मत्ती 25 - Walangiदस कुई के कथा 1 तोउं यीशु बोलु, “स्वर्गे राज्य, यक ब्याहे तेन्हि दस कुई के ईं भुन्ता, जे अपु दीये जाई कइ नोउए लाड़े जोई मीण जे घेन्ति। 2 तेन्हि अन्तर पन्ज थी मुर्ख त होरे पन्ज थी समझदार। 3 मुर्खी तेन्हि घेन्ते घेन्ते अपु दीये त नीए पर तेल न नीआ। 4 पर समझदार तेन्हि अपु दीये नीए, होर बोतल अन्तर तेल बि नीआ। 5 जपल नोउए लाड़े एण चेरे भु, तेन्हि सोबी उंघ एण लगी त से उंघ गई। 6 तोउं बुछ रात हल्ला भुआ: ‘हेरे, हेरे! नोउआं लाड़ा अओ असा! तेस जोई मीण जे हंटे।’ 7 तोउं से सोब कुई खड़ भोई कइ अपु अपु दीया जुढ़ेरण लगी। 8 मुर्खी तेन्हि समझदार तेन्हि जे बोलु, ‘थोड़ा भइ तेल हेन्धे बि दिए, हें दीये हुशुण लगो असे।’ 9 पर समझदार तेन्हि जवाब दुतु, ‘न बारा, असी केईं थोड़ा ईं असा, तुस तेल बेचणे बाड़ी केईं घिए त मुले अण्हे।’ 10 जपल से तेल नेण जे गई त नोउआं लाड़ा एई गा। त जे कुई तेयार बिशो थी, से तेस जोई ब्याह बाड़ी के गी घेई गई त दुआर बन्न कइ छउ। 11 तढ़िया पता होरी से मुर्ख कुई बि एई गई त बोती, ‘भाई साहबा, भाई साहबा! असी जे दुआर खोल!’ 12 तेन जवाब दुतु, ‘अउं तुसी जे बोता कि अउं तुसी न जाणता।’ 13 तोउं त चौकाने बिशे, किस कि तुस न त मनखे कोईये दुबारी एणे तेस घड़ी जाणते, होर ना तेस रोज।” बटुए कथा लूका 19:11-27 14 तोउं यीशु बोलु, “किस कि स्वर्गे राज्य तेस मेह्णु ईं असा, जेन परदेश घेण केआं पेहले अपु नौखर भिए त अपु धन संपत्ति जिम्मा तेन्के धे दिता। 15 तेन तेन्के काबिलियते मुताविक यक जेईं धे सुन्ने सिक्के भरो पंज बटुए, दोके धे दुई बटुए त टेके धे यक बटुआ दिते त परदेश घेई गा। 16 तोउं, जेस पन्ज बटुआ मेओ थिए, तेन तिखेईंए घेई कइ लेण देण किउ, त सुन्ने सिक्के बेलि पन्ज होरे बटुए भरे। 17 तोउं जेसे धे दुई बटुए दुतो थिए तेन बि लेण देण कर कइ दुई होरे बटुए भरे। 18 पर जेस यक बटुआ मेओ थिआ, तेन घेई कइ खोपर खडा त अपु मालिके धन तेस अन्तर नियोकइ छड़ा।” 19 “सुआ टेमी बाद, तेन्के मालिक वापिस आ त तेन्हि केआं हिसाब कताब नेण लगा। 20 जेसे धे पन्ज बटुए दुतो थिए, तेन पन्ज होरे बटुए अण्ह कइ बोलु, ‘ए मालिका! तुसी मेन्धे सुन्ने सिक्की के पन्ज बटुए दुतो थिए, हेरे, तेन्के बेलि मेईं पन्ज होर बटुए भर छओ असे।’ 21 तसे मालिके तेस जे बोलु, ‘शबाश! ए खरे त यकीन लेएक नौखरा, तु थोड़े अन्तर बि यकीन लेएक रिहा, त अउं तेन्धे सुआ होरे चीजी के जिम्मेबारी देन्ता। गा त अपु मालिक जुए खुशी मनाण दे।’ 22 होर, जेसे धे दुई बटुए दुतो थिए, तेन बि एई कइ बोलु, ‘ए मालिका! तुसी मेन्धे जे दुई बटुए दुतो थिए, हेरे! मेईं तेन्के बेलि दुई होरे बटुए भरो असे।’ 23 तसे मालिके तेस जे बोलु, ‘शबाश! ए खरे त यकीन लेएक नौखरा, तु थोड़े अन्तर बि यकीन लेएक रिहा, त अउं तेन्धे सुआ होरे चीजी के जिम्मेबारी देन्ता। गा त अपु मालिक जुए खुशी मनाण दे।’ 24 पता, जेसे धे यक बटुआ दुतो थिआ से आ त बोलुण लगा, ‘ए मालिका! अउं तोउ जाणता कि तु कत सक्त मेह्णु असा। तु जेठि न बांता तठि लुणता, होर जेठि बिएजु ना छिंगान्ता, तठि बेह्ढ़ता। 