मरकुस 11 - Walangi

यरुशलेम शेहर अन्तर घेण

¹ जपल यीशु त तसे चेले यरुशलेम शेहरे भेएड़, जैतुन नओएं यक फाट पुठ बैतफगे त बैतनिया ग्रां भेएड़ पुजे, त तेन अपु चेली अन्तरा दुई जेईं ईं बोलु कइ लंघाए कि

² “जे ग्रां हें सामणि असु, अठि घिए। ग्रां अन्तर पुजते ईं तुसी तठि यक खोतुड़ु बच्चा बन्हो मेता। तस पुठ आज तकर कोई नेईं चढ़ो। तेस खोल कइ घिन एईए।

³ अगर तुसी जे कोउं पुछियाल, ‘ईं किस करण लगो असे?’ त बोलुण, ‘प्रभु असे जरूरत असी, त से झट एस वापिस लंघाई छता।’”

⁴ से गे त तेन्हि से बच्चा बाहर दुआर केईं बन्हो मेआ, त से खोलुण लगे।

⁵ त जे तठि खड़ खड़ थिए तेन्हि अन्तर कोई कोई बोलुण लगे, “ई किस करण लगो असे? खोतुड़ु बच्चे को जे खोलुण लगो असे?”

⁶ त जीं यीशु बोलो थिउ, तिहांणि तेन्हि, तेन्हि जे बोलु; तोउं मेह्‍णु से नेण दिता।

⁷ से खोतुड़ु बच्चा यीशु केईं घिन आए त तेस पुठ कुछ झिणे छड़े त से तेस पुठ बिश गा।

⁸ त सुआ जेईं अपु अपु फुलो टलिड़ बथ टडी त केहि केहि बगा डा लुण कइ आणते त बथ टड छड़े।

⁹ त जे तसे अगर त तसे पता हंटो थिए जोरी जोरी बोलुण लगे, “होशान्ना! हें परमेश्वरे जे राजा, असी जे लंघो असा, परमेश्वरे तसे धे अशुश दुतो असी।

¹⁰ हें बोउ दाऊदे जे राज्य एण लगो असा, से सुआ खास असा। स्वर्ग पुठ परमेश्वरे महिमा भो!”

¹¹ पता से यरुशलेम शेहर पूज कइ देहेर अन्तर गा त चोहरो कना सोबी चीजी ध्यान जुए हेर कइ अपु बाराह चेली जोई बैतनिया ग्रां जे गा, किस कि झवादी भोई गो थी।

बगैर फले अंजीरे बुटा

¹² दोके रोजे, जपल यीशु त तसे चेले बैतनिया ग्रां केआं यरुशलेम शेहर जे गे त तस ढुक लगी।

¹³ तेन दूरा यक नीला अंजीरे बुटा काआ त ई उम्मीद जुए कि एस बुटे पुठ किछ फल भोल, तसे भेएड़ घेई कइ हेरु। तेस पुठ किछ फल नेओथ, किस कि तिखेईं फले टेम न थिआ, त तेस पुठ सद पन्ने ईं थिए।

¹⁴ तोउं तेन तेस जे बोलु, “अभेईं केआं खड़ तें फल कोई न खांता!” त तसे चेले ई बोक शुणुण लगो थिए।

यीशु यरुशलेमे देहेर अन्तरा व्यापारी बाहर लाण

¹⁵ तोउं यीशु त तसे चेले यरुशलेम शेहर पुजे, त यीशु देहेर अन्तर गा। तठि जे लेण देण करण लगो थिए तेन्हि बाहर किढ़ण लगा। रुपेई के अटा-बाटा करणे बाड़ी के ठेले त अलिण बेचणे बाड़ी के कुण्सी फटाई छेई।

¹⁶ देहरे अन्तरी बइ केसे जेईं बि कोई सामान अण्हण त नेण ना दिता।

¹⁷ त शिक्षा दी कइ तेन बोलु, “धरमे कताब अन्तर ईं नेईं न लिखो कि ‘में गी सोबी जाति जे प्रार्थना करणे गी बोलिन्तु? पर तुसी ए डाकु के कुड बणाई छओ असी।’”

