मत्ती 27 - Walangi

राज्यपाल पिलातुसे अगर यीशु पेशी

¹ पथवारी ईं मुख्य पुजारे त टजे स्याणी यीशु मारणे ब्योरा कइ छड़ा।

² तोउं तेन्हि से बन्हा त घिन कइ राज्यपाल पिलातुसे धे दी छड़ा।

यहूदा इस्कारियती मरुण

³ पता, जपल तेस टोवाणे बाड़ा यहूदे हेरु कि यीशु मारणे ब्योरा भोई गो असा त से पछताण लगा। तेन तिह चन्नी मेलकी मुख्य पुजारे त टजे स्याणी केईं वापस अण्हे।

⁴ त बोलु, “मेईं यक नरदोष मेह्‍णु टोवाई कइ पाप किओ असा।” तेन्हि बोलु, “असी की? तुईएं जाण।”

⁵ तोउं से तेन्हि मेलकी देहेर अन्तर फटाई कइ नश गा, त गादौड़ दी कइ मर गा।

⁶ पर मुख्य पुजारे से मेलकी चुण कइ बोलु, “ए रुपेई देहरे भण्डार अन्तर रखण ठीक नेईं, किस कि ए केसे लहुए कीमत भो।”

⁷ तोउं तेन्हि बोक विचार कर कइ तेन्हि मेलकी बइ परदेशी मेह्‍णु पथण जे यक कुम्हार केआं जिम मुले नी।

⁸ इस बझई जोई तेस जे आज तकर “लहुए जिम” बोते।

⁹ इसे बेलि से भविष्य वाणि पूरी भुई, जे यिर्मयाह भविष्य वक्ते बोलो थी। तेन बोलो थिउ कि “तोउं तेन्हि से तिह मेलकी, जे इस्राएले कुछ मेह्‍णु तसे मुल किओ थी, नी छड़े।

¹⁰ तोउं जीं प्रभु मोउं जे निआंग दुतो थी से कुम्हारे बगे मुल दी छउ।”

पिलातुस यीशु पूछताछ करण

¹¹ तोउं जपल यीशु राज्यपाल पिलातुसे सामणि पेश भुआ त पिलातुसे तेस जे बोलु, “तु कि यहूदी मेह्‍णु के राजा भो ना?” यीशु तेस जे बोलु, “तु अपफ बोलुण लगो असा।”

¹² पर जपल मुख्य पुजारे त टजे स्याणे तेस पुठ दोष लाण लगे त तेन कोई जवाब न दिता।

¹³ त पिलातुस तेस जे बोलुण लगा, “तोउ न शुणतु ना, ए तोउ पुठ कत दोष लाण लगो असे?”

¹⁴ पर तेन तसे यक बि बोकी के जवाब न दिता। त राजा सुआ हैरान भोई गा।

यीशु मारणे सज्जा मेण

¹⁵ तठि ईं यक रिवाज राज्यपाले बणो थिआ कि त्योहारे रोज मेह्‍णु के मर्जी मुताविक केस यक कैदी अजाद कतेथ।

¹⁶ तेस टेम तेन्के कैद अन्तर बरअब्बा नओएं यक खतरनाक कैदी थिआ।

¹⁷ त जपल मेह्‍णु तठि किठिए त पिलातुसे तेन्हि जे बोलु, “तुस कैद केआं केस छुड़ाण चहन्ते? ‘बरअब्बा’ या ‘यीशु’ जेस जे ‘मसीह’ बोते?”

¹⁸ किस कि पिलातुस जाणताथ कि यहूदी नेती यीशु हेर जड़ कइ टातो थिआ।

¹⁹ इस केआं अलावा, जपल से न्याये गद्दी पुठ बिशा, त तसे जुएली तेस जे ई बोलुण जे अपु नौखर लंघा कि, “तुस तेस धर्मी मेह्‍णु मामले अन्तर कुछ न बोले, किस कि मोउं आज सुपने अन्तर तसे बझई जोई सुआ दुख मेओ असा।”

²⁰ पर मुख्य पुजारे त टजे स्याणे किठिए मेह्‍णु बेहकाए कि से बरअब्बा अजाद करण त यीशु मारण जे मांग करे।

²¹ राज्यपाले तेन्हि केआं दुबारी पुछु, “इन्हि दुहि बिचा तुस केस चहन्ते कि मोउं तुसी जे छड़ देण?” तेन्हि बोलु, “बरअब्बा।”

²² पिलातुसे तेन्हि केआं पुछु, “तोउं जेस जे ‘मसीह’ बोते, एस ‘यीशु’ की करुण?” सोबी बोलु, “एस क्रूस पुठ ढना!”

