मत्ती 7 - Walangi

होरी पुठ दोष लाणे बारे शिक्षा

¹ “केसेरी पंची ना करे त तुं बि पंची ना भुन्ति।

² किस कि जीं तुस होरी पुठ दोष लान्ते, तिहांणि तुसी पुठ बि दोष लगता। होर जेन नापे बइ तुस होरी जे नापते, तेस नापे बइ तुसी जे बि नापिंन्‍तु।

³ तुस किस अपु भाई टीरी अन्तर टख हेरते? तुसी अपु टीरी अन्तरी डड न केता ना?

⁴ तुं अपु टीर अन्तर त डड असा, त फि तुस कीं अपु भाई जे बोते कि मोउं तुं टीरे टख किढ़ण दिए।

⁵ ओई कपटियो! पेहले त तुस अपु टीरे डड भीं किढ़े। तोउं तुसी सुसुर केतु त तुस अपु भाई टीरे टख किढ़ बटते।

⁶ शुची चीज कुतरेउ कें धे दी कइ बेकार ना मुकाए। अपु मोती सूरी के अगर न फटाए। ईं न भो कि से तेन्हि अपु खुर पड्डे ढच छड़े त तुसी बि चीर छड़ियेल।”

विश्वास जोई प्रार्थना करणे बारे शिक्षा

⁷ “मगियाल त तुन्धे दी छते। तोपियाल त तुसी मेई घेन्तु। दुआर घमकान्ता त तुसी जे खोल छते।

⁸ किस कि जे बि मगता, तसे धे दीइन्तु; जे बि तोपता तसे मेई घेन्तु; त जे बि घमकान्ता, तस जे दुआ उघिड़ घेन्तु।

⁹ ईं कोई बि मेह्‍णु नेईं जेसे गभुर तस केआं रौठि मगियेल त से तेन्के धे घोड़ दियाल।

¹⁰ या मछली मगियेल त तेन्के धे कीड़ा देन्ता।

¹¹ तोउं, तुस बुरे भोई कइ बि अगर अपु गभुर कें धे अब्बल अब्बल चीज देण जाणते त तुं स्वर्गे बोउ अपु मगणे बाड़ी कें धे केहि गुणा अब्बल अब्बल चीज किस न देन्ता?

¹² तोउं त जे कुछ तुस चहन्ते कि होरे मेह्‍णु तुसी जोई करे, तुसी बि तेन्हि जोई तिहांणि करुण, किस कि नियम त भविष्य वक्ती के मूल शिक्षा एईएं असी।”

संकड़े त खुले दुआर

¹³ संकड़े दुआरे बइ परमेश्वरे राज्य अन्तर घेणे कोशिश करे। किस कि जे खुले दुआर असा त जे बथ सुख्ती असी, से नर्क जे घेन्ति। सुआ जेईं तेस बथ पुठ हंटते।

¹⁴ पर जे दुआर त बथ अमर जीवन जे पुजान्ती, से सुआ संकड़ी त सुआ ओखी असी। थोड़े जेईं ईं असे जे एस बथ हंटते।

जीं बुटा, तीं फल

¹⁵ झूठे भविष्य वक्ती केआं दूर बिशे। से भोले-भाले ढडुड़ के वेश अन्तर तुं भेएड़ एन्ते, पर सच्चे बि से चीरणे बाड़े शेंखु भुन्ते।

¹⁶ तेन्के कम हेर कइ तुस तेन्हि पिछाण बटते। मेह्‍णु कि शाघिल बखुर केआं दछि त कंटि केआं अंजीर फल उह्‍णते ना?

¹⁷ तिहांणि हर यक खरा बुटा खरे फल देन्ता त बुरा बुटा बुरे फल देन्ता।

¹⁸ खरा बुटा कदी बुरे फल न दी बटता, होर न बुरा बुटा खरा फल दी बटता।

¹⁹ जे जे बुटे खरे फल न देन्ते, तेन्हि काट कइ आग छइ छते।

²⁰ त तुस तेन्के फली केआं तेन्हि पिछाण छते।

²¹ जे मोउं जे “ए प्रभु, ए प्रभु!” कते तेन्हि अन्तरा हर कोई स्वर्गे राज्य अन्तर न एई बटते। पर सेईंए एई बटते जे में स्वर्गे बोउए इच्छाई पुठ चलते।

²² तेस न्याय करणे रोज सुआ जेईं मोउं जे बोते, “ए प्रभु, ए प्रभु! असी कि तुं नओएं बइ भविष्य वाणि न की ना। तुं नओएं बइ कि असी दुष्ट आत्मा बाहर न नशेणि ना। होर तुं नओएं बइ कि असी बोडे बोडे चमत्कारे कम न किए ना?”

²³ तपल अउं तेन्हि जे खुल कइ बोता, “अउं तुसी बिलकुल ना जाणता। ओए दुष्ट मेह्‍णुओ! में भेएड़ा नश घिए।”

अक्लदार त मुर्ख मिस्त्री

²⁴ “तोउं त अउं तुसी सोबी जे बोता, जे कोउं में बोक मान कइ जीन्ता, से तेस अक्लदार मेह्‍णु ईं भुन्ता, जेन अपु गी फाट पुठ सुसुर खाई दी कइ बड़ाउ।

²⁵ पता मेघे लगी, हड़ आउ, डू ब्यार बि तेस गी लगी। पर से न ढेईउ, किस कि तसे खाई फाट पुठ बणो थी।

²⁶ पर जे कोउं में बोक शुणता, पर तेन्हि पुठ न हंटता, से तेस मुर्ख मेह्‍णु ईं असा, जेन अपु गी रेत पुठ बणो असु।

²⁷ तोउं मेघे लगी, हड़ आउ, डू ब्यार बि तेस गी लगी। होर से गी ढेई गोउ।”

²⁸ जपल यीशु ई सोब शिक्षा दी गा त तस शुण कइ हुसुड़ा हैरान भोई गा।

²⁹ किस कि से तेन्हि जे धर्मशास्त्री के ईं ना, बल्कि अधिकारी के ईं पूरे हक जोई शिक्षा देण लगो थिआ।