मत्ती 28 - Walangi

यीशु दुबारी जीण

¹ भक्ति करणे रोज केआं पता, हफ्ते पेहलकण रोज पथवारी ईं मगदला ग्रांए मरियम त दोकी मरियम यीशु लाश रखो कुड हेरण जे पुजी।

² त अजगता यक बोडा भुंजल गा, स्वर्ग केआं प्रभु यक दूत आ, कुडे मुंहे पठ उघाड़ कइ तेस पुठ बिश गा।

³ तसे रूप बिजली ईं चमकताथ त झिणे डंगे ईं हच्छे थिए।

⁴ तेस हेर डर कइ पेहरेदार मरो मुड़दे ईं भोई गे।

⁵ पर स्वर्गेदूते तेन्हि जिल्हाणु जे बोलु, “डरे नउ! मोउं पता असा कि तुस यीशु तोपुण लगो असी, जे क्रूस पुठ मरो थिआ।

⁶ से इठि नेईं, पर अपु वचने हिसाब जोई दुबारी जी गो असा। एईए, हेरिण दिए, जेठि प्रभु रखो थिआ।

⁷ तोउं झठ घेई कइ यीशु चेली जे बोले कि से मरण केआं दुबारी जी गो असा त तुसी केआं पेहलाई गलील राज्य जे घेण लगो असा। तठि तुसी से केता। हेरे! मेईं तुसी जे बोल छउ।”

⁸ से डरो बि थी त खुश बि। तोउं कुड केआं दौड़ कइ तसे चेली समाचार देण जे गई।

⁹ त अचानक यीशु तेन्हि मेईंया त बोलु, “होर ठीक असी ना, तुस”? तेन्हि भेएड़ एई कइ उटेऊ तसे खुर बिने त गुणगान किआ।

¹⁰ तोउं यीशु तेन्हि जे बोलु, “डरे नोउ! घेई कइ में भाई जे बोले कि तुस गलील राज्य जे एई घिए। तठि अउं तुसी जोई मीता।”

पेहरेदारी के झुठी खबर

¹¹ से घेण लगो थी कि पेहरेदारी अन्तरा केनि शेहर घेई कइ मुख्य पुजारी पूरा हाल शुणाई छड़ा।

¹² तोउं तेन्हि पुजारी त टजे स्याणे ब्योरा कर कइ तेन्हि सपाही कें धे सुआ रुपेई दिते त बोलु,

¹³ “तुसी ईं बोलुण कि ‘रात जपल अस उंघो थिए, तसे चेली एई कइ तसे लाश चोरी कइ नी छड़ी।’

¹⁴ अगर ए बोक राज्यपाल पिलातुस केईं पुजियेल, त अस तेस समझान्‍ते त तुसी बचाई छते।”

¹⁵ तोउं तेन्हि रुपेई नीए त जीं शिचालो थिउ, तीं किउ। ए झुठी बोक आज तकर बि यहूदी मेह्‍णु के बुछ चलो असी।

यीशु निछिटि निआंग

¹⁶ त से ग्याराह चेले गलील राज्ये तेस फाट पुठ गे, जेठि घेण जे यीशु तेन्हि जे बोलो थिउ।

¹⁷ जपल तेन्हि तसे दर्शण भुओ, त तेन्हि तसे खुर बिन कइ अराधना की। पर केसे केसे शक बि भुआ।

¹⁸ यीशु तेन्के भेएड़ एई कइ बोलु, “स्वर्गे त धरती सोब हक मेन्धे दुतो असे।

¹⁹ तोउं त तुस घिए, सोब जाति मेह्‍णु चेला बणाए, त तेन्हि बोउए, कोईये त शुची आत्माई नओएं बेलि पाणि अन्तर चुसीण दिए।

²⁰ होर जे जे निआंग मेईं तुन्धे दुतो असी, तेन्हि सोब मनण जे तेन्हि शिचालिण दिए। शुणे, अउं मतोके मुकुण तकर तुसी जोई साते असा।”