मत्ती 3 - Walangi

चुसुणे बाड़ा यूहन्ना अपु कम शुरु करण

¹ तेन्हि दिनि चुसुणे बाड़ा यूहन्ना यहूदिया राज्ये अरुणि धार अन्तर एई कइ प्रचार करण लगा,

² “शुणे, शुणे! तुस अपु अपु मन बदलीण दिए, किस कि स्वर्गे राज्य नीड़ा एई गो असा।”

³ ए सेईंए भो जेसे बारे यशायाह भविष्य वक्ते पेहलाई बोलो थिउ “अरुणि धार अन्तर कोई हक देण लगो असा, कि प्रभु जे बथ बणाण दिए त तसे बथ सुसुर कइ बड़ाए।”

⁴ यूहन्ना ऊंटी के ऊनि के बड़ाउओ झिणे डबताथ, त छोड़ी मझीन पिड़ताथ। से टठ त जंगले मखीर खांताथ।

⁵ तोउं यरुशलेम शेहर, यहूदिया राज्य त यरदन दरेउए औत-कोती बइ सोब जगाई मेह्‍णु तसे भेएड़ एई गे।

⁶ तेन्हि सोबी अपु अपु पाप मने त यूहन्ने से यरदन दरेउ अन्तर चुसे।

⁷ जिखेईं तेन सुआ फरीसी त सदूकी चुसीण जे एन्ते काए त तेन्हि जे बोलु, “ए जहरिले कीड़ी के गभुरुओ! तुस बि इरुह किस परमेश्वरे एणे बाड़ी लेहेर केईआं बचणे कोशिश करण लगो असे?

⁸ घेई कइ ईं कम करे जेसे बेलि पता लगाल कि तुसी सच्चे बि अपु मन बदलो असे।

⁹ तुस अपु अपु मन अन्तर ईं न सोचे कि ‘हें बोउ अब्राहम भो’ त असी मन बदलुणे कोई जरूरत नेईं; किस कि अउं तुसी जे बोता कि परमेश्वर अब्राहम जे घोड़ी अन्तरा बि गभुर किढ़ बटता।

¹⁰ हेरे! अभेईं बि झेउठ बुटे जील रख छो असा, ताकि जे बि बुटा खरा फल न देन्ता तेस काट कइ आग अन्तर छइ छते।”

¹¹ “शुणे, किस कि तुसी अपु मन बदलो असे त अउं तुसी पाणि अन्तर चुसुण लगो असा। पर जे मोउं केआं पता एन्ता, से मोउं केआं बि ताकतवर असा। अउं त तसे प्युले टाणे लेएक बि नेईं। से तुसी शुची आत्मा त आगी अन्तर चुसता।

¹² तसे फटण तसे हतेउ असु। से अपु खला सुसुर साफ कता, त अपु अनाज केंचार अन्तर कठेरता। पर जे कऊ असा तेस आग अन्तर छता, जे कदी न हुशती।”

यूहन्ने यीशु चुसुण

¹³ तेस टेम यीशु गलील राज्य केआं यरदन दरेउ बन्ने आ, ताकि यूहन्ना तस पाणि अन्तर चुसे।

¹⁴ पर यूहन्ना तेस जे बोलुण लगा कि “मोउं तुसी केईं चुसीण जे एण चहिए। पर तुस मोउं केईं कीं ओ असे?”

¹⁵ यीशु तेस जे जवाब दिता, “अब त इहांणि भुण दे, किस कि असी इहांणि रीति रिवाज जोई धरम पूरा करण ठीक असा।”

¹⁶ तोउं यीशु चुसी कइ झट पोण अन्तरा बाहर एई गा। त तसे पुठे अम्बर पूरा खुल गा। तोउं तेन परमेश्वरे आत्मा अलणी वेश अन्तर अपु पुठे एन्ते काई।

¹⁷ तोउं अम्बर केआं ईं अवाज भुई कि “ए में ट्यारा कुआ भो, जेस हेर अउं सुआ खुश असा।”