मरकुस 2 - Walangi

यीशु अदरंगे बीमार मेह्‍णु ठीक करण

¹ कुछ रोजे पता यीशु फिर कफरनहुम शेहर आ, त मेह्‍णु शुणु कि से गी अओ असा।

² त तठि यकदम ईं अत मेह्‍णु किठे भुए कि दुआर केईं बि जगाह न रेही। होर से तेन्हि परमेश्वरे बोक शुणाण लगो थिआ।

³ तपल, कुछ मेह्‍णु चोउर मेह्‍णु के मदते बेलि यक अदरंगे बीमार मेह्‍णु डानी पुठ कर कइ तसे भेएड़ अण्हण लगो थिए।

⁴ पर सुआ हुसुड़े बेलि से तसे भेएड़ पूज न बटे। तोउं तेन्हि से लहाड़ पुठि छड़ा, जेस पड्डे से थिआ; त से बीमार मेह्‍णु डानी समेत तेन खोपरे बइ उन्निया छड़ा।

⁵ यीशु तेन्के विश्वास हेर कइ तेस अदरंगे बीमार मेह्‍णु जे बोलु, “मेह्‍णुआ! तें पाप माफ भोई गे”।

⁶ तपल कुछ धर्मशास्त्री जे तठि बिशो थिए, से अपु अपु मन अन्तर सोचुण लगे कि,

⁷ “ए मेह्‍णु किस ईं बोता? ए त परमेश्वरे बेज्जती करण लगो असा! किस कि परमेश्वर छड़ दी कइ कि होर कोउं पाप माफ कइ सकता ना?”

⁸ पर एस बोकी बारे यीशु अपु मन अन्तर समझी गा त तेन तेन्हि जे बोलु, “तुस इसे बारे अपु अपु मन अन्तर किस सोचुण लगो असे?

⁹ सुख्तु की असु? की इस अदरंगे बीमार मेह्‍णु जे बोलुण कि तें पाप माफ भोई गे, या ईं बोलुण कि खड़ भो! अपु डानी टा त हंटिण-फिरिण दे?

¹⁰ पर अब अउं तुसी ई हरालण चहन्ता कि अउं जे मनखे कुआ भो, मोउं केईं धरती पुठ पाप माफ करणे अधिकार असा।” त तेन तेस अदरंगे बीमार मेह्‍णु जे बोलु,

¹¹ “अउं तोउ जे बोता, खड़ भो! अपु डानी टाइ कइ अपु गी जे घेई गा।”

¹² तिखेईंए से खड़ भुआ त सोबी के सामणि अपु डानी टाइ कइ बाहर घेई गा। ई हेर कइ सोब जेईं हैरान भोई गे, त परमेश्वरे महिमा कते कते बोलुण लगे, “ईं असी कदी काओ न थिउ”।

यीशु लेवी भिआण

¹³ तठिआ निस कइ दुबारी यीशु गलीले तथे भेएड़ जे गा, त पूरा हुसुड़ा तसे पता पता एई गा, त से तेन्हि शिचालण लगा।

¹⁴ घेन्त घेन्त तेन हलफई कुआ लेवी अपु मामला नेण बाड़ी जगाई पुठ बिशो का, त तेस जे बोलु, “में पता आई”। त से खड़ भोई कइ तसे पता पता घेई गा।

¹⁵ जिखेईं यीशु लेवी गी रौठि खाण जे बिशा, तिखेईं सुआ मामला नेणे बाड़े त पापी, यीशु त तसे चेली जोई रौठि खाण जे बिश गे, किस कि से सुआ थिए, त तसे पतोती अओ थिए।

¹⁶ ईं हेर कइ कि यीशु पापी त मामला नेणे बाड़ी जोई रौठि खाण जे बिशो असा, कुछ धर्मशास्त्री जे फरीसी थिए तसे चेली केआं पुछु, “ए किस पापी त मामला नेणे बाड़ी जोई खांता पीन्ता?”

¹⁷ ईं शुण कइ यीशु तेन्हि जे बोलु, “जिहांणि चंगे भले वैदी के जरूरत न भुन्ति, पर बीमारी भुन्ति: तिहांणि जे अपफ धर्मी समझते तेन्हि ना, बल्कि अउं पापी मेह्‍णु भिआण जे अओ असा”।

ब्रत रखणे बारे सवाल

¹⁸ किस कि चुसुणे बाड़े यूहन्ने चेले त फरीसी ब्रत रखतेथ, त कुछ मेह्‍णु एई कइ यीशु केईआं पुछु, “किस यूहन्ने त फरीसी चेले ब्रत रखते, पर तें चेले न रखते?”

¹⁹ तेन तेन्हि जे बोलु, “जपल तकर नोउआं लाड़ा म्हाराई जोई असा, से कि ब्रत रख सकते न? त जपल तकर नोउआं लाड़ा तेन्हि जोई साते असा, तपल तकर से ब्रत न रख सकते।

²⁰ पर से रोज बि एण असा, जपल नोउआं लाड़े तेन्हि केआं केहरी छते; तेस टेम से बि ब्रत रखते।”

²¹ “नोउएं झिणि के टलि पुराणे झिणि पुठ कोई न लान्ता; न त, से टलि तेस अन्तरा किछ थुस छती, मतलब नोई टलि, पुराणा झिणि छिछड़ेरि छती त से पेहले केआं ज्यादा चीरी घेन्ता।

²² तिहांणि कोई बि नोउआं सरा पुराणे खलोठु अन्तर न रखते, न त सरा खलोठु चीर छता त से सरा त खलोठु दुहे खतम भोई घेन्ते; पर नोउआं सरा नोउएं खलोठु अन्तर भरीन्‍ता”।

यीशु भक्ति करणे रोजे प्रभु

²³ यक भक्ति करणे रोज भु ईं कि यीशु त तसे चेले बगे बीच बइ घेण लगो थिए, त तसे चेले हंटते हंटते गिहुंए सियुड़ टोड़ुण लगे।

²⁴ त फरीसी तसे केईआं पुछु, “हेर; भक्ति करणे रोज जे करुण ठीक नेईं, तेस कम ए किस कते?”

²⁵ तेन तेन्हि जे बोलु, “कि तुसी ई कदी नेईं ना पढ़ो कि जपल राजा दाऊद जरूरत पड़ी, होर जिखेईं से त तसे साथी ढुके थिए, तिखेईं तेन की किओ थिउ?

²⁶ जपल अबियातार बोडा पुजारा थिआ, त दाऊद राजे कीं परमेश्वरे गी गा त से चढ़ो रौठि खेई, जेस पुजारा छड़ दी कइ होरा कोई बि ना खाई बटताथ। तेन ना कि सद अपफ खेई, पर अपु साथी कें धे बि दिती।”

²⁷ तोउं तेन तेन्हि जे बोलु, “भक्ति करणे रोज मेह्‍णु जे बणाओ असा, न की मेह्‍णु भक्ति करणे रोज जे।

²⁸ तोउं त अउं मनखे कुआ भक्ति करणे रोजे बि मालिक भो”।