मरकुस 10 - Walangi

छुटिबा भुणे बारे यीशु शिक्षा

¹ फिर यीशु कफरनहुम शेहर केआं घेई कइ यहूदिया राज्य अन्तर त यरदन दरेउ पार आ। त तसे भेएड़ दुबारी हुसुड़ा किठा भोई गा, त से रोजेरीं ईं तेन्हि शिक्षा देण लगा।

² तपल फरीसी तसे भेएड़ एई कइ तस फसाण जे तेस केआं पुछु, “गुरुजी! हें नियमे हेसाब जुए मड़द अपु जुएली छुटिबा करण की ठीक असु ना?”

³ तेन तेन्हि जे जवाब दिता, “मूसे तुन्धे की निआंग दुतो असी?”

⁴ तेन्हि बोलु, “मूसे लिख तुखि कइ जुएली छड़ देणे इजाजत दुतो असी।”

⁵ यीशु तेन्हि जे बोलु, “तुं नकठर मने बझई जुए ईं तेन तुसी जे ईं निआंग लिखि।

⁶ पर सृष्टि शुरुवात अन्तर जपल परमेश्वर से बड़ाए, तेन मड़द त जिल्हाणु कर कइ बणाए।

⁷ ‘इस बझई जोई मड़द अपु ईया बोउ केआं बखी कइ अपु जुएली जोई बिश्ता

⁸ त से दुहे मी कइ यक जिसम बणते’ तोउं त से अब दुई नेईं बल्कि यक जिसम बण गो असे।

⁹ तोउं त जे परमेश्वरे जोड़ो असे, तेस मेह्‍णु बखरे न करे”।

¹⁰ पता जपल से गी एई गे त चेली दुबारी छुटिबा करणे बारे तेस केआं पुछु।

¹¹ तेन तेन्हि जे बोलु, “जे कोउं अपु जुएली छड़ दी कइ होरी जोई ब्याह कता त से अपु पेहलकण जुएली खिलाफ नाजायज रिश्ता रखता।

¹² त अगर जुएली अपु धाणि छड़ दी कइ होरी जोई ब्याह कती त से बि नाजायज रिश्ता रखती।”

गभुर ईं भुण

¹³ तोउं मेह्‍णु अपु गभुर यीशु केईं अण्हण लगे कि से तेन्हि पुठ हथ रख कइ अशुश दिए, पर चेले तेन्हि जे लेहरिए।

¹⁴ यीशु ईं हेर कइ तेन्हि जोई नराज भोई गा त बोलु, “गभुर मोउं केईं एण दिए त अन्हि रोके नउ, किस कि परमेश्वरे राज्य इन्हि गभुर के ईं मेह्‍णु के भो।

¹⁵ अउं तुसी जे बोता कि जे कोउं परमेश्वरे राज्य गभुर ईं ना अपणाल, त से तेस अन्तर कदी घेई ना सकते।”

¹⁶ तोउं तेन से कल्हाई किए, त तेन्हि पुठ हथ रख कइ अशुश दिती।

अमीर मेह्‍णु त अमर जीवन

¹⁷ पता, जपल से तठिआ निस कइ घेण लगा, त यक मेह्‍णु दौड़ता तेस केईं आ, तसे अगर उटेऊ बिश कइ पुछु, “ए खरा गुरु! मोउं अमर जीवन मेण जे की करुण?”

¹⁸ यीशु तेस जे बोलु, “तु मोउं जे ‘खरा’ किस बोता? परमेश्वर छड़ दी कइ कोई खरा नेईं।

¹⁹ तु नियम त जाणता : ‘कोउं मारण नउ, नाजायज रिश्ता न रखण, चोरुण नउ, झुठी उगाही न देण, कोउं ठगण नउ, अपु ईये बोउए इज्जत करीण।’”

²⁰ तेन तेस जे बोलु, “ए गुरु! इन्हि सोबी त अउं मठड़ियार केआं मानता।”

