारे यीशु शिक्षा

¹ पता, फरीसी त कुछ धर्मशास्त्री जे यरुशलेम शेहर केआं अओ थिए, तसे भेएड़ कठे भोई गे।

² त तेन्हि तसे कुछ चेले तेन्के रिवाजे हेसाब जोई अधोए हथि रौठि खांते काए।

³ बोक ई असी कि फरीसी त सोब यहूदी, अपु पुरखी के रिवाज मान कइ जपल तकर सही हेसाब जुए अपु हतेउ न धून्‍तेथ से रौठि ना खांते।

⁴ से त बाजार केआं एई कइ जपल तकर सन्हु न कते; तपल तकर रौठि न खांते। से होर बि सुआ रिवाज मानते जीं कोल, लोठु त टामे भाणे माजुण त धूण।

⁵ तोउं त, तेन्हि फरीसी त धर्मशास्त्री तेस केआं पुछु, “तें चेले पुरखी के रिवाजे मुताविक किस न चलते? किस अधोए हथि रौठि खाई छते?”

⁶ तेन तेन्हि जे बोलु, “यशायाह भविष्य वक्ता तुसी कपटी के बारे सही भविष्य वाणि किओ थी। परमेश्वरे बोलो बोके तेन लिखो असी ‘ई मेह्‍णु मुंहे बइ त में इज्जत कते, पर अन्के मन मोउं केआं दूर असा।

⁷ ए बेकार अन्तर में पूजा कते, किस कि ए मनखे बड़ाओ रीति रिवाज परमेश्वरे वचन बणाई कइ मेह्‍णु शिचालते।’”

⁸ “तुस मेह्‍णु के शिक्षा मनुण जे परमेश्वरे नियम टोड़ते।”

⁹ फि यीशु तेन्हि जे बोलु, “तुस अपु रीति रिवाज मनुण जे परमेश्वरे नियम बि कतु चलाकी जोई टोड़ छते!

¹⁰ किस कि मूसे बोलो असु, ‘अपु ईये बोउए इज्जत करे। जे कोउं अपु ईया बोउ जे बुरु बोलियाल, से मार छाण चहिए।’”

¹¹ पर तुस बोते, “ए ठीक असु अगर कोई अपु ईया बोउ जे बोले कि ‘तुं अउगेश करण जे मोउं केईं जे किछ बि थिउ, से सोब परमेश्वर जे चढ़ाई छउ असु’।

¹² ईं कर कइ तुस तेन्हि अपु ईये बोउए कुछ अउगेश करण न देन्ते।

¹³ तोउं त, तुस अपु बणाओ रिवाजे बझई जोई परमेश्वरे नियम टोड़ छते; त ईं ईं सुआ कम कइ छते”।

¹⁴ तोउं तेन मेह्‍णु अपु भेएड़ भिए त तेन्हि जे बोलु, “तुस सोब में शुणे, त समझे।

¹⁵ बाहरीआ कोई बि चीज मेह्‍णु अन्तर घेई कइ तस परमेश्वर सामणि जुठा ना बणान्ती; बल्कि जे चीजे मेह्‍णु अन्तरा निस्ती, सेईंए तेस परमेश्वर सामणि जुठा बणाई छती।

¹⁶ अगर तुस में बोके ध्यान जोई शुणियेल त तुस समझ घेन्ते।”

¹⁷ जपल यीशु हसुड़े केआं गी गा, त तसे चेली तेस कथाई बारे तेस केआं पुछु।

¹⁸ त तेन तेन्हि जे बोलु, “कि तुस बि अपल तकर नासमझ असे ना? तुसी कि किछ समझ ना आउ ना, कि जे चीज बाहरीआ मेह्‍णु अन्तर घेन्ति, से तेस जुठा न कइ सकती?