²³ पिलातुसे बोलु, “किस, एन की गलती किओ असी?” पर से हउ बि जोरी जोरी बोलुण लगे, “एस क्रूस पुठ ढना।”

²⁴ त जपल पिलातुसे हेरु कि कुछ नेईं बणुण लगो, होर पुठे केआं हल्ला बधण लगो असा त तेन पुओणि टातु त हुसुड़े सामणि अपु हथ धोई कइ बोलु, “एस धर्मी मेह्‍णु लहु जुए में कोई वास्ता नेईं। अउं नरदोष असा; तुसे ईं जाणे तुस की कते।”

²⁵ सोबी जवाब दुतु, “एसे लहु असी पुठ त हें गभुर पुठ भो लौतु!”

²⁶ तोउं तेन बरअब्बा छड़ दिता। होर यीशु चाबुके बइ मडाई कइ क्रूस पुठ ढनाण जे अपु सपाही के हवाले कइ छड़ा।

सपाही यीशु बेज्जती करीण

²⁷ तोउं पिलातुसे सपाही यीशु राजवाड़ी अन्तर नीआ त पूरी पलटन तसे बियेर बइ किठि गई।

²⁸ तोउं तेन्हि तसे झिणे खोल कइ तेस लाल रंगे चोगा डबा,

²⁹ त कंटि के मुकुट बड़ाई कइ तसे मगिर पुठ ला। तोउं देहणे हथ अन्तर लठि टोवाई कइ तसे अगर बिश गे, होर तसे ईं बोल कइ फूल बणाण लगे कि “ए यहूदी मेह्‍णु के राजीया, तें जइ भो।”

³⁰ तोउं तेस पुठ थुकु; त सेईंए लठि टाइ कइ तसे मगिर पुठ देण लगे।

³¹ जपल से तसे मखोल बड़ाई बिशे, तोउं तेन्हि तसे चोगा खोला त दुबारी तसे झिणे डबाए, तोउं क्रूस पुठ ढनाण जे घिन गे।

यीशु क्रूस पुठ ढनाण

³² बाहर घेन्त पेंत पिलातुसे सपाही शमौन नओएं कुरेन शेहरे यक मेह्‍णु मेईंया। तेन्हि से टाता त तसे पिठ पुठ जब्बरदस्ती से थम छड़ा, जेस पुठ यीशु ढनाण थिआ।

³³ त जपल से गुलगुता नओएं जगाई पुजे जेस जे “खोपड़ी के जगाह” बि बोते त,

³⁴ तेन्हि पितकाड़ु मिओ अराख यीशु धे पीण जे दिता, पर तेन चख कइ ना कइ छड़ा।

³⁵ तोउं तेन्हि तसे हथि खुरी जुए मिएखि डूबाई कइ से क्रूस पुठ ढनाई छड़ा त तसे झिणे अपफ बुछ बांटण जे लखिर छइ।

³⁶ तोउं से तठि बिशे त तसे पेहरा देण लगे।

³⁷ त तसे दोष यक पट्टि पुठ लिख कइ मगिरि पुठे क्रूस पुठ लाई छड़ा, जेस पुठ लिखो थिउ कि “ए यहूदी मेह्‍णु के राजा, यीशु भो”।

³⁸ तोउं तेस जुए साते दुई डाकु बि क्रूस पुठ ढनाई छड़े, यक तसे देहणा कना त होरा बउंआ कना।

³⁹ त एन्ते घेन्ते सोब जेईं अपु अपु मगिर हिलाई कइ तसे बेज्जती कतेथ।

⁴⁰ से ईं बोतेथ, “देहेर ढाणे बाड़िआ त टाई रोज अन्तर दुबारी बणाणे बाड़िआ! अपु अपफ त बचा! अगर सच्चे तु परमेश्वरे कुआ भो त क्रूस पुठा भीं आई।”

⁴¹ तिहांणि मुख्य पुजारे, धर्मशास्त्री त टजे स्याणे सोब तसे मखोल बड़ाई कइ बोलु,

⁴² “एनि होरे बचाए, पर अपफ न बचाई बटता। ए ‘इस्राएले राजा’ भो ना? एस अभेईं क्रूस पुठा भीं एण दिए त अस विश्वास कते।

⁴³ एन परमेश्वर पुठ विश्वास किओ असा। त अगर परमेश्वर एस चहन्ता त से एस जरूर छुड़कान्ता, किस कि एन बोलो थिउ कि ‘अउं परमेश्वरे कुआ भो।’”

⁴⁴ तिहांणि से डाकु बि, जे तेस जोई साते क्रूस पुठ ढनाओ थिए, तेन्हि बि तसे बेज्जती की।

यीशु मरुण

⁴⁵ तिएस दिसाई बाराह बज केआं टाई बज तकर तेस देश अन्तर अन्हारु भोई गोउ।

⁴⁶ टाई बज टेम यीशु जोरी हक दी कइ बोलु, “एली एली लमा शबक्तनी?” मतलब “ए में परमेश्वरा, ए में परमेश्वरा! तेईं अउं किस छड़ दिता?”