²¹ इस बोकी पुठ यीशु से ट्यारा लगा त तसे धे हेर कइ बोलु, “तोउ अन्तर यक बोकी कमी असी। गा, जे किछ तोउ केईं असु तेस बेच कइ गरीब कें धे बांट छड़, त में पता आई, तोउं तोउ स्वर्ग अन्तर धन मेता”।

²² इ शुण कइ तसे चेहरा उदास भोई गा, त से दुखी भोई कइ घेई गा, किस कि से सुआ अमीर थिआ।

²³ यीशु चोहरो कना हेर कइ अपु चेली जे बोलु, “अमीरी के परमेश्वरे राज्य अन्तर घेण सुआ औखु असु!”

²⁴ चेले तसे बोकी बेलि हैरान भोई गे। त यीशु तेन्हि जे बोलु, “ए गभुरुओ! बचुण जे जे धन पुठ भरोसा कते, तेन्हि परमेश्वरे राज्य अन्तर घेण जे औखु असु!

²⁵ सच्चाई त ई असी कि अमीर मेह्‍णु के परमेश्वरे राज्य अन्तर घेण ईं औखु असु, जीं ऊंटे स्नाणि छिने बइ निशरुण।”

²⁶ से सुआ हैरान भोई कइ अपफ बुच बोलुण लगे, “त फि कोउं बच सकता?”

²⁷ यीशु तेन्के धे हेर कइ बोलु, “मेह्‍णु केईआं त ईं न भोई सकतु, पर परमेश्वर केईआं भोई सकतु; किस कि परमेश्वर केईआं सोब कुछ भोई सकतु”।

²⁸ त पतरस तेस जे बोलुण लगा, “हेर, अस त सोब किछ छड़ दी कइ तें पतोती ओ असे।”

²⁹ यीशु बोलु, “अउं तुसी जे बोता कि जेन बि में त खुश खबरी लिए अपु घरबार, भाई भेण, ई बोउ, गभुरु-छिएड़ु, बग-बघुई, छड़ दुतो असे,

³⁰ तस मेह्‍णु भुंजान्ते, फि बि इस टेम तस सद सौ गुणा घरबार, भाई भेण, ई बोउ, गभुरु-छिएड़ु, बग-बघुईएं ना मेती, बल्कि तस त एण बाड़े रोज अन्तर अमर जीवन बि मेता।

³¹ पर सुआ जेईं जे अगर असे, से पतूं भोई घेन्ते; त जे पतूं असे, से अगर भोई घेन्ते।”

अपु मरणे बारे यीशु टेकी भविष्य वाणि

³² यीशु त तसे चेले यरुशलेम शेहर जे घेन्त पेंत बथ थिए। त यीशु तेन्के अगर अगर हंटो थिआ : पर चेले हैरान थिए कि से यरुशलेम जे घेण लगो असा। त जे हुसुड़ा तसे पता थिआ से बि डरो थिए। तपल यीशु फिर से बाराह चेले बखरे नी कइ तेस जुए जे भुणे बाड़ु थिउ, तेस बारे बोक करण लगा।

³³ तेन बोलु, “हेरे, अस यरुशलेम शेहर जे घेण लगो असे, त तठि मुख्य पुजारी त धर्मशास्त्री मनखे कुआ मतलब मोउं टान्ते त मरणे दोषी कर कइ गैर यहूदी के हतेउ दी छते।

³⁴ से सोब में मखोल बणान्ते, मोउं पुठ थूकते, त चाबुके बइ मडी मडी कइ घायल कते, तोउं मार छते। पर टेके रोज बाद अउं दुबारी जी घेन्ता”।

याकूब त यूहन्ना

³⁵ तोउं जबदी कुआ याकूब त यूहन्ना तसे भेएड़ एई कइ बोलु, “ए गुरु, अस चहन्ते कि जे कुछ अस तुसी केआं मगुं, तुस असी जे करे”।

³⁶ तेन तेन्हि जे बोलु, “तुस की चहन्ते कि अउं तुं लिए करुं?”

