मरकुस 16 - Walangi

यीशु दुबारी जीण त स्वर्ग जे घेण ( 16:1-20 ) यीशु दुबारी जीण

¹ शण्हेचर ब्यादि जपल भक्ति करणे रोज पूरा भोई गा, त मगदला ग्रांए मरियम, याकूबे ई मरियम त सलोमी अब्बल अब्बल मुश्कि बाड़ी चीज खरीदी ताकि घेई कइ यीशु लाश पुठ लान्ती।

² त हफ्ते पेहला रोजे भ्यागे, दिस निस्ते ईं से कब्र पुठ जे घेण लगी।

³ त से अपफ बुच बोलुण लगी, “हें लिए कब्रे मुंह पुठि पठ कोउं घरांता?”

⁴ पर तठि पूज कइ हेरु कि मुंह पुठि मोटा घोड़ घराओ असा।

⁵ त से कब्र अन्तर घेई गई। तठि तेन्हि यक हच्छे झिणे डबो जवान सुमले कना बिशो काआ, त से सुआ हैरान भोई गई।

⁶ त तेन तेन्हि जे बोलु, “हैरान न भुए! तुस नासरत ग्रांए यीशु, जे क्रूस पुठ ढनओ थिआ, तोपुण लगो असी ना? से जी गो असा। हेरे, एईएं से जगाह भो, जेठि तेन्हि से रखो थिआ। से इठि नेईं।

⁷ पर तुस घिए, त तसे चेली त पतरस जे बोले कि से तुसी केआं पेहलाई गलील राज्य जे घेण लगो असा। मरुण केआं पेहले जीं तेन तुसी जे बोलो थिउ, तठि तुसी से केता।”

⁸ तोउं से जिल्हाणु कब्र केआं निसि त दौड़ दी कइ नश गई; किस कि से सुआ डर कइ ठरकण लगो थी त हैरान भोई गो थी। तेन्हि केसे जे किछ न बोलु, किस कि से डरो थी। [

दुबारी जीणे पता यीशु मगदला ग्रांए मरियम जुए मीण

⁹ हफ्ते पेहले रोज पथवारी यीशु जी गा त सोबी केआं पेहला मगदला ग्रांए मरियमे का, जेसे अन्तरा तेन सत दुष्ट आत्मा बाहरि किढ़ो थी।

¹⁰ तेन घेई कइ यीशु चेली त होरे साथी जे बोलु, जे सुआ दुखी थिए त रोलुण लगो थिए।

¹¹ ईं शुण कइ कि से जी गो असा त तेन से काआ, तेन्हि चेली त होरे साथी विश्वास ना किआ।] [

यीशु दुई चेली जुए मीण

¹² तढ़िया पता से होरे रूप अन्तर तेन्हि बुचा दुई चेली काआ, जपल से केसे ग्रां जे घेण लगो थिए।

¹³ तेन्हि बि घेई कइ होरी जे बोलु, पर तेन्हि तेन्के विश्वास ना किआ।] [

यीशु ग्याराह चेली जुए मीण

¹⁴ इढ़िया पता, जपल से ग्यारोह चेले रौठि खाण बिशो थिए, तेन्हि यीशु काआ। तेन्के अविश्वास त नकठर मने लिए तेन से जड़के, किस कि जेन्हि तसे जीणे पता से काओ थिआ, तेन्हि तेस पुठ विश्वास न किआ।

¹⁵ तोउं यीशु तेन्हि जे बोलु, “तुस पूरे धरती पुठ घेई कइ सोबी जाति मेह्‍णु बुच खुश खबरी प्रचार करे।

¹⁶ जे विश्वास कता त पाणि अन्तर चुसीन्‍ता, से बच घेन्ता। पर जे विश्वास ना कता तस सज्जा मेती।

¹⁷ विश्वास करणे बाड़ी के ई निशाणी भुन्ति कि से में नओं नी कइ दुष्ट आत्मा नशाणते, नोई नोई भाषा बोते।

¹⁸ कीड़ी टाइ छते। अगर से जेहेर बि पियेल, तोउं बि तेन्हि कुछ न भुन्तु; से बीमार मेह्‍णु पुठ हथ रखियेल त से ठीक भोई घेन्ते।”] [

यीशु स्वर्ग जे घेण

¹⁹ प्रभु यीशु तेन्हि जुए बोक करणे पता परमेश्वरे से स्वर्ग जे नी छड़ा, जेठि से परमेश्वरे देहणा कना सुआ इज्जते जगाई बिशा।

²⁰ तोउं तेन्हि चेली निस कइ हर जगाई प्रचार किआ, त प्रभु तेन्हि जोई साते कम कता रिहा। त तेन्हि चमत्कारे कमे के बेलिए जेन्हि चेले कतेथ, परमेश्वरे साबित कइ छड़ु कि तसे वचन सच्चे असे। आमीन।]