मरकुस 3 - Walangi

शुखो हथ बाड़ा मेह्‍णु ठीक करुण

¹ यीशु फिर अराधनालय अन्तर गा। तठि यक मेह्‍णु थिआ, जेसे हथ शुख गो थिउ।

² त कुछ मेह्‍णु तेस पुठ दोष लाण जे हेरी बिशो थिए कि यीशु भक्ति करणे रोज तेस मेह्‍णु ठीक कता कि न कता।

³ तेन शुखो हतेउ बाड़े मेह्‍णु जे बोलु, “तु इठि बुच खड़ भो”।

⁴ तोउं, तेन सम्हाई जे बोलु, “भक्ति करणे रोज भलु करुण खरु असु या बुरु करुण, केसे जीवन बचाण या मुकाण?” पर से सोब चुप बिशे।

⁵ तेन्के नकठर मन हेर कइ से उदास भोई गा, त लेहरी कइ तेन्हि सम्हाई कें धे हेरते हेरते, तेस मेह्‍णु जे बोलु, “अपु हथ अगर कर”। तेन अपु हथ अगर किउ, त तसे हतेउ यकदम ठीक भोई गोउ।

⁶ तिखेईंए फरीसी बाहर घेई गे। से झट हेरोदेस राजे मेह्‍णु जोई मी कइ यीशु खिलाफ अपफ बुछ मेझर करण लगे कि ए कीं कइ खतम करण।

सुआ मेह्‍णु यीशु पतोती घेण

⁷ पता, यीशु अपु चेली जोई तथे कना जे घेई गा। त गलील राज्य त यहूदिया राज्य केआं सुआ हुसुड़ा तसे पता पता एई गा।

⁸ ईं शुण कइ कि से कीं बोडे बोडे चमत्कारे कम कता, यहूदिया, यरुशलेम, इदुमिया इलाके, यरदन दरेउ पार केआं, त सूर होर सैदा इलाके केईआं बि बोडा हुसुड़ा तस केईं आ।

⁹ तेन अपु चेली जे बोलु, “इठि मेह्‍णु के सुआ हुसुड़ा असा। तुस यक कम करे, मोउं जे यक मठड़ी नाव तेयार कइ रखे, ताकि अउं चिसियेल नउ”।

¹⁰ किस कि तपल तकर तेन सुआ जेईं ठीक किओ थिए, त जतु बि बीमार मेह्‍णु थिए से तस छूण जे तेस पुठ डूलतेथ।

¹¹ त दुष्ट आत्मा बि तेस हेर कइ तसे अगर खुरी पुठ उटेऊ बिश घेन्तीथ, त लियारी दी कइ बोतीथ, “तु परमेश्वरे कुआ भो।”

¹² पर तेन तसे बारे केसे जे बि ना बोलुणे तेन्हि जे सक्त निआंग दिती।

यीशु अपु बाराह प्रतिनिधि चुणुण

¹³ पता, से फाट पुठ चढ़ गा, त जेन्हि से चहन्ताथ से सोब तेन अपु भेएड़ जे भिए। त से सोब तसे भेएड़ एई गे।

¹⁴ तोउं तेन बाराह मेह्‍णु चुणे कि से तसे जोई साते साते बिशे, ताकि से तेन्हि इएर-ओवर लंघाल कि से परमेश्वरे खुश खबरी प्रचार करियेल;

¹⁵ त तेन्के धे दुष्ट आत्मा नशाणे शक्ति दियेल।

¹⁶ तेन्के नओं ई ई असु: शमौन, जेस नओं तेन “पतरस” रखु,

¹⁷ होर जबदी कुआ याकूब त यूहन्ना, जेन्के नओं तेन “बुअनरगिस” रखु, जेसे मतलब “गड़कुणे कुआ” भो।

¹⁸ त अन्द्रियास, फिलिप्पुस, बरतुलमेई, मत्ती, थोमा, हलफई कुआ याकूब, तद्देइ, शमौन कनानी,

¹⁹ त यहूदा इस्कारियती, जेन पता से धोखा दी कइ टोवाई छड़ा।

यीशु अपु ताकती बारे मेह्‍णु समझाण

²⁰ तोउं यीशु त तसे चेले गी वापिस एई गे। त तठि ईं हुसुड़ा किठा भुआ कि तेन त तसे चेले रौठि बि खाई न बटी।

²¹ जिखेईं तसे गीहे बाड़ी ई शुणु, त से तस नेण जे निथे; किस कि से बोतेथ “तसे मन ठिकाणे नेईं।”

²² यरुशलेम शेहर केआं अओ धर्मशास्त्री बि ईं बोतेथ कि तेस अन्तर “बालजेबुल” असा, त से दुष्ट आत्माई के राजे मदती बेलि दुष्ट आत्मा बाहर किढ़ता।

²³ त से तेन्हि अपु भेएड़ भिआई कइ तेन्हि जे मशाल दी कइ बोलु, “शैतान की शैतान बाहर किढ़ सकता ना?

²⁴ अगर केसे राज्य अन्तर बगावत भोल, त से राज्य कीं कइ टिग सकता?

²⁵ अगर केसे गी अन्तर झगड़ा भोल, त से गी कीं कइ टिग सकता?

²⁶ तीं अगर शैतान अपफ अपु विरोध कता त बखी घेन्ता, त तसे की बणतु? से त खतम भोई घेन्ता।

²⁷ पर आं! अगर कोई मेह्‍णु केसे बोडे बलवाने गी लुटुण चहन्ता त तस पेहले से बलवान बन्हणे जरूरी असा। तोउं से तसे गी लूट सकता।”

²⁸ “अउं तुसी जे बोता कि मेह्‍णु के सम्हाई पाप त परमेश्वरे बुराई जे से कते, माफ भोई सकते।

²⁹ पर जे कोउं शुची आत्माई बुराई कता, तसे पाप कदी माफ न भुन्ते, त परमेश्वर तस हमेशा लिए पापी मानता।”

³⁰ यीशु ई तोउं बोलु, किस कि से बोतेथ कि एस अन्तर दुष्ट आत्मा असी।

यीशु सक्के रिश्तेदार

³¹ तिखेईं तकर तसे ई त भाई तठि पूज गे। से हुसुड़े बाहरी बिश कइ कोउं तेस भिआण जे लंघा।

³² हुसुड़ा तसे बियेर बइ बिशो थिआ, त तेन्हि तेस जे बोलु, “हेरे गुरुजी! तें ई त भाई बाहर तोउ भाड़ बिशो असे”।

³³ तेन तेन्हि जे जवाब दिता, “कोउं में सच्चे ई त भाई भिन्थ?”

³⁴ तोउं अपु बियेर बइ मेह्‍णु कें धे हेर कइ बोलु, “हेरे! में सच्चे ई त भाई ई भिन्थ।

³⁵ किस कि जे कोउं परमेश्वरे इच्छा मान कइ जीन्ता, सेईंए में सच्चे भाई, भेण त ई भो।”