⁴⁷ जे तठि खड़ खड़ बिशो थिए, कत जेईं ईं शुण कइ बोलु, “ए त एलिय्याह भविष्य वक्ता जे हक देण लगो असा।”

⁴⁸ तेन्हि अन्तरा यक जेईं झठ दौड़ा त स्पंज अण्ह कइ सिरके अन्तर डूबा त लम्मी लठि पुठ रख कइ तेस चुशाण लगा।

⁴⁹ होरु बोलु, “इठि बिशे, हेरते कि एलिय्याह एस बचाण जे एन्ता कि ना एन्ता।”

⁵⁰ तोउं यीशु फिर जोरी हक दिती त तसे शाह निस गे।

⁵¹ त शुणे, देहरे चादुर पुठे केआं बुन्ह तकर चीरी कइ दुई टुकुड़ भोई गे, भुंजल गा त फाट फूट गे।

⁵² कब्र खुल गई त सुआ शुचे मेह्‍णु जी गे।

⁵³ यीशु दुबारी जीण केआं पता से कब्र अन्तरा निस कइ शुचा शेहर यरुशलेम जे गे त सुआ जेईं से काए।

⁵⁴ अब से सुबेदार त तसे सपाही जे यीशु पेहरा देण लगो थिए, भुंजल त होरे घटना हेर कइ डर गे त बोलु, “सच्चे, ए परमेश्वरे कुआ थिआ!”

⁵⁵ तठि सुआ जिल्हाणु बि थी, जे गलीले राज्य केआं यीशु पतोती सेवा कती अओ थी। से दूर केआं सोब हेरण लगो थी।

⁵⁶ तेन्हि अन्तर मगदला ग्रांए मरियम थी। याकूब त योसेसे ई मरियम थी, होर जबदी जुएली थी, जे याकूब त यूसुफे ई भो।

यीशु पथण

⁵⁷ जपल ब्यादि भुई त अरिमतिया ग्रांए यूसुफ नओएं यक अमीर मेह्‍णु आ। से बि यीशु चेली बिचा यक थिआ।

⁵⁸ से पिलातुस केईं गा त यीशु लाश मगी। त पिलातुसे लाश देणे बोल छउ।

⁵⁹ तोउं यूसुफे लाश नी कइ यक हच्छे कपड़े अन्तर लपेटी।

⁶⁰ त से यक नोई ईं खनो कुड अन्तर छड़ी, जे तेन फाट अन्तर अपफ जे बड़ो थी। तोउं कुडे मुंह पुठ यक बोडा पठ दी कइ घेई गा।

⁶¹ मगदला ग्रांए मरियम त दोकी मरियम जे याकूबे त यूहन्ने ई थी, तठि कुडे सामणि बिश कइ हेरण लगो थी।

सपाही यीशु कुड पुठ पेहरा देण

⁶² दोके रोज, मतलब भक्ति करणे रोज मुख्य पुजारे त फरीसी पिलातुस केईं एई कइ बोलु,

⁶³ “राज्यपाल जी, असी याद असु कि से भरमाणे बाड़ा यीशु जपल जीन्ता थिआ, तेन बोलो थिउ, ‘अउं टेके रोजे जी घेन्ता।’

⁶⁴ त टाई रोज तकर तेस कुडे पेहरा देण जे निआंग दिए। ईं न भोल कि तसे चेले एई कइ लाश चोरियेल, होर मेह्‍णु जे झूठ बोलियेल कि ‘हेरे! से मरो तेन्हि अन्तरा दुबारी जी गा।’ तोउं ई धोखा पेहलकण तेस केआं बि सुआ बुरा भुन्ता।”

⁶⁵ पिलातुसे तेन्हि जे बोलु, “कोई नेईं! तुसी केईं पेहरेदार असे। घिए, त पेहरेदारी करे।”

⁶⁶ तोउं तेन्हि पेहरेदार जोई नीए, त पठ पुठ मुहर लाई कइ तसे पेहरेदारी करण लगे।