मरकुस 4 - Walangi

बिएजु बाणे कथा

¹ पता यीशु तथे औत जे गा त तठि बिश कइ दुबारी शिचालुण लगा। तठि अत हुसुड़ा किठा भुआ कि तस घेई कइ नाव पुठ बिशुण आउ, त सोब हुसुड़ा औत पुठ बिशा।

² तोउं से कथाई बइ तेन्हि सुआ बोक शिचालुण लगा। तेन ई बोक बि बोली कि

³ “शुणे शुणे! यक मेह्‍णु बिएजु बाण जे गा।

⁴ बांत पेंत कुछ बिएजु बत झड़ु त चड़ी चखुरु एई कइ से खाई छउ।”

⁵ “किछ बिएजु शकरिआटी जगाई झड़ु, जेठि सुसुर जन ना थिआ। जन घट भुणे बझई जुए बेशक से झट लुंग गोउ।

⁶ पर जपल दिस निसु त से धुपि बेलि टड़ गोउ त सीरे घट भुणे बझई जुए शुख गोउ।”

⁷ “किछ बिएजु कांटि बुछ झड़ु। पर कांटे लम्मिए त तेन्के औजि बेलि तेस बिएजु केआं कोई फल ना मेआ।”

⁸ “पर किछ बिएजु सुसुर बग झड़ु। से लुंगु त लम्मी कइ अब्बल फसल भुई; कोई तिह गुणा, कोई शठ गुणा त कोई सौ गुणा फसल भुई।”

⁹ तोउं तेनि बोलु, “अगर तुस में बोक ध्यान जोई शुणियेल त तुस समझ घेन्ते।”

कथाई मतलब

¹⁰ पता, जपल यीशु अकेला थिआ, त तसे बाराह चेली त होरे साथी तस कथाई मतलबे बारे पुछु।

¹¹ तेन तेन्हि जे बोलु, “तुन्धे त परमेश्वरे अपु राज्ये नियको बोके समझणे बुद्धि दुतो असी, पर होरी जे सोब बोके कथाई अन्तर भुन्ति।

¹² ताकि से हेर हेर कइ बि ना पिछाणियेल त शुण शुण कइ बि ना शुणियेल होर न समझियेल। ई ना भो कि से समझ कइ अपु मन बदलियेल त तेन्के पाप माफ करी घियेल।”

¹³ तोउं, तेन तेन्हि जे बोलु, “कि तुस इस कथाई मतलब न समझते ना? त फिर होर कथाई कीं समझते?

¹⁴ बाणे बाड़ा जेस बिएजु बाण लगो थिआ, से परमेश्वरे वचने ईं असु।

¹⁵ त केहि मेह्‍णु तेस बते ईं असे, जेठि से बिएजु झड़ थिउ। से परमेश्वरे वचन त शुणते, पर तिखेईंए शैतान एई कइ तेन्हि वचनी तेन्के मन केआं दूर कइ छता।

¹⁶ त केहि मेह्‍णु तेस शकरिआटी जिम ईं असे। से परमेश्वरे वचन त खुशी जुए शुणते त मानते बि।

¹⁷ पर तेस बिएजु ईं परमेश्वरे वचन अन्तर सीरे घट भुणे बझई जोई धिक रोजे लिए सुसुर रेहन्ते। होर जपल तेस वचने बझई जोई मेह्‍णु तेन्हि भुंजान्ते त से तस मनुण छड़ देन्ते।

¹⁸ तिहांणि केहि मेह्‍णु तेस कांटियाली जिम ईं असे। से परमेश्वरे वचन त शुण कइ मानते,

¹⁹ पर मतोके चिन्ता, धन दौलते लालच अन्तर एई कइ त अपु मने होरे होरे लोभे बेलि से फस घेन्ते त परमेश्वरे पतूं घेण छड़ देन्ते।

²⁰ पर केहि मेह्‍णु तेस सुसुर बगे ईं असे। से परमेश्वरे वचन शुण कइ मानते त तेन्हि पुठ तिह गुणे, शठ गुणे त सौ गुणे फल लगते।”

