मत्ती 4 - Walangi

शैतान यीशु परीक्षा नेण

¹ तोउं परमेश्वरे आत्मा यीशु अरुणि धार घिन गई, ताकि शैतान तस लचेरयाल।

² तेन चढ़ी रोज तकर दन रात ना कुछ खउ, होर ना पिउ। त पता तस ढुक लगी।

³ त लचेरणे बाड़ा यीशु भेएड़ आ त तेस जे बोलुण लगा, “अगर तु परमेश्वरे कुआ भो त बोल कि ई घोड़ रौठि बण घिए।”

⁴ यीशु जवाब दिता, “धरमे कताब अन्तर लिखो असु: ‘मेह्‍णु सद रौठि बइ ना, बल्कि परमेश्वरे हर यक बोके बइ जीन्ता रेहन्ता, जे तसे मुंह केआं निस्ती।’”

⁵ तोउं शैतान तस शुचा शेहर यरुशलेम घिन गा त देहरे पुठे कुणे पुठ खड़ियेर छड़ा।

⁶ त तेस जे बोलुण लगा, “अगर तु परमेश्वरे कुआ भो त अपफ इठिआ उणिहां टऊ दी छड़; किस कि धरमे कताब अन्तर लिखो असु: ‘से तोउ केईं जे अपु स्वर्गेदूत लंघान्ता। त से तोउ अपु कल्हाई कइ छते ताकि घोड़े बइ तें खुर ना लगियेल।’”

⁷ यीशु तेस जे जवाब अन्तर बोलु, “तठि ईं बि लिखो असु कि ‘तु अपु प्रभु परमेश्वर न परख।’”

⁸ त अखिर अन्तर शैतान तेस यक बोडे फाट पुठ घिन गा त पूरे मतोके राज्य त तेन्के धन दौलत हराल कइ तेस जे बोलुण लगा,

⁹ “अगर तु उटेऊ में खुर बिन कइ में पूजा कराल त इ सोब अउं तेन्धे दी छता।”

¹⁰ यीशु तस जे बोलु, “ए शैताना, इठिआ नश! किस कि धरमे कताब अन्तर लिखो असु: ‘तु सद प्रभु अपु परमेश्वरे सेवा कर त हमेशा तसेरी पूजा कर।’”

¹¹ तोउं शैतान तठिआ नश गा, त स्वर्गेदूत एई कइ यीशु सेवा करण लग गे।

यीशु सेवा करीण शुरु की

¹² जपल यीशु ईं शुणु कि राजा हेरोदेसे यूहन्ना कैद कइ छड़ा, त से गलील राज्य जे वापिस घेई गा।

¹³ त से नासरत ग्रां छड़ दी कइ तथे कना जबूलून त नपताली इलाके कफरनहुम शेहर अन्तर बिशुण लगा।

¹⁴ तोउं यशायाह भविष्य वक्ते बेलि परमेश्वर जे बोलो थिउ से पूरु भु।

^15-16 तेन बोलो थिउ: “यरदन दरेउ पार, जेन बइ गलील तथ जे बथ असी, जेस जे ‘गैर यहूदी के गलील’ बोते, तेस जबूलून त नपताली इलाके अन्तर जे मेह्‍णु अन्हारे अन्तर थिए, तेन्हि यक टगड़ियार काई, त जे मरणे उडार अन्तर थिए तेन्हि पुठ यक दीया चमका।”

¹⁷ तेस टेम केआं खड़ यीशु ई बोल कइ प्रचार करण लगा “अपु अपु मन बदलीण दिए, किस कि स्वर्गे राज्य नीड़ा एई गो असा।”

यीशु मसीहे कम त तसे संदेश ( मत्ती 4:18—16:20 ) यीशु पेहला चेला भिआण

¹⁸ पता यक रोज, गलीले तथे औत हंटते हंटते यीशु दुई भाई काए: शमौन त तसे भाई अन्द्रियास। शमौन नओं पता तेन “पतरस” रखु। से दुहे तथ अन्तर जाल छड़ण लगो थिए, किस कि से मछवारे थिए।

¹⁹ यीशु तेन्हि जे बोलु, “में पता एईए, तोउं अउं तुसी शिचालता की मेह्‍णु में चेला कीं बणाण।”

²⁰ त से तिखेईंए जाल छड़ दी कइ तसे पता घेई गे।

²¹ तठिआ धिक अगर घेई कइ यीशु दुई होरे भाई काए। से जबदी कुआ याकूब त यूहन्ना थिए। से अपु बोउ जोई नाव पुठ बिश कइ जाल जुढ़ेरण लगो थिए। त तेन से बि भिए।

²² त से दुहे जेईं अपु बोउ त नाव छड़ दी कइ तसे पता घेई गे।

यीशु बीमार मेह्‍णु ठीक करण

²³ तोउं यीशु पूरे गलील राज्ये अराधनालय अन्तर शिचालता त खुश खबरी प्रचार कता हंटते रिहा, त हर किस्मी बीमारी त कमजोरी केआं मेह्‍णु बि ठीक कता रिहा।

²⁴ तोउं पूरे सीरिया देश अन्तर बि तसे चर्चा भुण लगी। त मेह्‍णु तेस केईं सुआ बीमार मेह्‍णु अण्हण लगे, जेन्हि अन्तर सुआ किस्मे बीमारी थी त जेन्हि अन्तर दुष्ट आत्मा भुन्तीथ, होर जेन्हि मिर्गी त अदरंगे बीमारी थी। त तेन सोब सुसुरेरि छड़े।

²⁵ तोउं त, गलील राज्य त दिकापुलिसे इलाका, यरुशलेम शेहर, यहूदिया राज्य त यरदन दरेउ ओवर-पार केआं सुआ हुसुड़ा यीशु पता पता घेण लगा।