¹⁸ ईं शुण कइ मुख्य पुजारे त धर्मशास्त्री यीशु खतम करण जे मौका तोपुण लगे; किस कि सम्हाई मेह्‍णु बोडे चह जुए तसे शुणतेथ त मुख्य पुजारे त धर्मशास्त्री तेन्हि मेह्‍णु हेर डरतेथ।

¹⁹ जपल झवादी भुई त से शेहर केआं बाहर घेई गे।

शुखो अंजीरे बुटे केआं शिक्षा

²⁰ होउस भ्यागे जपल यीशु त तसे चेले तेन बइ गे त तेन्हि से अंजीरे बुटा जड़ तकर शुखो काआ।

²¹ पतरस से बोक याद आई, त तेन यीशु जे बोलु, “ए गुरु, हेर! ई से अंजीरे बुटा जेस तुसी शराप दुतो थिआ, शुख गो असा।”

²² यीशु तेन्हि जे जवाब दुतु, “परमेश्वर पुठ विश्वास रखे।

²³ अउं तुसी जे बोता कि जे कोउं इस फाट जे बोलाल, ‘तु उखिड़ गा, त तथ अन्तर झड़’, होर अपु मन अन्तर धिक बि शक न कता, पर पूरा विश्वास कता कि तेन जे बोलो असु, से जरूर भुन्तु, तेस जे तिहांणि भुन्तु।

²⁴ तोउं त, अउं तुसी जे बोता कि जे कुछ तुस प्रार्थना कर कइ परमेश्वर केआं मगते, होर तस मेणे पक्का विश्वास कते त तुसी से मेई घेन्तु।

²⁵ त जपल कदी तुस प्रार्थना दुआ कते, होर अगर तुं मन अन्तर केसे जे बदला नेणे भावना असी त तेन्हि माफ करे ताकि तुं स्वर्गे बोउ बि तुं पाप माफ करियाल।

²⁶ अगर तुस तेन्हि माफ न करियेल त तुं स्वर्गे बोउ बि तुं पाप माफ न कता।”

यीशु हक पुठ सवाल

²⁷ पता फि यीशु त तसे चेले यरुशलेम शेहर आए। जपल यीशु देहेर अन्तर हंटण लगो थिआ त मुख्य पुजारे, धर्मशास्त्री त टजे स्याणे तसे भेएड़ एई कइ पुछुण लगे,

²⁸ “तु ई सोब कम केस हक जोई कता? त ई सोब कम करण जे ए हक तेन्धे केन दुतो असा?”

²⁹ यीशु तेन्हि जे बोलु, “अउं बि तुसी केआं यक सवाल पुछता; मोउं जे जवाब दिए। तोउं अउं बि बतान्ता कि ई सोब कम केस हक जोई कता।

³⁰ यूहन्ने मेह्‍णु चुसुणे हक स्वर्गे कनारा थिआ या मेह्‍णु के कनारा थिआ?”

³¹ तपल से अपफ बुच बोक विचार करण लगे कि “अगर अस बोलियेल कि ‘स्वर्गे कनारा’, तोउं से बोता ‘त फिर तुसी तेसे बोकी पुठ विश्वास किस न किआ?’

³² होर अगर अस बोलियेल, ‘मेह्‍णु के कनारा’, त ए हुसुड़ा असी मुकाई छता।” से तेन्हि मेह्‍णु हेर डरो थिए किस कि सोब मानतेथ कि यूहन्ना यक सच्चा भविष्य वक्ता थिआ।

³³ त तेन्हि यीशु जे जवाब दिता, “असी नेईं पता”। त यीशु तेन्हि जे बोलु, “अउं बि तुसी जे न बोता कि ई सोब कम अउं केस हक जोई कता।”