दीये कथा

²¹ तोउं यीशु तेन्हि जे बोलु, “दीये तोउं जाते ना कि तस मन्जे पड्डे रखे या लेंसुड़ बइ घटे? ना! दीया त इस बझई जुए जाते कि तस तुबारि पुठ रखे।

²² किस कि हर यक नियको बोक सामणि एई घेन्ति त हर यक राज खुल घेन्ता।”

²³ तोउं तेनि बोलु, “अगर तुस में बोक ध्यान जोई शुणियेल त तुस समझ घेन्ते।”

²⁴ फिर तेन तेन्हि जे बोलु, “जे तुस शुणुण लगो असे, तेस पुठ ध्यान दिए। जेन नापे बइ तुस होरी जे नापते, तेस नापे बइ तुसी जे बि नापिंन्‍तु त तुन्धे सुआ दीइन्तु।

²⁵ किस कि जेस केईं असु, तसे धे दीइन्तु; त जेस केईं नेईं, तेस केआं से बि नीइन्तु जे तेस केईं असु”।

जिमदार त परमेश्वरे राज्य

²⁶ तोउं तेन बोलु, “परमेश्वरे राज्य जीं केस जिमदारे बग बिएजु फटाणे ईं असा

²⁷ से घेई कइ रात उंघता त दिसाई खड़िन्ता। पर से बिएजु कीं लुंगतु त बोडिन्तु तसे बारे तस भनक बि ना लगती।

²⁸ धरती अपफ फल लान्ती, पेहले लुंग एन्ती, तोउं सियुड़ त पता रो पक्की घेन्ते।

²⁹ पर जपल रो पक्की घेन्ते, तोउं से जिमदार एई कइ तस लुणुण लगता, किस कि फसल लुणणे भोई गई।”

शरहेउए रोए कथा

³⁰ फि यीशु बोलु, “असी परमेश्वरे राज्ये बराबरी केस जुए करीण त केस कथा जुए तसे बोक लाण?

³¹ से शरहेउए रोए ईं असा : जपल बग अन्तर तस बांते त सोबी चीजी केआं मठुड़ भुन्तु,

³² पर बाण केआं पता से लुंग कइ सोबी टाट केआं बोडु भुन्तु, त तसे डा अत बोडे बोडे भुन्ते कि चड़ी चखुरु बि तसे डाई पुठ गुला बणाई कइ बिश सकते”।

³³ से परमेश्वरे वचन तेन्हि समझाण जे ईं सुआ कथा शुणाई शुणाई कइ शिचालताथ।

³⁴ त बगैर कथाई से तेन्हि जे कुछ न बोताथ; पर अकेले अन्तर अपु चेली जे सोब बोकी के मतलब समझान्ताथ।

यीशु तुफान शान्त करण

³⁵ तेस रोज जपल झवादी भुई, त तेन अपु चेली जे बोलु, “चले! तथे ओस पार घेन्ते”।

³⁶ त से हुसुड़ा छड़ दी कइ जीं से बिशो थिआ, तिहांणि से नाव पुठ साते नी छड़ा; त तेन्हि जोई होरी बि नाव थी।

³⁷ तपल सुआ ब्यार लगण लगी। पुओणि छल्हारे नाव जोई बजण लगे त नाव पुओणि बेलि भरीण लगी।

³⁸ पर से अपफ नावी पती कना उंघ बिशो थिआ। तोउं तेन्हि से खड़ेरा त बोलु, “ए गुरु, ए गुरु! तुसी कि चिन्ता नेईं न कि अस मरणे बाड़े असे?”

³⁹ तोउं तेन खड़ी कइ ब्यार डराई, त छल्हारी जे बोलु, “शान्त भो!” त ब्यार रुक गई त तठि यकदम ईं चैन एई गई।

⁴⁰ तोउं तेन तेन्हि जे बोलु, “तुस किस डरते? तुसी कि अपल तकर मोउं पुठ विश्वास नेईं न?”

⁴¹ ईं हेर कइ चेले बिचारे सुआ डर गे त अपफ बुच बोलुण लगे, “ए कोउं भो भाई, जेसे केहणा ब्यारी त छल्हारे बि मानते?”