मत्ती 6 - Walangi

दान देणे बारे शिक्षा

¹ “अपफ हेरी बिशे! तुस मेह्‍णु हरालण जे धरमे कम न करे। न त तुसी अपु स्वर्गे बोउ केआं कोई फल न मेता।

² तोउं त, जपल बि तुस केस गरीब कें धे दान दियेल त सोबी जे प्रचार न करे, जीं कपटी मेह्‍णु अराधनालय, ग्राओंट अन्तर त दुआरोड़ी कते, ताकि मेह्‍णु तेन्के इज्जत करियेल। अउं तुसी जे बोता कि तढ़ि फल तेन्हि मेई बि गो असा।

³ पर जपल तुस दान करियेल त तुं यक हथे देण, होरे हथ पता न लौता लगो,

⁴ ताकि तुं दान नियको रेहाल। तोउं तुं स्वर्गे बोउ, जे नियोक कइ सोब किछ हेरता, से तेन्धे तसे फल देन्ता।”

प्रार्थना दुआ करणे बारे शिक्षा

⁵ “जपल तुस प्रार्थना करियेल त कपटी के ईं न करे, किस कि से मेह्‍णु हरालण जे अराधनालय त बथ खड़ भोई प्रार्थना करण चहन्ते। अउं बोता कि तेन्हि तसे फल मेई बि गो असा।

⁶ पर जपल तुस प्रार्थना करियेल त अपु अन्तर घिए, त दुआर बन्न कर कइ अपु बोउ जे प्रार्थना करे। तोउं, तुं बोउ, जे नियोक कइ सोब किछ हेरता तसे फल तुं धे देन्ता।

⁷ प्रार्थना करणे टेम होरी के ईं बक बक न करण, किस कि से समझते कि सुआ बोलुणे बेलि तेन्के प्रार्थना शुणिन्ति।

⁸ तोउं त तुस तेन्के ईं ना बणे, किस कि तुं बोउ मगण केआं पेहलाई जाणता कि तुसी केस केस चीजी जरूरत असी।”

प्रभु शिचालो प्रार्थना

⁹ तोउं त, तुस ईं प्रार्थना करे। “ए में बोउआ, तु जे स्वर्ग अन्तर असा; सम्हाई तें नओं शुचु जाण कइ इज्जत करे।

¹⁰ धरती पुठ तें राज्य एईए, तें इच्छा जीं स्वर्ग अन्तर पूरी भुन्ति, तिहांणि धरती पुठ बि भुओ लौती।

¹¹ हें दन भइ रौठि आज हेन्धे दे।

¹² जीं अस अपु कसुरवार माफ कते, तिहांणि तुस बि हें पाप माफ करे।

¹³ होर असी परीक्षा अन्तर ना छड़े, होर पाप करण केआं त तेस दुष्ट केआं बचाई रखे। [किस कि राज करणे हक, सम्हाई शक्ति त महिमा हमेशा तेन्धेरी असी। आमीन]”

¹⁴ “अगर तुस मेह्‍णु के गलती माफ करियेल त तुं स्वर्गे बोउ बि तुसी माफ कता।

¹⁵ अगर तुस मेह्‍णु के गलती माफ न करियेल त तुं स्वर्गे बोउ बि तुसी माफ न कता।”

ब्रत रखणे बारे शिक्षा

¹⁶ यीशु हउ बोलु, “जपल तुस ब्रत रखियेल त होरे कपटी के ईं मुंह बणाई कइ न रखुंण, किस कि से मेह्‍णु मुंह बणाई रखते ताकि सोबी पता लगियेल कि एन ब्रत रखो असा। अउं तुसी जे बोता कि तेन्हि तसे फल मेई गो असा।

¹⁷ पर जपल तुस ब्रत रखियेल त सन्हुण शदाण करे त मगिर जोई तेल लाए,

¹⁸ ताकि मेह्‍णु ना, बल्कि तुं स्वर्गे बोउ, जे सोब किछ नियोख कइ हेरता, जाणियेल कि तुसी ब्रत रखो असा त से तुं धे तसे फल देन्ता।”

स्वर्गे धने बारे यीशु शिक्षा

¹⁹ त यीशु फि बोलुण लगा, “अपु लिए धरती पुठ धन कठा न करे, किस कि इठि कुण लगते, शड़ुआ लगता त चोरी के चोरणे डर रेहन्ता।

²⁰ पर अपु लिए स्वर्ग अन्तर धन कठा करे, जेठि न त कुण लगते, न शड़ुआ लगता, होर न चोरी के चोरणे डर रेहन्ता।

²¹ किस कि जेठि तें धन असा, तठि तें मन बि लग घेन्ता।”

तुं अन्तर परमेश्वरे टगड़ियार

²² तोउं यीशु बोलु, “जिसमे दीया टीर भो। तोउं त, अगर तें नजर ठीक असी त तें पूरा जिसम बि टगड़ा भुन्ता।

²³ अगर तें नजर बुरी असी त तें पूरा जिसम बि अन्हारा भुन्ता। तोउं त, जे टगड़ियार तोउ अन्तर असी, अगर से अन्हारी भोई घियेल त सच्चे से सुआ अन्हारु भुन्तु।”

परमेश्वर त धन

²⁴ “कोई बि मेह्‍णु दुई मालिकी के सेवा न कइ सकता, किस कि से यक जेईं नराज त होर जेईं खुश कता। तिहांणि तुस परमेश्वरे त धने दुहि के सेवा न कइ सकते।

²⁵ त अउं तुसी जे बोता कि अपु प्राणी चिन्ता न करे कि असी की खाण, की पीण, होर असी की डबुण। बोले त धिक रौठि केईआं कि प्राण, होर झिणि केईआं कि जिसम बध कइ नेईं ना?

²⁶ हेरे, चड़ी चखुरु हेरे! से न त बांते, होर न लुणते, होर न से केंचार अन्तर किठेरते। तोउं बि तुं स्वर्गे बोउ तेन्हि रज्जि खिलान्ता। त कि तुस तेन्हि केआं बि बध नेईं ना?”

²⁷ “तुसी अन्तर कि कोउं ईं असा ना जे चिन्ता कर कइ यक पल बि अपु उमर बधाई सकता?

²⁸ अपु झिणि लिए किस चिन्ता कते? धारे फियुड़ हेरे कि से कीं बोडीन्‍ते; से न मेहनत कते, होर न कातते।

²⁹ अउं त बोता कि तोउं बि राजा सुलैमाने अपु सम्हाई अमीरी जुए बि एन्हि धारे फियुड़ के ईं अब्बल झिणे लाई ना बटे।

³⁰ तोउं त, परमेश्वर घास जे, जे आज असु त शुई फुकी घेन्तु अगर अतु अब्बल सजान्‍ता त ए कमजोर विश्वासी! से तुसी तढ़िया बध कइ न डबान्‍ता ना?

³¹ तोउं त तुस ईं चिन्ता न करे कि असी की खाण, की पीण या की लाण?

³² किस कि अविश्वासी मेह्‍णु ईं अस चीजी तलाश अन्तर रेहन्ते। पर तुं स्वर्गे बोउ जाणता कि तुसी इन्हि सोब चीजी के जरूरत असी।

³³ तोउं त, तुस पेहले परमेश्वरे राज्य त तसे इच्छा तोपीण दिए। तोउं ए सोब चीज बि तुसी मेई घेन्ति।

³⁴ त तुस शुकुण चिन्ता न करे; किस कि शुकणे रोज अपु चिन्ता अपफ कता। आजे लिए आजकणे चिन्ता रज्जि असी।”