25 अउं तोउ हेर डरो थिआ त घेई कइ तें सुन्ने सिक्के मेईं खोपर खन कइ पथि छड़े। हेरे! जे तें भो, से इठि असु।’ 26 तसे मालिके तेस जे जवाब दिता, ‘ए दुष्ट त सुसत नौखरा! तु ई सोब जाणताथ कि अउं जेठि न बांता तठि लुणता, होर जेठि बिएजु न छिंगो भुन्तु, तठि बेह्ढ़ता। 27 तोउं त, तोउ में सुन्ने सिक्के व्यापारी कें धे देण चहिए थिए। तोउं कम से कम अउं एई कइ अपु सिक्के ब्याजे समेत त नेन्ताथ।’” 28 “तोउं तेन मालिके निआंग दिती ‘अभेईं एस केआं तेस बटुए छुड़कइ कइ नीए, त जेस केईं दस बटुए असे तसे धे दी छड़े। 29 किस कि जेस केसे केईं असु, तसे धे होरु बि दीइन्तु, ताकि तेस केईं सुआ भोई घियेल। पर जेस केईं नेईं, तेस केआं जे कुछ बि असु से बि निईन्तु। 30 पर इस नकम्मे नौखर नी कइ अन्हारे फटाए, जेठि रोलुण शींकुण त मगिर चठ देण भुन्ति’” परमेश्वर सोब मेह्णु के पंच 31 तोउं यीशु बोलु, “जपल मनखे कुआ यक राजे ईं अपु महिमा जोई त स्वर्गेदूती साते एईयाल, त से महिमा सिंहासन पुठ बिश्ता। 32 तोउं सोब जाति मेह्णु तसे सामणि कठे करिन्ते। तोउं जीं पुहाल ढडुड़ केआं बकीर केहेरता, तिहांणि से तेन्हि यक होरी केआं केहेरता। 33 से धर्मी मेह्णु, जे कि ढडुड़ के ईं असे, अपु देहणा कना त दुष्ट तेन्हि, जे बकीर के ईं असे, अपु बउंआ कना रखता। 34 तोउं राजा अपु देहणा कनारी तेन्हि जे बोता, ‘ए में बोउ परमेश्वरे केईआं अशुश मेओ मेह्णुओ! एईए, ओस राज्य हेस्सेदार बणे, जे सृष्टि बणुण केआं पेहलाई तुसी जे तेयार किओ असा। 35 किस कि अउं ढुका थिआ, तुसी मोउं रौठि खिलेई। अउं टिशो थिआ, तुसी मोउं पुओणि पिआउ। अउं परदेशी थिआ, तुसी अउं अपु गी बिशाणा। 36 अउं नगा थिआ, तुसी मोउं झिणे डबे। अउं बीमार थिआ, तुसी में देखभाल की। अउं जेहेल अन्तर थिआ, तुस मोउं जोई मीण जे आए।’ 37 त धर्मी मेह्णु तेस जे जवाब दिता, ‘ए प्रभु! असी कपल तु ढुका काआ त तोउ खिलाऊ? या टिशो काआ त पुओणि पिआउ? 38 असी कपल तु परदेशी काआ त अपु गी बिशाणा? या नगा काआ त झिणे डबे? 39 होर असी कपल तु बीमार या जेहेल अन्तर काआ त तोउ जोई मीण जे आए?’ 40 तोउं राजा तेन्हि जे जवाब देन्ता, ‘अउं तुसी जे बोता कि जे कुछ मदत तुसी इन्हि गरीबी के की, समझे कि से में की।’ 41 तोउं से बउंआ कनारी तेन्हि जे बोता, ‘ए शराप लगो मेह्णुओ! में सामणि केआं ओस ना हुशणे बाड़ी आग अन्तर घेई घिए, जे शैतान त तसे दूती जे तेयार किओ असी। 42 किस कि अउं ढुका थिआ, त तुसी मेन्धे खाण जे कुछ न दुतु। अउं टिशो थिआ, होर तुसी मेन्धे पीण जे पुओणि न दुतु। 43 अउं परदेशी थिआ, त तुसी अपु गी न बिशाणा। अउं नगा थिआ, त तुसी मोउं झिणे न डबे। अउं बीमार त जेहेल अन्तर थिआ, होर तुस मोउं जोई मीण जे ना आए।’ 44 तोउं से जवाब देन्ते, ‘ए प्रभु! असी तु कपल ढुका, टिशो, परदेशी, नगा, बीमार त जेहेल अन्तर काआ त तें सेवा न की?’ 45 तोउं से तेन्हि जे बोता, ‘अउं तुसी जे बोता, किस कि तुसी इन्हि गरीबी के कुछ मदत ना की, त समझे कि तुसी में बि ना की।’ 46 त अन्हि सोबी अमर सज्जाई लिए नर्क घेण एन्तु, पर धर्मी मेह्णु अमर जीवन जे स्वर्ग घेन्ते।” |
© 2023 (Active) Wycliffe Bible Translators, Inc. All rights reserved.
Wycliffe Bible Translators, Inc.