¹⁹ किस कि से तसे मन अन्तर न घेन्ति, पर पेट अन्तर घेन्ति त बाहर निस घेन्ति।” ईं बोल कइ तेन सोब खाणे चीज शुची बणाई।

²⁰ फि तेन बोलु, “जे मेह्‍णु अन्तरा निस्तु, सेईंए मेह्‍णु जुठु कतु।

²¹ किस कि अन्तरा, मतलब मनखे मन अन्तरा ईं बुरे बुरे विचार एन्ते, नाजायज रिश्ता रखणे सोच एन्ती, केस जोई गलत कम करणे सोच, चोरणे त मेह्‍णु मारणे,

²² होरी के चीजे लोभ करणे, बेशर्मे कम करणे, कपट कर कइ मेह्‍णु ठगणे, होरी के भलाई हेर जड़णे त तेन्के मेझर करणे, झूठा रोभ किढ़णे त मुर्खी के कम करणे निस्ती।

²³ ई सोब बुरी बुरी बोके अन्तरारी निस्ती त मेह्‍णु जुठा बणान्ती।”

यक गैर यहूदी जाति जिल्हाणु विश्वास

²⁴ पता यीशु तठिआ खड़ भोई कइ सूर त सैदा इलाके अन्तर आ; त यक मेह्‍णु गी जे गा त से चहन्ताथ कि केसे पता न लौता लगो; पर मेह्‍णु तसे बारे पता लग गा।

²⁵ त तसे चर्चा शुण कइ तिखेईं यक जिल्हाणु आई जेसे मठड़ी कुई अन्तर दुष्ट आत्मा थी। से एई कइ तसे खुरी पुठ बिश गई।

²⁶ से सुरुफीनीके इलाके यक गैर यहूदीण थी। तेन तसे छनेअरे किउ कि में मठड़ी कुई अन्तरा दुष्ट आत्मा बाहर किढ़।

²⁷ त यीशु तेस जे बोलु, “पेहले गभुरु रज्जि भुण दिए, किस कि गभुरु के रौठि नी कइ कुतरे अगर छाण ठीक नेईं”।

²⁸ त तेन तेस जे जवाब दुतु, “हाँ प्रभु; तोउं बि कुतर बि चुणि-चाणि खांते, जे गभुरु के हतेउ केआं झड़तु”।

²⁹ त तेन तेस जे बोलु, “में बोकी के ईं जवाब देणे बझई जोई दुष्ट आत्मा तें कुई अन्तरा बाहर निस गो असी। अब तु अपु गी जे घेई गा।”

³⁰ त तेन अपु गी एई कइ हेरु कि कुई मन्जे पुठ सैलि बिशो असी, त दुष्ट आत्मा बाहर निस गो असी।

यीशु यक लिना टौणा ठीक करण

³¹ पता यीशु सूर इलाके केआं निस कइ सैदा त दिकापुलिस इलाके बइ भुन्ता-भान्‍ता गलीले तथ केईं पूज गा।

³² त मेह्‍णु यक टौणा जे लिनियांताथ बि, तसे भेएड़ अण्ह कइ तसे छनेअरे किउ कि तस सुसुर करे।

³³ त यीशु तस हुसुड़े केआं बखरे घिन गा, त अपु अंगुल तसे कन अन्तर छड़े, त थुक कइ तसे जिभुड़ छु।

³⁴ त स्वर्गे कना जे हेर कइ हशाश छड़ा, त तेस जे बोलु, “इप्फत्तह!” मतलब “खुल गा!”

³⁵ त तसे कन खुल गा, त तसे जिभुड़ लाठ बि खुल गा, त से सुसुर बोलुण लग गा।

³⁶ तोउं तेन हुसुड़े जे निआंग दी कइ बोलु कि केसे जे न बोलुण; पर जत तेन से ठाको थिए, ततुरु से हर जगाई बोते रिहे।

³⁷ त तेन्हि हैरान भोई कइ बोलु, “से जे बि कता, खरा कता। से त टौणी शुणणे त गुंगी बोलुणे शक्ति बि देन्ता।”