³⁷ तेन्हि तेस जे बोलु, “अस चहन्ते कि तुं राज्य अन्तर तुं राजगद्दी जोई असी बि साते बिशुण दिए: यक जेईं देहणा कना त यक जेईं बउंआ कना।”

³⁸ यीशु तेन्हि जे बोलु, “तुस न जाणते कि तुस की मगण लगो असे? जे दुख अउं सेहणे बाड़ा असा, तुस कि सेह सकते ना; होर जीं अउं मरणे बाड़ा असा तुस कि तीं मर सकते ना?”

³⁹ तेन्हि तेस जे बोलु, “अस कइ सकते।” त यीशु तेन्हि जे बोलु, “जे दुख अउं सेहणे बाड़ा असा, तुस जरूर सेहन्ते; होर जीं अउं मरणे बाड़ा असा, तुस बि तिहांणि मरते।

⁴⁰ पर केस बि अपु देहणा त बउंआ कना बिशाणण हक मोउं केईं नेईं। ए जगाह तेन्के लिए असी जे परमेश्वरे पेहलाई चुणो असे।”

⁴¹ याकूब त यूहन्ने बोके शुण कइ होरे दस चेले तेन्हि जोई नराज भोई गे।

⁴² त यीशु से अपु भेएड़ भिए त तेन्हि जे बोलु, “तुस त जाणते कि जे मेह्‍णु पुठ राज कते, से तेन्हि पुठ जुलुम कते; त से तेन्हि पुठ अपु हक जतान्ते।

⁴³ पर तुसी बुछ तीं न भुओ लौतु, किस कि तुसी अन्तर अगर कोउं बोडा भुण चहन्ता से तुं सेवक बणे;

⁴⁴ होर जे कोउं तुं मुखिया बणुण चहन्ता, से सोबी के नौखर बणे।

⁴⁵ किस कि अउं मनखे कुआ तोउं नेईं अओ कि में सेवा करेउं। अउं तोउं अओ असा कि होरी के सेवा करुं, त सोबी मेह्‍णु पापे सज्जाई केआं बचाणे लिए अपु प्राण दिउं।”

अन्हा बरतिमाई सारा करण

⁴⁶ पता, यीशु त तसे चेले यरीहो शेहर पुजे। जपल यीशु त तसे पता पता चेले होर मेह्‍णु के बोडा हुसुड़ा यरीहो शेहर केआं घेण लगे, तपल बरतिमाई नओएं यक अन्हा भिकारी, जे तिमाई कुआ थिआ, बते औत बिशो थिआ।

⁴⁷ से ईं शुण कइ कि नासरत ग्रांए यीशु घेण लगो असा, से हक दी दी कइ बोलुण लगा, “ए दाऊदे कोईया यीशु! मोउं पुठ दाह कर!”

⁴⁸ सुआ मेह्‍णु तेस डराई कइ चुप बिशाणणे कोशिश की, पर से जोरी जोरी हक देण लगा, “ए दाऊदे कोईया, मोउं पुठ दाह कर!”

⁴⁹ त यीशु रुक कइ बोलु, “अस इए भिए।” तोउं मेह्‍णु से अन्हा मेह्‍णु भिआ त तेस जे बोलु, “खड़ भो, हिम्मत कर! ए तोउ भिआण लगो असा।”

⁵⁰ त जे टलिड़ तेन फुलोउ थी तस फटाई कइ तिखेईं से खड़ी गा, त यीशु भेएड़ आ।

⁵¹ त यीशु तेस जे बोलु, “तु मोउं केआं की चहन्ता?” अन्हे तेस जे बोलु, “ए गुरु, अउं हेरुण चहन्ता।”

⁵² यीशु तेस जे बोलु, “गा, तेईं मोउं पुठ विश्वास किआ, तोउं त तु ठीक भुआ।” से तिखेईंए हेरण लग गा, त तसे पता पता घेण लगा।